Ɛzoanvolɛma Gyima 21:1-40
21 Mɔɔ akee yɛbɔle mɔdenle yɛvile bɛ nwo ɛkɛ ne na yɛdɔle nyevile ne azo la, yɛhɔle yɛ nyunlu fɔɔnwo yɛhɔdwule Kɔɔso, ye alehyenlɛ nu yɛhɔle Wulodise, na yɛvile ɛkɛ ne yɛhɔle Patala.
2 Mɔɔ yɛnwunle kɛ meli bie ɛlɛpɛ nu ahɔ Fonehyea la, yɛhɔvole bie yɛhɔle.
3 Na mɔɔ yɛradwule ɛleka bie mɔɔ ɛnee yɛ nye dua Saepelɛse bɔra ne wɔ yɛ sa bɛne zo la, yɛpɛle nu yɛhɔle Selea na yɛhɔgyinlanle Taya, ɛleka mɔɔ ɛnee bɛbaye meli ne anu ninyɛne ne la.
4 Yɛhɔkpondɛle ɛdoavolɛma ne, na mɔɔ yɛnwunle bɛ la yɛdɛnlanle ɛkɛ ne kenle nsuu. Noko bɛluale sunsum ne azo bɛhanle ye fane dɔɔnwo bɛhilele Pɔɔlo kɛ ɔmmakɔ Gyɛlusalɛm.+
5 Ɔti mɔɔ yɛlile yɛ mekɛ ne yɛwiele wɔ ɛkɛ ne la, yɛvile ɛkɛ na yɛdoale yɛ adendulɛ ne azo, noko bɛ muala mɔɔ mraalɛ nee ngakula boka nwo la razɔhonle yɛ too yɛvile sua ne azo. Na yɛhotole nyevile ne anloa yɛyɛle asɔne
6 na yɛ nee bɛ lile nrɛlaleɛ. Akee yɛhɔvole meli ne anu, na bɛziale bɛhɔle bɛ azua nu.
7 Akee yɛvile Taya na yɛhɔle Tɔlɛmeeyese, yɛhɔbizale mediema ne mɔ ahye na yɛlile kenle ko wɔ bɛ nwo ɛkɛ.
8 Aleɛ hyenle la, yɛvile ɛkɛ ne yɛhɔle Sizalia, na yɛhɔle edwɛkpakavolɛ Felepe mɔɔ ɛnee boka menli nsuu ne anwo la+ sua nu, na yɛdɛnlanle ɔ nwo ɛkɛ.
9 Ɛnee nrenyia ɛhye lɛ mralɛ mraalɛ nna mɔɔ ɛtɛkɔle agyalɛ* na bɛka ngapezo a.+
10 Noko mɔɔ yɛdɛnlanle ɛkɛ ne mekɛ ekyi la, ngapezonli bie mɔɔ bɛfɛlɛ ye Agabɛse+ la vi Dwudiya rale.
11 Na ɔrale yɛ nwo ɛkɛ ne na ɔvale Pɔɔlo bɛlɛte ne ɔkyekyele ɔdaye mumua ne ɔ gyakɛ nee ɔ sa na ɔhanle kɛ: “Kɛ sunsum nwuanzanwuanza ne se la ɛne, ‘Nrenyia ne mɔɔ lɛ bɛlɛte ɛhye la, Dwuuma bakyekye ye zɛhae wɔ Gyɛlusalɛm,+ na bɛaye ye bɛawula maanle maanle ne anu amra asa anu.’”+
12 Mɔɔ yɛdele ɛhye la, yɛ nee bɛdabɛ mɔɔ bɛwɔ ɛkɛ ne la bɔle ɔ bo kpale ye kyɛlɛ kɛ ɔmmakɔ Gyɛlusalɛm.
13 Akee Pɔɔlo buale bɛ kɛ: “Duzu ati a bɛlɛsu bɛamaa me rɛle abɔ a?* Bɛnwu ye kɛ, meziezie me nwo kɛ memaa bakyekye me na eza bɛahu me wɔ Gyɛlusalɛm wɔ Awulae Gyisɛse duma ne ati.”+
14 Mɔɔ yɛnwunle kɛ yɛnrɛhola yɛnrɛmaa ɔnrɛhakyi ye adwenle la, yɛanzi ye adenle bieko* na yɛhanle kɛ: “Gyihova* ɛhulolɛdeɛ ɛyɛ ɛkɛ.”
