Yizikeɛle 28:1-26
28 Gyihova nee me dendɛle bieko kɛ:
2 “Sonla ra, ka kile Taya adekilevolɛ ne kɛ, ‘Mɔɔ Tumivolɛ Awulae Gyihova ɛha la ɛne:
“Kɛmɔ wɔ ahonle ɛmemaa ɔ nwo zo la ati,+ ɛkɔ zo ɛka kɛ, ‘Mele nyamenle.
Metɛnla nyamenle belemgbunli ebia zo wɔ nyevile ne akunlu lɔ.’+
Ɛte nganeɛ wɔ wɔ ahonle nu kɛ ɛle nyamenle ɛdeɛ,Noko ɛle sonla ala, ɛnle nyamenle.
3 Nea! Ɛze nrɛlɛbɛ ɛtɛla Daneɛle.+
Fealeranu edwɛkɛ biala ɛnle ɛkɛ mɔɔ ɛnze a.
4 Wɔ nrɛlɛbɛ nee wɔ adwenlenunwunlɛ ɛmaa wɔnyia ɛ nwo,Na ɛkɔ zo ɛboɔboa nvutuke nee dwɛtɛ fufule nloa ɛgua wɔ ninyɛnezielɛ ɛleka ne mɔ.+
5 Gualilɛ mɔɔ ɛze ɔ nye zo la maanle wɔ anwonyia yɛle kpole,+Na wɔ anwonyia ne ati, wɔ ahonle memaanle ɔ nwo zo.”’
6 “‘Ɛhye ati mɔɔ Tumivolɛ Awulae Gyihova ɛha la ɛne:
“Kɛmɔ ɛte nganeɛ wɔ wɔ ahonle nu kɛ ɛle nyamenle la ati,
7 Mebamaa nyɛvolɛ adwazo atia wɔ, maanle maanle mɔɔ bɛ ti yɛ se kpalɛ la,+Na bɛbahwe bɛ konle dadeɛ ne mɔ bɛatia wɔ nrɛlɛbɛ kɛnlɛma neNa bɛagua wɔ anyunlunyia kpole ne anwo evinli.+
8 Bɛbava wɔ bɛahɔ kuma* ne anu,Na wɔawu konle nu* wɔ nyevile ne akunlu lɔ.+
9 Asoo ɛbahɔ zo wɔaha wɔahile ahenle mɔɔ ɛlɛku wɔ la kɛ, ‘Mele nyamenle’ ɔ?
Ɛbayɛ sonla ala, ɛnrɛyɛ nyamenle wɔ bɛdabɛ mɔɔ bɛlɛsɛkye wɔ la asa anu.”’
10 ‘Ɛbawu kɛ menli mɔɔ bɛtɛpɛle bɛ mrenyiazo la wɔ nyɛvolɛ asa anu,Ɔluakɛ medame mumua ne a medendɛ a,’ Tumivolɛ Awulae Gyihova a se a.”
11 Na Gyihova nee me dendɛle bieko kɛ:
12 “Sonla ra, to Taya belemgbunli ne anwo awolɛyelɛ edwɛne,* na ka kile ye kɛ, ‘Mɔɔ Tumivolɛ Awulae Gyihova ɛha la ɛne:
“Ɛnee ɛle debie mɔɔ di munli la anwo neazo,*Nrɛlɛbɛ ɛyi wɔ tɛkɛɛ+ na wɔ anwofɛlɛko di munli.+
13 Ɛnee ɛwɔ Yidɛn, Nyamenle tola ne anu.
Bɛvale awolɛ mɔɔ sonle bolɛ la biala bie bɛzieziele wɔ—Wulubi, topaze yɛɛ gyasepa;kelesɔlaete, ɔnekese yɛɛ gyeede; safaya, tɛkoyɛse+ yɛɛ ɛmelade;Na bɛvale bɛduoduale nvutuke nu.
Kenle mɔɔ membɔle wɔ la yɛɛ menyɛle bɛ a.
14 Menyɛle wɔ kɛ kyɛlɔbe mɔɔ bɛkpokpa wɔ mɔɔ ɛsinza.
Ɛnee ɛwɔ Nyamenle boka nwuanzanwuanza ne azo,+ na ɛluale senle awolɛ zo.
