Gyɛlɛmaya 30:1-24
-
Ɛkyekyelɛ bieko nee ayileyɛlɛ nwo ɛwɔkɛ ne mɔ (1-24)
30 Edwɛkɛ mɔɔ vi Gyihova ɛkɛ rale Gyɛlɛmaya ɛkɛ ne la ɛne, ɔse:
2 “Mɔɔ Gyihova, Yizilayɛ Nyamenle ne ɛha la ɛne, ‘Kɛlɛ edwɛkɛ mɔɔ meka meahile wɔ la kɔsɔɔti wɔ buluku nu.
3 Ɔluakɛ “nea! mekɛ ɛlɛba,” Gyihova a se a, “mɔɔ mebaboɔboa me menli Yizilayɛma nee Dwudama mɔɔ wɔ akɛlɛzonlenlɛ nu la anloa a,”+ Gyihova a se a, “na mebava bɛ meazia meara azɛlɛ ne mɔɔ menvale memaanle bɛ nenyia mɔ la azo, na bɛbadɛnla zolɛ bieko.”’”+
4 Edwɛkɛ mɔɔ Gyihova hanle hilele Yizilayɛ nee Dwuda la ɛne.
5 Mɔɔ Gyihova ɛha la ɛne:
“Yɛde anwowosolɛ ɛnelɛ;Ɛzulolɛ ngome, na anzodwolɛ ɛnle ɛkɛ.
6 Mesɛlɛ bɛ, bɛbiza, asoo nrenyia kola nrenzɛ wo ralɛ?
Ɛnee duzu ati a menwu kɛ sonla nrenyia biala ɛva ɔ sa ɛgua ɔ ko zo*Kɛ raalɛ mɔɔ ɛlɛwo la ɛ?+
Duzu ati a awie biala anyunlu ɛkpa* a?
7 Bɛ gyakɔ! Ɔluakɛ kenle zɔhane yɛ ɛzulolɛ.*+
Kenle biala nee ye ɛnzɛ,Ɔle anwongyelelɛ mekɛ ɔmaa Gyekɔbo.
Noko bɛbalie ye bɛavi nu.”
8 “Na kenle zɔhane,” ɛlɔne Gyihova a se a, “mebabubu gyɛnvayile ne anu meavi ɛ kɔme zo, na meatete wɔ nyɛma ne mɔ anu; na nyɛvolɛ* ɛnrɛva ye* ɛnrɛyɛ bɛ akɛlɛ bieko.
9 Bɛbazonle Gyihova bɛ Nyamenle ne nee bɛ Belemgbunli Devidi mɔɔ mebamaa ye zo meamaa bɛ la.”+
10 “Na wɔmɔ me sonvolɛ Gyekɔbo, mmasulo,” Gyihova a se a,“Na mmamaa wɔ ahonle tu, O Yizilayɛ.+
Ɔluakɛ mebalie wɔ meavi moamoaNa mealie ɛ bo zo amra meavi akɛlɛzonlenlɛ maanle nu.+
Gyekɔbo bazia ara na ɔ nwo badɔ ye na ɔ nzo nu adwo ye,Na awie biala ɛnrɛha bɛ ɛzulolɛ.”+
11 “Ɔluakɛ me nee wɔ lua kɛ medie wɔ,” Gyihova a se a.
“Noko mebabɔ maanle maanle mɔɔ membɔle wɔ asande mengɔle zo la kɔsɔɔti abo zo;+Noko wɔmɔ, menrɛbɔ ɛ bo zo.+
Mebadea* wɔ kɛ mɔɔ ɔfɛta la,Na menrɛmaa ɛnrɛva ɛ nwo ɛnrɛli.”+
12 Mɔɔ ɛlɔne Gyihova ɛha la ɛne:
“Bɛnrɛhola wɔ ɛbodalɛ ne ayile yɛ.+
Wɔ hanlɛ ne ɛnlɛ ye ayile.
13 Awie ɛnle ɛkɛ mɔɔ ɔbali wɔ edwɛkɛ yeamaa wɔ a,Bɛnlɛ wɔ hanlɛ ne anwo ayile.
Bɛnrɛhola bɛnrɛyɛ wɔ ayile.
