Dwɔhyua 10:1-43
10 Mekɛ mɔɔ Gyɛlusalɛm Belemgbunli Adonae-zidɛke dele kɛ Dwɔhyua ɛho ɛva Eyae na yezɛkye ye bɔkɔɔ na yeyɛ Eyae nee ye belemgbunli ne+ kɛ mɔɔ ɔyɛle Gyɛleko nee ye belemgbunli ne,+ nee kɛzi Gebɛyɔnoma nee bɛ ɛyɛ anzodwolɛ ngyekyeleɛ+ na bɛ nee bɛ de la,
2 ye ahonle dule kpole kpalɛ,+ ɔluakɛ Gebɛyɔn le suakpole kɛ arelemgbunli azuamgbole ne mɔ anu ko la. Ɔle kpole ɔtɛla Eyae,+ yɛɛ zolɛ mrenyia kɔsɔɔti ze konle nye zo.
3 Ɔti Gyɛlusalɛm Belemgbunli Adonae-zidɛke maanle bɛhɔhanle bɛhilele Hibulɔn+ Belemgbunli Hoham, Gyaamɔto Belemgbunli Paelam, Leekehye Belemgbunli Gyafaya yɛɛ Ɛgelɔn Belemgbunli+ Dibɛ kɛ:
4 “Bɛraboa me bɛmaa yɛho yɛtia Gebɛyɔnoma, ɔluakɛ bɛ nee Dwɔhyua nee Yizilayɛma ɛyɛ anzodwolɛ ngyekyeleɛ.”+
5 Yemɔti Amɔlema+ arelemgbunli nnu ne—Gyɛlusalɛm belemgbunli, Hibulɔn belemgbunli, Gyaamɔto belemgbunli, Leekehye belemgbunli yɛɛ Ɛgelɔn belemgbunli ne nee bɛ ɛlɔne ne mɔ hanle bɛ nwo bɔle nu na bɛhɔyɛle bɛ azokoɛleɛ kɛ bɛ nee Gebɛyɔnoma kaho.
6 Akee Gebɛyɔnoma maanle bɛhɔhanle bɛhilele Dwɔhyua wɔ Gelegale azokoɛleɛ+ ne kɛ: “Mmagyakyi wɔ ngɛkɛlɛ.*+ Bɛla ndɛndɛ! Balie yɛ na boa yɛ! Amɔlema arelemgbunli ne mɔ mɔɔ wɔ awoka ne mɔ azo la ɛra kɛ bɛ nee yɛ baho.”
7 Ɔti Dwɔhyua nee ye kovolɛma nee ye konle nu katakyiema ne kɔsɔɔti+ vi Gelegale hɔle.
8 Gyihova zele Dwɔhyua kɛ: “Mmasulo bɛ,+ ɔluakɛ meva bɛ mewula ɛ sa nu.+ Bɛ nuhua ko bɔbɔ ɛnrɛhola ɛnrɛgyinla ɛ nyunlu.”+
9 Dwɔhyua nee ye ɛlɔne ne vi Gelegale diale nɔe ne amuala na bɛrale bɛ agbɔvolɛ ne mɔ anwo zo mɔɔ bɛ nye ɛnla a.
10 Gyihova maanle bɛ nye zo danle bɛ wɔ Yizilayɛma anyunlu,+ na bɛhunle bɛ nuhua dɔɔnwo wɔ Gebɛyɔn, bɛdoale bɛ wɔ adenle ne mɔɔ fo kɔ Bɛte-hɔlɔn la azo na bɛhunle bɛ too bɛhɔdwule Azika nee Makidaa.
11 Mekɛ mɔɔ bɛlɛnriandi bɛavi Yizilayɛma anyunlu na bɛhɔdwule Bɛte-hɔlɔn ndololeɛ nu la, Gyihova maanle ezuawolɛ mgbole vi anwuma dɔle guale bɛ nwo zo too ɔhɔdwule Azika na bɛwule. Nɔhalɛ nu, bɛdabɛ mɔɔ ezuawolɛ ne hunle bɛ la zonle tɛla bɛdabɛ mɔɔ Yizilayɛma vale konle dadeɛ hunle bɛ la.
12 Kenle mɔɔ Gyihova hunle Amɔlema wɔ Yizilayɛma anye zo la, Dwɔhyua hanle hilele Gyihova wɔ Yizilayɛma anyunlu kɛ:
“Sɛnzɛne, gyinla zo+ wɔ Gebɛyɔn,+“Siane, gyinla zo wɔ Ayegyalɔn Bɔnza ne anu!”
13 Ɔti sɛnzɛne ne gyinlanle yɛɛ siane ne noko andu ɔ bo hɔkpulale kɛ maanle ne lile bɛ agbɔvolɛ nzenralɛ la. Asoo bɛtɛkɛlɛle ye wɔ Gyeehya buluku ne+ anu ɔ? Sɛnzɛne ne gyinlanle zo wɔ anwomanyunlu na yeanyɛ ye ndɛndɛ yeangɔdɔ wɔ asɛɛ kenle ko ne amuala anu.