15 Ɛnee wɔ ndenle tenrɛ ɔvi kenle mɔɔ bɛbɔle wɔ laHɔkpulale kɛ bɛnwunle ɛtane wɔ wɔ nu la.+
16 Wɔ gualilɛ bebelebe ne ati,+Amumuyɛyɛlɛ yile wɔ tɛkɛɛ, na ɛbɔle ɔ bo kɛ ɛyɛ ɛtane.+
Ɔti mebaye wɔ meavi Nyamenle boka ne azo kɛ debie mɔɔ nwolɛ ɛgua evinli la na meazɛkye wɔ,+O kyɛlɔbe mɔɔ sinza, fi awolɛ senle ne anu.
17 Wɔ kɛnlɛma ne ati, wɔ ahonle memaanle ɔ nwo zo.+
Ɛzɛkyele wɔ nrɛlɛbɛ ɔlua wɔ anyunlunyia kpole ne ati.+
Mebavuandi wɔ meado azɛlɛ ne azo.+
Mebamaa arelemgbunli anlea wɔ.
18 Ɔlua wɔ fɔlɛlilɛ kpole ne nee wɔ awule gualilɛ ne ati, wɔgua wɔ ɛzonlenlɛsua ne mɔ anwo evinli.
Mebamaa senle adɔ wɔ avinli na yeayela wɔ.+
Mebamaa wɔadɔ nzonle wɔ azɛlɛ ne azo wɔ menli mɔɔ ɛlɛnea wɔ la kɔsɔɔti anyunlu.
19 Bɛdabɛ mɔɔ bɛze wɔ wɔ menli ne anu la kɔsɔɔti banlea wɔ azibɛnwo nu.+
Wɔ awieleɛ bara arɛlevilɛ nu na yeayɛ ɛzulolɛ,Na ɛ bo zo baminli bɔkɔɔ.”’”+
20 Na Gyihova nee me dendɛle bieko kɛ:
21 “Sonla ra, kakyi ɛ nye wɔ Saedɛn,+ na ka ngapezo tia ye.
22 Ka kɛ, ‘Mɔɔ Tumivolɛ Awulae Gyihova ɛha la ɛne:
“O Saedɛn, kɛkala meyɛ wɔ kpɔvolɛ, na bɛbawula me anyunlunyia wɔ wɔ avinli;Na saa mebua ye ndɛne na mete me nwo wɔ ye avinli a, menli banwu kɛ medame a mele Gyihova a.
23 Mebamaa ewulenzane ahɔ ɔ nwo zo na mogya aze ye awɔdenle ne mɔ azo.
Menli mɔɔ bɛbahu bɛ la bagua ye avinli wɔ mekɛ mɔɔ konle dadeɛ bavi ɛleka biala ara ɔ nwo zo la;Na bɛbanwu kɛ medame a mele Gyihova a.+
24 “‘“Akee mbowunyɛma nee mbowule mɔɔ anloa yɛ nyane, menli mɔɔ golo bɛ nwo la ɛnrɛbɔ Yizilayɛma ɛnrɛyia bieko;+ na menli banwu kɛ medame a mele Tumivolɛ Awulae Gyihova a.”’
25 “‘Mɔɔ Tumivolɛ Awulae Gyihova ɛha la ɛne: “Saa meboɔboa Yizilayɛma anloa bieko mefi menli mɔɔ bɛbɔle bɛ asande bɛhɔle bɛ nu la anu a,+ bɛbade me nwo wɔ bɛ avinli wɔ maanle maanle ne mɔ anye zo.+ Na bɛbadɛnla bɛ azɛlɛ ne+ mɔɔ menvale memaanle me sonvolɛ Gyekɔbo la azo.+
26 Bɛbadɛnla zolɛ anzodwolɛ nu+ na bɛasisi azua na bɛayɛ vanye egyinli,+ na saa mebua bɛdabɛ mɔɔ bɛbɔ bɛ bɛyia mɔɔ bɛgolo bɛ nwo la amuala ndɛne a, bɛbadɛnla aze anzodwolɛ nu;+ na bɛbanwu kɛ medame a mele Gyihova bɛ Nyamenle ne a.”’”
Ɔbodwɛkɛ
^ Anzɛɛ “ɛtɔfoɔ ewule.”
^ Anzɛɛ “nla.”
^ Anzɛɛ “nyanelilɛ edwɛne.”
^ Hibulu aneɛ nu, “sɛkɛlɛneɛ, ɛsaso.”
