Tɛ alesama mɔdenlebɔlɛ a bamaa anzodwolɛ ara azɛlɛ ye azo a, emomu ɔlua Nyamenle Belemgbunlililɛ ne, anwuma arane mɔɔ Kelaese Gyisɛse a di zolɛ tumi la azo. Yɛ mɔɔ Baebolo ne kilehile fale anyelazo kɛnlɛma ɛhye anwo la nzonlɛ.

1.   Nyamenle bamaa ‘bagyakyi konle wɔ azɛlɛ ye amuala azo,’ amaa ye ɛwɔkɛ mɔɔ yebɔ kɛ ɔbamaa “anzonudwolɛ ɛha bɛdabɛ mɔɔ ɔ nye die bɛ nwo wɔ ewiade ye la” ara nu.​—Edwɛndolɛ 46:9; Luku 2:14.

2.   Nyamenle Belemgbunlililɛ ne tumililɛ ne vi anwuma na ɔbali azɛlɛ ye amuala azo tumi. (Daneɛle 7:14) Kɛmɔ ɔbayɛ ewiade amuala arane la ati, ɔbaye maanle nwo ɛhulolɛ mɔɔ fa konle konle ba la yeavi ɛkɛ.

3.   Bɛfɛlɛ Gyisɛse mɔɔ le Nyamenle Belemgbunlililɛ ne azo Belemgbunli la “Anzonudwolɛ Belemgbunli,” na ɔbamaa ‘ye maanlema anzo nu adwo bɛ dahuu.’​—Ayezaya 9:6, 7.

4.   Menli mɔɔ bɛbɔ kpɔkɛ kɛ bɛbahɔ zo bɛaha konle la ɛnrɛdɛnla Belemgbunlililɛ ne abo bie, ɔluakɛ Nyamenle kyi “mɔɔ kulo konle konle la.”​—Edwɛndolɛ 11:5; Mrɛlɛbulɛ 2:22.

5.   Nyamenle kilehile ye maanlema ne kɛzi bɛtɛnla anzodwolɛ nu la. Baebolo ne ka mɔɔ vi ngilehilelɛ ɛhye anu ɛra la anwo edwɛkɛ kɛ: “Bɛbabolo bɛ konle dadeɛ ne mɔ bɛayɛ ɛyazonlɛ mbulalɛ, na bɛbabolo bɛ atwɛ ne mɔ bɛayɛ ɛdedadeɛ. Maanle ko nee maanle ko ɛnrɛho bieko, yɛɛ bɛnrɛzukoa konle ɛhonlɛ bieko.”​—Ayezaya 2:3, 4.

 Kɛkala bɔbɔ, Gyihova Alasevolɛ mgbe dɔɔnwo mɔɔ wɔ ewiade la ɛlɛsukoa kɛzi bɛ nee awie mɔ tɛnla anzodwolɛ nu la avi Nyamenle ɛkɛ. (Mateyu 5:9) Ɔwɔ nuhua kɛ yɛka aneɛ ngakyile yɛɛ yɛvi maanle mɔɔ bo 230 anu la, noko yɛkpo kɛ yɛbava adu yɛaho yɛatia yɛ gɔnwo mɔ.