Edwɛne 89:1-52
Masekele.* Ɛzelaenli Yitan+ edwɛne.
89 Mebado Gyihova ɛlɔlɛ kpundii ne mɔɔ ɔda ye ali la anwo edwɛne dahuu.
Mebava me nloa meaha wɔ nɔhalɛlilɛ ne anwo edwɛkɛ meahile awolɛndoazo kɔsɔɔti.
2 Ɔluakɛ meha kɛ: “Ɛlɔlɛ kpundii badɛnla ɛkɛ ne dahuu,+Yɛɛ wɔva wɔ nɔhalɛlilɛ ne wɔzie ɛkɛ ne kpundii wɔ anwuma.”
3 “Me nee ahenle mɔɔ mekpa nu meye ye la ɛyɛ ngyekyeleɛ;+Meha me sonvolɛ Devidi ndane kɛ:+
4 ‘Mebava ɛ ra meazie ɛkɛ ne dahuu,+Na meamaa wɔ belemgbunli ebia ne adɛnla ɛkɛ wɔ awolɛndoazo kɔsɔɔti anu.’”+ (Sila)
5 O Gyihova, anwuma ye wɔ nwanwane ninyɛne ne mɔ ayɛlɛ,Ɛhɛe, bɛye wɔ nɔhalɛlilɛ ne noko ayɛlɛ wɔ nwuanzanwuanzama asafo ne anu.
6 Ɔluakɛ nwane a wɔ anwuma nehane mɔɔ bɛbava ye bɛatoto Gyihova anwo a?+
Nyamenle amra ne mɔ*+ anu boni a nee Gyihova sɛ a?
7 Bɛsulo Nyamenle wɔ nwuanzanwuanzama ne ayia bo;+Ɔle kpole yɛɛ ɔ nwo yɛ ɛzulolɛ tɛla bɛdabɛ mɔɔ bɛbɔ ye bɛyia la amuala.+
8 O ɛlɔne Gyihova Nyamenle,Nwane a lɛ tumi kpole kɛ ɛdawɔ a, O Gyaa?+
Wɔ nɔhalɛlilɛ ɛbɔ wɔ ɛyia.+
9 Ɛlɛ tumi wɔ nyevile mɔɔ ɛyɛ begyebegye la anwo zo;+Saa ye azɛlɛkye ne mɔ maa bɛ nwo zo a, ɛmaa bɛgua dii.+
10 Wɔbubu Releehabe+ dwɔkɔdwɔkɔ kɛ awie mɔɔ bɛhu ye la.+
Wɔva wɔ tumi ne* wɔbɔ wɔ kpɔvolɛma asande.+
11 Anwuma le wɔ ɛdeɛ, yɛɛ azɛlɛ ye noko le wɔ ɛdeɛ;+Ewiade nee nuhua ninyɛne muala+—ɛdawɔ a ɛyɛle a.
12 Ɛdawɔ a ɛbɔle sɔlɔ nee nyiakɛ a;Teebɔ+ nee Hɛmɔn+ fa anyelielɛ ye wɔ duma ne ayɛlɛ.
13 Tumi kpole wɔ ɛ sa kpɔma ne anu;+Ɛ sa yɛ se;+Bɛkpogya ɛ sa fema ne zo.+
14 Tenleneyɛlɛ nee pɛlepɛlelilɛ le wɔ belemgbunli ebia ne adiabo;+Ɛlɔlɛ kpundii nee nɔhalɛlilɛ gyi ɛ nyunlu.+
15 Anyelielɛ a le menli mɔɔ fa ɛnelɛ fɛlɛko ye wɔ ayɛlɛ la.+
O Gyihova, bɛdua ɛ nyunlu wienyi ne anu.
