Ɛzoanvolɛma Gyima 16:1-40
16 Ɔti ɔhɔdwule Dɛbi nee Lesetela.+ Na ɛnee ɛdoavolɛ bie mɔɔ bɛfɛlɛ ye Timote+ la wɔ ɛkɛ, Dwuunli raalɛ bie mɔɔ le diedinli la ara ɔ, noko ye papa le Gilikinli,
2 na ɛnee mediema mɔɔ wɔ Lesetela nee Ayekoneɛm la ka ɔ nwo edwɛkɛ kpalɛ.
3 Pɔɔlo hulole kɛ ɔ nee Timote kɛhɔ, noko kɛmɔ Dwuuma wɔ ɛleka zɔhane mɔ la ati, ɔvale ye ɔpɛle ye mrenyiazo+ ɔluakɛ ɛnee bɛ muala bɛze kɛ ye papa le Gilikinli.
4 Mekɛ mɔɔ bɛlɛkpɔsa azuamgbole ne mɔ azo la, bɛvale mɛla mɔɔ ɛzoanvolɛma ne nee mgbanyima ne mɔ mɔɔ wɔ Gyɛlusalɛm ɛzi nwolɛ kpɔkɛ la bɛmaanle bɛ, amaa bɛali zolɛ.+
5 Ɔti asafo ne mɔ anwo hɔle zo yɛle se wɔ diedi ne anu na bɛ dodo ne hɔle ɔ nyunlu alehyenlɛ biala.
6 Eza bɛhɔvale Felegyea nee Galeehyea,+ ɔluakɛ sunsum nwuanzanwuanza ne ammaa bɛ adenle yeammaa bɛanga edwɛkɛ ne wɔ Ehyea maanzinli ne anu.
7 Mekɛ mɔɔ bɛdwule Mesea la, bɛbɔle mɔdenle kɛ bɛkɔ Baetenea+ noko Gyisɛse sunsum ne ammaa bɛ adenle.
8 Yemɔti bɛpɛle nu wɔ* Mesea bɛhɔle Tulowase.
9 Na nɔe ne Pɔɔlo nwunle ɛnyelɛzodeɛnwunlɛ bie—ɛnee Masidonea nrenyia bie gyi ɛkɛ ne na ɔlɛkpa ye kyɛlɛ kɛ: “Pɛ nu bɛla Masidonea baboa yɛ.”
10 Mɔɔ ɔnwunle ɛnyelɛzodeɛnwunlɛ ne ala la, yɛbɔle mɔdenle kɛ yɛkɔ Masidonea, yɛnwunle kɛ Nyamenle ɛvɛlɛ yɛ kɛ yɛhɔbɔ edwɛkpa ne nolo yɛhile bɛ.
11 Ɔti yɛluale nyevile zo yɛvile Tulowase na yɛdoale zo yɛhɔle Samotelase, noko aleɛ hyenle la, yɛhɔle Niapɔlese;
12 na mɔɔ yɛvile ɛkɛ ne la yɛhɔle Felepae,+ Wulomuma suakpole mɔɔ wɔ Masidonea maangyeba nu la azo. Yɛdɛnlanle suakpole ɛhye azo yɛlile mekɛ ekyi.
13 Mɔɔ ɔdwule Ɛnwomenlelielɛ kenle ne la, yɛvale anlenkɛ kpole ne anu yɛhɔle azule bie anloa, ɛleka mɔɔ ɛnee yɛdwenle kɛ menli barayia kɛ bɛyɛ asɔne la, na yɛdɛnlanle ɛkɛ na yɛdendɛle yɛhilele mraalɛ mɔɔ ɛyia ɛkɛ ne la.
14 Na ɛnee raalɛ bie mɔɔ bɛfɛlɛ ye Ledea mɔɔ vi Tayataela+ mɔɔ ɔtɔne ndanlɛ buluwu nee kɔkɔlɛ afonla na ɔsonle Nyamenle la ɛlɛtie, na Gyihova* bukele ye ahonle nu wienyi ɔmaanle ɔdiele mɔɔ Pɔɔlo ɛlɛka la kpalɛ.
