Edwɛkɛsisilɛ Mɔɔ Limoa 19:1-19
19 Nzinlii Amɔnoma Belemgbunli Neehahye wule, na ɔ ra ralile ye agya lile belemgbunli.+
2 Na Devidi hanle kɛ: “Mebala ɛlɔlɛ kpundii+ ali meahile Neehahye ara Heenɛn, ɔluakɛ ye papa lale ɛlɔlɛ kpundii ali hilele me.” Ɔti Devidi zoanle ɛbɔfoɔma kɛ bɛhɔkyekye ɔ rɛle wɔ ye papa ewule ne anwo. Noko mɔɔ Devidi sonvolɛma ne hɔdwule Amɔnoma+ azɛlɛ zo kɛ bɛkakyekye Heenɛn arɛle la,
3 Amɔn mgbanyima bizale Heenɛn kɛ: “Ɛdwenle kɛ Devidi kulo kɛ ɔdi wɔ papa eni la ati a yezoa menli kɛ bɛrakyekye ɛ rɛle a? Asoo tɛ kɛ ɔba yearanleɛnlea azɛlɛ ne nee debie biala mɔɔ wɔ zo la kpalɛ na yeanwu kɛzi ɔbazɛkye wɔ la ati a yezoa ye azonvolɛ wɔ ɛ nwo ɛke a?”
4 Ɔti Heenɛn hyele Devidi sonvolɛma ne na ɔkpale bɛ kɛsa+ na ɔpepɛle bɛ adɛladeɛ ne mɔ azo ɔmaanle ɔradwule bɛ bo anwo na ɔmaanle bɛhɔle.
5 Mɔɔ bɛhanle menli ne anwo edwɛkɛ bɛhilele Devidi la, ɛkɛ ne ala ɔzoanle awie mɔ kɛ bɛhɔyia bɛ, ɔluakɛ ɛnee bɛgua menli ne mɔ anyunlu aze kpole; na belemgbunli ne zele bɛ kɛ: “Bɛdɛnla Gyɛleko+ kɔkpula kɛ bɛ kɛsa ne mɔ kɛvi bieko na bɛazia bɛara.”
6 Nzinlii Amɔnoma nwunle kɛ bɛha Devidi ɛya, ɔti Heenɛn nee Amɔnoma vale dwɛtɛ fufule talɛnte* 1,000 kɛ bɛkalie ehwili na bɛabɔ mgbɔnwɔkavoma ɛkpa bɛavi Mɛsɔpɔteemea,* Elam-meeyaka yɛɛ Zoba.+
7 Ɛhye ati, bɛliele ehwili 32,000 na Meeyaka belemgbunli ne nee ye menli ne rabokale bɛ nwo. Na bɛrayɛle bɛ azokoɛleɛ wɔ Mɛdeba.+ Amɔnoma vile bɛ azuamgbole ne mɔ azo boɔboale bɛ nloa kɛ bɛkaho.
8 Mɔɔ Devidi dele la, ɔzoanle Dwowabe+ nee ɛlɔne ne amuala, yɛɛ ye konle nu katakyiema ne.+
9 Na Amɔnoma ne vindele na bɛhyehyɛle bɛ nwo pɛpɛɛpɛ wɔ suakpole ne anlenkɛ kpole ne anloa kɛ bɛkaho, noko arelemgbunli ne mɔ mɔɔ rale la dele bɛ nwo hɔgyinlanle ɛleka bie mɔɔ le wienyi la.
10 Mɔɔ Dwowabe nwunle kɛ kovolɛma ne bie vi ɔ nyunlu nee ɔ nzi ɛlɛba ɔ nwo zo la, ɔkpale Yizilayɛ ɛlɔne ne mɔɔ bɔ mɔdenle la bie mɔ na ɔhyehyɛle bɛ pɛpɛɛpɛ kɛ bɛhɔyia Seleama ne mɔ.+
11 Ɔvale menli mɔɔ ɛha la ɔwulale ɔ diema Abehyae+ asa anu, amaa yeahyehyɛ bɛ pɛpɛɛpɛ na bɛahɔyia Amɔnoma bɛ nee bɛ aho.
12 Akee ɔhanle kɛ: “Saa Seleama+ ne anwosesebɛ bo me nwo zo a, balie me; noko saa Amɔnoma anwosesebɛ bo ɛ nwo zo a, mebaralie wɔ.
13 ɔwɔ kɛ yɛfa anwosesebɛ nee akɛnrasesebɛ+ yɛko yɛmaa yɛ menli ne nee yɛ Nyamenle ne azuamgbole ne mɔ, na Gyihova bayɛ mɔɔ le kpalɛ wɔ ɔ nye zo la.”
14 Akee Dwowabe nee ye menli ne hɔle kɛ bɛkayia Seleama bɛ nee bɛ aho, na bɛnriandile bɛvile ɔ nyunlu.+
15 Mɔɔ Amɔnoma ne nwunle kɛ Seleama ɛnriandi la, bɛdabɛ noko bɛnriandile bɛvile ɔ diema Abehyae anyunlu na bɛhɔle suakpole ne azo. Ɛhye anzi, Dwowabe ziale hɔle Gyɛlusalɛm.
16 Mɔɔ Seleama nwunle kɛ Yizilayɛma ɛli bɛ nwo zo konim la, bɛzoanle ɛbɔfoɔma kɛ bɛhɔva Seleama mɔɔ wɔ Azule* ne anloa lɔ la bɛrɛla,+ na ɛnee Hadadizɛ ɛlɔnema kpanyinli Hyofake a li bɛ nyunlu a.+
17 Mɔɔ bɛhɔbɔle Devidi amaneɛ la, ɛkɛ ne ala ɔboɔboale Yizilayɛma kɔsɔɔti anloa na bɛpɛle Dwɔdan ne na bɛhyehyɛle bɛ nwo pɛpɛɛpɛ kɛ bɛ nee bɛ kaho. Devidi hyehyɛle bɛ pɛpɛɛpɛ kɛ bɛ nee Seleama kaho, na bɛ nee ye honle.+
18 Noko Seleama nriandile vile Yizilayɛma anyunlu; na Devidi hunle Selea ehwilikavoma 7,000 nee sogyama mɔɔ lua aze la 40,000, yɛɛ ɔhunle ɛlɔnema kpanyinli Hyofake noko.
19 Mɔɔ Hadadizɛ sonvolɛma ne nwunle kɛ Yizilayɛma ɛli bɛ nwo zo konim la,+ ndɛndɛ ne ala bɛ nee Devidi yɛle anzodwolɛ ngyehyɛleɛ na bɛraveale ɔ bo;*+ na Seleama angulo kɛ bɛkɛboa Amɔnoma ne bieko.
