Ditilɔnomi 7:1-26
7 “Saa Gyihova bɛ Nyamenle ne fa bɛ kɔ azɛlɛ ne mɔɔ bɛlɛkɔ bɛahɔva bɛayɛ bɛ agyapadeɛ la azo a,+ eza ɔbadu maanle maanle mɔɔ bɛ nwo zonle la yeavi zolɛ:+ Hɛtema, Gɛgahyema, Amɔlema,+ Keenama, Pilɛzema, Havaema yɛɛ Gyibɛsema,+ maanle nsuu mɔɔ bɛ nwo zonle na bɛ nwo yɛ se kpalɛ tɛla bɛ la.+
2 Gyihova bɛ Nyamenle ne bava bɛ awula bɛ sa nu na bɛali bɛ nwo zo konim.+ Ɔwɔ kɛ bɛsɛkye bɛ bɔkɔɔ.+ Ɔnle kɛ bɛ nee bɛ yɛ ngyekyeleɛ anzɛɛ bɛse bɛ anwunvɔne.+
3 Ɔnle kɛ bɛ nee bɛ yɛ agyalɛ ngyehyɛleɛ biala.* Bɛmmafa bɛ mra mraalɛ bɛmaa bɛ mra mrenyia yɛɛ bɛmmagya bɛ mra mraalɛ bɛmaa bɛ mra mrenyia.+
4 Ɔluakɛ bɛbahwe bɛ mra ne mɔ bɛavi me nwo na bɛahɔzonle nyamenle gyɛne;+ ɔba ye zɔ a Gyihova bava bɛ nwo ɛya na yeazɛkye bɛ ndɛndɛ.+
5 “Emomu, mɔɔ ɔwɔ kɛ bɛfa bɛyɛ bɛ la ɛne: Bɛbubu bɛ afɔlemokyea ne mɔ, bɛ ɛzonlenlɛ mpila ne mɔ,+ bɛpepɛ bɛ ɛzonlenlɛ mbaka*+ ne mɔ na bɛyela bɛ ananze ne mɔ mɔɔ bɛgua la.+
6 Ɔluakɛ bɛle menli nwuanzanwuanza bɛmaa Gyihova bɛ Nyamenle ne, na Gyihova bɛ Nyamenle ne ɛkpa bɛ ɛvi menli kɔsɔɔti mɔɔ wɔ azɛlɛ ye azo la anu kɛ bɛrayɛ ye menli, ye agyapadeɛ titili.*+
7 “Tɛ kɛ ɛnee bɛ nwo zonle tɛla menli ne kɔsɔɔti la ati a Gyihova hulole bɛ na ɔkpale bɛ a,+ ɔluakɛ ɛnee bɛdabɛ a bɛle ekyi kpalɛ wɔ menli kɔsɔɔti anu a.+
8 Emomu kɛmɔ Gyihova hulole bɛ yɛɛ kɛmɔ Gyihova lile ndane mɔɔ ɔhanle ɔhilele bɛ nenyia mɔ+ azo la ati a ɔvale ɛsalɛ mɔɔ tumi wɔ nu la ɔyele bɛ kɛ ɔdie bɛ yeavi akɛlɛzonlenlɛ sua nu,+ yeavi Yigyibiti Belemgbunli Falo tumi bo* a.
9 Bɛze ye wienyi kɛ Gyihova bɛ Nyamenle ne a le nɔhalɛ Nyamenle ne, nɔhavo Nyamenle ne, mɔɔ di ye ngyekyeleɛ zo na ɔda ɛlɔlɛ kpundii ali ɔkile awolɛndoazo mɔɔ tɔ zo apenle ko mɔɔ kulo ye na bɛdi ye mɛla zo la.+
10 Noko ɔbava ɛzɛkyelɛ yeadua menli mɔɔ kpɔ ye la kakɛ wɔ bɛ nye zo.+ Ɔnrɛhwenlehwenle ɔ bo aze wɔ menli mɔɔ kpɔ ye la ɛdeanlɛ nwo; ɔbadua bɛ kakɛ wɔ bɛ nye zo.
11 Ɔti bɛnlea boɛ na bɛli mɛla, adehilelɛ nee ngyehyɛleɛ ne mɔ mɔɔ melɛfa meamaa bɛ ɛnɛ la azo.
12 “Saa bɛkɔ zo bɛtie ngyehyɛleɛ ɛhye mɔ na bɛdi zo a, Gyihova bɛ Nyamenle ne bali ngyekyeleɛ ne nee ɛlɔlɛ kpundii ne mɔɔ ɔhanle nwolɛ ndane ɔhilele bɛ nenyia mɔ la azo.