15 Ɛhye anzi, yɛzieziele yɛ nwo yɛmaanle adendulɛ ne na yɛbɔle yɛ Gyɛlusalɛm adendulɛ ne abo.
16 Ɛdoavolɛma ne mɔɔ vi Sizalia la bie mɔ noko nee yɛ hɔle, bɛvale yɛ bɛhɔle Meneesen mɔɔ vi Saepelɛse la sua nu, ɔboka bɛdabɛ mɔɔ bɛlimoale bɛyɛle ɛdoavolɛma la anwo.
17 Mɔɔ yɛdwule Gyɛlusalɛm la, mediema ne mɔ vale anyelielɛ liele yɛ.
18 Na ye alehyenlɛ nu, Pɔɔlo nee yɛ hɔle Gyemise+ anwo ɛkɛ, na ɛnee mgbanyima ne mɔ amuala wɔ ɛkɛ.
19 Ɔbizale bɛ ahye na ɔbɔle ɔ bo ɔhanle ninyɛne mɔɔ Nyamenle luale ye ɛzonlenlɛ gyima ne azo yɛle ye wɔ maanle maanle ne mɔ anu la amuala ɔhilele bɛ.
20 Mɔɔ bɛdele ɛhye la, bɛbɔle ɔ bo bɛwulale Nyamenle anyunlunyia, noko bɛzele ye kɛ: “Adiema, wɔnwu kɛ Dwuuma apenle apenle dɔɔnwo le diedima, noko bɛ muala bɛdi Mɛla ne azo.+
21 Noko bɛde ɛ nwo edwɛkɛ kɛ ɛlɛkilehile Dwuuma mɔɔ wɔ maanle maanle ne anu la kɛ bɛmmadi Mosisi Mɛla ne azo, na ɛlɛka kɛ bɛmmapɛ bɛ mra mrenyiazo anzɛɛ bɛmmadi yɛ amaamuo ne azo.+
22 Ɛnee duzu a yɛbayɛ ye wɔ nwolɛ a? Kɛ ɔde ye biala la bɛbade kɛ wɔra.
23 Ɔti yɛ mɔɔ yɛka yɛahile wɔ la: Yɛlɛ mrenyia nna wɔ ɛke mɔɔ bɛbɔ ɛwɔkɛ a.
24 Ɛ nee bɛ ɛhɔ na bɛhɔde bɛ nwo kɛ mɔɔ amaamuo ne kile la na tua nwolɛ kakɛ ne, amaa bɛakpa bɛ ti enrinli. Akee awie biala banwu ye kɛ mɔɔ bɛlɛkeha ye wɔ ɛ nwo la ɛnle nɔhalɛ, emomu ɛbɔ ɛbɛla kpalɛ yɛɛ ɛdi Mɛla ne noko azo.+
25 Na mɔɔ fale maanle maanle ne anu amra mɔɔ bɛrayɛ diedima anwo la ɛdeɛ, yɛhɛlɛ yɛhɔmaa bɛ kɛ bɛhwe bɛ nwo bɛvi ninyɛne mɔɔ bɛva bɛbɔ afɔle bɛmaa awozonle,+ mogya,+ nane mɔɔ bɛlofo ye*+ nee adwɔmane ɛbɛla* nwo.”+
26 Aleɛ hyenle la, Pɔɔlo nee menli ne hɔle na bɛhɔdele bɛ nwo kɛ mɔɔ bɛ amaamuo ne kile la,+ na ɔhɔle ɛzonlenlɛsua ne anu kɛ ɔkahile kenle mɔɔ bɛbade bɛ nwo bɛawie na bɛava bɛ nuhua ko biala afɔlebɔdeɛ ne bɛamaa la.