14 Wɔ kulovolɛma kɔsɔɔti arɛle ɛvi wɔ.+
Bɛmkpondɛ ɛ bo zo bieko.
Ɔluakɛ meva kpɔvolɛ baka mebɔ wɔ,+Meva atisesebɛma anzohwenlɛ memaa wɔ,Ɔlua wɔ fɔlɛlilɛ kpole ne nee wɔ ɛtane dɔɔnwo ne ati.+
15 Duzu ati a wɔ ɛbodalɛ ne ati ɛtea nu kpole ɛ?
Wɔ nyanelilɛ ne ɛnrɛvi ɛkɛ ɛlɛ!
Wɔ fɔlɛlilɛ kpole ne nee wɔ ɛtane dɔɔnwo ne ati a+Meva ɛhye meyɛ wɔ a.
16 Ɛhye ati bɛbazɛkye bɛdabɛ mɔɔ bɛsɛkye wɔ la amuala,+Na wɔ kpɔvolɛma amuala noko bahɔ akɛlɛzonlenlɛ nu.+
Bɛdabɛ mɔɔ bɛwua wɔ la bɛbawua bɛ,Na mebamaa bɛave bɛdabɛ mɔɔ bɛfe wɔ ninyɛne la kɔsɔɔti ninyɛne.”+
17 “Na mebayɛ wɔ nganlɛ ne mɔ ayile meamaa wɔade kpɔkɛ,”+ Gyihova a se a,“Bɛvɛlɛle wɔ awie mɔɔ bɛkpo ye:
‘Zayɔn, mɔɔ awie biala ɛmkpondɛ ye la.’”+
18 Mɔɔ Gyihova ɛha la ɛne:
“Nea, melɛboɔboa Gyekɔbo abozoamra mɔɔ wɔ akɛlɛzonlenlɛ nu la anloa,+Na meanwu ye tɛnlabelɛ ne anwunvɔne.
Bɛbakyekye suakpole ne wɔ ye boka ne azo bieko,+Na aranemgbole ne agyinla ɔ bo zo ne.
19 Na moyɛlɛ nee ɛzelekɛ ɛnelɛ bɛavi bɛ ɛkɛ ne ara.+
Mebamaa bɛ nwo azo, na bɛ nwo ɛnrɛha ekyi;+Mebamaa bɛ nwo azo kpalɛ,*Na bɛnrɛyɛ ekyi.+
20 Ɔ mra bayɛ kɛ dɛba ne la,Na bɛbayɛ maanle mɔɔ yɛ se la wɔ me nyunlu.+
Me nee menli mɔɔ sisi ye la kɔsɔɔti bali.+
21 Ye nuhua a ye adekilevolɛ vi bara a,Yɛɛ ye nuhua a ye tumivolɛ vi bara a.
Mebamaa yeabikye me, na yeara me nwo ɛkɛ.”
“Anrɛɛ nwane a ɔdaye ɔbahola yeabikye me a?” Gyihova a se a.
22 “Bɛbayɛ me menli+ na medame noko meayɛ bɛ Nyamenle.”+
23 Nea! Gyihova ahumu ne badu, ye ɛya kpole ne badu kɛ ahumuakyima la,+Ɔbadu yeahɔgua amumuyɛnli ne ati zo.
24 Gyihova ɛya wuluwulu ne ɛnrɛziaKɔkpula kɛ ɔbayɛ mɔɔ yezuzu nwo wɔ ye ahonle nu la yeawie.+
Awieleɛ mekɛ ne anu a, bɛbade ɛhye abo a.+
Ɔbodwɛkɛ
^ Anzɛɛ “ɛzɔ ɔ nze.”
^ Anzɛɛ “ɛyɛ nwohyee.”
^ Hibulu aneɛ nu, “le kpole.”
^ Anzɛɛ “maanle gyɛne zo amra.”
^ Anzɛɛ “bɛ.”
^ Anzɛɛ “Mebadenrɛdenrɛ.”
^ Anzɛɛ ɔkola ɔkile, “Mebali bɛ eni.”
