Yizikeɛle 20:1-49
20 Wɔ ɛvolɛ mɔɔ tɔ zo nsuu, ye siane nnu ne anu, kenle mɔɔ tɔ zo bulu la azo, Yizilayɛ mgbanyima ne mɔ bie radɛnlanle aze wɔ me nyunlu ɛkɛ ne kɛ bɛbabiza Gyihova edwɛkɛ.
2 Na Gyihova nee me dendɛle kɛ:
3 “Sonla ra, ɛ nee Yizilayɛ mgbanyima ɛdendɛ na ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Bɛra kɛ bɛbabiza me edwɛkɛ ɔ? ‘Mekɛ ala mɔɔ mede aze la, menrɛbua edwɛkɛ biala mɔɔ bɛbabiza la,’+ Tumivolɛ Awulae Gyihova a se a.”’
4 “Wɔziezie ɛ nwo kɛ ɛbua bɛ ndɛne ɔ?* Sonla ra, wɔziezie ɛ nwo kɛ ɛbua bɛ ndɛne ɔ? Maa bɛnwu bɛkyi ninyɛne ne mɔ mɔɔ bɛ nenyia mɔ yɛle la.+
5 Ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Kenle mɔɔ memkpale Yizilayɛ la,+ eza menganle ndane* mengilele Gyekɔbo abozoamra,* na memaanle bɛnwunle me wɔ Yigyibiti azɛlɛ zo.+ Ɛhɛe, menganle ndane mengilele bɛ na menganle kɛ, ‘Medame a mele Gyihova bɛ Nyamenle ne a.’
6 Kenle zɔhane, menganle ndane kɛ mebaye bɛ meavi Yigyibiti azɛlɛ ne azo meava bɛ meahɔ azɛlɛ mɔɔ mekpondɛ* memaa bɛ la azo, azɛlɛ mɔɔ meleke nee wolɛ se zolɛ.+ Ɔle azɛlɛ kɛnlɛma* kpalɛ mɔɔ tɛla azɛlɛ biala.
7 Akee menzele bɛ kɛ, ‘Bɛ nuhua ko biala ɛvuandi ye bɛkyi ninyɛne ne mɔ mɔɔ ɔ nye die nwo la ɛgua ye lɔ; bɛmmafa Yigyibiti kyibadeɛ ananze* ne mɔ bɛgua bɛ nwo evinli.+ Medame a mele Gyihova bɛ Nyamenle ne a.’+
8 “‘“Noko bɛdele me nwo atua na bɛangulo kɛ bɛkɛdie me. Bɛanvuandi bɛ bɛkyi ninyɛne ne mɔ mɔɔ bɛ nye die nwo la bɛangua ye lɔ, yɛɛ bɛamkpo Yigyibiti kyibadeɛ ananze ne mɔ.+ Ɔti membɔle ɛwɔkɛ kɛ mebawola me ɛya ne meagua bɛ nwo zo, na meava me ɛya kpole ne meagua bɛ nwo zo bɔkɔɔ wɔ Yigyibiti azɛlɛ zo.
9 Noko me duma ne ati menyɛle nwolɛ debie amaa bɛangua nwolɛ evinli wɔ maanle maanle mɔɔ bɛde bɛ avinli la anyunlu.+ Ɔluakɛ memaanle bɛnwunle* me wɔ maanle maanle ɛhye mɔ anyunlu wɔ mekɛ mɔɔ menyele bɛ* menvile Yigyibiti azɛlɛ zo la.+
10 Ɔti menyele bɛ menvile Yigyibiti azɛlɛ zo na menvale bɛ mengɔle fienemgbole ne anu.+
11 “‘“Akee menvale me mɛla ne mɔ memaanle bɛ na memaanle bɛnwunle me ndɛnebualɛ ne mɔ,+ amaa sonla mɔɔ kɛli zolɛ la anyia ngoane.+
12 Eza menvale me ɛnwomenlelielɛ kenle ne mɔ memaanle bɛ+ kɛ sɛkɛlɛneɛ mɔɔ wɔ me nee bɛ avinli a,+ amaa bɛanwu kɛ medame Gyihova, medame a melɛte bɛ nwo a.
