Dwɔn Edwɛkpa 1:1-51
1 Mɔlebɛbo ne ɛnee Edwɛkɛ ne wɔ ɛkɛ,+ ɛnee Edwɛkɛ ne nee Nyamenle a wɔ ɛkɛ a,+ na ɛnee Edwɛkɛ ne le nyamenle.+
2 Ɛnee ɛhye nee Nyamenle wɔ ɛkɛ wɔ mɔlebɛbo ne.
3 Ninyɛne kɔsɔɔti luale ɔ nwo zo a rale a,+ na debie ko bɔbɔ angoati ye amba.
Debie mɔɔ luale ɔ nwo zo rale la
4 a le ngoane, na ngoane ne a le alesama wienyi ne a.+
5 Wienyi ne ɛlɛta wɔ awozinli ne anu,+ na awozinli ne ɛngola ɛngeda zolɛ.
6 Nyamenle zoanle nrenyia bie; bɛfɛlɛ ye Dwɔn.+
7 Nrenyia ɛhye rale kɛ ɔbali daselɛ, amaa yeali wienyi ne anwo daselɛ+ na menli ngakyile kɔsɔɔti alua ɔ nwo zo alie ali.
8 Tɛ yemɔ a ɔle zɔhane wienyi ne a,+ na ɔrale kɛ ɔbali wienyi ne anwo daselɛ.
9 Ɛnee ɔnrɛhyɛ na nɔhalɛ wienyi ne mɔɔ ta awie biala anwo zo la ara ewiade.+
10 Ɛnee ɔwɔ ewiade ye,+ na ewiade ne luale ɔ nwo zo a rale a,+ noko ɛnee ewiade ne ɛnze ye.
11 Ɔrale ɔdaye mumua ne ye sua zo, na ye menli ne anlie ye.
12 Noko menli kɔsɔɔti mɔɔ liele ye la, ɔmaanle bɛnyianle adenle bɛrayɛle Nyamenle amra+ ɔluakɛ bɛnyianle diedi wɔ ye duma ne anu.+
13 Na tɛ mogya anzɛɛ nwonane anzɛɛ sonla ɛhulolɛ zo a bɛluale bɛwole bɛ a, emomu ɔvi Nyamenle.+
14 Yemɔti Edwɛkɛ ne rayɛle sonla+ na ɔ nee yɛ dɛnlanle, na yɛnwunle ye anyunlunyia ne, kɛ anyunlunyia mɔɔ selɛ fa maa ɔ ra mɔɔ ɔwole ye kokye la;+ na ɛnee Nyamenle ɛlolɛ* nee nɔhalɛlilɛ ɛyi ye tɛkɛɛ.
15 (Dwɔn lile ɔ nwo daselɛ, ɛhɛe, ɔdeanle nu kɛ: “Ɛhye a le mɔɔ menganle ɔ nwo edwɛkɛ kɛ, ‘Mɔɔ li me nzi ɛlɛba la ɛlimoa me nyunlu la, ɔluakɛ ɛnee ɔwɔ ɛkɛ na meara.’”)+
16 Ɛlolɛ kpole ɛyi ye tɛkɛɛ la ati, yɛ muala yɛnyia ɛlolɛ dɔɔnwo yɛvi ye ɛkɛ.
17 Kɛmɔ bɛluale Mosisi anwo zo a bɛvale Mɛla ne bɛmaanle la ati,+ ɛlolɛ kpole+ nee nɔhalɛ ne luale Gyisɛse Kelaese anwo zo a rale a.+
18 Awie biala ɛtɛnwunle Nyamenle ɛlɛ;+ nyamenle ne mɔɔ le ralɛ kokye ne+ na ɔwɔ Selɛ ne anwo ɛkɛ la,*+ yemɔ a yehile kɛzi Selɛ ne de a.+
19 Dwɔn lile daselɛ ɛhye wɔ mekɛ mɔɔ Dwuuma zoanle ɛsɔfoma nee Livaema vile Gyɛlusalɛm maanle bɛrabizale ye kɛ: “Wɔmɔ a le nwane?” la.+
20 Na yeanva yeanvea bɛ, ɔhanle ye wienyi kɛ: “Tɛ medame a mele Kelaese ne a.”
21 Na bɛbizale ye kɛ: “Ɛnee ɛle nwane? Wɔmɔ a ɛle Yilaegya ɔ?”+ Ɔbuale kɛ: “Tɛ medame ɔ.” “Wɔmɔ a ɛle Ngapezonli ne ɔ?”+ Na ɔbuale kɛ: “Kyɛkyɛ!”
