Edwɛkɛsisilɛ Mɔɔ Tɔ Zo Nwiɔ 20:1-37
20 Ɛhye anzi, Mowabema+ nee Amɔnoma+ yɛɛ Amɔnɛmma* bie mɔ rale kɛ bɛ nee Gyɛhɔhyafate baho.
2 Ɔti bɛrahanle bɛhilele Gyɛhɔhyafate kɛ: “Menli dɔɔnwo kpalɛ bie vi maanzinli mɔɔ wɔ nyevile* ne anloa wɔ Yidɔm la ɛlɛba ɛ nwo zo,+ na bɛwɔ Hazazɔn-teema, mɔɔ le Ɛn-gidae la.”+
3 Ɛhye ati ɛzulolɛ hanle Gyɛhɔhyafate, na ɔbɔle kpɔkɛ* kɛ ɔkpondɛ Gyihova abo zo.+ Ɔti ɔmaanle Dwudama amuala hyele ɛhɔne.
4 Akee Dwudama boɔboale bɛ nloa kɛ bɛkpondɛ moalɛ bɛavi Gyihova ɛkɛ.+ Bɛvi Dwuda azuamgbole ne mɔ amuala azo bɛrale kɛ bɛbakpondɛ adehilelɛ bɛavi Gyihova ɛkɛ.
5 Akee Gyɛhɔhyafate dwazole gyinlanle Dwuda nee Gyɛlusalɛm asafo ne anyunlu wɔ Gyihova sua ne alienwo fofolɛ ne anyunlu,
6 na ɔhanle kɛ:
“O Gyihova, yɛ nenyia mɔ Nyamenle, tɛ ɛdawɔ a ɛle Nyamenle mɔɔ wɔ anwuma la;+ asoo ɛnli maanle maanle arelemgbunlililɛ ne mɔ kɔsɔɔti azo tumi?+ Tumi nee anwosesebɛ wɔ ɛ sa nu, na awie biala ɛngola ɛngyinla ɛ nyunlu.+
7 O yɛ Nyamenle, asoo wɔanvoa menli mɔɔ ɛnee de azɛlɛ ɛhye azo la wɔanvi wɔ menli Yizilayɛma anyunlu wɔanva azɛlɛ ne wɔammaa ɛ gɔnwo Ebileham abozoamra kɛ bɛ agyapadeɛ dahuu ɔ?+
8 Na bɛdɛnlanle zo, na bɛzile ɛzonlenlɛsua wɔ ɛkɛ bɛvale wɔ duma bɛdole zolɛ,+ na bɛhanle kɛ,
9 ‘Saa esiane to yɛ, na ɔle konle dadeɛ, ndɛnebualɛ ɛtane, ewulenzane anzɛɛ ɛhɔne a, maa yɛgyinla sua ɛhye anyunlu nee ɛ nyunlu (ɔluakɛ wɔ duma wɔ sua ɛhye anu)+ na yɛzu yɛvɛlɛ wɔ kɛ ɛboa yɛ wɔ yɛ anwongyelelɛ nu, na tie yɛ na die yɛ.’+
10 Kɛkala, Amɔnoma, Mowabema yɛɛ Siyɛ awoka ne azo amra+ mɔɔ wɔammaa Yizilayɛma anzɛkye bɛ wɔ mekɛ mɔɔ bɛvi Yigyibiti azɛlɛ ne azo bɛlɛba la ɛra ɛke. Bɛhwenle bɛ nwo bɛvile bɛ nwo na bɛambɔ bɛ bo zo.+
11 Na mɔɔ bɛfa bɛadua yɛ kakɛ la a le kɛ bɛlɛba ɛke bɛaravoa yɛ bɛavi wɔ azɛlɛ ne mɔɔ ɛvale ɛmaanle yɛ kɛ yɛ agyapadeɛ la azo.+
12 O yɛ Nyamenle, ɛnrɛbua bɛ ndɛne ɔ?+ Ɔluakɛ yɛnlɛ tumi biala wɔ menli dɔɔnwo ɛhye mɔɔ ɛlɛba yɛ nwo zo la anyunlu; na yɛnnwu mɔɔ yɛyɛ a,+ noko yɛ nye la ɛ nwo zo.”+
13 Na ɛnee Dwudama amuala gyigyi Gyihova anyunlu, bɛ nee bɛ mra ngyikyi, bɛ ye mɔ yɛɛ bɛ ngakula ne mɔ.*
14 Akee wɔ asafo ne avinli, Gyihova sunsum ne rale Gyeheezayɛle anwo zo, ɔle Zɛkalaya ara Bɛnaya ara Gyiyayɛle ara Matanaya ara, Livaenli mɔɔ vi Esafe abozoamra anu.
