Pita Mɔɔ Limoa 3:1-22
3 Zɔhane ala a bɛmɛ yelɛma, bɛbɛlɛ bɛ nwo aze bɛmaa bɛ hu mɔ a,+ amaa saa bie mɔ andie edwɛkɛ ne a, bɛalua bɛ ye mɔ nyɛleɛ zo bɛanyia bɛ mɔɔ bɛnga edwɛkɛ kpɔkɛ ko bɔbɔ a,+
2 ɔluakɛ bɛbali bɛ nyɛleɛ kpalɛ* nee bɛ ɛbulɛ kpole ne anwo daselɛ.+
3 Bɛmmamaa bɛ anwoziezielɛ yɛ ɛnyelɛzo ɛdeɛ—bɛ ti enrinli ɛyɛlɛ nee agudeɛ+ anzɛɛ tɛladeɛ ngɛnlɛma ɛwulalɛ—
4 emomu bɛmaa ɔyɛ ahonle nu sonla mɔɔ vea, koonwuyɛlɛ nee mɛlɛbɛnwoaze subane, tɛladeɛ mɔɔ ɛmkpɔlɔ,+ mɔɔ sonle bolɛ kpole wɔ Nyamenle anyunlu a.
5 Na zɛhae a tete mraalɛ nwuanzanwuanza mɔɔ vale bɛ nwo dole Nyamenle anwo zo la zieziele bɛ nwo na bɛbɛlɛle bɛ nwo aze bɛmaanle bɛ hu mɔ a,
6 kɛ mɔɔ Sɛla diele Ebileham na ɔvɛlɛle ye ɔ menle la.+ Na saa bɛkɔ zo bɛyɛ kpalɛ na ɛzulolɛ anga bɛ a, ɛnee bɛle ɔ mra.+
7 Zɔhane ala a bɛmɛ kunlima, bɛhɔ zo bɛ nee bɛ ɛdɛnla nrɛlɛbɛ nu* a. Bɛli mraalɛ eni+ kɛ bɛle kɛ mbuakɛ mɔɔ bɛnlɛ anwosesebɛ, ɔluakɛ bɛ nee bɛ a bɛanyia ngoane+ ɛlolɛ ne a, na bɛ asɔneyɛlɛ nwo adenle anzi.
8 Yemɔti bɛ muala bɛnyia adwenle ko,+ bɛde bɛ gɔnwo mɔ nyane bo, na bɛnyia mediema ɛlɔlɛ, ahunluyelɛyelalɛ+ nee mɛlɛbɛnwoaze.+
9 Bɛmmafa ɛtane bɛtua ɛtane kakɛ+ anzɛɛ aholoba bɛtua aholoba kakɛ.+ Emomu, bɛva nyilalɛ bɛdua ɛtane kakɛ,+ ɔluakɛ ɛhye ati a bɛvɛlɛle bɛ a, amaa bɛanyia nyilalɛ.
10 Ɔluakɛ “awie biala mɔɔ kulo ngoane na ɔkpondɛ kɛ ɔnyi ɔkyɛ na ɔnwu ninyɛne mgbalɛ la, ɔwɔ kɛ ɔbɔ ɔ tafinlima anwo bane ɔfi ɛtane nwo+ yɛɛ ɔ nloa nwo bane ɔfi mɛlɛbɛla edwɛkɛ nwo.
11 Maa ɔhwe ɔ nwo ɔvi ɛtane nwo+ na ɔyɛ kpalɛ;+ ɔkpondɛ anzodwolɛ na ɔli ɔ nzi.+
12 Ɔluakɛ Gyihova* anye wɔ tenlenema anwo zo na ɔyɛ ɛnzolɛ ɔtie bɛ modolɛ,+ noko Gyihova* anye sa bɛdabɛ mɔɔ bɛyɛ ninyɛndane la.”+
13 Nɔhalɛ nu, saa bɛbɔ mɔdenle wɔ kpalɛyɛlɛ nu a, nwane a kɛgyegye bɛ a?+
14 Na saa tenleneyɛlɛ ti bɛnwu amaneɛ bɔbɔ a, bɛ nye balie.+ Noko bɛmmasulo mɔɔ bɛsulo ye la* anzɛɛ bɛmmamaa bɛ ahonle tu.+
15 Emomu, bɛde Kelaese anwo kɛ Awulae wɔ bɛ ahonle nu, na bɛziezie bɛ nwo mekɛ biala kɛ bɛkɛbua awie biala mɔɔ kɛbiza anyelazo mɔɔ bɛlɛ ye la anwo edwɛkɛ la, noko bɛyɛ ye wɔ mɛlɛbɛnwoaze+ nee ɛbulɛ kpole nu.+
16 Bɛnyia adwenle kpalɛ+ amaa menli mɔɔ ka bɛ ɛbɛla kpalɛ mɔɔ bɛbɔ kɛ Kelaese ɛdoavolɛma+ anwo edwɛkɛ ɛtane la anyunlu agua aze wɔ mɔɔ bɛka bɛtia bɛ la anwo.+
17 Na saa ɔle Nyamenle ɛhulolɛ kɛ bɛkɛnwu kpalɛ mɔɔ bɛlɛyɛ la anwo amaneɛ a,+ ɔle kpalɛ ɔtɛla kɛ bɛkɛnwu ɛtane nwo amaneɛ.+
18 Ɔluakɛ Kelaese wule kokye maanle ɛtane,+ sonla tenlenenli wule maanle ɛtanevolɛma,+ amaa yeaboa bɛ yeamaa bɛanwu Nyamenle.+ Bɛhunle ye wɔ nwonane nu+ noko bɛdwazole ye wɔ sunsum nu.+
19 Na wɔ sunsum nu sonlabaka ne anu, ɔhɔhanle edwɛkɛ ne ɔhilele sunsum mɔɔ bɛgua efiade,+
20 mɔɔ bɛyɛle anzosesebɛ wɔ mekɛ mɔɔ ɛnee Nyamenle ɛlɛkendɛ abotane nu* wɔ Nowa mekɛ zo,+ mekɛ mɔɔ ɛnee bɛlɛbobɔ ɛlɛne ne+ mɔɔ bɛluale zo bɛliele menli ekyi bie, mɔɔ bɛle ɛkɛla* mɔtwɛ ngoane wɔ nzule ne anu la.+
21 Ɛzɔnenlɛ mɔɔ le kɛ ɛhye la noko ɛlɛdie bɛ ngoane kɛkala (ɔnnrinzi nwonane ne anwo evinli, emomu ɔle Nyamenle anyunlu modolɛ kɛ ɔmaa bɛ adwenle kpalɛ*),+ ɔlua Gyisɛse Kelaese ewudwazo ne azo.
22 Ɔhɔle anwuma na ɔwɔ Nyamenle asa fema zo,+ na bɛva anwumabɔvolɛma nee tumivolɛma nee tumililɛma bɛwula ɔ gyakɛ abo.+
Ɔbodwɛkɛ
^ Giliki aneɛ nu, “bɛ ɛbɛla mɔɔ anwo te.”
^ Anzɛɛ “bɛdwenle bɛ nwo; bɛde bɛ edwɛkɛ bo.”
^ Anzɛɛ ɔkola ɔkile, “bɛmmasulo bɛ ɛnwunlonwunlalɛ ne.”
^ Giliki aneɛ nu, “ɛnee Nyamenle abotane ne ɛlɛkendɛ.”
^ Anzɛɛ “menli.”
^ Anzɛɛ “adwenle mɔɔ anu la ɛkɛ.”