22 Yemɔti bɛbizale ye kɛ: “Wɔmɔ a le nwane? Ka kile yɛ amaa yɛahola yɛabua menli mɔɔ zoanle yɛ la. Duzu a ɛka ye wɔ ɛ nwo a?”
23 Ɔhanle kɛ: “Mame a mele ɛnelɛ bie mɔɔ ɛlɛtea nu wɔ fienemgbole ne anu kɛ, ‘Bɛmaa Gyihova* adenle ne ɛdenrɛ,’+ kɛ mɔɔ ngapezonli Ayezaya hanle la.”+
24 Falasiima a zoanle menli mɔɔ rale la a.
25 Yemɔti bɛbizale ye kɛ: “Saa tɛ wɔmɔ a ɛle Kelaese ne anzɛɛ Yilaegya anzɛɛ Ngapezonli ne a, ɛnee duzu ati a ɛsɔne* menli ɛ?”
26 Dwɔn buale bɛ kɛ: “Mesɔne* menli wɔ nzule nu. Na awie gyi bɛ avinli mɔɔ bɛnze ye a,
27 mɔɔ li me nzi ɛlɛba la, menfɛta kɛ mekɛzianyi ye mgbɔlaboa zo nyɛma.”+
28 Ninyɛne ɛhye mɔ zile wɔ Bɛtani wɔ Dwɔdan ne anzi, ɛleka mɔɔ ɛnee Dwɔn ɛlɛsɔne* menli la.+
29 Aleɛ hyenle la, ɔnwunle kɛ Gyisɛse ɛlɛba ɔ nwo ɛkɛ ne na ɔhanle kɛ: “Nea, Nyamenle Boaneralɛ ne+ mɔɔ ɔbaye ɛtane+ yeavi ewiade la ɛne!+
30 Ɛhye a le ahenle mɔɔ menganle ɔ nwo edwɛkɛ kɛ: ‘Awie li me nzi ɛlɛba, na yelimoa me nyunlu la, ɔluakɛ ɛnee ɔwɔ ɛkɛ na meara.’+
31 Ɛnee menze ye bɔbɔ, noko deɛmɔti ɛnee melɛsɔne menli wɔ nzule nu la a le kɛ amaa bɛala ye ali bɛahile Yizilayɛ.”+
32 Dwɔn eza lile daselɛ kɛ: “Menwunle kɛ sunsum ne vi anwuma ɛlɛdwu ara ɔ nwo zo kɛ abubule la, na ɔrazinzele ɔ nwo zo.+
33 Ɛnee menze ye bɔbɔ, noko Mɔɔ zoanle me kɛ menzɔne menli wɔ nzule nu la zele me kɛ: ‘Ahenle mɔɔ ɛbanwu kɛ sunsum ne ɛrazinze ɔ nwo zo la,+ yemɔ a ɔbava sunsum nwuanzanwuanza ne yeazɔne menli a.’+
34 Na menwu ye yɛɛ meli nwolɛ daselɛ kɛ yemɔ a ɔle Nyamenle Ara ne a.”+
35 Ye alehyenlɛ bieko, ɛnee Dwɔn nee ye ɛdoavolɛma nwiɔ gyi ɛkɛ,
36 na mɔɔ ɔnwunle kɛ Gyisɛse ɛlɛpɛ nu la, ɔhanle kɛ: “Nea, Nyamenle Boaneralɛ ne ɛne!”+
37 Mɔɔ ɛdoavolɛma nwiɔ ne dele ɛhye la, bɛdoale Gyisɛse.
38 Akee Gyisɛse dole ɔ nye na ɔnwunle kɛ bɛdoa ye la, ɔbizale bɛ kɛ: “Duzu a bɛkpondɛ a?” Bɛbuale ye kɛ: “Relabae (ɔ bo kile “Kilehilevolɛ”), nienwu a ɛde a?”
