Yizikeɛle 27:1-36
-
Taya meli ne mɔɔ ɛlɛnoma la anwo awolɛyelɛ (1-36)
27 Gyihova nee me dendɛle bieko kɛ:
2 “Na wɔmɔ sonla ra, to Taya anwo awolɛyelɛ edwɛne,*+
3 na ka kile Taya kɛ,‘Wɔmɔ mɔɔ ɛde nyevile ne nlenkɛ mgbole ne mɔ anloa,Gualilɛnli mɔɔ nee mbɔra dɔɔnwo azo menli di gua la,Mɔɔ Tumivolɛ Awulae Gyihova ɛha la ɛne:
“O Taya, wɔmɔ a wɔha kɛ, ‘Me anwofɛlɛko ne di munli.’+
4 Wɔ azɛlɛ ne mɔ gua nyevile ne akunlu* lɔ,Yɛɛ menli mɔɔ kyekyele wɔ la ɛmaa wɔ anwofɛlɛko ne ɛli munli.
5 Bɛvale Sinɛ dwunipa mbaka a bɛyɛle wɔ ndaboa ne mɔ a,+Yɛɛ bɛvale Lɛbanɔn sida mbaka a bɛyɛle wɔ avela mbaka ne mɔ a.
6 Bɛvale Beehyan oku mbaka a bɛyɛle wɔ ɛdahoma ne mɔ a,Yɛɛ sepelɛse mbaka mɔɔ bɛva Kitem mbɔra ne mɔ azo ɛzɛlɛ* bɛfɔle nwolɛ la a bɛvale bɛyɛle ɛ nyunlu a.+
7 Yigyibiti lenen mɔɔ bɛva kɔla ngakyile bɛnwo la a bɛvale bɛyɛle wɔ avela ne a,Yɛɛ nyɛma buluwu nee boane enrinli buluwu nee kɔkɔlɛ afonla mɔɔ bɛ nee ye vi Yilaehyaa mbɔra ne mɔ azo la a bɛvale bɛhedale ɛ nwo zo a.+
8 Saedɛnema nee Avadema+ a hanle wɔ meli ne a.
O Taya, wɔ menli mɔɔ ze gyima nye zo la a yɛle wɔ meli nu gyimayɛvoma a.+
9 Gibalema mɔɔ lɛ anwubielɛ na bɛze gyima nye zo* la+ a duoduale wɔ meli nu adokule a.+
Nyevile zo meli nee bɛ gyimayɛvoma kɔsɔɔti rale wɔ ɛkɛ nee wɔ ralile gua.
10 Ɛnee Pɛhyeama, Ludema nee Pɛɛtema+ wɔ wɔ ɛlɔnema, wɔ menli mɔɔ kɔ konle la anu.
Bɛvale bɛ enyinlike nee bɛ bulalɛ ahyɛlɛ bɛhendanle wɔ, na bɛmaanle ɛnyianle anyunlunyia.
11 Avadema mɔɔ wɔ wɔ ɛlɔnema ne anu la gyinlanle wɔ bane ne mɔ azo bɛngale ye yiale,Na mrenyia mɔɔ lɛ akɛnrasesebɛ la zinzale wɔ tawa ne mɔ.
Bɛvale bɛ enyinlike bɛhendanle wɔ bane ne anwo amualaNa bɛmaanle wɔ anwofɛlɛko ne lile munli.
12 “‘“Tahyehye+ nee wɔ lile gua ɔlua wɔ anwonyia kpole ne ati.+ Bɛvale dwɛtɛ fufule, bulalɛ, kyɛnze nee sumi bɛmaanle wɔ bɛliele ninyɛne.+
13 Gyeevan, Tubale+ nee Mihyɛke+ nee wɔ lile gua, bɛvale ngɛkɛlɛ nee kɔbele ninyɛne bɛmaanle wɔ bɛliele gualilɛ ninyɛne.+
14 Togamaa abozoamra+ vale mgbɔnwɔ nee konle mgbɔnwɔ yɛɛ mgbɔnwɔndua* maanle wɔ bɛliele ninyɛne.
15 Didanema+ nee wɔ lile gua; ɛmaanle mbɔra dɔɔnwo azo amra lile gua maanle wɔ; bɛvale ɛzɛlɛ*+ nee baka bile titili bie mɔɔ bɛfɛlɛ ye ɛbɔni la bɛmaanle wɔ kɛ wɔ ahyɛlɛdeɛ.
16 Yidɔmma nee wɔ lile gua ɔlua wɔ ninyɛne dɔɔnwo ne ati. Bɛvale tɛkoyɛse, boane enrinli buluwu nee kɔkɔlɛ afonla, ɛdanlɛ mɔɔ bɛnwo nuhua kɔla ngakyile, tɛladeɛ kɛnlɛma, ezukoa awolɛ ngɔkɔlɛ nee wulubi bɛmaanle wɔ bɛliele ninyɛne.
17 “‘“Dwuda nee Yizilayɛ nee wɔ lile gua, bɛvale Menete hwiiti,+ aleɛ kpalɛ, wolɛ,+ nwole yɛɛ balesam+ bɛmaanle wɔ bɛliele ninyɛne.+
18 “‘“Damasekɛse+ nee wɔ lile gua ɔlua wɔ ninyɛne dɔɔnwo ne nee wɔ anwonyia ne mɔ amuala ati, bɛdɔnenle Hɛlebɔn nwanye nee Zaaha mboane enrinli* bɛmaanle wɔ.
19 Vidan nee Gyeevan mɔɔ bɛvi Yuzale la maanle wɔ bulalɛ mɔɔ ye ɛbelelɛ ɛnyɛ se, kasea* nee baka evuanlɛ* bɛliele ninyɛne.
