Dwɔn Mɔɔ Limoa 5:1-21
5 Awie biala mɔɔ die di kɛ Gyisɛse a le Kelaese ne la le Nyamenle ara,+ na awie biala mɔɔ kulo ahenle mɔɔ wole ye la kulo ɔ ra ne noko.
2 Debie mɔɔ maa yɛnwu kɛ yɛkulo Nyamenle amra la+ a le kɛ yɛkɛhulo Nyamenle na yɛkɛli ye mɛla zo.
3 Na ɛhye a Nyamenle anwo ɛlɔlɛ kile a, kɛ yɛkɛli ye mɛla ne mɔ azo;+ yɛɛ ye mɛla ne mɔ ɛnle adesoa,+
4 ɔluakɛ awie biala* mɔɔ le Nyamenle ara la di ewiade ne anwo zo konim.+ Na mɔɔ ɛli ewiade ne anwo zo konim la a le yɛ diedi.+
5 Nwane a kola di ewiade ne anwo zo konim a?+ Asoo tɛ awie mɔɔ die di kɛ Gyisɛse le Nyamenle Ara la ɔ?+
6 Ɛhye a le ahenle mɔɔ luale nzule nee mogya zo rale la, Gyisɛse Kelaese, tɛ nzule angome,+ emomu ɔluale nzule nee mogya zo.+ Na sunsum ne a di daselɛ a,+ ɔluakɛ sunsum ne a le nɔhalɛ ne.
7 Na ninyɛne nsa a di daselɛ a:
8 sunsum ne+ nee nzule ne+ yɛɛ mogya ne;+ na bɛmɛ nsa bɛdi daselɛ ko.
9 Saa yɛdie menli daselɛlilɛ yɛto nu a, ɛnee Nyamenle daselɛlilɛ le kpole tɛla yemɔ. Ɔluakɛ daselɛ mɔɔ Nyamenle ɛli la ɛne, daselɛ mɔɔ yeli ye wɔ ɔ Ra ne anwo la.
10 Mɔɔ die Nyamenle Ara ne di la lɛ daselɛlilɛ ne wɔ ye nu. Mɔɔ ɛnlie Nyamenle ɛnli la ɛmaa yeyɛ adalɛ,+ ɔluakɛ yeanlie daselɛ mɔɔ Nyamenle ɛli wɔ ɔ Ra ne anwo la yeanli.
11 Na daselɛlilɛ ne a le ɛhye, Nyamenle ɛmaa yɛ dahuu ngoane,+ na ngoane ɛhye wɔ ɔ Ra ne anu.+
12 Mɔɔ die Ralɛ ne to nu la lɛ ngoane ɛhye; mɔɔ ɛnlie Nyamenle Ara ne ɛndo nu la ɛnlɛ ngoane ɛhye.+
13 Melɛkɛlɛ ɛhye mearɛlɛ bɛ amaa bɛdabɛ mɔɔ bɛdie Nyamenle Ara ne duma bɛdi la+ anwu kɛ bɛlɛ dahuu ngoane.+
14 Na anwodozo* mɔɔ yɛlɛ wɔ ye nu la+ a le kɛ, debie biala mɔɔ yɛkɛbiza ye wɔ ye ɛhulolɛ zo la, ɔtie yɛ.+
15 Na saa yɛze kɛ yɛbiza ye debie biala a ɔtie yɛ a, ɛnee yɛze kɛ yɛ sa baha mɔɔ yɛbiza la, ɔluakɛ yɛbiza yɛvi ye ɛkɛ.+
16 Saa awie nwu kɛ ɔ diema ɛlɛyɛ ɛtane mɔɔ ɛngɔnwie ewule nu a, ɔzɛlɛ ɔmaa ye na Nyamenle bamaa ye ngoane,+ ɛhɛe, bɛdabɛ mɔɔ bɛlɛyɛ ɛtane mɔɔ ɛngɔnwie ewule nu la. Ɛtane bie wɔ ɛkɛ mɔɔ ɔwie ewule.+ Menga ye kɛ ɔzɛlɛ ɛtane ɛhye anwo.
17 Nyɛleɛ biala mɔɔ ɛndenrɛ la le ɛtane,+ noko ɛtane bie wɔ ɛkɛ mɔɔ ɛngɔnwie ewule nu.
18 Yɛze kɛ awie biala mɔɔ le Nyamenle ara la ɛngɔ zo ɛnyɛ ɛtane, emomu Nyamenle Ara ne* sinza ye na amumuyɛnli ne ɛngola ɛnzɔ ye nu.*+
19 Yɛze kɛ yɛvi Nyamenle, noko ewiade ye amuala wɔ amumuyɛnli ne tumi bo.+
20 Na yɛze kɛ Nyamenle Ara ne ɛra,+ na yemaa yɛnyia nwunu* amaa yɛanyia nɔhavo ne anwo ndelebɛbo. Na ɔlua ɔ Ra Gyisɛse Kelaese anwo zo yɛ nee nɔhavo ne ɛyɛ ko.+ Ɛhye a le nɔhalɛ Nyamenle ne nee dahuu ngoane ne a.+
21 Ngakula, bɛnlea bɛ nwo boɛ wɔ awozonle ɛzonlenlɛ* nwo.+
Ɔbodwɛkɛ
^ Giliki aneɛ nu, “debie biala.”
^ Anzɛɛ “akɛnrasesebɛ.”
^ Anzɛɛ “asa ɛnga ye.”
^ Ɛhye kile, Gyisɛse Kelaese.
^ Giliki aneɛ nu, “adwenlenunwunlɛ; adwenle nu tumi.”
^ Giliki aneɛ nu, “ananze.”