15 Na mɔɔ bɛzɔnenle* ɔdaye nee ye sua nu amra la,+ ɔzɛlɛle yɛ kɛ: “Saa bɛbu me kɛ medi nɔhalɛ memaa Gyihova* a, ɛnee bɛradɛnla me sua nu.” Na ɔyɛle too ɔmaanle yɛhɔle.
16 Kenle ko bie mɔɔ yɛlɛkɔ ɛleka mɔɔ bɛyɛ asɔne la, sonvolɛ bɛlɛra bie mɔɔ sunsum ɛtane wɔ ɔ nwo na ɔka mɔɔ bazi kenle bie la+ nee yɛ yiale. Ɔdua kenle bie edwɛkɛ mɔɔ ɔka la azo ɔmaa ɔ menle mɔ nyia nvasoɛ dɔɔnwo.
17 Bɛlɛra ɛhye lile yɛ nee Pɔɔlo anzi deɛdeanle nu kɛ: “Menli ɛhye mɔ le Anwuma Anwuma Nyamenle ne+ ngɛkɛlɛ mɔɔ bɛlɛbɔ ngoanelielɛ adenle ne anwo nolo bɛahile bɛ a.”
18 Ɔyɛle ɛhye mekɛ dɔɔnwo. Akee ɔyɛle Pɔɔlo abodelɛ na ɔhakyile ɔ nye ɔzele sunsum ne kɛ: “Meka meahile wɔ wɔ Gyisɛse Kelaese duma nu kɛ ɛvi ɔ nwo tu.” Na ɔvi ɔ nwo ɔdule ɛkɛ ne ala.+
19 Mɔɔ ɔ menle mɔ nwunle kɛ anyelazo mɔɔ bɛlɛ kɛ bɛbanyia nvasoɛ la ɛbɔ bɛ la,+ bɛhyele Pɔɔlo nee Saelase na bɛhwenle bɛ bɛhɔmaanle tumivolɛma ne wɔ gua ne anu.+
20 Bɛvale bɛ bɛhɔmaanle edwɛkɛdivolɛma ne mɔ na bɛhanle kɛ: “Menli ɛhye mɔ ɛlɛgyegye yɛ suakpole ye kpole kpalɛ.+ Bɛle Dwuuma,
21 na bɛlɛkilehile amaamuo mɔɔ mɛla ɛmmaa adenle kɛ yɛkɛli zo la, ɔluakɛ yɛle Wulomuma.”
22 Na menli ne amuala dwazole hɔle bɛ nwo zo, na edwɛkɛdivolɛma ne mɔ suosuanle bɛ adɛladeɛ ne mɔ anu na bɛhanle kɛ bɛbila bɛ mbaka.+
23 Mɔɔ bɛbilale bɛ kpalɛ bɛwiele la, bɛguale bɛ efiade na bɛhanle bɛhilele pilizama sinzavolɛ ne kɛ ɔnlea bɛ boɛ.+
24 Kɛmɔ bɛhanle ɛhye bɛhilele ye la ati, ɔvale bɛ ɔguale ɔ kunlu lɔ na ɔkyekyele bɛ gyakɛ ɔbɔle baka nu.
25 Noko kɛyɛ nɔɔzo bulu nee nwiɔ,* ɛnee Pɔɔlo nee Saelase ɛlɛyɛ asɔne na bɛlɛto edwɛne bɛaye Nyamenle ayɛlɛ,+ na ɛnee pilizama ne ɛlɛtie bɛ.
