Zɛkalaya 4:1-14
4 Anwumabɔvolɛ ne mɔɔ ɔ nee me dendɛle la ziale rale na ɔdunwuele me kɛ mɔɔ bɛtunwue sonla bɛfi nafelɛ nu la.
2 Na ɔzele me kɛ: “Duzu a ɛnwu ye a?”
Ɔti menganle kɛ: “Menwu ye, na nea! kɛnlaneɛbaka bie mɔɔ le nvutuke ngome la,+ na kyɛnze gyi zolɛ. Ahɛnlaneɛ nsuu gyigyi zolɛ,+ ɛhɛe, nsuu, na ahɛnlaneɛ ne mɔ mɔɔ gyigyi zolɛ la lɛ paepe nsuu.
3 Na ɔlivi mbaka nwiɔ gyigyi nwolɛ,+ ko wɔ kyɛnze ne fema zo yɛɛ ko wɔ ye bɛne zo.”
4 Akee membizale anwumabɔvolɛ ne mɔɔ ɛnee ɔ nee me ɛlɛtendɛ la kɛ: “Me menle, duzu a ɛhye mɔ abo kile a?”
5 Ɔti anwumabɔvolɛ ne mɔɔ ɛnee ɔ nee me ɛlɛtendɛ la bizale me kɛ: “Ɛnze mɔɔ ninyɛne ɛhye mɔ abo kile la ɔ?”
Membuale kɛ: “Me menle, menze.”
6 Na ɔzele me kɛ: “Edwɛkɛ mɔɔ Gyihova ɛlɛka ahile Zɛlubabɛle la ɛne: ‘“Tɛ sogyama anwosesebɛ, anzɛɛ tumi zo,+ emomu, me sunsum ne azo,”+ ɛlɔne Gyihova a ɛha a.
7 O boka kpole, ɛle nzɔne? Ɛbahakyi azɛlɛ sɛsɛ+ wɔ Zɛlubabɛle+ anyunlu. Na ɔbava bolɛ ne mɔɔ la zolɛ anwuma la yeara na bɛadea nu kɛ: “Nea ye kɛnlɛma! Nea ye kɛnlɛma!”’”
8 Gyihova edwɛkɛ ne rale me ɛkɛ ne bieko kɛ:
9 “Zɛlubabɛle asa a wulale sua ɛhye adiabo a,+ na ɔdaye mumua ne ɔ sa a bawie ye a.+ Na ɛbanwu kɛ ɛlɔne Gyihova a zoanle me bɛ nwo ɛkɛ a.
10 Nwane a ɛbu ɔ nye ɛgua kenle mɔɔ ninyɛne ngyikyi bɔle ɔ bo la azo a?+ Ɔluakɛ bɛbali fɛlɛko na bɛanwu ɛzuzunyɛma* ne wɔ Zɛlubabɛle asa anu. Nsuu ɛhye mɔ a le Gyihova anye mɔɔ ɔfa ɔbɔ azɛlɛ ye kɔsɔɔti azo mgbɔlɔka la.”+
11 Akee membizale ye kɛ: “Ɔlivi mbaka nwiɔ ɛhye mɔ mɔɔ bɛgyigyi kɛnlaneɛbaka ne fema zo nee ye bɛne zo la abo kile duzu?”+
12 Eza membizale ye kɛ: “Ɔlivi mbaka ngane* nwiɔ ne mɔɔ bɛlɛwola nvutuke nwole bɛagua nvutuke paepe nwiɔ ne anu la abo kile duzu?”
13 Ɔti ɔbizale me kɛ: “Ɛnze mɔɔ ninyɛne ɛhye mɔ abo kile la ɔ?”
Membuale kɛ: “Me menle, menze.”
14 Ɔhanle kɛ: “Ɛhye mɔ a le menli nwiɔ ne mɔɔ bɛkpokpa bɛ mɔɔ bɛgyi azɛlɛ ye kɔsɔɔti Awulae ne anwo ɛkɛ ne la.”+
Ɔbodwɛkɛ
^ Ɔle nyɛma mɔɔ bɛva bolɛ bɛhenda ye mɔɔ bɛfa bɛto debie nwo bɛnea saa ɔtenrɛ a.
^ Ɛhye kile, baka ne ngane ne mɔɔ bakama ne taakɛ wɔ zo la.