20 Didan+ nee wɔ lile ndanlɛ mɔɔ bɛfa bɛgua ɛkpɔnwɔ nwo zo bɛtɛnla zo la* anwo gua.
21 Ɛmaanle Arelabema nee Kidaa mgbanyima kɔsɔɔti lile gua maanle wɔ,+ ɛnee bɛdi mboane mralɛ nee mboane nyinli yɛɛ mbɔnkye nwo gua.+
22 Hyiba nee Releeyama gualilɛma+ nee wɔ lile gua; bɛvale ninyɛne evuanlɛ kpalɛ, awolɛ mɔɔ sonle bolɛ nee nvutuke bɛmaanle wɔ bɛliele ninyɛne.+
23 Hɛlan,+ Kani, Yidɛn,+ Hyiba gualilɛma,+ Ahyɛ+ yɛɛ Kelemade nee wɔ lile gua.
24 Bɛdɔnenle ndanlɛ ngɛnlɛma, adɛladeɛ aguzo mɔɔ bɛva ɛdanlɛ buluwu bɛnwo na bɛva kɔla ngakyile bɛnwo nuhua kɛnlɛma nee kapɛte mɔɔ bɛva kɔla ngakyile bɛnwo, bɛva nyɛma bɛkyekye na bɛmia nu la wɔ wɔ gua ne anu.
25 Tahyehye meli ne mɔ+ a hwenle wɔ gualilɛ ninyɛne ne mɔ a,Ɔti yemaa wɔyi tɛkɛɛ na wɔdɛnla zolɛ* wɔ nyevile ne akunlu nehane.
26 Menli mɔɔ ka wɔ la ɛva wɔ ɛra nyevile kpole ne anu;Aduduleɛ anwoma ne ɛmaa wɔnloma nyevile ne akunlu nehane.
27 Wɔ anwonyia, wɔ ninyɛne, wɔ gualilɛ ninyɛne, wɔ melikavoma nee menli mɔɔ yɛ gyima wɔ wɔ meli nu,Menli mɔɔ tuodua meli ne anu adokule, menli mɔɔ tɔ wɔ gualilɛ ninyɛne+ yɛɛ menli mɔɔ kɔ konle la amuala+—Menli dɔɔnwo ne* mɔɔ de bɛ avinli la amuala—Bɛ muala bɛbanloma wɔ nyevile ne akunlu lɔ wɔ kenle mɔɔ ɛbadɔ aze la.+
28 Saa wɔ meli nu gyimayɛvoma tea nu a, ɛnweazo azɛlɛ ne mɔ bakpusu.
29 Ɛdahomakavoma, melikavoma nee menli mɔɔ yɛ nyevile zo gyima la amualaBavi bɛ meli ne mɔ anu adwu aze na bɛaragyinla azɛlɛ ne azo.
30 Bɛbamaa bɛ ne zo na bɛazu ɛ nwo alɔbɔlɛ ɛzunlɛ+Bɛava ɛnwea bɛagua bɛ ti zo na bɛahundo bɛ nwo wɔ nzonle nu.
31 Bɛbakpa bɛ ti na bɛaheda ɛrele;Bɛbava awolɛyelɛ kpole* bɛazu ɛ nwo alɔbɔlɛ ɛzunlɛ.
32 Wɔ bɛ awolɛyelɛ ne anu bɛbado ɛ nwo awolɛyelɛ edwɛne na bɛazu wɔ kɛ:
‘Nwane a le kɛ Taya, mɔɔ kɛkala yeyɛ koonwu wɔ nyevile ne avinli la ɛ?+
33 Mekɛ mɔɔ wɔ ninyɛne vi nyevile ne akunlu nehane rale la, ɛmaanle menli dɔɔnwo ako yile.+
Wɔ anwonyia kpole nee wɔ gualilɛ ninyɛne maanle azɛlɛ ne azo arelemgbunli nyianle bɛ nwo.+
34 Kɛkala wɔnloma wɔ nyevile ne akunlu nehane, wɔ azule kuma ne anu,+Na wɔ gualilɛ ninyɛne nee wɔ menli kɔsɔɔti nee wɔ ɛnloma.+
35 Menli mɔɔ wɔ mbɔra ne mɔ azo la amuala banlea wɔ azibɛnwo nu,+Na ɛzulolɛ bamaa bɛ arelemgbunli anwo awoso bɛ+—bɛ nyunlu bahakyi.
36 Gualilɛma mɔɔ wɔ maanle maanle ne mɔ anu la babɔ mɔɔ ɛdo wɔ la anwo nvonloma.
Wɔ awieleɛ bara arɛlevilɛ nu na yeayɛ ɛzulolɛ,Na ɛ bo zo baminli bɔkɔɔ.’”’”+
Ɔbodwɛkɛ
^ Anzɛɛ “nyanelilɛ edwɛne.”
^ Anzɛɛ “avinli.”
^ Anzɛɛ “ɛzonle mɛne.”
^ Hibulu aneɛ nu, “Gibalema mgbanyima mɔɔ bɛze gyima nye zo.”
^ Asoaso nyinli nee ɛkpɔnwɔ belɛ a wole ye a.
^ Anzɛɛ “ɛzonle mɛne.”
^ Anzɛɛ “nee mboane enrinli nzonle nee kɔkɔlɛ.”
^ Baka bie mɔɔ ɔ nee senamɔn baka ne le abusua ko la.
^ Ndɔ baka bie mɔɔ bɔ evuanlɛ.
^ Anzɛɛ “ɛdanlɛ mɔɔ bɛnwo la.”
^ Anzɛɛ ɔkola ɔkile, “wɔnyia anyunlunyia.”
^ Hibulu aneɛ nu, “Asafo ne.”
^ Anzɛɛ “ɛkɛla mɔɔ ɛlɛdi nyane la.”
