Kyɛkyɛ. Yɛfa yɛ nwo yɛwula azua nu gyima ne anu dahuu noko yɛnlie yɛnli kɛ yemɔ ati ɔfɛta kɛ yɛnyia ngoane. (Ɛfɛsɛsema 2:8) Kɛmɔti ɛ?

 Dwenle ndonwo ɛhye anwo nea: Fa ye kɛ nrenya atiakunlukɛnlɛma bie ɛbɔ ɛwɔkɛ kɛ awie biala mɔɔ bahɔ ɛleka bie wɔ mekɛ titile bie anu la banyia ahyɛlɛdeɛ mɔɔ sonle bolɛ la. Saa ɛdie nrenya ne ɛwɔkɛ ne ɛdi amgba a, ɛbali ye adehilelɛ zo ɔ? Ɛhɛe! Bie a ɛbabɔ ɛ gɔnwo mɔ nee wɔ mbusuafoɔ amaneɛ amaa bɛdabɛ noko banyia zolɛ nvasoɛ. Yemɔ bɔbɔ, adehilelɛ ne azo ɛlilɛ ɛngile kɛ ɔfɛta kɛ ɛnyia ahyɛlɛdeɛ ne. Kakye kɛ nrenya mumua ne a ɔkulo kɛ ɔfa ɔkyɛ wɔ a.

 Zɔhane ala a, Gyihova Alasevolɛ die Nyamenle dahuu ngoane ɛwɔkɛ ne mɔɔ awie biala mɔɔ kɛdie ye la banyia la to nu a. (Wulomuma 6:23) Yɛbɔ mɔdenle yɛka yɛ diedi ne anwo edwɛkɛ yɛkile awie mɔ, ɔluakɛ yɛlɛ anyelazo kɛ bɛbanyia Nyamenle ɛwɔkɛ ne azo nvasoɛ. Noko yɛnlie yɛnli kɛ gyima ɛhye ati ɔfɛta kɛ bɛdie yɛ ngoane. (Wulomuma 1:17; 3:28) Nɔhalɛ nu, saa Nyamenle ka kɛ ɔnea gyima mɔɔ yɛyɛ la anwo na yɛadua yɛ kakɛ a, anrɛɛ dasanli biala ɛnrɛnyia ngoane ne. “Ɔliele yɛ ngoane. Tɛ gyima kpalɛ mɔɔ yɛyɛle la ati ɔ, na ɔse anwunvɔne la ati ɔ.”​—Taetɛse 3:5.