Ɛzoanvolɛma Gyima 23:1-35
23 Pɔɔlo nleanle Sanhedelin ne koonwu na ɔhanle kɛ: “Mediema, meva adwenle* mɔɔ anu te kpalɛ+ la a mebɔ me ɛbɛla wɔ Nyamenle anyunlu too a yeradwu ɛnɛ a.”
2 Mɔɔ ɔhanle ɛhye la ɛsɔfo kpanyinli Ananayase zele bɛdabɛ mɔɔ bɛgyigyi ɔ nwo ɛkɛ ne la kɛ bɛbɔ ɔ nloa ne azo.
3 Pɔɔlo zele ye kɛ: “Nyamenle babɔ wɔ, wɔmɔ nabalabanli.* Ɛde ɛke kɛ ɛbua me ndɛne kɛ mɔɔ Mɛla ne kile la noko ɛto Mɛla ne wɔaha kɛ bɛbɔ me ɔ?”
4 Bɛdabɛ mɔɔ bɛgyigyi ɛkɛ ne la hanle kɛ: “Ɛyɛ Nyamenle ɛsɔfo kpanyinli ne aholoba ɔ?”
5 Na Pɔɔlo zele kɛ: “Mediema, menze kɛ ɔle ɛsɔfo kpanyinli ɔluakɛ bɛhɛlɛ kɛ, ‘Mmatendɛ ɛtia kpanyinli mɔɔ nea wɔ menli ne la.’”+
6 Na mɔɔ Pɔɔlo nwunle kɛ bɛdabɛ mɔɔ bɛyia ɛkɛ ne la foa ko le Sadusiima na foa ko noko le Falasiima la, ɔdeanle nu wɔ Sanhedelin ne anu kɛ: “Mediema, mele Falasiinli,+ Falasiima ara. Kɛmɔ medie medi kɛ bɛbadwazo mowuamra la ati a bɛlɛbua me ndɛne a.”
7 Kɛmɔ ɔhanle ɛhye la ati, kpolerazulɛ kpole radɔle Falasiima nee Sadusiima ne avinli, na ayiama ne anu hyɛle nwiɔ.
8 Ɔluakɛ Sadusiima ka kɛ ewudwazo anzɛɛ anwumabɔvolɛ anzɛɛ sunsum ɛnle ɛkɛ, noko Falasiima die ɛhye mɔ amuala to nu.*+
9 Ɔti basabasayɛlɛ kpole bie rale, na mɛla kilehilevolɛma mɔɔ bɛboka Falasiima ne anwo la dwazole na bɛbɔle ɔ bo bɛzule kpolera kyengye kɛ: “Yɛnnwu nvonleɛ biala wɔ nrenyia ɛhye anwo, noko saa sunsum anzɛɛ anwumabɔvolɛ bie dendɛle hilele ye a+—.”
10 Mɔɔ kpolerazulɛ ne yɛle kpole la, ɛzulolɛ hanle sogyama kpanyinli ne kɛ bie a bɛbahu Pɔɔlo, yemɔti ɔhanle kɛ sogyama ne ɛdwu ɛhɔ bɛ nwo ɛkɛ ne na bɛhɔye ye wɔ menli ne avinli bɛva ye bɛhɔ ɛleka mɔɔ sogyama ne de la.
11 Noko zɔhane nɔe ne, Awulae ragyinlanle ɔ nwo ɛkɛ na ɔhanle kɛ: “Nyia akɛnrasesebɛ!+ Na kɛ mɔɔ wɔli me nwo daselɛ bɔkɔɔ wɔ Gyɛlusalɛm la, zɔhane ala a ɔwɔ kɛ ɛdi me nwo daselɛ wɔ Wulomu a.”+
12 Mɔɔ aleɛ hyenle la, Dwuuma ne bɔle adwenle ɛtane na bɛlile amonle kɛ bɛnrɛli yɛɛ bɛnrɛnlo kɔkpula kɛ bɛbahu Pɔɔlo.
13 Mrenyia mɔɔ bo 40 la a bɔle adwenle ɛtane ɛhye na bɛhanle ndane ne a.
14 Mrenyia ɛhye mɔ hɔle ɛsɔfo mgbanyinli ne nee mgbanyima ne mɔ ɛkɛ hɔhanle kɛ: “Yɛli amonle* bɔkɔɔ kɛ yɛnrɛli debie biala kɔkpula kɛ yɛbahu Pɔɔlo.
15 Ɔti ɔwɔ kɛ bɛ nee Sanhedelin ne kɔbɔ sogyama kpanyinli ne amaneɛ kɛ ɔmaa ɔdwu aze ɔrɛla bɛ nwo ɛkɛ ne kɛ asɛɛ bɛbizebiza ye edwɛkɛ ne anu kpalɛ la. Noko too mɔɔ ɔkadwu ɛke la, ɛnee yɛnwu adenle mɔɔ yɛbava zo yɛahu ye la.”
16 Noko Pɔɔlo awozoa nrenyia dele adwenle ne mɔɔ bɛlɛfa la, na ɔhɔle ɛleka mɔɔ sogyama ne de la ɔhɔbɔle Pɔɔlo amaneɛ.
17 Akee Pɔɔlo vɛlɛle sogya mgbanyima ne mɔ ko na ɔhanle kɛ: “Fa kpavolɛ ɛhye kɔ sogyama kpanyinli ne ɛkɛ, ɔluakɛ ɔlɛ edwɛkɛ bie ɔka ɔkile ye.”