13 “‘“Noko Yizilayɛma dele me nwo atua wɔ fienemgbole ne anu.+ Bɛanva me mɛla ne mɔ bɛanlua, yɛɛ bɛkpole me ndɛnebualɛ ne mɔ mɔɔ saa sonla di zolɛ a ɔbanyia ngoane la. Bɛguale me ɛnwomenlelielɛ kenle ne mɔ anwo evinli bɔkɔɔ. Ɔti membɔle ɛwɔkɛ kɛ mebawola me ɛya ne meagua bɛ nwo zo wɔ fienemgbole ne anu na meabɔ bɛ bo zo bɔkɔɔ.+
14 Me duma ne ati menyɛle nwolɛ debie amaa bɛangua nwolɛ evinli wɔ maanle maanle ne mɔ mɔɔ menyele bɛ* menvile bɛ nye zo ɛkɛ ne la anyunlu.+
15 Eza menganle ndane wɔ fienemgbole ne anu mengilele bɛ kɛ menrɛva bɛ menrɛra azɛlɛ ne mɔɔ meva memaa bɛ la azo+—azɛlɛ mɔɔ meleke nee wolɛ se zolɛ,+ azɛlɛ kɛnlɛma* kpalɛ mɔɔ tɛla azɛlɛ biala la—
16 ɔluakɛ bɛkpole me ndɛnebualɛ ne mɔ, bɛanva me mɛla ne mɔ bɛanlua, yɛɛ bɛguale me ɛnwomenlelielɛ kenle ne mɔ anwo evinli, ɔluakɛ ɛnee bɛ ahonle li bɛ kyibadeɛ ananze ne mɔ anzi.+
17 “‘“Noko menwunle* bɛ anwunvɔne na meanzɛkye bɛ; meambɔ bɛ bo zo wɔ fienemgbole ne anu.
18 Menganle mengilele bɛ mra ne mɔ wɔ fienemgbole ne anu kɛ,+ ‘Bɛmmafa bɛ nenyia mɔ mɛla bɛdua+ anzɛɛ bɛdi bɛ ndɛnebualɛ zo anzɛɛ bɛfa bɛ kyibadeɛ ananze ne mɔ bɛgua bɛ nwo evinli.
19 Medame a mele Gyihova bɛ Nyamenle ne a. Bɛva me mɛla ne mɔ bɛlua, bɛdie me ndɛnebualɛ ne mɔ na bɛli zo.+
20 Na bɛde me ɛnwomenlelielɛ kenle ne mɔ anwo,+ na bɛbayɛ sɛkɛlɛneɛ wɔ me nee bɛ avinli amaa bɛanwu kɛ medame a mele Gyihova bɛ Nyamenle ne a.’+
21 “‘“Noko mralɛ mrenyia ne mɔ dele me nwo atua.+ Bɛanva me mɛla ne mɔ bɛanlua yɛɛ bɛandie na bɛali me ndɛnebualɛ ne mɔ mɔɔ saa sonla di zo a ɔbanyia ngoane la azo. Bɛguale me ɛnwomenlelielɛ kenle ne mɔ anwo evinli. Ɔti membɔle ɛwɔkɛ kɛ mebawola me ɛya ne meagua bɛ nwo zo, na meava me ɛya kpole ne meagua bɛ nwo zo bɔkɔɔ wɔ fienemgbole ne anu.+
22 Noko mendwenle menziale+ na me duma ne ati menyɛle nwolɛ debie,+ amaa bɛangua nwolɛ evinli wɔ maanle maanle ne mɔ mɔɔ menyele bɛ* menvile bɛ nye zo ɛkɛ ne la anyunlu.
