Yizikeɛle 22:1-31
22 Gyihova nee me dendɛle bieko kɛ:
2 “Wɔmɔ sonla ra, wɔziezie ɛ nwo kɛ ɛka ndɛnebualɛ edwɛkɛ wɔatia suakpole ne mɔɔ ka mogya gua la,*+ na wɔamaa yeanwu ye bɛkyi ninyɛne ne mɔ amuala ɔ?+
3 Ka kɛ, ‘Mɔɔ Tumivolɛ Awulae Gyihova ɛha la ɛne: “O suakpole mɔɔ ka mogya gua+ ye awɔdenle ne mɔ azo, mɔɔ ye mekɛ ɛlɛba,+ na ɔyɛ kyibadeɛ ananze* ɔgua ɔ nwo evinli la,+
4 wɔ mogya ne mɔɔ ɛka ɛgua la ɛmaa wɔli fɔlɛ,+ yɛɛ wɔ kyibadeɛ ananze ne mɔ ɛgua ɛ nwo evinli.+ Wɔmaa wɔ mekɛ ɛra ndɛndɛ, yɛɛ wɔ ɛvolɛ ne ɛdwu. Ɛhye ati a mebamaa wɔayɛ anyiemgba debie wɔamaa maanle maanle ne mɔ na wɔayɛ agolobɛnwo debie wɔ azɛlɛ ne amuala azo la.+
5 Ɛdawɔ mɔɔ wɔ duma a le evinli na basabasayɛlɛ ɛyi wɔ tɛkɛɛ la,+ azɛlɛ mɔɔ bikye wɔ nee mɔɔ wɔ moamoa la bagolo ɛ nwo.
6 Nea! Yizilayɛ mgbanyima ne mɔ anu ko biala mɔɔ wɔ bɛ avinli la fa ye tumi ne ka mogya gua.+
7 Bɛmbu bɛ papa nee bɛ mame wɔ bɛ avinli.+ Bɛsisi ɛyɛvolɛ, yɛɛ bɛ nee arisa yɛɛ kunlavolɛ ɛnli ye boɛ.”’”+
8 “‘Bɛmbu me ɛleka nwuanzanwuanza ne yɛɛ bɛgua me ɛnwomenlelielɛ kenle ne mɔ anwo evinli.+
9 Menli mɔɔ sɛkye awie mɔ duma na bɛkulo kɛ bɛka mogya bɛgua la wɔ bɛ avinli.+ Bɛdi afɔlebɔlɛ aleɛ wɔ awoka ne mɔ azo yɛɛ bɛbɔ anyiemgba ɛbɛla wɔ bɛ avinli.+
10 Bɛgua bɛ papa ɛkpa nwo evinli* wɔ bɛ avinli,+ yɛɛ bɛgua raalɛ mɔɔ kɛhɔ amozi mɔɔ ɔ nwo ɛnde la anwo evinli.+
11 Nrenyia nee ɔ gɔnwo aye yɛ bɛkyi debie wɔ bɛ avinli,+ nrenyia gyɛne nee ɔdaye mumua ne ye ase raalɛ bɔ ɛbɛlatane ɔgua ɔ nwo evinli+ yɛɛ nrenyia gyɛne noko gua ɔ diema raalɛ, ɔdaye mumua ne ye papa ara raalɛ anwo evinli.+
12 Bɛdie belaebo bɛka mogya bɛgua wɔ bɛ avinli.+ Ɛbɔ bosea ɛdie mpaefoa+ anzɛɛ ɛkpondɛ nvasoɛ,* yɛɛ ɛsisi ɛ gɔnwo mɔ ɛdie ezukoa.+ Ɛhɛe, ɛ rɛle ɛvi me bɔkɔɔ,’ Tumivolɛ Awulae Gyihova a se a.
13 “‘Nea! Mebɔ me sa nu mekile kɛ mekyi nvasoɛ ɛtane ne mɔɔ wɔnyia ye nee mogya mɔɔ wɔha wɔgua wɔ bɛ avinli la.
14 Asoo wɔ akɛnrasesebɛ ne* bagyinla na ɛ sa nu ahɔ zo ayɛ se wɔ kenle mɔɔ mebadwazo ɛ nwo zo la?+ Medame Gyihova a medendɛ a, na mebayɛ noko.
15 Mebabɔ wɔ asande wɔ maanle maanle ne mɔ anu na meakponde wɔ wɔ azɛlɛ ne mɔ azo,+ na meamaa wɔ evinli nyɛleɛ ne mɔ ara awieleɛ.+
16 Na bɛbabɔ wɔ anyiemgba wɔ maanle maanle ne mɔ anyunlu, na ɛbanwu kɛ medame a mele Gyihova a.’”+
17 Na Gyihova nee me dendɛle bieko kɛ:
18 “Sonla ra, Yizilayɛma ɛyɛ kɛ ewula la wɔ me nye zo. Bɛ muala bɛle kɔbele nee kyɛnze nee bulalɛ nee sumi wɔ fonlomo nu. Bɛle kɛ dwɛtɛ fufule nu evinli la.+
19 “Ɛhye ati mɔɔ Tumivolɛ Awulae Gyihova ɛha la ɛne: ‘Kɛmɔ bɛ muala bɛyɛ kɛ ewula mɔɔ nvasoɛ ɛnle zo la ati,+ mebaboɔboa bɛ nloa wɔ Gyɛlusalɛm.
