Samoɛle Mɔɔ Limoa 10:1-27
10 Akee Samoɛle vale toba ne mɔɔ nwole ne wɔ nu la na ɔwolale ɔguale Sɔɔlo ati zo.+ Ɔvole ɔ nloa anwo na ɔhanle kɛ: “Asoo Gyihova ɛtɛkpokpale wɔ kɛ adekilevolɛ+ wɔ ye agyapadeɛ ne azo ɔ?+
2 Saa ɛvi me nwo ɛke na ɛkɔ a, ɛbanwu mrenyia nwiɔ wɔ Relahyɛle nla ne+ mɔɔ wɔ Zɛleza wɔ Bɛngyaman azɛlɛ zo la anwo, na bɛbaha bɛahile wɔ kɛ, ‘Bɛnwu asoaso ne mɔ mɔɔ bɛhɔle bɛ ɛkpondɛlɛ la, noko kɛkala wɔ papa arɛle ɛvi asoaso ne mɔ+ na ɛdawɔ a ɔlɛdwenle ɛ nwo a. Ɔlɛka kɛ: “Duzu a menyɛ wɔ me ra ne anwo a?”’
3 Ɛvi ɛkɛ ne a toa zo too kɔdwu Teebɔ baka kpole ne anwo, ɛ nee mrenyia nsa bayia ɛkɛ ne kɛ bɛlɛkɔ nɔhalɛ Nyamenle ne ɛkɛ wɔ Bɛtɛle,+ ko lɛ mbɔnkye mralɛ nsa, ko lɛ paano nsa yɛɛ ko lɛ nwanye toba kpole ko.
4 Bɛbabiza wɔ kɛzi ɛ nwo de la na bɛamaa wɔ paano nwiɔ, na anrɛɛ die.
5 Akee ɛbahɔ nɔhalɛ Nyamenle ne boka ne azo, ɛleka mɔɔ Filisitia sogyama azokoɛleɛ bie wɔ la. Saa ɛdwu sua ne azo a, ɛ nee ngapezoma ekpunli bie bayia kɛ bɛvi ɛzonlenlɛ ɛleka ne bɛlɛba na menli li bɛ nyunlu ɛlɛbɔ getaa* nee akɛya nee fulutu yɛɛ haape wɔ mekɛ mɔɔ bɛlɛka ngapezo la.
6 Gyihova sunsum ne bara ɛ nwo zo,+ na ɛbaboka bɛ nwo bɛaha ngapezo na wɔayɛ sonla ngakyile bie.+
7 Saa sɛkɛlɛneɛ ɛhye mɔ sisi a, yɛ debie biala mɔɔ ɛkɛhola ye yɛ la, ɔluakɛ nɔhalɛ Nyamenle ne nee wɔ lua.
8 Akee dimoa me nyunlu kɔ Gelegale,+ na mebara ɛ nwo nehane mearabɔ ɛyelalɛ afɔle nee anzodwolɛ afɔle. Kendɛ me too kenle nsuu kɔkpula kɛ mekɛra ɛ nwo lɔ la. Na mebamaa wɔanwu mɔɔ ɔwɔ kɛ ɛyɛ la.”
9 Mɔɔ Sɔɔlo hakyile ɔ nwo vile Samoɛle anwo ɛkɛ ne ala la, Nyamenle bɔle ɔ bo hakyile ye ahonle maanle ɔyɛle kɛ awie gyɛne ɛdeɛ la, na sɛkɛlɛneɛ ɛhye mɔ amuala rale nu kenle zɔhane.
10 Ɔti bɛvile ɛkɛ ne bɛhɔle boka ne azo, na ngapezoma ekpunli bie rayiale ye. Ɛkɛ ne ala Nyamenle sunsum ne rale ɔ nwo zo,+ na ɔbɔle ɔ bo kɛ ɔka ngapezo+ wɔ bɛ avinli.
11 Mekɛ mɔɔ menli kɔsɔɔti mɔɔ ze ye dɛba la nwunle ye kɛ ɔ nee ngapezoma ne ɛlɛka ngapezo la, bɛbizale bɛ nwo kɛ: “Duzu a ɛdo Kehye ara ne a? Sɔɔlo noko boka ngapezoma ne anwo ɔ?”
12 Na nrenyia bie mɔɔ vi ɛkɛ ne la hanle kɛ: “Na bɛ papa a le nwane?” Ɔti ɔrayɛle edwɛkɛ mɔɔ bɛka* kɛ: “Sɔɔlo noko boka ngapezoma ne anwo ɔ?”+
13 Mɔɔ ɔhanle ngapezo ne ɔwiele la, ɔhɔle ɛzonlenlɛ ɛleka ne.
14 Nzinlii, Sɔɔlo papa adiema nrenyia ne bizale ɔdaye nee ye sonvolɛ ne kɛ: “Bɛhɔle ni?” Na ɔhanle kɛ: “Yɛhɔle asoaso ne mɔ ɛkpondɛlɛ,+ noko yɛannwu bɛ, ɔti yɛhɔle Samoɛle ɛkɛ.”