23 Eza menganle ndane mengilele bɛ wɔ fienemgbole ne anu kɛ mebabɔ bɛ asande wɔ maanle maanle ne mɔ anu na meakponde bɛ wɔ azɛlɛ ne mɔ azo,+
24 ɔluakɛ bɛanli me ndɛnebualɛ ne mɔ azo yɛɛ bɛkpole me mɛla ne mɔ,+ bɛguale me ɛnwomenlelielɛ kenle ne mɔ anwo evinli, na bɛlile* bɛ nenyia mɔ kyibadeɛ ananze ne mɔ anzi.+
25 Medame noko memaanle bɛ adenle kɛ bɛli mɛla mɔɔ ɛnle kpalɛ nee ndɛnebualɛ mɔɔ ɛnrɛhola ɛnrɛmaa bɛ ngoane la anzi.+
26 Memaanle bɛdabɛ mumua ne bɛ afɔlebɔlɛ ne mɔ guale bɛ nwo evinli—wɔ mekɛ mɔɔ bɛmaanle bɛ belamunli ralɛ biala vale senle nu la+—amaa bɛayɛ mgbane, na bɛanwu kɛ medame a mele Gyihova a.”’
27 “Ɔti, O sonla ra, ɛ nee Yizilayɛma ɛdendɛ na ka kile bɛ kɛ, ‘Mɔɔ Tumivolɛ Awulae Gyihova ɛha la ɛne: “Wɔ adenle ɛhye noko azo, bɛ nenyia mɔ luale nɔhalɛ mɔɔ bɛanli bɛammaa me la azo hanle munzule edwɛkɛ tiale me.
28 Menvale bɛ membale azɛlɛ ne mɔɔ menganle ndane kɛ mebava meamaa bɛ la azo.+ Mekɛ mɔɔ bɛnwunle awoka ndendenle ne mɔ nee mbaka buzuu ne mɔ amuala la,+ bɛbɔle ɔ bo bɛbɔle bɛ afɔle ne mɔ na bɛvale bɛ ahyɛlɛdeɛ ne mɔ bɛhanle me ɛya. Bɛbɔle afɔle evuanlɛ mɔɔ bɛ nye die nwolɛ* la na bɛguale afɔlebɔlɛ nza wɔ ɛkɛ.
29 Ɔti membizale bɛ kɛ, ‘Duzu ati a bɛkɔ ɛzonlenlɛ ɛleka* ɛhye ɛ? (Ɛnɛ nee ɛnɛ ala, bɛtɛfɛlɛ ye Ɛzonlenlɛ Ɛleka.)’”’+
30 “Akee ka kile Yizilayɛma kɛ, ‘Mɔɔ Tumivolɛ Awulae Gyihova ɛha la ɛne: “Asoo bɛgua bɛ nwo evinli kɛ mɔɔ bɛ nenyia mɔ yɛle la bɛahɔli bɛ kyibadeɛ ananze ne mɔ anzi na bɛ nee bɛ abɔ sunsum nu tuutuu ɛbɛla ɔ?+
31 Asoo ɛnɛ nee ɛnɛ ala bɛtɛgua bɛ nwo evinli ɔlua afɔle mɔɔ bɛbɔ bɛmaa bɛ kyibadeɛ ananze ne mɔ amuala la azo na bɛmaa bɛ mra fa senle nu ɔ?+ Asoo ɔwɔ kɛ mebua bɛ wɔ mɔɔ bɛkɛbiza la anwo wɔ mekɛ ko ne ala anu ɔ, O Yizilayɛma?”’+
“‘Mekɛ ala mɔɔ mede aze la, menrɛbua bɛ wɔ mɔɔ bɛkɛbiza la anwo,’ Tumivolɛ Awulae Gyihova a se a.+
32 ‘Na mɔɔ wɔ bɛ adwenle* nu na bɛka kɛ, “Bɛmaa yɛyɛ kɛ maanle maanle ne mɔ, yɛyɛ kɛ mbusua mɔɔ wɔ maanle gyɛne nu, mɔɔ bɛsonle* mbaka nee awolɛ la,”+ ɛnrɛyɛ zɔ ɛlɛ.’”