14 Kenle zɛhae bie ɛtɛbale ɛlɛ, bie ɛnli ɔ nyunlu anzɛɛ ɔ nzi, mɔɔ Gyihova diele sonla ne a,+ ɔluakɛ ɛnee Gyihova ɛlɛko amaa Yizilayɛ.+
15 Ɛhye anzi, Dwɔhyua nee Yizilayɛma amuala ziale hɔle azokoɛleɛ ne wɔ Gelegale.+
16 Mekɛ zɔhane, arelemgbunli nnu ne nriandile na bɛhɔveale Makidaa+ bolɛ bɔne ne anu.
17 Na bɛhɔhanle bɛhilele Dwɔhyua kɛ: “Bɛnwu kɛ arelemgbunli nnu ne vea Makidaa+ bolɛ bɔne ne anu.”
18 Ɔti Dwɔhyua hanle kɛ: “Bɛhundo awolɛ mgbole bɛnyi bɔne ne anloa na bɛmaa menli ɛzinza bɛ.
19 Noko ɔwɔ kɛ bɛdabɛ mɔɔ bɛha la kɔ bɛ nyunlu. Bɛdoa bɛ agbɔvolɛ ne mɔ na bɛhu bɛ.+ Bɛmmamaa bɛwolo bɛ azuamgbole ne mɔ azo, ɔluakɛ Gyihova bɛ Nyamenle ne ɛva bɛ ɛwula bɛ sa nu.”
20 Mɔɔ Dwɔhyua nee Yizilayɛma hunle bɛ nuhua dɔɔnwo la anzi, mɔɔ asɛɛ bɛbɔ bɛ bo zo, na ɔhale bɛdabɛ mɔɔ bɛ sa anga bɛ na bɛnriandile bɛhɔwolole azuamgbole mɔɔ bɛlie nwolɛ bane la azo la,
21 menli ne amuala ziale hɔle Dwɔhyua ɛkɛ ne anzodwolɛ nu wɔ Makidaa azokoɛleɛ ne. Awie biala angola anga edwɛkɛ* antia Yizilayɛma.
22 Akee Dwɔhyua hanle kɛ: “Bɛbuke bolɛ bɔne ne na bɛye arelemgbunli nnu ne bɛvi bɔne ne anu bɛrɛlɛ me.”
23 Ɔti bɛyele arelemgbunli nnu ɛhye mɔ bɛvile bolɛ bɔne ne anu bɛrɛlɛle ye: Gyɛlusalɛm belemgbunli ne, Hibulɔn belemgbunli ne, Gyaamɔto belemgbunli ne, Leekehye belemgbunli ne yɛɛ Ɛgelɔn belemgbunli ne.+
24 Mekɛ mɔɔ bɛvale arelemgbunli ɛhye mɔ bɛrɛlɛle Dwɔhyua la, ɔvɛlɛle Yizilayɛ mrenyia kɔsɔɔti na ɔzele menli mɔɔ li ɛlɔne ne ati mɔɔ ɔ nee bɛ hɔle la kɛ: “Bɛrɛla bɛ nyunlu. Bɛva bɛ gyakɛ bɛziezie arelemgbunli ɛhye mɔ akɔme anzi.” Ɔti bɛrale bɛ nyunlu na bɛvale bɛ gyakɛ bɛzieziele bɛ kɔme anzi.+
25 Akee Dwɔhyua zele bɛ kɛ: “Bɛmmasulo yɛɛ bɛmmamaa bɛ ahonle tu.+ Bɛnyia akɛnrasesebɛ na bɛmaa bɛ nwo ɛyɛ se, ɔluakɛ ɛhye a Gyihova bava ayɛ bɛ kpɔvolɛma kɔsɔɔti mɔɔ bɛ nee bɛ baho la a.”+
26 Akee Dwɔhyua hunle bɛ na ɔhendanle bɛ wɔ mbaka nnu azo, na bɛhendɛhendanle ɛkɛ ne too nɔsolɛ nu.
27 Mɔɔ sɛnzɛne ne hɔdɔle la, Dwɔhyua maanle bɛyele bɛ bɛvile mbaka ne mɔ azo+ na bɛvuandinle bɛ bɛguale bolɛ bɔne ne mɔɔ bɛhɔveale nu la anu. Akee bɛvale awolɛ mgbole bɛnyinle bolɛ bɔne ne anloa, na ɛhye mɔ tɛbɔ ɛkɛ badwu ɛnɛ.
28 Dwɔhyua honle vale Makidaa+ wɔ kenle zɔhane na ɔvale konle dadeɛ ɔhunle bɛ. Ɔhunle ye belemgbunli ne nee awie* biala mɔɔ wɔ ɛkɛ ne la mɔɔ ko bɔbɔ anga a.+ Ɔyɛle Makidaa belemgbunli+ ne kɛ mɔɔ ɔyɛle Gyɛleko belemgbunli ne la.