16 Bɛdi fɛlɛko wɔ wɔ duma ne anu dahuu,Na bɛkpogya bɛ zo wɔ wɔ tenleneyɛlɛ ne anu.
17 Ɔluakɛ ɛle bɛ anwosesebɛ+ ne anyunlunyia,Na ɔlua wɔ ɛlolɛ zo yɛ anwosesebɛ* ne bayɛ kpole.+
18 Ɔluakɛ yɛ enyinlike ne vi Gyihova ɛkɛ,Yɛɛ yɛ belemgbunli ne vi Yizilayɛ Nwuanzanwuanza Ko ne ɛkɛ.+
19 Mekɛ zɔhane, ɛdendɛle ɛnyelɛzodeɛnwunlɛ nu ɛhilele wɔ nɔhavoma ne na ɛhanle kɛ:
“Meva anwosesebɛ memaa katakyie bie;+Mekpogya awie mɔɔ bɛkpa nu bɛye ye wɔ menli avinli la zo.+
20 Menwu me sonvolɛ Devidi;+Meva me nwole nwuanzanwuanza ne mekpokpa ye.+
21 Me sa bazɔ ye,+Na me sa kpɔma ne amaa ye anwosesebɛ.
22 Kpɔvolɛ biala ɛnrɛlie adwule ɛnrɛvi ye ɛkɛ,Yɛɛ amumuyɛnli biala ɛnrɛsisi ye.+
23 Mebabubu ye kpɔvolɛma dwɔkɔdwɔkɔ meavi ɔ nye zo+Na meaha bɛdabɛ mɔɔ bɛkyi ye la meagua.+
24 Me nɔhalɛlilɛ nee me ɛlɔlɛ kpundii ne nee ye de,+Na ye anwosesebɛ* ne bayɛ kpole wɔ me duma nu.
25 Mebava ɔ sa* meado nyevile ne azoNa meava ɔ sa fema ne meado azule ne mɔ azo.+
26 Ɔbadea nu yeavɛlɛ me kɛ: ‘Wɔmɔ a ɛle me Papa a,Me Nyamenle nee me ngoanedievolɛ Bodane.’+
27 Na mebayɛ ye me belamunli ralɛ,+Ɔbayɛ azɛlɛ ye azo arelemgbunli ne mɔ kpanyinli.+
28 Ɛlɔlɛ kpundii mɔɔ melɛ memaa ye la badɛnla ɛkɛ ne dahuu,+Yɛɛ ngyekyeleɛ mɔɔ me nee ye ɛyɛ la ɛnrɛzɛkye ɛlɛ.+
29 Mebava ɔ ra meazie ɛkɛ ne dahuuNa meamaa ye belemgbunli ebia ne adɛnla ɛkɛ ne kɛ anwuma la.+
30 Saa ɔ bo zo amra kpo me mɛla neNa bɛanlua me ndɛnebualɛ ne anu,
31 Saa bɛanli me ngyehyɛleɛ ne azoNa bɛanli me mɛla ne mɔ azo a,
32 Yemɔ mebava baka meahwe bɛ nzo wɔ bɛ anzosesebɛ* ne ati+Na meava empele meahwe bɛ nzo wɔ bɛ nvonleɛ ne ati.
33 Noko menrɛye me ɛlɔlɛ kpundii ne wɔ ɔ nwo zo+Yɛɛ menrɛmaa me ɛwɔkɛ ne ɛnrɛyɛ adalɛ.*
34 Menrɛtulu me ngyekyeleɛ ne+Anzɛɛ menrɛhakyi mɔɔ me nloa ɛha la.+
35 Meha ndane wɔ me nwuanzanwuanzayɛlɛ ne anu kokye;Menrɛbɔ adalɛ menrɛhile Devidi.+
36 Ɔ ra badɛnla ɛkɛ ne dahuu;+Ye belemgbunli ebia ne badɛnla ɛkɛ ne kɛ sɛnzɛne ne la wɔ me nyunlu.+
37 Ɔbayɛ kɛ siane ne la yeadɛnla ɛkɛ ne dahuuKɛ dasevolɛ nɔhavo wɔ anwomanyunlu.” (Sila)