33 “‘Mekɛ ala mɔɔ mede aze la,’ Tumivolɛ Awulae Gyihova a se a, ‘Mebava ɛsalɛ mɔɔ anu yɛ se nee ɛsalɛ mɔɔ bɛdenrɛ nu yɛɛ ɛya mɔɔ bɛwola bɛgua la meali bɛ nwo zo belemgbunli.+
34 Mebava ɛsalɛ mɔɔ anu yɛ se nee ɛsalɛ mɔɔ bɛdenrɛ nu yɛɛ ɛya mɔɔ bɛwola bɛgua la meaye bɛ meavi menli ne mɔ anu na meaboɔboa bɛ nloa meavi maanle maanle mɔɔ membɔle bɛ asande mengɔle nu la anu.+
35 Mebava bɛ meara menli ne mɔ fienemgbole ne anu, na yɛ nye babɔ zo na meabua bɛ ndɛne wɔ ɛkɛ.+
36 “‘Kɛ mɔɔ membuale bɛ nenyia mɔ ndɛne wɔ fienemgbole ne mɔɔ wɔ Yigyibiti azɛlɛ zo anu la, zɔhane ala a mebabua bɛdabɛ noko ndɛne a,’ Tumivolɛ Awulae Gyihova a se a.
37 ‘Mebamaa bɛaze mboaneneavolɛ kpɔma bo+ na bɛali me ngyekyeleɛ ne azo.*
38 Noko mebaye atuadelɛma nee bɛdabɛ mɔɔ bɛto me mɛla ne la meavi bɛ nu.+ Ɔluakɛ mebaye bɛ meavi nyɛvolɛ azɛlɛ zo, noko bɛnrɛra Yizilayɛ azɛlɛ ne azo;+ na bɛbanwu kɛ medame a mele Gyihova a.’
39 “Na bɛmɛ, O Yizilayɛma, mɔɔ Tumivolɛ Awulae Gyihova ɛha la ɛne: ‘Bɛ nuhua ko biala ɛhɔzonle ye kyibadeɛ ananze ne mɔ.+ Noko saa yemɔ anzi bɛandie me a, bɛnrɛhola bɛnrɛva bɛ afɔlebɔlɛ ne mɔ nee bɛ kyibadeɛ ananze ne mɔ bɛnrɛgua me duma nwuanzanwuanza ne anwo evinli bieko.’+
40 “Tumivolɛ Awulae Gyihova se, ‘wɔ me boka nwuanzanwuanza ne azo, wɔ Yizilayɛ boka tendenle ne azo,+ Yizilayɛma amuala, bɛ kɔsɔɔti, bɛbazonle me wɔ azɛlɛ ne azo.+ Me nye balie bɛ nwo wɔ ɛkɛ, na me nye ala bɛ ndoboa nee bɛ ma mɔɔ limoa la afɔlebɔlɛ ne mɔ ade, bɛ ninyɛne nwuanzanwuanza ne mɔ amuala.+
41 Ɔlua bɛ afɔle evuanlɛ ne mɔɔ me nye die nwolɛ la ati, saa meye bɛ mefi menli ne mɔ anu na meboɔboa bɛ nloa mefi maanle maanle mɔɔ membɔle bɛ asande mengɔle nu la anu a,+ me nye balie bɛ nwo; na mebayɛ nwuanzanwuanza wɔ bɛ nu wɔ maanle maanle ne mɔ anyunlu.’+
42 “‘Na saa mefa bɛ meba Yizilayɛ azɛlɛ ne azo,+ azɛlɛ ne mɔɔ menganle ndane kɛ mebava meamaa bɛ nenyia mɔ la azo a, bɛbanwu kɛ medame a mele Gyihova a.+
43 Na ɛkɛ ne bɛbahakye ɛbɛla mɔɔ bɛbɔle nee bɛ nyɛleɛ kɔsɔɔti mɔɔ bɛvale bɛguale bɛ nwo evinli la,+ na ninyɛndane mɔɔ bɛyɛle la amuala ati, bɛbahyi bɛ nwo.*+
44 O Yizilayɛma, na saa me duma ne ati,+ meyɛ ɛhye memaa bɛ na me nee bɛ anli ye kɛ mɔɔ bɛ ɛbɛla ɛtane ne anzɛɛ bɛ nyɛleɛ kpɔlɔlera ne mɔ de la a, bɛbanwu kɛ medame a mele Gyihova a,’ Tumivolɛ Awulae Gyihova a se a.”