26 Arɛlevilɛ nu ala azɛlɛkpusulɛ kpole bie zile maanle efiade sua ne kpusule. Eza nlenkɛ ne mɔ amuala bukebukele ɛkɛ ne ala, na awie biala kyeenyi kpolokpolole guale.+
27 Mɔɔ pilizama sinzavolɛ ne dwazole na ɔnwunle kɛ efiade ne nlenkɛ ne mɔ ɛbukebuke la, ɔhwenle ye konle dadeɛ ne kɛ ɔku ɔ nwo, ɛnee ɔsuzu kɛ pilizama ne ɛnriandi.+
28 Na Pɔɔlo vale ɛnelɛ kpole deanle nu kɛ: “Mmaku ɛ nwo, yɛ muala yɛwɔ ɛke!”
29 Yemɔti ɔmaanle bɛvale kɛnlaneɛ bɛrale na ɔnriandile ɔhɔwolole ɛkɛ, ɔvale anwowosolɛ ɔdule ɔdɔle Pɔɔlo nee Saelase agyakɛ anu.
30 Ɔvale bɛ ɔvindele na ɔhanle kɛ: “Yɛmenle mɔ, duzu a ɔwɔ kɛ meyɛ na meanyia ngoane a?”
31 Bɛhanle kɛ: “Die Awulae Gyisɛse di, na bɛbalie ɛdawɔ nee wɔ sua nu amra ngoane.”+
32 Akee bɛhanle Gyihova* edwɛkɛ ne bɛhilele ye nee ye sua nu amra amuala.
33 Yemɔti zɔhane nɔe ne ala, ɔ nee bɛ hɔle na ɔmiemianle bɛ nganlɛ ne mɔ. Akee bɛzɔnenle* ɔdaye nee ye sua nu amra amuala ndɛndɛ ne ala.+
34 Ɔvale bɛ ɔhɔle ye sua nu na ɔdole bɛ ɛkponle, na ɔ nee ye sua nu amra amuala anye liele kpole kɛ yenyia Nyamenle anu diedi la.
35 Aleɛ hyenle la, edwɛkɛdivolɛma ne mɔ zoanle sinzavolɛma maanle bɛhɔhanle kɛ: “Gyakyi menli ne mɔ maa bɛhɔ.”
36 Pilizama sinzavolɛ ne hanle edwɛkɛ ne hilele Pɔɔlo kɛ: “Edwɛkɛdivolɛma ne mɔ ɛzoa menli ɛra kɛ mengyakyi bɛ mu nwiɔ. Yemɔti bɛvinde kɛkala na bɛhɔ anzodwolɛ nu.”
37 Noko Pɔɔlo zele bɛ kɛ: “Bɛbole yɛ bagua nu mɔɔ yɛnli fɔlɛ* wɔ mekɛ mɔɔ yɛle Wulomuma+ la na bɛguale yɛ efiade. Akee bɛkulo kɛ bɛye yɛ wɔ fealeranu ɔ? Kyɛkyɛ! Maa bɛdabɛ mumua ne bɛrɛla na bɛraye yɛ.”
38 Sinzavolɛma ne hanle edwɛkɛ ɛhye hilele edwɛkɛdivolɛma ne mɔ. Mɔɔ bɛdele kɛ bɛle Wulomuma la ɛzulolɛ hanle bɛ.+
39 Yemɔti bɛrakpale bɛ kyɛlɛ, na mɔɔ bɛyele bɛ la, bɛzɛlɛle bɛ kɛ bɛvi suakpole ne azo bɛhɔ.
40 Noko mɔɔ bɛvile efiade ɛkɛ ne la, bɛhɔle Ledea sua nu na mɔɔ bɛnwunle mediema ne mɔ la, bɛmaanle bɛ anwosesebɛ+ na bɛhɔle.
Ɔbodwɛkɛ
^ Anzɛɛ “bɛvale.”
^ Anzɛɛ “bɛnlomanle.”
^ Anzɛɛ “kɛyɛ alevinli mu nwiɔ avinli.”
^ Anzɛɛ “bɛnlomanle.”
^ Anzɛɛ “mɔɔ bɛanli yɛ edwɛkɛ.”