38 Noko ɛdawɔ mumua ne wɔkpo ye na wɔvuandi ye wɔdo;+Wɔva mɔɔ wɔkpokpa ye la anwo ɛya kpole.
39 Wɔtulu ngyekyeleɛ ne mɔɔ ɛ nee wɔ sonvolɛ yɛle la;Wɔvuandi ye belemgbunli kyɛlɛ* ne wɔdo aze wɔmaa nwolɛ ɛgua evinli.
40 Wɔbubu ye awolɛ bane* ne mɔ kɔsɔɔti wɔgua;Wɔzɛkye ye aranemgbole ne mɔ bɔkɔɔ.
41 Bɛdabɛ mɔɔ bɛse ɛkɛ la amuala ɛve ye ninyɛne;Ɔ gɔnwo mɔ bɔ ye aholoba.*+
42 Wɔmaa bɛdabɛ mɔɔ bɛkyi ye la ɛli konim;*+Wɔmaa ye kpɔvolɛma kɔsɔɔti anye ɛlie.
43 Wɔammaa yeanva ye konle dadeɛ ne noko yeanyɛ ɛhwee,Yɛɛ wɔammaa yeangola konle ne anloa gyinla.
44 Wɔmaa ye anyunlunyia ɛwieNa wɔvuandi ye belemgbunli ebia ne wɔdo aze.
45 Wɔpɛ ye mgbavolɛ nu ngoane mekɛ ne azo;Wɔva anyiemgba wɔheda ye. (Sila)
46 O Gyihova, ɛbava ɛ nwo wɔavea wɔahɔdwu kenlenzu? Dahuu ɔ?+
Wɔ ɛya ne bahɔ zo azɔ kɛ senle ɔ?
47 Kakye kɛzi me ngoane le ezinra la!+
Asoo mgbane ala a ɛbɔle alesama kɔsɔɔti a?
48 Sonla boni a bahola adɛnla ngoane nu na ɔnrɛnwu ewule ɛlɛ a?+
Ɔbahola yealie ɔ nwo* yeavi Nla* tumi ne abo ɔ? (Sila)
49 O Gyihova, nienwu a wɔ alimoa ɛlɔlɛ kpundii ne,Mɔɔ ɛhanle nwolɛ ndane ɛhilele Devidi wɔ wɔ nɔhalɛlilɛ nu la wɔ a?+
50 O Gyihova, kakye kɛzi bɛgolo wɔ sonvolɛma anwo la;Kɛzi ɔwɔ kɛ megyinla menli kɔsɔɔti agolobɛnwo* ne anloa la;
51 Nea kɛzi wɔ kpɔvolɛma bɔ aholoba, O Gyihova;Nea kɛzi ahenle mɔɔ wɔkpokpa ye la tu ɔ gyakɛ ko biala a bɛbɔ ye aholoba la.
52 Ayɛlɛyelɛ ɛha Gyihova dahuu. Amen yɛɛ Amen.+
Ɔbodwɛkɛ
^ Nea Edwɛkɛbohilelɛ.
^ Anzɛɛ “anwumabɔvolɛma ne mɔ.”
^ Hibulu aneɛ nu, “ɛ sa kpɔma ne mɔɔ yɛ se la.”
^ Hibulu aneɛ nu, “mɛne.”
^ Hibulu aneɛ nu, “mɛne.”
^ Anzɛɛ “tumi.”
^ Anzɛɛ “atuadelɛ.”
^ Hibulu aneɛ nu, “Me nɔhalɛlilɛ ɛnrɛhakyi adalɛ.”
^ Anzɛɛ “abotile.”
^ Anzɛɛ “awolɛ ɛvealeka.”
^ Anzɛɛ “golo ɔ nwo.”
^ Hibulu aneɛ nu, “Wɔmaa bɛdabɛ mɔɔ bɛkyi ye la asa fema ne zo.”
^ Anzɛɛ “ye ɛkɛla.”
^ Hibulu aneɛ nu, “Sheol asa,” ɛhye kile, alesama nla. Nea Edwɛkɛbohilelɛ.
^ Anzɛɛ “aholobabɔlɛ.”