45 Na Gyihova nee me dendɛle bieko kɛ:
46 “Sonla ra, kakyi ɛ nye wɔ nyiakɛ nehane na bɔ edwɛkɛ ne nolo kile nyiakɛ, na ka ɛhoayelɛ mɔɔ wɔ nyiakɛ ɛbɔ nu la anwo ngapezo.
47 Ka kile nyiakɛ ɛhoayelɛ ne kɛ, ‘Tie Gyihova edwɛkɛ ne. Mɔɔ Tumivolɛ Awulae Gyihova ɛha la ɛne: “Nea meto senle wɔ wɔ avinli,+ na ɔbayela baka amolɛ nee baka welera biala mɔɔ wɔ wɔ avinli la. Bɛnrɛnlua sendɔlɔra ne,+ na ɔbayelɛyela awie biala anyunlu,* ɔvi nyiakɛ yeahɔdwu sɔlɔ.
48 Na nwonane biala* banwu kɛ medame Gyihova a mendole senle nu a, amaa bɛannua ye.”’”+
49 Na menganle kɛ: “O Tumivolɛ Awulae Gyihova! Bɛlɛkeha ye wɔ me nwo kɛ, ‘Asoo tɛ agyebɛ a ɔlɛkye* a?’”
Ɔbodwɛkɛ
^ Anzɛɛ “kɛ ɛka ndɛnebualɛ wɔagua bɛ nwo zo ɔ?”
^ Hibulu aneɛ nu, “memaanle me sa zo.”
^ Hibulu aneɛ nu, “ma.”
^ Anzɛɛ “mehɔnleɛnlea zo.”
^ Anzɛɛ “mɔɔ bɛziezie zolɛ.”
^ Ɔbayɛ kɛ Hibulu edwɛkɛkpɔkɛ ɛhye nee edwɛkɛkpɔkɛ mɔɔ kile “nane ebinli” la le ko na ɔle edwɛkɛ mɔɔ ɛngile ɛbulɛ.
^ Ɛhye kile, Yizilayɛma nwunle.
^ Ɛhye kile, Yizilayɛma.
^ Ɛhye kile, Yizilayɛma.
^ Hibulu aneɛ nu, “mɔɔ bɛziezie zolɛ.”
^ Hibulu aneɛ nu, “me nye nwunle.”
^ Ɛhye kile, Yizilayɛma.
^ Hibulu aneɛ nu, “ɛnee bɛ nye li.”
^ Anzɛɛ “kola kpɔda bɛ.” Hibulu aneɛ nu, “bɛ kunlu dwo nwolɛ.”
^ Hibulu aneɛ nu, “ɛleka mɔɔ wɔ anwuma.”
^ Hibulu aneɛ nu, “sunsum.”
^ Anzɛɛ “bɛyɛ gyima bɛmaa.”
^ Hibulu aneɛ nu, “bara ɔ bo.”
^ Hibulu aneɛ nu, “bɛ nyunlu.”
^ Anzɛɛ “azɛlɛ ne azo amuala.”
^ Anzɛɛ “menli kɔsɔɔti.”
^ Anzɛɛ “ɛrɛlɛ a ɔlɛbu.”