15 Ɔhanle kɛ: Dwudama amuala nee menli mɔɔ de Gyɛlusalɛm yɛɛ Belemgbunli Gyɛhɔhyafate, bɛyɛ ɛnzolɛ bɛdie! Mɔɔ Gyihova ɛlɛka ahile bɛ la ɛne, ‘Bɛmmasulo yɛɛ bɛmmamaa bɛ ahonle tu ɔlua menli dɔɔnwo ɛhye ati, ɔluakɛ konle ne ɛnle bɛ konle emomu ɔle Nyamenle ɛdeɛ.+
16 Ɛhyema, bɛhɔ bɛ nwo zo. Bɛbalua Zeze adenle ne anu a bɛara a, na bɛbanwu bɛ wɔ bɔnza ne awieleɛ wɔ Gyɛluwɛle fienemgbole ne anyunlu.
17 Ɔnrɛhyia kɛ bɛbaho konle ɛhye. Bɛgyinla bɛ bo zo ne, bɛmmatu bɛ bo,+ na bɛnlea kɛzi Gyihova balie bɛ ngoane* la.+ O Dwudama nee Gyɛlusalɛmma, bɛmmasulo yɛɛ bɛmmamaa bɛ ahonle tu.+ Ɛhyema bɛhɔ bɛ nwo zo na Gyihova nee bɛ balua.’”+
18 Ɛkɛ ne ala Gyɛhɔhyafate hotole na ɔbutule ɔ nyunlu aze, na Dwudama nee menli mɔɔ de Gyɛlusalɛm la amuala butubutule bɛ nyunlu aze wɔ Gyihova anyunlu na bɛzonlenle Gyihova.
19 Akee Livaema mɔɔ le Kohatema+ nee Kɔlama abozoamra la dwazole vale ɛnelɛ kpole yele Gyihova, Yizilayɛ Nyamenle ne ayɛlɛ.+
20 Aleɛ hyenle la, bɛdwazole nwonlomɔ mangyee ne na bɛhɔle Tɛkowa fienemgbole ne anu.+ Mɔɔ bɛlɛkɔ la, Gyɛhɔhyafate dwazole gyinlanle na ɔhanle kɛ: “O Dwuda nee menli mɔɔ de Gyɛlusalɛm la, bɛdie me! Bɛnyia Gyihova, bɛ Nyamenle ne anu diedi amaa bɛahola bɛagyinla kpundii. Bɛnyia ye ngapezoma ne mɔ anu diedi+ na ɔbawie bɛ boɛ.”
21 Mɔɔ ɔ nee menli ne vale adwenle wiele la, ɔkpale menli kɛ bɛdo edwɛne+ bɛmaa Gyihova na bɛwulowula adɛladeɛ nwuanzanwuanza bɛye ye ayɛlɛ wɔ mekɛ mɔɔ bɛli menli mɔɔ ɛziezie bɛ nwo ɛmaa konle ne anyunlu la, na ɛnee bɛlɛka kɛ: “Bɛyɛ Gyihova mo, ɔluakɛ ye ɛlɔlɛ kpundii ne wɔ ɛkɛ ne dahuu.”+
22 Mɔɔ bɛbɔle ɔ bo kɛ bɛfa anyelielɛ bɛado ayɛlɛyelɛ edwɛne la, Gyihova maanle Amɔnoma, Mowabema yɛɛ Siyɛ awoka ne azo amra mɔɔ ɛlɛba Dwuda anwo zo la tetale bɛ nwo arɛlevilɛ nu, na bɛhuhunle bɛ nwo.+
23 Na Amɔnoma nee Mowabema dwazole tiale menli mɔɔ de Siyɛ awoka ne azo la+ kɛ bɛsɛkye bɛ na bɛabɔ bɛ bo zo; na mɔɔ bɛhuhunle menli mɔɔ de Siyɛ bɛwiele la, bɛpɛle bɛ nwo bɛhuhunle bɛ nwo.+
24 Noko mɔɔ Dwudama radwule ɛzinzalɛ arane ne mɔɔ wɔ fienemgbole ne anu anwo+ na bɛnleanle menli dɔɔnwo ne la, bɛnwunle kɛ bɛ avunli gugua azɛlɛ ne anwo;+ sonla ko bɔbɔ anga.
25 Ɔti Gyɛhɔhyafate nee ye menli ne ravenle bɛ nwo ninyɛne ne, na bɛnwunle ninyɛne dɔɔnwo kpalɛ wɔ bɛ nwo ɛkɛ, adɛladeɛ nee ninyɛne mgbalɛ, na bɛyeyele too mɔɔ ɛnee akee bɛngola bieko soa a.+ Bɛvale kenle nsa a bɛzoale ninyɛne mɔɔ bɛvenle la a, ɔluakɛ ɛnee ɔzonle kpalɛ.