13 Ɔbahulo bɛ na yeayila bɛ na yeamaa bɛ nwo azo. Ɛhɛe, ɔbayila bɛ yeamaa bɛawo mralɛ dɔɔnwo*+ na bɛ azɛlɛ ne ahye aleɛ, bɛ ma, bɛ nwanye fofolɛ, bɛ nwole,+ bɛ nlankɛ mralɛ nee bɛ mboane mralɛ nwo bazo wɔ azɛlɛ ne mɔɔ ɔhanle ndane ɔhilele bɛ nenyia mɔ kɛ ɔbava yeamaa bɛ la azo.+
14 Bɛbayila bɛ bɛadɛla menli kɔsɔɔti;+ nrenyia anzɛɛ raalɛ biala mɔɔ wɔ bɛ nu la ɛnrɛyɛ mota, yɛɛ bɛ nyɛmoa noko ɛnrɛyɛ mota.+
15 Gyihova baye anwodolɛ kɔsɔɔti avi bɛ nwo zo, na ɔnrɛva ewule ɛzulolɛ ne mɔ mɔɔ bɛnwunle bɛ wɔ Yigyibiti la bie ɔnrɛra bɛ nwo zo.+ Emomu ɔbava yeara menli mɔɔ kpɔ bɛ la kɔsɔɔti anwo zo.
16 Ɔwɔ kɛ bɛsɛkye* menli mɔɔ Gyihova bɛ Nyamenle ne bava bɛ awula bɛ sa nu la amuala.+ Ɔnle kɛ bɛse* bɛ anwunvɔne,+ yɛɛ ɔnle kɛ bɛsonle bɛ nyamenle ne mɔ,+ ɔluakɛ ɛhye bahola ayɛ ɛhane amaa bɛ.+
17 “Saa ɛka ye wɔ wɔ ahonle nu kɛ, ‘Maanle maanle ɛhye mɔ zonle tɛla yɛ. Kɛ ɔkɛyɛ na meavoa bɛ ɛ?’ a,+
18 ɔnle kɛ ɛsulo bɛ.+ Ɔwɔ kɛ ɛkakye mɔɔ Gyihova wɔ Nyamenle ne vale yɛle Falo nee Yigyibiti amuala,+
19 ndɛnebualɛ* mgbole ne mɔ mɔɔ ɛnwunle ye ɛ nye zo nee sɛkɛlɛneɛ+ nee nwanwane ninyɛne yɛɛ ɛsalɛ mɔɔ tumi wɔ nu nee ɛsalɛ mɔɔ bɛdende mɔɔ Gyihova wɔ Nyamenle ne vale yele wɔ vile ɛkɛ ne la.+ Zɔhane ala a Gyihova wɔ Nyamenle ne bava ayɛ menli mɔɔ ɛsulo bɛ la kɔsɔɔti a.+
20 Gyihova wɔ Nyamenle ne bamaa menli ne arɛle abɔ* kɔkpula kɛ bɛdabɛ mɔɔ bɛbaha+ mɔɔ bɛlɛfa bɛ nwo bɛavea bɛavi ɛ nyunlu la abo zo baminli la.
21 Mmasulo bɛ, ɔluakɛ Gyihova wɔ Nyamenle ne nee wɔ lua,+ ɔle Nyamenle kpole mɔɔ ɔ nwo yɛ ɛzulolɛ a.+
22 “Gyihova bɛ Nyamenle ne bavoa maanle maanle ɛhye mɔ avi bɛ nyunlu ngyikyi ngyikyi.+ Ɔnrɛmaa bɛnrɛzɛkye bɛ ndɛndɛ, amaa nane anwo ɛzulolɛ ne mɔ anwo anzo na bɛangyegye bɛ.
23 Gyihova bɛ Nyamenle ne bava bɛ awula bɛ sa nu na yeazɛkye bɛ bɔkɔɔ kɔkpula kɛ ɔbabɔ bɛ bo zo la.+
24 Ɔbava bɛ arelemgbunli ne mɔ yeawula bɛ sa nu+ na bɛakyikyi bɛ aluma bɛavi azɛlɛ ye azo.+ Awie biala ɛnrɛhola ɛnrɛgyinla bɛ nyunlu+ kɔkpula kɛ bɛbabɔ bɛ bo zo.+
25 Ɔwɔ kɛ bɛfa senle bɛyela bɛ ananze ne mɔ mɔɔ bɛgua la.+ Bɛmmamaa bɛ nye bolo dwɛtɛ fufule nee nvutuke ne mɔɔ wɔ nwolɛ la anzɛɛ bɛmmafa bie,+ amaa yeanzua bɛ ɛhane, ɔluakɛ ɔle Gyihova bɛ Nyamenle ne kyibadeɛ.+
26 Ɔnle kɛ bɛfa bɛkyi debie bɛba bɛ sua nu amaa bɛanyɛ kɛ deɛ ne mɔɔ ɔwɔ kɛ bɛsɛkye ye la. Ɔwɔ kɛ bɛmaa ɔyɛ bɛ ɛtane na bɛkyi ye bɔkɔɔ, ɔluakɛ ɔle debie mɔɔ ɔwɔ kɛ bɛsɛkye ye a.
Ɔbodwɛkɛ
^ Anzɛɛ “bɛgyigya bɛ nwo.”
^ Nea Edwɛkɛbohilelɛ.
^ Anzɛɛ “agyapadeɛ mɔɔ sonle bolɛ.”
^ Hibulu aneɛ nu, “asa anu.”
^ Hibulu aneɛ nu, “ɔbayila bɛ awodeɛ nu ma.”
^ Hibulu aneɛ nu, “bɛtete.”
^ Hibulu aneɛ nu, “kɛ bɛmaa bɛ nye se.”
^ Anzɛɛ “sɔnea.”
^ Anzɛɛ ɔkola ɔkile, “bamaa ɛzulolɛ aha menli ne.”
