Gyisɛse hanle nrenyia sukoavolɛ ne nee Lazalɛse anwo edwɛkɛ wɔ ye ɛdendɛlɛ ne mɔ ko anu. (Luku 16:19-31) Wɔ edwɛkɛ zɔhane anu, ɛnee mrenyia ne mɔ gyi ɛkɛ ne maa menli ekpunli nwiɔ bie: (1) Gyisɛse mekɛ zo ɛzonlenlɛ nu mgbanyima mɔɔ ɛnee memaa bɛ nwo zo la yɛɛ (2) menli mɔɔ bɛmbu bɛ bie noko bɛdi nɔhalɛ mɔɔ diele Gyisɛse edwɛkɛ ne la.

Wɔ edwɛkɛ ɛhye anu

•  Duzu a Gyisɛse hanle ye wɔ sukoavolɛ ne nee Lazalɛse anwo a?

•  Asoo ɔle edwɛkɛ mɔɔ zile amgba?

•  Asoo edwɛkɛ ɛhye kile kɛ Abɔnsam senle ngilehilelɛ ne le nɔhalɛ ɔ?

•  Sukoavolɛ ne nee Lazalɛse edwɛkɛ ne abo kile nzɔne?

 Wɔ Luku tile 16, Gyisɛse hanle mrenyia nwiɔ bie mɔɔ nzenzaleɛ kpole rale bɛ tɛnlabelɛ nu la anwo edwɛkɛ.

 Gyisɛse edwɛkɛ ne sikalɛ ɛne: Ɛnee nrenyia sukoavolɛ bie de boɛ. Ɛnee bɛfa nrenyia bie mɔɔ sɛlɛzɛlɛ debie mɔɔ bɛfɛlɛ ye Lazalɛse la bɛbatɛnla sukoavolɛ ne anlenkɛ ne anloa. Ɛnee ɔ nye la kɛ ɔbanyia aleɛ mɔɔ vi sukoavolɛ ne ɛkponle ne azo gua aze la bie yeali. Mekɛ bie anzi, Lazalɛse wule na anwumabɔvolɛma ravale ye hɔle Ebileham anwo lɔ. Sukoavolɛ ne noko wule na bɛziele ye. Wɔ edwɛkɛ ne anu, ɔhanle kɛ mɔɔ mrenyia nwiɔ ne wule la ɛnee bɛnwu mɔɔ ɛlɛkɔ zo la. Ɛnee sukoavolɛ ne mɔɔ ɛwu la ɛlɛnwu amaneɛ wɔ sendɔlɔra nu na ɔhanle ɔhilele Ebileham kɛ ɔzoa Lazalɛse ɔmaa ɔva ɔ sa ɛrɛlɛsɛka ɔbɔ nzule nu ɔrape ɔ tafinlima zo. Ebileham andie sukoavolɛ ne na ɔhanle kɛ mrenyia nwiɔ ne tɛnlabelɛ ɛhakyi bɔkɔɔ yɛɛ eza bɛva kuma kpole bɛdo bɛ avinli mɔɔ awie ɛngola ye pɛ a.

 Kyɛkyɛ. Ɔle ndonwo mɔɔ Gyisɛse yɛle vale hilele ɛzukoalɛdeɛ bie ala. Mbɔlɔba bie mɔ die to nu kɛ edwɛkɛ ɛhye le ndonwo ala. Kɛ neazo la, edwɛkɛtile ekyi bie mɔɔ wɔ Luther’s Bible mɔɔ bɛyɛle ye 1912 la ka kɛ edwɛkɛ ɛhye le ndonwo. Yɛɛ Kateleke Jerusalem Bible ne ka ye wɔ ɔbodwɛkɛ ne anu kɛ, edwɛkɛ ɛhye le “ndonwo yɛɛ menli mɔɔ wɔ nu la andɛnla aze.”

 Asoo ɛnee Gyisɛse ɛlɛka mɔɔ kɔ zo wɔ awie ewule nzi la anwo edwɛkɛ? Asoo ɛnee ɔlɛkile kɛ menli bie mɔ wu a bɛyɛ bɛ amumuyɛ wɔ Abɔnsam senle nu yɛɛ Ebileham nee Lazalɛse wɔ anwuma ɔ? Nɔhalɛ edwɛkɛ dɔɔnwo maa yɛnwu ye kɛ ɔnle zɔ.