39 Ɔzele bɛ kɛ: “Bɛrɛla, na bɛbanwu ye.” Yemɔti bɛhɔle na bɛnwunle ɛleka mɔɔ ɔde la, na bɛ nee ye dɛnlanle ɛkɛ kenle zɔhane; ɛnee bɛbɔ kɛyɛ nɔsolɛ dɔne nna.*
40 Saemɔn Pita adiema Andelu+ le menli nwiɔ ne mɔɔ dele mɔɔ Dwɔn hanle na bɛdoale Gyisɛse la anu ko.
41 Ɔlimoale ɔhɔnwunle ɔ diema Saemɔn na ɔzele ye kɛ: “Yɛnwu Mɛzaya ne”+ (ɔ bo kile “Kelaese”),
42 na ɔ nee ye hɔle Gyisɛse ɛkɛ. Mɔɔ Gyisɛse nwunle ye la, ɔhanle kɛ: “Wɔmɔ a ɛle Saemɔn,+ Dwɔn ara ne; bɛbavɛlɛ wɔ Sifase” (ɔ bo kile “Pita”).+
43 Aleɛ hyenle la ɛnee Gyisɛse kpondɛ kɛ ɔkɔ Galeli. Ɔnwunle Felepe+ na ɔzele ye kɛ: “Bɛla badoa me.”
44 Felepe vi Bɛteseeyeda, Andelu nee Pita sua zo.
45 Felepe nwunle Natanayɛle+ na ɔzele ye kɛ: “Yɛnwu ahenle mɔɔ Mosisi hɛlɛle ɔ nwo edwɛkɛ wɔ Mɛla ne anu, na Ngapezoma ne hɛlɛle ɔ nwo edwɛkɛ la: Gyisɛse, Dwosefi ara ne+ mɔɔ vi Nazalɛte la.”
46 Noko Natanayɛle bizale ye kɛ: “Asoo debie kpalɛ bahola avi Nazalɛte ara?” Felepe zele ye kɛ: “Bɛla banlea.”
47 Gyisɛse nwunle kɛ Natanayɛle ɛlɛba ɔ nwo ɛkɛ na ɔhanle ɔ nwo edwɛkɛ kɛ: “Nea, Yizilayɛnli mɔɔ amgba mɛlɛbɛla biala ɛnle ye nu la ɛne.”+
48 Natanayɛle bizale ye kɛ: “Kɛ ɔyɛle mɔɔ ɛnwunle me ɛ?” Gyisɛse buale ye kɛ: “Kolaa na Felepe avɛlɛ wɔ mɔɔ ɛnee ɛde feege baka ne abo la, yɛɛ menwunle wɔ a.”
49 Natanayɛle buale kɛ: “Relabae, wɔmɔ a ɛle Nyamenle Ara ne a, ɛle Yizilayɛ Belemgbunli.”+
50 Gyisɛse buale ye kɛ: “Kɛmɔ menganle mengilele wɔ kɛ menwunle wɔ kɛ ɛde feege baka ne abo la ati a wɔlie wɔli ɔ? Ɛbanwu ninyɛne mgbole mɔɔ tɛla ɛhye mɔ a.”
51 Akee ɔzele ye kɛ: “Nɔhalɛ nu meka meahile bɛ kɛ, bɛbanwu kɛ anwuma ɛbuke na Nyamenle anwumabɔvolɛma ɛlɛdi fodwu wɔ sonla Ra ne anwo ɛkɛ.”+
Ɔbodwɛkɛ
^ Anzɛɛ “ɛnee ɛlolɛ kpole.”
^ Anzɛɛ “Selɛ ne akɛnra anu la.” Ɛhye kile gyinlabelɛ titili bie.
^ Anzɛɛ “ɛnoma.”
^ Anzɛɛ “Menoma.”
^ Anzɛɛ “ɛlɛnoma.”
^ Giliki aneɛ nu, kɛyɛ dɔnehwele bulu ne azo.