15 Sɔɔlo papa adiema ne hanle kɛ: “Mesɛlɛ wɔ ka kile me, duzu edwɛkɛ a Samoɛle hanle hilele wɔ a?”
16 Sɔɔlo buale ye papa adiema ne kɛ: “Ɔhanle ɔhilele yɛ kɛ bɛnwu asoaso ne mɔ.” Noko Sɔɔlo anga belemgbunlililɛ ne mɔɔ Samoɛle hanle nwolɛ edwɛkɛ hilele ye la angile ye.
17 Akee Samoɛle vɛlɛle menli ne maanle bɛrayiale Gyihova anyunlu wɔ Mezepa+
18 na ɔzele Yizilayɛma kɛ: “Edwɛkɛ mɔɔ Gyihova, Yizilayɛ Nyamenle ne ɛha la ɛne: ‘Medame a menyele Yizilayɛ menvile Yigyibiti na menliele bɛ menvile Yigyibiti+ nee arelemgbunlililɛ kɔsɔɔti mɔɔ sisile bɛ la asa anu a.
19 Ɛnɛ, bɛkpo bɛ Nyamenle ne+ nee bɛ Ngoanedievolɛ ne mɔɔ liele bɛ vile bɛ ngyegyelɛ nee bɛ amaneɛnwunlɛ kɔsɔɔti anu la na bɛha kɛ: “Kyɛkyɛ, ye belemgbunli maa ɔnlea yɛ nwo zo.” Akee bɛmaa bɛ mbusua ekpunli ekpunli ne mɔ nee bɛ apenle apenle ne mɔ ɛragyinla Gyihova anyunlu.’”
20 Ɔti Samoɛle maanle Yizilayɛ mbusua ekpunli ne mɔ amuala rale ngoko,+ na bɛyele Bɛngyaman abusua ekpunli ne.+
21 Akee ɔmaanle Bɛngyaman abusua ekpunli ne anu mbusua ne mɔ rale ngoko, na bɛyele Matelaetema abusua ne. Akee bɛyele Kehye ara Sɔɔlo,+ noko mekɛ mɔɔ bɛhɔle ye ɛkpondɛlɛ la, bɛannwu ye.
22 Ɔti bɛbizale Gyihova kɛ:+ “Nrenyia ne ɛra ɛke ɔ?” Gyihova buale kɛ: “Ɔvea ninyɛne ne avinli nehane.”
23 Yemɔti bɛnriandile bɛhɔvale ye bɛrale. Mekɛ mɔɔ ɔragyinlanle menli ne avinli la, ɛnee ɔwale ɔtɛla menli ne kɔsɔɔti, ɔvi ye awane zo kɔdwu ɔ ti zo.+
24 Samoɛle zele menli ne kɔsɔɔti kɛ: “Asoo bɛnwu ahenle mɔɔ Gyihova ɛkpa ye la+ kɛ awie biala ɛnle menli ne kɔsɔɔti anu mɔɔ nee ye sɛ ɔ?” Na menli ne amuala deanle nu kɛ: “Belemgbunli ɛnyi ɛhyɛ!”
25 Samoɛle hanle mɔɔ ɔfɛta kɛ bɛyɛ bɛmaa arelemgbunli la+ anwo edwɛkɛ hilele menli ne na ɔhɛlɛle ye wɔ buluku nu ɔvale ɔdole Gyihova anyunlu. Akee Samoɛle maanle menli ne amuala hɔle, na ko biala hɔle ye sua nu.
26 Sɔɔlo noko hɔle sua nu wɔ Gebeya, kovolɛma mɔɔ Gyihova hanle bɛ ahonle la nee ye hɔle.
27 Noko sonlamgbanema bie mɔ hanle kɛ: “Kɛ ɔkɛyɛ na sonla ɛhye alie yɛ ɛ?”+ Ɔti bɛambu ye bie, yɛɛ bɛanva ahyɛlɛdeɛ biala bɛambɛlɛ ye.+ Noko yeanga nwolɛ ɛhwee.*
Ɔbodwɛkɛ
^ Tete ɛdeɛ ne le ngakyile fi ɛnɛ mekɛ ye getaa nwo.
^ Anzɛɛ “ɔrayɛle ɛrɛlɛ.”
^ Hibulu aneɛ nu, “Na ɔyɛle kɛ awie mɔɔ ɛndendɛ.”