26 Kenle nna ne azo, bɛboɔboale bɛ nloa wɔ Bɛleka Bɔnza* ne anu, ɔluakɛ ɛkɛ ne a bɛyele Gyihova ayɛlɛ* a. Ɛhye ati a bɛvɛlɛle ɛkɛ ne Bɛleka* Bɔnza+—too yeradwu ɛnɛ la.
27 Akee Dwudama nee Gyɛlusalɛmma amuala, mɔɔ Gyɛhɔhyafate li bɛ ti la vale fɛlɛkolilɛ ziale hɔle Gyɛlusalɛm, ɔluakɛ Gyihova ɛmaa bɛli fɛlɛko wɔ bɛ kpɔvolɛma ati.+
28 Ɔti bɛvale getaa,* haape+ yɛɛ aweɛne ndendenle+ bɛrale Gyɛlusalɛm, na bɛhɔle Gyihova sua ne anu.+
29 Mekɛ mɔɔ azɛlɛ ne azo arelemgbunlililɛ kɔsɔɔti dele kɛ Gyihova ɛho ɛtia Yizilayɛ kpɔvolɛma la, Nyamenle anwo ɛzulolɛ dɔle bɛ nwo zo.+
30 Ɛhye ati bɛangyegye Gyɛhɔhyafate belemgbunlililɛ ne, na ye Nyamenle ne maanle ɔhɔle zo ɔliele ɔ menle wɔ ɛleka biala.+
31 Na Gyɛhɔhyafate hɔle zo lile tumi wɔ Dwuda. Ɔlile ɛvolɛ 35 la yɛɛ ɔrayɛle belemgbunli a, na ɔlile tumi ɛvolɛ 25 wɔ Gyɛlusalɛm. Ye mame duma a le Azuba mɔɔ le Hyelehae ara raalɛ la.+
32 Ɔhɔle zo ɔluale ye papa Esa adenle ne anu.+ Yeandwe ɔ nwo yeanvi nwolɛ, na ɔyɛle mɔɔ le kpalɛ wɔ Gyihova anye zo la.+
33 Noko bɛanye ɛzonlenlɛ ɛleka ne mɔ* bɛanvi ɛkɛ,+ na ɛnee menli ne noko ɛtɛsieziele bɛ ahonle ɛtɛmaanle bɛ nenyia mɔ Nyamenle ne.+
34 Na Gyɛhɔhyafate anwo tetedwɛkɛ mɔɔ ɛha, ɔvi mɔlebɛbo kɔdwu awieleɛ, bɛhɛlɛ ye wɔ Haneenae+ ara Gyihu+ edwɛkɛ ne mɔɔ bɛvale bɛbokale Yizilayɛ Arelemgbunli Buluku ne anwo la anu.
35 Ɛhye anzi Dwuda Belemgbunli Gyɛhɔhyafate nee Yizilayɛ Belemgbunli Ehazaya mɔɔ yɛle amumuyɛ la+ yɛle ko.
36 Ɔti ɔ nee ye bɔle nu na bɛyɛle meli mɔɔ bɛbava bɛahɔ Tahyehye+ la, na bɛyɛle meli ne mɔ wɔ Yizeɔn-gibɛ.+
37 Noko Dɔdavahu mɔɔ vi Malihya la ara Ɛleyizɛ hanle ngapezo tiale Gyɛhɔhyafate kɛ: “Kɛmɔ ɛ nee Ehazaya ɛyɛ ko la ati, Gyihova bazɛkye wɔ gyima ne.”+ Yemɔti meli ne mɔ hɔnlomanle,+ na bɛangola bɛangɔ Tahyehye.
Ɔbodwɛkɛ
^ Anzɛɛ ɔkola ɔkile, “Mɛyunɛmma.”
^ Ɔda ali kɛ, Nyevile Wulera ne ɔ.
^ Hibulu aneɛ nu, “ɔvale ɔziele ɔ nye zo.”
^ Hibulu aneɛ nu, “bɛ mra mrenyia.”
^ Anzɛɛ “bɛnlea kɛzi Gyihova bapepɛ alie bɛ.”
^ Anzɛɛ “Azɛlɛ Sɛsɛ.”
^ Hibulu aneɛ nu, “bɛyilale ye.”
^ Ɔ bo kile “Nyilalɛ.”
^ Tete ɛdeɛ ne le ngakyile fi ɛnɛ mekɛ ye getaa nwo.
^ Hibulu aneɛ nu, “ɛleka mɔɔ wɔ anwuma.”
