Dwɔhyua 3:1-17
-
Yizilayɛma pɛle Dwɔdan ne (1-17)
3 Akee Dwɔhyua dwazole nwonlomɔ mangyee ne na ɔ nee Yizilayɛma* kɔsɔɔti vile Hyetim+ na bɛhɔle Dwɔdan ne anloa. Bɛlale ɛkɛ ne nɔe ne kolaa na bɛapɛ.
2 Kenle nsa pɛle nu la mgbanyima ne mɔ+ hɔkpɔsale azokoɛleɛ ɛkɛ ne
3 na bɛzele menli ne kɛ: “Saa bɛnwu kɛ Livae ɛsɔfo ne mɔ ɛzoa Gyihova bɛ Nyamenle ne ngyekyeleɛ ɛlɛka ne ala a,+ bɛdu bɛ bo na bɛli ɔ nzi.
4 Noko bɛmaa adenle kɛyɛ kubit* 2,000 ɛla bɛ nee ye avinli; bɛmmabikye nwolɛ amaa bɛanwu adenle mɔɔ ɔwɔ kɛ bɛdua nu la, ɔluakɛ bɛtɛfale adenle ɛhye azo ɛlɛ.”
5 Akee Dwɔhyua zele menli ne kɛ: “Bɛde bɛ nwo,+ ɔluakɛ ɛhyema Gyihova bayɛ nwanwane ninyɛne wɔ bɛ avinli.”+
6 Akee Dwɔhyua zele ɛsɔfo ne mɔ kɛ: “Bɛva ngyekyeleɛ ɛlɛka ne+ na bɛze bɛli menli ne anyunlu.” Ɔti bɛvale ngyekyeleɛ ɛlɛka ne na bɛlile menli ne anyunlu.
7 Akee Gyihova zele Dwɔhyua kɛ: “Ɛnɛ kenle ye, mebabɔ ɔ bo meakpogya wɔ zo wɔ Yizilayɛma kɔsɔɔti anye zo,+ amaa bɛanwu kɛ me nee wɔ balua+ kɛ mɔɔ me nee Mosisi luale la.+
8 Ka kile ɛsɔfoma mɔɔ zo ngyekyeleɛ ɛlɛka ne la kɛ: ‘Saa bɛdwu Dwɔdan azule ne anloa a, bɛdwu nu na bɛgyinla Dwɔdan ne anu.’”+
9 Dwɔhyua zele Yizilayɛma kɛ: “Bɛrɛla ɛke bɛradie Gyihova bɛ Nyamenle ne edwɛkɛ.”
10 Akee Dwɔhyua hanle kɛ: “Ɛhye bamaa bɛanwu kɛ tease Nyamenle bie wɔ bɛ avinli,+ na kɛ ɔde ye biala la, ɔbavoa Keenama, Hɛtema, Havaema, Pilɛzema, Gɛgahyema, Amɔlema yɛɛ Gyibɛsema+ yeavi bɛ nyunlu.
11 Bɛnlea! Azɛlɛ ye kɔsɔɔti Amenle ngyekyeleɛ ɛlɛka ne ɛlɛse ali bɛ nyunlu ahɔ Dwɔdan ne anu.
12 Yemɔti bɛye mrenyia 12 bɛvi Yizilayɛ mbusua ne mɔ anu, abusua ko biala anu sonla ko,+
13 saa ɛsɔfo ne mɔ mɔɔ zo Gyihova, azɛlɛ ye kɔsɔɔti Amenle ngyekyeleɛ Ɛlɛka ne la agyakɛ ka* Dwɔdan ne anu nzule ne ala a, Dwɔdan nzule ne mɔɔ vi ye sɔlɔ se la bagyakyi ɛzenlɛ na bɛaboɔboa bɛ nloa bɛagyinla ɛleka ko kɛ bɛzi ye pike* la.”+
14 Ɔti mɔɔ menli ne vi bɛ ɛdanlɛ azua ne mɔ anu dule bɛ bo na ɔka ekyii bɛpɛ Dwɔdan ne la, ɛsɔfo ne mɔ mɔɔ zo ngyekyeleɛ ɛlɛka ne+ la zenle lile menli ne anyunlu.
15 Mekɛ mɔɔ ɛsɔfo ne mɔ mɔɔ zo Ɛlɛka ne la dwule Dwɔdan ne anloa na bɛvale bɛ gyakɛ bɛwulale azule ne anu ala la (ɔdwu ma ɛdelɛ mekɛ biala a Dwɔdan ne yi bu aze),+
16 nzule ne mɔɔ vi ye sɔlɔ se la gyinlanle ɛleka ko. Ɔyɛle kɛ pike* kpole wɔ moamoa wɔ Adam, suakpole ne mɔɔ bikye Zaletan la, na nzule ne mɔɔ se kɔgua Alaba Nyevile ne, mɔɔ le Ngyenle Nyevile ne* anu la sesanle. Azule ne gyinlanle, na menli ne luale ɛleka mɔɔ bikye Gyɛleko la pɛle.
17 Mekɛ mɔɔ ɛsɔfo ne mɔ mɔɔ zo Gyihova ngyekyeleɛ ɛlɛka ne tɛgyi azɛlɛ resee zo+ wɔ Dwɔdan ne avinli la, Yizilayɛma kɔsɔɔti luale azɛlɛ resee+ zo pɛle hɔkpulale kɛ maanle ne amuala pɛle Dwɔdan ne wiele la.
Ɔbodwɛkɛ
^ Hibulu aneɛ nu, “Yizilayɛ amra mrenyia ne mɔ.”
^ Hibulu aneɛ nu, “wula nu.”
^ Anzɛɛ “kɛ bane.”
^ Anzɛɛ “bane.”
^ Ɛhye kile, Nyevile Wulera ne.
