Dwɔhyua 14:1-15
14 Ɛhye a Yizilayɛma nyianle kɛ bɛ agyapadeɛ wɔ Keenama azɛlɛ zo a, ɛsɔfo Ɛlieza nee Nɛn ara Dwɔhyua yɛɛ Yizilayɛ mbusua mgbanyima ne mɔ a vale maanle bɛ a.+
2 Bɛguale ma* na bɛhyɛle+ mbusua ngɔnla nee foa ko ne agyapadeɛ ne bɛmaanle bɛ kɛ mɔɔ Gyihova luale Mosisi anwo zo hanle la.+
3 Ɛnee Mosisi ɛva mbusua nwiɔ nee foa ko ne agyapadeɛ ɛdeɛ ne ɛmaa bɛ wɔ Dwɔdan ne anzi lɔ,*+ noko yeammaa Livaema agyapadeɛ+ wɔ mbusua ne mɔ avinli.
4 Ɛnee bɛbu Dwosefi abozoamra ne kɛ bɛle mbusua nwiɔ,+ Manasɛ nee Yifelaem;+ na bɛammaa Livaema azɛlɛ ne bie, kyesɛ azuamgbole+ mɔɔ bɛbadɛnla zo nee ɛleka mɔɔ bɛ nyɛmoa badidi na bɛava bɛ ninyɛne bɛagua la ala.+
5 Ɔti Yizilayɛma hyɛle azɛlɛ ne kɛ mɔɔ Gyihova hanle hilele Mosisi la.
6 Akee Dwudama hɔle Dwɔhyua anwo ɛkɛ wɔ Gelegale,+ na Kinaezenli Gyɛfɛna ara Keelɛbe+ zele ye kɛ: “Ɛdawɔ ɛze mɔɔ Gyihova hanle+ hilele nɔhalɛ Nyamenle sonla Mosisi+ wɔ Keedɛhye-baanea+ mɔɔ fale ɛdawɔ nee me nwo la.
7 Mɔɔ Gyihova sonvolɛ Mosisi zoanle me wɔ Keedɛhye-baanea kɛ mengɔneɛnlea azɛlɛ ne la,+ ɛnee meli ɛvolɛ 40, na membanganle mɔɔ menwunle ye la nɔhalɛ nu.+
8 Me mediema ne mɔ mɔɔ me nee bɛ hɔle la maanle menli ne ahonle dule,* noko menvale me ahonle muala menlile Gyihova me Nyamenle ne anzi.+
9 Kenle zɔhane, Mosisi hanle kɛ: ‘Azɛlɛ ne mɔɔ ɛvale ɛ gyakɛ ɛziele zo la bayɛ ɛdawɔ nee ɛ bo zo amra agyapadeɛ dahuu, ɔboalekɛ wɔva wɔ ahonle muala wɔli Gyihova me Nyamenle ne anzi.’+
10 Kɛ mɔɔ Gyihova bɔle nwolɛ ɛwɔkɛ la,+ yemaa medɛnla ngoane nu+ ɛvolɛ 45 ɛhye ɔvi kenle mɔɔ Gyihova bɔle Mosisi ɛwɔkɛ ɛhye wɔ mekɛ mɔɔ ɛnee Yizilayɛma lua fienemgbole ne anu la;+ metɛte aze ɛnɛ, kɛkala meli ɛvolɛ 85.
11 Na ɛnɛ me nwo tɛyɛ se kɛ kenle mɔɔ Mosisi zoanle me ala la. Anwosesebɛ mɔɔ ɛnee melɛ wɔ zɔhane mekɛ ne mɔɔ ɛnee mefa mekɔ konle na mefa meyɛ gyima gyɛne la yemɔ ala a tɛbɔ ɛkɛ a.
12 Yemɔti fa awoka ne mɔ azo azɛlɛ ne mɔɔ Gyihova vale bɔle ɛwɔkɛ kenle zɔhane la maa me. Kenle zɔhane, ɛdele kɛ Anakema+ wɔ ɛkɛ yɛɛ bɛlɛ azuamgbole mɔɔ bɛlie nwolɛ bane la ɛdeɛ,+ noko meze kɛ Gyihova baboa me+ na meavoa bɛ* kɛ mɔɔ Gyihova hanle la.”+
13 Yemɔti Dwɔhyua yilale Gyɛfɛna ara Keelɛbe na ɔvale Hibulɔn ɔmaanle ye kɛ ye agyapadeɛ.+
14 Ɛhye ati a Hibulɔn le Kinaezenli Gyɛfɛna ara Keelɛbe agyapadeɛ badwu ɛnɛ la, ɔluakɛ ɔvale ye ahonle muala ɔlile Gyihova, Yizilayɛ Nyamenle ne anzi.+
15 Dɛba ne ɛnee bɛfɛlɛ Hibulɔn Keleate-aaba+ (ɛnee Aaba le sonlakpole wɔ Anakema avinli). Na konle anzi azɛlɛ ne azo bieko.+
Ɔbodwɛkɛ
^ Nea Edwɛkɛbohilelɛ.
^ Ɛhye kile, aduduleɛ afoa nu.
^ Hibulu aneɛ nu, “maanle menli ne ahonle holole.”
^ Anzɛɛ “meadu bɛ.”
