Mrɛlɛbulɛ 28:1-28
28 Amumuyɛma nriandi wɔ mekɛ mɔɔ awie ɛndoa bɛ la,Noko tenlenema lɛ anwodozo kɛ awenade.*+
2 Saa mɛladonlɛ wɔ azɛlɛ ne azo a, tumivolɛ ko ba kɔ na fofolɛ ba,+Noko ɔlua sonla mɔɔ lɛ adwenlenunwunlɛ na ɔze nrɛlɛbɛ la moalɛ zo, tumivolɛ bagyinla kpundii ahyɛ.+
3 Ehyianli mɔɔ sisi koahweabane la+Le kɛ ezule mɔɔ pia aleɛ kɔsɔɔti kɔ la.
4 Bɛdabɛ mɔɔ bɛkpo mɛla ne la kanvo amumuyɛnli,Noko bɛdabɛ mɔɔ bɛdi mɛla zo la, fa bɛ nwo ɛya kpole.+
5 Ɛtanevolɛma ɛnde pɛlepɛlelilɛ bo,Noko bɛdabɛ mɔɔ bɛkpondɛ Gyihova la kola te debie biala abo.+
6 Ehyianli mɔɔ fa nɔhalɛlilɛ* dua la le kpalɛTɛla sukoavolɛ mɔɔ ye ndenle nu ɛnle kpalɛ la.+
7 Ralɛ mɔɔ lɛ ndelebɛbo la di mɛla zo,Noko mɔɔ nee adidikpokuma tu la, gua ye papa anyunlu aze.+
8 Sonla mɔɔ dua mpaefoa kpole zo maa ye anwonyia yɛ kpole+ laBoɔboa ɔ nloa maa sonla mɔɔ do ehyiavolɛma la.+
9 Sonla mɔɔ kpo kɛ ɔkɛdie mɛla ne la,—Ye asɔneyɛlɛ bɔbɔ le kyibadeɛ.+
10 Sonla mɔɔ bɛlɛbɛla tenlenenli maa ɔfa adenle ɛtane zo la, badɔ ɔdaye mumua ne ye kuma nu,+Noko mɔɔ edwɛkɛ ɛnle ɔ nwo la banyia debie kpalɛ.+
11 Sukoavolɛ anye zo a ɔze nrɛlɛbɛ,+Noko ehyianli mɔɔ lɛ adwenlenunwunlɛ la, kola nwu mɔɔ wɔ ye nu la.+
12 Saa tenlenema di konim a, ɔle anyunlunyia kpole,Noko saa amumuyɛma ɛlɛdi tumi a menli kɔfea.+
13 Sonla mɔɔ fea ye mɛladonlɛ ne mɔ azo la, ɔnrɛwie ye boɛ,+Noko mɔɔ ɔka na ɔgyakyi bɛ ɛyɛlɛ la, bɛbanwu ye anwunvɔne.+
14 Anyelielɛ a le sonla ne mɔɔ nea ɔ nwo boɛ* dahuu la,Noko awie biala mɔɔ kpunli ye ahonle la, munzule bado ye.+
15 Tumivolɛ mɔɔ le amumuyɛ na ɔnea menli mɔɔ ɛnlɛ boavolɛ anwo zo laLe kɛ awenade mɔɔ ɛlɛkulu yɛɛ ezizile mɔɔ ɛva ɛya ɛlɛba la.+
16 Adekilevolɛ mɔɔ ɛnlɛ adwenlenunwunlɛ la fa ye tumi ne di gyima wɔ adenle ɛtane zo,+Noko sonla mɔɔ kyi nvasoɛ ɛtane la ngoane mekɛ bawa.+
17 Awie mɔɔ di mogya nwo fɔlɛ kɛ yehu sonla la banriandi too yeahɔdwu nla* ne anu.+
Mmamaa awie biala boa ye.
18 Sonla mɔɔ edwɛkɛ ɛnle ɔ nwo la, bɛbalie ye ngoane,+Noko mɔɔ ye ndenle nu kyeɛhyea la badɔ aze arɛlevilɛ nu.+
19 Sonla mɔɔ yɛ ye azɛlɛ zo gyima* la banyia aleɛ dɔɔnwo,Noko mɔɔ di ninyɛne mɔɔ nvasoɛ ɛnle zo anzi la bali ehyia kpole.+
20 Sonla mɔɔ di nɔhalɛ la banyia nyilalɛ dɔɔnwo,+Noko sonla mɔɔ pele kɛ ɔnyia ɔ nwo ndɛndɛ la ɛnrɛva ɔ nwo ɛnrɛli.+
21 Ɔnle kpalɛ kɛ ɛkɛnlea sonla nyunlu ɛkɛli ɛkɛmaa ye;+Noko sonla kola yɛ ɛtane ɔlua paano sinli ti.
22 Anyebolo sonla kpondɛ kɛ ɔnyia ɔ nwo,Noko ɔnze kɛ ehyia bado ye.
23 Awie biala mɔɔ twi sonla nyunlu la+ nzinlii banyia ɛlolɛ dɔɔnwo+Adɛla sonla mɔɔ fa ɔ tafinlima kanvo awie adalɛ nu la.
24 Awie biala mɔɔ wua ye papa nee ye mame na ɔka kɛ, “Ɔnle ɛtane”+ la,
Le sonla mɔɔ sɛkye ninyɛne la agɔnwo.+
25 Anyebolo sonla* twehwe kpolera,Noko awie biala mɔɔ fa ɔ nwo to Gyihova anwo zo la bakpazi.*+
26 Awie biala mɔɔ fa ɔ nwo to ɔdaye mumua ne ye ahonle zo la le koasea,+Noko bɛbalie mɔɔ fa nrɛlɛbɛ dua la ngoane.+
27 Awie biala mɔɔ maa ehyianli debie la ɛnrɛhyia ɛhwee,+Noko sonla mɔɔ fa ɔ nye fea bɛ la, banyia amowa dɔɔnwo.
28 Saa amumuyɛma ɛlɛdi tumi a sonla kɔfea,Noko saa bɛ bo zo bɔ a, tenlenema anwo so.+
Ɔbodwɛkɛ
^ Anzɛɛ “awenade ekyi.”
^ Anzɛɛ “munlililɛ.” Nea Edwɛkɛbohilelɛ.
^ Anzɛɛ “sulo ɔ nwo.”
^ Anzɛɛ “kuma.”
^ Anzɛɛ “so ye ɛya.”
^ Anzɛɛ ɔkola ɔkile, “Ɛkɛla mɔɔ memaa ɔ nwo zo la.”
^ Hibulu aneɛ nu, “bɛbamaa yeayɛ belane.”