29 Akee Dwɔhyua nee Yizilayɛma kɔsɔɔti vi Makidaa hɔle Lebena+ na bɛ nee Lebenama hɔhonle.
30 Gyihova eza vale Lebena nee ye belemgbunli ne+ wulale Yizilayɛma asa anu, na bɛvale konle dadeɛ bɛhunle awie* biala mɔɔ wɔ ɛkɛ ne la mɔɔ bɛangyakyi sonla ko bɔbɔ a. Ɔti bɛyɛle ye belemgbunli ne kɛ mɔɔ bɛyɛle Gyɛleko belemgbunli ne+ ala la.
31 Ɛhye anzi, Dwɔhyua nee Yizilayɛma kɔsɔɔti vi Lebena hɔle Leekehye+ na bɛyɛle bɛ azokoɛleɛ wɔ ɛkɛ na bɛ nee bɛ honle.
32 Gyihova vale Leekehye wulale Yizilayɛma asa anu, na bɛhonle bɛvale sua ne wɔ kenle mɔɔ tɔ zo nwiɔ la azo. Bɛvale konle dadeɛ bɛzɛkyele sua ne nee awie* biala mɔɔ wɔ zolɛ la+ kɛ mɔɔ bɛyɛle Lebena la.
33 Gizɛ Belemgbunli+ Hɔlam hɔle kɛ ɔkaboa Leekehye, noko Dwɔhyua hunle ye nee ye menli ne mɔ mɔɔ ko bɔbɔ anga a.
34 Akee Dwɔhyua nee Yizilayɛma amuala vi Leekehye hɔle Ɛgelɔn+ na bɛyɛle bɛ azokoɛleɛ wɔ ɛkɛ na bɛ nee bɛ hɔhonle.
35 Bɛhonle bɛvale sua ne kenle ko zɔhane na bɛvale konle dadeɛ bɛhunle bɛ. Bɛhunle awie* biala mɔɔ wɔ ɛkɛ ne la wɔ kenle zɔhane kɛ mɔɔ bɛyɛle Leekehye+ ala la.
36 Ɛhye anzi, Dwɔhyua nee Yizilayɛma kɔsɔɔti vi Ɛgelɔn hɔle Hibulɔn+ na bɛ nee bɛ hɔhonle.
37 Bɛhonle bɛvale sua ne na bɛzɛkyele ye na bɛvale konle dadeɛ bɛhunle ye belemgbunli ne, menli mɔɔ wɔ azua mɔɔ zuozua ye la azo la nee awie* biala mɔɔ wɔ zolɛ la mɔɔ ko bɔbɔ anga a. Kɛ mɔɔ ɔyɛle Ɛgelɔn la, zɔhane ala a ɔzɛkyele ye nee awie* biala mɔɔ wɔ ɛkɛ ne la a.
38 Awieleɛ bɔkɔɔ ne, Dwɔhyua nee Yizilayɛma kɔsɔɔti ziale hɔle Dibɛ+ anwo zo na bɛ nee bɛ hɔhonle.
39 Ɔlile sua ne, ye belemgbunli ne yɛɛ azua mɔɔ zuozua ye la anwo zo konim, na bɛvale konle dadeɛ bɛhunle awie* biala+ mɔɔ ko bɔbɔ anga a.+ Ɔyɛle Dibɛ belemgbunli ne kɛ mɔɔ ɔyɛle Hibulɔn nee Lebena arelemgbunli ne mɔ la.
40 Dwɔhyua lile maanle mɔɔ wɔ awoka ne mɔ azo, Nɛgɛbe, Hyifɛla+ nee ndololeɛ ne mɔ anu yɛɛ bɛ arelemgbunli kɔsɔɔti anwo zo konim, bɛangyakyi sonla ko bɔbɔ; ɔzɛkyele debie biala mɔɔ die ɛnwomenle la+ kɛ mɔɔ Gyihova, Yizilayɛ Nyamenle ne hanle la.+
41 Dwɔhyua lile bɛ nwo zo konim ɔvi Keedɛhye-baanea+ kɔdwu Gaza+ nee Gohyɛn+ azɛlɛ ne amuala azo too ɔhɔdwule Gebɛyɔn.+
42 Dwɔhyua honle vale arelemgbunli ɛhye mɔ nee bɛ azɛlɛ ne wɔ mekɛ ko ne ala anu, ɔluakɛ ɛnee Gyihova, Yizilayɛ Nyamenle ne a ɛlɛko amaa Yizilayɛ a.+
43 Akee Dwɔhyua nee Yizilayɛma amuala ziale rale Gelegale azokoɛleɛ ne.+
Ɔbodwɛkɛ
^ Hibulu aneɛ nu, “Mmagua ɛ sa aze wɔ wɔ ngɛkɛlɛ ne mɔ anwo.”
^ Hibulu aneɛ nu, “angola anzi ɔ tafinlima.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
^ Anzɛɛ “ɛkɛla.”