 Kɛ neazo la:

•   Saa ɛnee sukoavolɛ ne la senle nu a, asoo anrɛɛ senle ne ɛnrɛmaa nzule ne mɔɔ wɔ Lazalɛse asa ɛrɛlɛsɛka ne anwo la ɛnrɛwe ɔ?

•   Saa ɔnrɛwe bɔbɔ a, asoo anrɛɛ nzule ekyi zɔhane bamaa sukoavolɛ ne mɔɔ ɛlɛnwu amaneɛ wɔ senle ne anu la anwo adɔ ye bɔkɔɔ ɔ?

•   Mekɛ mɔɔ Gyisɛse ɛlɛyɛ ndonwo ne la ɛnee yeha ye dɛba kɛ awie biala ɛtɛkɔle anwuma, ɔti kɛ ɔyɛle mɔɔ akee Ebileham tɛte aze wɔ anwuma ɛ?​—Dwɔn 3:13.

 Kyɛkyɛ. Ɛhye ɛnle edwɛkɛ mɔɔ zile amgba a, noko bie mɔ ka kɛ ɔkile kɛ kpalɛma kɔ anwuma yɛɛ bɛyɛ ɛtanevolɛma amumuyɛ wɔ Abɔnsam senle nu. *

 Asoo adwenle ɛhye tɔ ɛzonlɛ nu? Kyɛkyɛ.

 Abɔnsam senle ngilehilelɛ ne nee mɔɔ Baebolo ne ka ye wɔ tɛnlabelɛ mɔɔ mowuamra wɔ nu anwo la ɛnle ko. Kɛ neazo la, Baebolo ne ɛnga kɛ kpalɛma wu a bɛkɔ anwuma bɛkɔdie bɛ nye anzɛɛ bɛyɛ ɛtanevolɛma amumuyɛ wɔ senle nu. Emomu, ɔka kɛ: “Anyewɔzoamra ze kɛ bɛbawu noko mowuamra ɛnze ɛhwee.”​—Nolobɔvo 9:5.

 Ndonwo ne kile menli ekpunli nwiɔ mɔɔ nzenzaleɛ kpole rale bɛ tɛnlabelɛ nu la.

 Nrenyia sukoavolɛ ne gyi ɛkɛ ne maa Dwuuma ɛzonlenlɛ nu mgbanyima mɔɔ ɛnee “bɛkulo ezukoa” la. (Luku 16:14) Bɛdele mɔɔ Gyisɛse hanle la noko bɛdwazole bɛtiale ye edwɛkɛ ne. Ɛnee ɛzonlenlɛ nu mgbanyima ɛhye mɔ ɛmbu menli ne.​—Dwɔn 7:49.

 Lazalɛse gyi ɛkɛ ne maa menli mɔɔ liele Gyisɛse edwɛkɛ ne dole nu noko ɛnee Dwuuma ɛzonlenlɛ nu mgbanyima ɛmbu bɛ bie la.

 Nzenzaleɛ mɔɔ rale bɛ tɛnlabelɛ ne anu la ɛnee le kpole.

•   Ɛnee Dwuuma ɛzonlenlɛ nu mgbanyima ne mɔ dwenle kɛ bɛlɛ Nyamenle anyunlu ɛlolɛ. Noko saa yɛbaha a bɛwule, wɔ mekɛ mɔɔ Nyamenle kpole bɛ nee ɛzonlenlɛ mɔɔ bɛfa bɛmaa ye ɔlua Gyisɛse edwɛkɛ ne mɔɔ bɛanlie bɛando nu la ati. Eza edwɛkɛ ne mɔɔ Gyisɛse nee ye ɛdoavolɛma ne hanle la maanle bɛnwunle amaneɛ.​—Mateyu 23:29, 30; Gyima ne 5:29-33.

•   Menli mɔɔ ɛnlɛ bie mɔɔ ɛzonlenlɛ nu mgbanyima ne mɔ kpole bɛ la akee nyianle gyinlabelɛ kpalɛ. Bɛ nuhua dɔɔnwo liele Ngɛlɛlera ne anu edwɛkɛ mɔɔ Gyisɛse hanle la lile na bɛnyianle zolɛ nvasoɛ. Akee bɛnyianle nwolɛ adenle mɔɔ bamaa bɛanyia Nyamenle anyunlu ɛlolɛ dahuu a.​—Dwɔn 17:3.