27 Na mɔɔ kenle nsuu ne ɛlɛba ye awieleɛ la, Dwuuma bie mɔɔ vi Ehyea la nwunle ye wɔ ɛzonlenlɛsua ne anu, bɛlile bɛwulale menli ne amuala bɛmaanle bɛhyele ye,
28 bɛdeɛdeanle nu kɛ: “Yizilayɛma, bɛboa yɛ! Nrenyia ne mɔɔ kilehile awie biala wɔ ɛleka biala ninyɛne mɔɔ ɛmmaa bɛmbu yɛ menli ne nee Mɛla ne yɛɛ ɛleka ɛhye la ɛne. Eza yeva Gilikima yera ɛzonlenlɛsua ɛhye anu yemaa bɛgua ɛleka nwuanzanwuanza ɛhye anwo evinli.”+
29 Ɔluakɛ ɛnee bɛlimoa bɛnwu kɛ Pɔɔlo nee Tulofemɛse+ mɔɔ vi Ɛfɛsɛse la lua suakpole ne azo, na bɛdwenlenle kɛ yeva ye yera ɛzonlenlɛsua ne anu.
30 Basabasayɛlɛ zile suakpole ne azo amuala, menli ne nriandile rale na bɛhwenle Pɔɔlo bɛvile ɛzonlenlɛsua ne anu bɛvindele, na ɛkɛ ne ala bɛtotole nlenkɛ ne mɔ anu.
31 Mɔɔ ɛnee bɛlɛbɔ mɔdenle kɛ bɛku ye la, sogyama kpanyinli ne dele kɛ basabasayɛlɛ ɛzi Gyɛlusalɛm amuala;
32 na ɛkɛ ne ala ɔvale sogyama nee bɛ mgbanyima na bɛnriandile bɛhɔle bɛ nwo ɛkɛ. Mɔɔ bɛnwunle sogya kpanyinli ne nee sogyama ne la bɛgyakyile Pɔɔlo ɛbolɛ.
33 Akee sogya kpanyinli ne bikyele ɛkɛ ne na ɔmaanle bɛhyele ye bɛvale kyeenyi nwiɔ bɛguale ye;+ na ɔbizale ye sonla holɛ ko nee debie mɔɔ yeyɛ la.
34 Noko mɔɔ menli ne bie ɛlɛtea nu aha edwɛkɛ ɛhye la ɛnee bie mɔ noko ɛlɛka edwɛkɛ fofolɛ. Na kɛmɔ basabasayɛlɛ ne ammaa yeande edwɛkɛ ne kpalɛ la ati, ɔmaanle bɛvale ye bɛhɔle ɛleka mɔɔ sogyama ne de la.
35 Noko mɔɔ ɔdwule kpolike ne anwo la, ɛnee ɔwɔ kɛ sogyama ne maa ye zo ɔlua basabasa mɔɔ menli dɔɔnwo ne ɛlɛyɛ la ati,
36 ɔluakɛ menli dɔɔnwo bie lile bɛ nzi na bɛdeɛdeanle nu kɛ: “Bɛhu ye!”
37 Mɔɔ ɔka ekyii bɛfa ye bɛwolo sogyama ne ɛkɛ ne la, Pɔɔlo bizale sogya kpanyinli ne kɛ: “Mebahola me nee wɔ adendɛ ekyii ɔ?” Ɔbizale kɛ: “Ɛkola ɛka Giliki ɔ?
38 Ɛnee tɛ wɔmɔ a ɛle Yigyibitinli ne mɔɔ mekɛ bie mɔɔ ɛpɛ nu la ɔmaanle atuadelɛ rale na ɔvale menli 4,000 mɔɔ bɛtwe dadeɛ la ɔhɔle fienemgbole ne anu la ɔ?”
39 Akee Pɔɔlo hanle kɛ: “Nɔhalɛ nu, mele Dwuunli,+ mevi Taasɛse+ mɔɔ wɔ Selesea mɔɔ le suakpole mɔɔ ɛlie duma la azo. Ɔti mesɛlɛ wɔ, maa me adenle maa mendendɛ mengile menli ne.”
40 Mɔɔ ɔmaanle ye adenle la, Pɔɔlo gyinlanle kpolike ne azo maanle ɔ sa zo hilele menli ne. Mɔɔ ɛkɛ ne yɛle dii la, ɔdendɛle ɔhilele bɛ wɔ Hibulu aneɛ nu,+ na ɔhanle kɛ:
Ɔbodwɛkɛ
^ Giliki aneɛ nu, “ɛnze mrenyia.”
^ Anzɛɛ “meali nyane wɔ me ahonle nu a?”
^ Giliki aneɛ nu, “yɛyɛle koonwu.”
^ Anzɛɛ “bɛandwi ye mogya bɛangua la.”
^ Giliki, por·nei′a. Nea Edwɛkɛbohilelɛ.
