Hibulu edwɛkɛkpɔkɛ neʹphesh yɛɛ Giliki edwɛkɛkpɔkɛ psy·kheʹ a bɛhile ɔ bo “ɛkɛla” wɔ Baebolo ne anu a. Mɔɔ Hibulu edwɛkɛkpɔkɛ ne kile la ala a le “abɔdeɛ mɔɔ die ɛnwomenle,” yɛɛ Giliki edwɛkɛkpɔkɛ ne kile “abɔdeɛ mɔɔ de aze.” * Yemɔti, ɛkɛla ne a le abɔdeɛ mumua ne na tɛ debie mɔɔ wɔ sonlabaka ne anu mɔɔ sonla ne wu a ɔkɔ zo ɔtɛnla ngoane nu la. Nea deɛmɔti Baebolo ne kile kɛ ɛkɛla ne a le sonla mumua ne la:

•   Mɔɔ Gyihova Nyamenle bɔle nrenyia mɔɔ limoa, Adam la, Baebolo ne se “sonla rayɛle ɛkɛla mɔɔ de aze.” (1 Kɔlentema 15:45) Bɛammaa Adam ɛkɛla​—ɔrayɛle ɛkɛla anzɛɛ sonla mɔɔ de aze.

•   Baebolo ne se ɛkɛla ne kola yɛ gyima, ɛhɔne ku ye, ɔdi aleɛ, ɔdi mɛla zo, na ɔfa ɔ sa ɔka funli. (Sɛlɛvolɛma 5:2; 7:20; 23:30; Mɛla ne 12:20; Wulomuma 13:1) Sonla mumua ne a yɛ ninyɛne ɛhye mɔ amuala a.

Asoo ɛkɛla ne ɛnwu ɛlɛ ɔ?

 Kyɛkyɛ, ɛkɛla ne kola wu. Baebolo ne anu edwɛkɛ dɔɔnwo kile kɛ ɛkɛla ne wu. Nwolɛ neazo bie mɔ ɛne:

•   “Ɛkɛla biala mɔɔ bayɛ ɛtane la bawu.”​—Yizikeɛle 18:​4, 20, King James Version.

•   Wɔ tete Yizilayɛ, ɛnee ɛtane mɔɔ le kpole la anu dɔɔnwo anwo ahatualɛ a le kɛ “bɛbaye ɛkɛla ne bɛavi bɛ nu.” (Adendulɛ 12:15, 19; Sɛlɛvolɛma 7:20, 21, 27; 19:8, King James Version) Ɛhye kile kɛ “ɔwɔ kɛ bɛku” ahenle ne.​—Adendulɛ 31:14.

•   Wɔ Baebolo ne anu ɛleka dɔɔnwo, saa awie wu a, bɛka kɛ “ɛkɛla mɔɔ ɛwu.” (Sɛlɛvolɛma 21:11; Ɛdianlɛ 6:6) Bɛfa edwɛkɛkpɔkɛ “funli” bɛdi gyima wɔ Baebolo dɔɔnwo anu ɛdeɛ, noko wɔ zɔhane ngyehyɛnu ne mɔ anu, Hibulu ne mɔɔ bɛlimoale bɛvale bɛhɛlɛle Baebolo ne la vale edwɛkɛkpɔkɛ neʹphesh, anzɛɛ “ɛkɛla” a lile gyima a.

“Ɛkɛla” kola kile “ngoane”

 Eza Baebolo ne fa “ɛkɛla” gyinla ɛkɛ maa “ngoane.” Kɛ neazo la, Dwobu 33:22 vale Hibulu edwɛkɛkpɔkɛ “ɛkɛla” (neʹphesh) ziele “ngoane” agyakɛ anu. Eza Baebolo ne kile kɛ awie ɛkɛla, anzɛɛ ye ngoane kola minli.​—Adendulɛ 4:19; Maanlebuvolɛma 9:17; Felepaema 2:30.

 Edwɛkɛkpɔkɛ “ɛkɛla” mɔɔ bɛva bɛli gyima wɔ adenle ɛhye azo la boa yɛ maa yɛte Baebolo ne anu ngyehyɛnu bie mɔ mɔɔ se ɛkɛla ne “ɛlɛfi ye anu” la abo. (Mɔlebɛbo 35:18; King James Version) Ɛrɛlɛdendɛ ɛhye maa yɛnwu kɛ ahenle ne ngoane ɛlɛba ye awieleɛ. Baebolo bie mɔ kile edwɛkɛ mɔɔ wɔ Mɔlebɛbo 35:18 la abo kɛ “ɔgule ye ɛnwomenle mɔɔ li awieleɛ.”​—Good News Translation; New Jerusalem Bible.

Ɛleka mɔɔ ɛkɛla mɔɔ ɛnwu ɛlɛ diedi ne vi la

 Kilisiene ɛzonlenlɛ ngakyile mɔɔ bɛdie ɛkɛla mɔɔ ɛnwu ɛlɛ bɛdi la ngilehilelɛ ɛhye ɛngyi Baebolo ne azo, emomu, ɔvi tete Giliki adalɛ nrɛlɛbɛ nu. Encyclopædia Britannica ne ka kɛ: “Ɛkɛla ne mɔɔ bɛvale bɛlile gyima wɔ Baebolo ne anu la fale debie mɔɔ die ɛnwomenle la anwo na ɔnvale ngakyile mɔɔ wɔ ɛkɛla mɔɔ yɛnnwu ye nee sonlabaka ne mɔɔ yɛnwu ye la avinli la anwo. Kilisienema ngilehilelɛ ne mɔɔ kile kɛ sonlabaka ne le ngakyile fi ɛkɛla ne anwo la vi tete Giliki.”

 Nyamenle ɛnlie ɛndo nu kɛ yɛbava sonla nrɛlɛbɛ mɔɔ bie a le ɛkɛla mɔɔ ɛnwu ɛlɛ la diedi ne yɛafonla ye ngilehilelɛ ne. Emomu, Baebolo ne bɔ yɛ kɔkɔ kɛ: “Bɛnlea boɛ na awie anva mɛlɛbɛla nee adalɛ nrɛlɛbɛ mɔɔ bɛlua ewiade amaamuo zo bɛhyehyɛ . . . la anyɛ bɛ ngɛkɛlɛ.”​—Kɔlɔsaema 2:8.