Samoɛle Mɔɔ Limoa 29:1-11
-
Filisitiama anlie Devidi anli (1-11)
29 Filisitiama+ boɔboale bɛ ɛlɔne ne kɔsɔɔti anloa wɔ Efɛke, na Yizilayɛma noko yɛle bɛ azokoɛleɛ wɔ Gyɛzeɛle+ nzubula ne anwo.
2 Filisitia arelemgbunli ne mɔ nee bɛ ɛlɔne ɛya ɛya nee apenle apenle ne mɔ rapɛle nu, na ɛnee Devidi nee ye menli ne yɛɛ Ekehye+ li bɛ nzi.
3 Na Filisitia menli titili ne mɔ bizale kɛ: “Duzu a Hibuluma ɛhye mɔ ɛlɛyɛ ye wɔ ɛke a?” Ekehye buale Filisitia menli titili ne mɔ kɛ: “Yizilayɛ Belemgbunli Sɔɔlo sonvolɛ Devidi ɛne, ɔ nee me ɛdɛnla ɛvolɛ ko nee ekyi.+ Metɛnwunle nvonleɛ biala wɔ ɔ nwo ɔvi kenle mɔɔ ɔrale me nwo ɛke la too badwu ɛnɛ.”
4 Noko Filisitia menli titili ne mɔ vale ɔ nwo ɛya kpole, na bɛzele ye kɛ: “Maa nrenyia ne ɛzia ɛhɔ.+ Maa ɔzia ɔhɔ ɛleka mɔɔ ɛvale ɛmaanle ye la. Mmamaa ɔ nee yɛ kɔ konle ne, amaa yeampɛ ɔ nwo yeango yeantia yɛ wɔ konle ne anu.+ Asoo tɛ adenle kpalɛ mɔɔ ɔbalua zo yeanyia ɔ menle anyunlu ɛlolɛ la a le kɛ ɔbapepɛ yɛ menli ne ati ɔ?
5 Tɛ Devidi ɛhye a bɛdole ɔ nwo edwɛne bɛzile agole kɛ:
‘Sɔɔlo ɛhu apenle apenle,Na Devidi ɛhu apenle apenle bulu bulu’ la ɔ?”+
6 Ɔti Ekehye+ vɛlɛle Devidi na ɔzele ye kɛ: “Mekɛ ala mɔɔ Gyihova de aze la, ɛle tenlenenli yɛɛ ɔyɛ me fɛ kɛ mebamaa ɛ nee me ɛlɔne ne ahɔ konle ne,+ ɔluakɛ metɛnwunle nvonleɛ biala wɔ ɛ nwo ɔvi kenle mɔɔ ɛrale me nwo ɛke la too badwu ɛnɛ.+ Noko arelemgbunli ne mɔ ɛnlie wɔ ɛnli.+
7 Yemɔti sia kɔ anzodwolɛ nu, na mmayɛ debie biala mɔɔ Filisitia arelemgbunli ne mɔ anye ɛnlie nwolɛ la.”
8 Noko Devidi bizale Ekehye kɛ: “Kɛmɔti ɛ, duzu a meyɛ a? Nvonleɛ boni a wɔnwu ye wɔ wɔ sonvolɛ anwo ɔvi kenle mɔɔ membale ɛ nwo ɛke la too badwu ɛnɛ ɛ? Duzu ati a ɔnle kɛ me nee me menle belemgbunli kɔ na mekɔko metia ye kpɔvolɛma ɛ?”
9 Ekehye buale Devidi kɛ: “Wɔ me nye zo, ɛle sonlakpalɛ kɛ Nyamenle anwumabɔvolɛ la.+ Noko Filisitia menli titili ne mɔ se, ‘Mmamaa ɔ nee yɛ kɔ konle ne.’
10 Ɔti ɛ nee ɛ menle azonvolɛ ne mɔ mɔɔ nee wɔ rale la ɛdwazo nwonlomɔ mangyee ne ala; nwonlomɔ mangyee ne ala saa maanle nu tete a bɛdwazo na bɛhɔ.”
11 Yemɔti Devidi nee ye menli ne dwazole nwonlomɔ mangyee kɛ bɛsia bɛahɔ Filisitiama azɛlɛ zo, na Filisitiama ne hɔle Gyɛzeɛle.+