20 Kɛ mɔɔ bɛfa dwɛtɛ fufule nee kɔbele nee bulalɛ yɛɛ sumi nee kyɛnze bɛgua fonlomo nu amaa bɛawuda senle wɔ ɔ bo bɛaholo bɛ la, zɔhane ala a mebaboɔboa bɛ nloa wɔ me ɛya nee me ɛya kpole ne anu na meawuda senle wɔ bɛ nu meaholo bɛ a.+
21 Mebaboɔboa bɛ nloa na meawuda me ɛyavalɛ senle ne anu wɔ bɛ nwo zo,+ na bɛbaholo wɔ suakpole ne azo.+
22 Kɛ mɔɔ bɛkolo dwɛtɛ fufule wɔ fonlomo nu la, zɔhane ala a bɛbaholo bɛ wɔ suakpole ne azo a; na bɛbanwu kɛ medame mumua ne, Gyihova a mewola me ɛya ne megua bɛ nwo zo a.’”
23 Na Gyihova nee me dendɛle bieko kɛ:
24 “Sonla ra, ka kile ye kɛ, ‘Ɛle azɛlɛ mɔɔ bɛnrɛde ɛ nwo anzɛɛ ezule ɛnrɛdɔ zolɛ wɔ ɛya kenle ne anu a.
25 Ye ngapezoma ne mɔ ɛbɔ adwenle wɔ ye avinli,+ bɛle kɛ awenade mɔɔ ɛlɛkpo atete nane nu la.+ Bɛkye menli* bɛdi. Bɛdie agyapadeɛ nee ninyɛne mɔɔ sonle bolɛ la. Bɛmaa menli dɔɔnwo ɛyɛ ahunlanvolɛ wɔ ye avinli.
26 Ye ɛsɔfo ne mɔ anli me mɛla zo,+ yɛɛ bɛkɔ zo bɛgua me ɛleka nwuanzanwuanza ne mɔ anwo evinli.+ Bɛmmaa bɛnnwu ngakyile mɔɔ wɔ ninyɛne nwuanzanwuanza nee ninyɛne gyɛne anu la,+ yɛɛ bɛmmaa bɛnnwu ninyɛne mɔɔ anwo ɛnde nee mɔɔ anwo te la,+ yɛɛ bɛkpo kɛ bɛkɛzie me ɛnwomenlelielɛ kenle ne mɔ, na bɛgua me nwo evinli wɔ bɛ avinli.
27 Ye mgbanyima mɔɔ wɔ bɛ avinli la le kɛ bedi mɔɔ ɛlɛtete nane nu la; bɛka mogya bɛgua na bɛku menli* bɛfa bɛkpondɛ nvasoɛ ɛtane.+
28 Noko ye ngapezoma ne mɔ ɛpenti bɛ nyɛleɛ ne mɔ anwo fufule. Bɛnwu adalɛ ɛnyelɛzodeɛnwunlɛ na bɛka abisadeɛ edwɛkɛ adalɛ+ na bɛka kɛ: “Mɔɔ Tumivolɛ Awulae Gyihova ɛha la ɛne,” wɔ mekɛ mɔɔ Gyihova mumua ne ɛtɛtendɛle la.
29 Menli mɔɔ wɔ azɛlɛ ne azo la ɛsisi menli na bɛwua bɛ,+ bɛ nee mɔɔ hyia debie nwo la nee ehyianli ɛnli ye boɛ yɛɛ bɛsisi ɛyɛvolɛ na bɛmaa pɛlepɛlelilɛ bɔ ye.’
30 “‘Ɛnee melɛkpondɛ nrenyia wɔ bɛ avinli mɔɔ bayɛ bane ne boɛ anzɛɛ ɔbagyinla me nyunlu wɔ ɛleka mɔɔ bɛbubu ye la na yeagyinla azɛlɛ ne agyakɛ anu, amaa bɛanzɛkye ye a,+ noko meannyia awie biala.
31 Ɔti mebawola me ɛya ne meagua bɛ nwo zo na meava me ɛyavalɛ senle ne meabɔ bɛ bo zo. Mebava mɔɔ ɛvi bɛ ndenle ne mɔ anu ɛra la meagua bɛdabɛ mumua ne bɛ ti zo,’ Tumivolɛ Awulae Gyihova a se a.”
Ɔbodwɛkɛ
^ Hibulu aneɛ nu, “ɛbabua ye ndɛne, ɛbabua ye ndɛne.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Hibulu aneɛ nu, “Bɛye bɛ papa anwo bɛto zo.”
^ Anzɛɛ “ɔfa bie ɔgua zo.”
^ Hibulu aneɛ nu, “ahonle.”
^ Anzɛɛ “ɛkɛla.”
^ Anzɛɛ “ɛkɛla.”