18 Ɔti ɔvale ye ɔrale na ɔ nee ye hɔle sogyama kpanyinli ne ɛkɛ na ɔhanle kɛ: “Pilizanli Pɔɔlo vɛlɛle me na ɔzele me kɛ menva kpavolɛ ɛhye membɛlɛ wɔ ɔluakɛ ɔlɛ edwɛkɛ bie mɔɔ ɔka yeahile wɔ a.”
19 Sogyama kpanyinli ne zɔle ɔ sa hɔle ahane na ɔbizale ye kɛ: “Duzu a ɛlɛ ye ɛka ɛkile me a?”
20 Ɔhanle kɛ: “Dwuuma ne ɛyɛ adwenle ko kɛ bɛbazɛlɛ wɔ kɛ ɛva Pɔɔlo ɛrɛla Sanhedelin ne ɛkɛ ɛhyema kɛ asɛɛ bɛkpondɛ kɛ bɛnwu ye edwɛkɛ ne anu kpalɛ la.+
21 Noko mmamaa bɛdi wɔ adwenle, ɔluakɛ mrenyia mɔɔ bo 40 la ɛhɔzia adenle nu na bɛli amonle* kɛ bɛnrɛli anzɛɛ bɛnrɛnlo kɔkpula kɛ bɛbahu ye;+ na kɛkala bɛlɛkendɛ kɛ ɛbamaa nwolɛ adenle.”
22 Ɔti sogyama kpanyinli ne maanle kpavolɛ ne hɔle, noko ɔzele ye kɛ: “Mmaka ɛkile awie biala kɛ wɔha ɛhye wɔhile me.”
23 Na ɔvɛlɛle sogya mgbanyima ne mɔ nwiɔ na ɔhanle kɛ: “Bɛva sogyama 200 nee sogyama mɔɔ tɛnla mgbɔnwɔ zo la 70 yɛɛ sogyama mɔɔ to atwɛ la 200, bɛziezie bɛ nwo bɛhɔ Sizalia ɛnɛ nɔsolɛ dɔne ngɔnla.*
24 Eza bɛva mgbɔnwɔ mɔɔ Pɔɔlo badɛnla zolɛ la na bɛva ye gyɛlɛɛnye bɛhɔmaa amɛnlado Filese.”
25 Na ɔhɛlɛle kɛlata mɔɔ nuhua edwɛkɛ a le ɛhye la:
26 “Medame Kolɔdeɛse Lesease a melɛkɛlɛ kɛlata ɛhye mearɛlɛ Anyunlunyianli, Amɛnlado Filese a: Mebiza wɔ ahye!
27 Dwuuma ne hyele nrenyia ɛhye na anrɛɛ bɛku ye, noko me nee me sogyama ne hɔle ɛkɛ ne ndɛndɛ hɔliele ye,+ ɔluakɛ mendele kɛ ɔle Wulomunli.+
28 Na kɛmɔ ɛnee mekulo kɛ menwu deɛmɔti bɛdo ye ɛzonle la ati, menvale ye mengɔle bɛ Sanhedelin ne anyunlu.+
29 Menwunle kɛ bɛ Mɛla ne anwo edwɛkɛ bie mɔ a ɛnee bɛlɛbizebiza ye a,+ noko meannwu debie biala mɔɔ maa ɔfɛta ewule anzɛɛ efiadedolɛ a.
30 Noko kɛmɔ mendele kɛ bɛva nrenyia ɛhye anwo adwenle kɛ bɛku ye la ati,+ melɛfa ye mearɛlɛ wɔ ndɛndɛ amaa menli mɔɔ dole ye ɛzonle ne la araha bɛ edwɛkɛ ne wɔ ɛ nyunlu.”
31 Ɔti sogyama ɛhye mɔ vale Pɔɔlo+ kɛ mɔɔ bɛhilele bɛ la, na bɛ nee ye hɔle Antepatelese nɔe ne.
32 Aleɛ hyenle la, bɛmaanle sogyama mɔɔ tɛnla mgbɔnwɔ zo la nee ye doale zo, na sogyama mɔɔ hale la ziale hɔle ɛleka mɔɔ bɛde la.
33 Sogyama ne mɔɔ tɛnla mgbɔnwɔ zo la dwule Sizalia na bɛvale kɛlata ne bɛhɔmaanle amɛnlado ne na bɛvale Pɔɔlo noko bɛwulale ɔ sa nu.
34 Ɔti ɔgengale kɛlata ne na ɔbizale maanzinli mɔɔ ɔvi nu la, na ɔnwunle kɛ ɔvi Selesea.+
35 Ɔhanle kɛ: “Saa menli mɔɔ ɛdo wɔ ɛzonle ne la ba a mebadie wɔ edwɛkɛ ne kpalɛ.”+ Na ɔzele bɛ kɛ bɛva ye bɛhɔdo efiade wɔ Hɛlɔdo belemgbunli sua nu ɛkɛ.
Ɔbodwɛkɛ
^ Anzɛɛ “tiboa.”
^ Anzɛɛ “bane mɔɔ bɛha nwolɛ fufule.”
^ Anzɛɛ “ka ɛhye mɔ amuala wɔ bagua nu.”
^ Anzɛɛ “Yɛha ndane.”
^ Anzɛɛ “bɛha ndane.”
^ Giliki aneɛ nu, kɛyɛ nɔsolɛ nu dɔnehwele nsa ne azo.
