Edwɛne 33:1-22
33 Bɛmɛ tenlenema, Gyihova ati, bɛva anyelielɛ bɛdeɛdea nu.+
Ɔfɛta kɛ tenlenema ye ye ayɛlɛ.
2 Bɛva haape bɛyɛ Gyihova mo;Bɛva nyɛma bulu getaa* bɛdo* ayɛlɛyelɛ edwɛne bɛmaa ye.
3 Bɛdo edwɛne fofolɛ bɛmaa ye;+Bɛbɔ getaa ne kpalɛ, na bɛva anyelielɛ bɛdeɛdea nu.
4 Ɔluakɛ Gyihova edwɛkɛ le fɔɔnwo,+Na yɛkola yɛfa yɛ nwo yɛto debie biala mɔɔ ɔkɛyɛ la azo.
5 Ɔkulo tenleneyɛlɛ nee pɛlepɛlelilɛ.+
Gyihova ɛlɔlɛ kpundii ne ɛyi azɛlɛ ye tɛkɛɛ.+
6 Gyihova luale ye edwɛkɛ zo a ɔbɔle anwuma a,+Yɛɛ ɔluale ɔ nloa anu sunsum* ne azo a ɔyɛle ninyɛne* kɔsɔɔti mɔɔ wɔ nu la a.
7 Ɔboɔboa nyevile ne anu nzule nloa kɛ asɛɛ bɛdo nwolɛ bane la;+Ɔfa nzule mɔɔ ɛlɛtu la ɔsie ninyɛnezielɛ ɛleka ne mɔ.
8 Bɛmaa azɛlɛ ye amuala ɛzulo Gyihova.+
Bɛmaa menli mɔɔ wɔ ewiade ye la ɛli ye eni.
9 Ɔluakɛ ɔdendɛle, na ɔyɛle zɔ;+Ɔhanle na ɔyɛle zɔ.+
10 Gyihova ɛmaa maanle maanle ne mɔ adwenle mɔɔ bɛbɔ la* ɛyɛ gyɛne;+Yemaa menli ne ngyehyɛleɛ ne mɔ* ɛyɛ mgbane.+
11 Noko kpɔkɛ mɔɔ Gyihova ɛbɔ la* bagyinla dahuu;+Ye ahonle nu nzuzulɛ wɔ ɛkɛ ɔvi awolɛndoazo zo kɔdwu awolɛndoazo zo.
12 Anyelielɛ a le maanle ne mɔɔ ye Nyamenle a le Gyihova,+Menli mɔɔ yekpa bɛ kɛ ye agyapadeɛ la.+
13 Gyihova fi anwuma to ɔ nye nea aze;Ɔnwu alesama kɔsɔɔti.+
14 Ɔvi ɛleka mɔɔ ɔde la,Ɔnea menli mɔɔ de azɛlɛ ne azo la.
15 Ɔdaye a ɔyɛle bɛ kɔsɔɔti bɛ ahonle a;Ɔneɛnlea bɛ gyima kɔsɔɔti anu.+
16 Ɛlɔne kpole+ ɛngola ɛnlie belemgbunli biala;Tumi kpole mɔɔ katakyie lɛ la ɛngola ɛnlie ye ngoane.+
17 Wɔ ngoanelielɛ* nu, ɛkpɔnwɔ ɛngola ɛnyɛ ɛhwee;+Ye anwosesebɛ kpole ne ɛngola ɛnlie ngoane.
18 Nea! Gyihova anye wɔ bɛdabɛ mɔɔ bɛsulo ye,+Bɛdabɛ mɔɔ bɛ nye la ye ɛlɔlɛ kpundii ne ade la anwo zo,
19 Kɛ ɔdie bɛ* yeavi ewule nuNa yeamaa bɛadɛnla ngoane nu wɔ ɛhɔne mekɛ nu.+
20 Yɛ nye la Gyihova anwo zo.
Ɔle yɛ boavolɛ nee yɛ enyinlike.+
21 Yɛ ahonle di fɛlɛko wɔ ye nu,Ɔluakɛ yɛfa yɛ nwo yɛto ye duma nwuanzanwuanza ne azo.+
22 O Gyihova, maa wɔ ɛlɔlɛ kpundii ne ɛrɛla yɛ nwo zo,+Wɔ mekɛ mɔɔ yɛlɛkendɛ wɔ la.+
Ɔbodwɛkɛ
^ Tete ɛdeɛ ne le ngakyile fi ɛnɛ mekɛ ye getaa nwo.
^ Anzɛɛ “bɛbɔ.”
^ Hibulu aneɛ nu, “bɛ ɛlɔne.”
^ Anzɛɛ “ɛnwomenle.”
^ Anzɛɛ “nzuzulɛ.”
^ Anzɛɛ “folɛdulɛ.”
^ Anzɛɛ “folɛdulɛ.”
^ Anzɛɛ “konimlilɛ.”
^ Anzɛɛ “bɛ ɛkɛla.”
