Tattoo finde kokye ala wɔ Baebolo ne anu wɔ Sɛlɛvolɛma 19:28. Ɔka kɛ: ‘Ɔnle kɛ bɛbobɔ ngonlɛ [tattoo] biala.” Nyamenle vale mɛla ɛhye maanle Yizilayɛ maanle ne, na ɔmaanle bɛyɛle ngakyile bɛvile maanle mɔɔ ɛnee ɛbɔ bɛ ɛyia mɔɔ bɛbobɔ bɛ awozonle aluma nee bɛ sɛkɛlɛneɛ ngonlɛ wɔ bɛ nwo la anwo. (Mɛla ne 14:2) Bɛvale Mɛla ne bɛmaanle Yizilayɛma tɛ Kilisienema ɔ, noko ɔwɔ kɛ yɛsuzu ngyinlazo mɔɔ wɔ nu la anwo kpalɛ.

Asoo ɔwɔ kɛ Kilisienenli yɛ tattoo ɔ?

 Baebolo ngyɛnu ɛhye mɔ baboa wɔ yeamaa wɔazuzu edwɛkɛ ɛhye anwo:

•   ‘Mraalɛ ne mɔ noko ɛsiezie bɛ nwo mɔɔ kile kɛ . . . nyiane wɔ bɛ nye zo.’ (1 Temɔte 2:9) Ngyinlazo ɛhye fale mraalɛ nee mrenyia nwo. Ɔwɔ kɛ yɛdwenle awie mɔ anwo yɛɛ ɔnle kɛ yɛtwehwe adwenle yɛba yɛ nwo zo.

•   Bie mɔ kulo kɛ menli nwu kɛzi bɛde la anzɛɛ bɛnyia fanwodi yɛɛ bie mɔ noko yɛ tattoo fa kile kɛ bɛlɛ adenle bɛyɛ biala mɔɔ bɛkulo la wɔ bɛ nwo. Noko akee, Baebolo ne tu Kilisienema folɛ kɛ: “Mesɛlɛ bɛ, bɛva bɛ sonlabaka ne mɔ bɛbɔ azu mɔɔ anwo te na ɔsɔ ɛnyelɛ la bɛmaa Nyamenle. Ɛhye a le sunsum nu ɛzonlenlɛ kpalɛ mɔɔ ɔwɔ kɛ bɛfa bɛsonle ye a.” (Wulomuma 12:1) Suzu deɛmɔti ɛkulo kɛ ɛyɛ tattoo la anwo. Saa yedwu zo la ati yɛɛ ɛkulo kɛ ɛyɛ bie anzɛɛ amaa bɛanwu wɔ kɛ ɛboka ekpunli bie anwo la ati a ɛyɛ a, kakye kɛ wɔ nganeɛdelɛ ne bahakyi noko tattoo ne ɛnrɛhɔ ɛlɛ. Ɛsuzu deɛmɔti ɛkulo kɛ ɛyɛ la anwo a ɔbaboa wɔ yeamaa wɔazi kpɔkɛ kpalɛ.​—Mrɛlɛbulɛ 4:7.

•   “Sonla mɔɔ anye bolo ye gyima nwo la adwenle ngyehyɛlɛ maa ɔnyia aleɛ dɔɔnwo, na sonla mɔɔ pe yɛ debie la ɛnnyia ɛhwee.” (Mrɛlɛbulɛ 21:5) Fane dɔɔnwo ne ala, menli pele bɛ nwo yɛ tattoo, noko ɔbahola yeaha bɛ agɔnwolɛvalɛ nee bɛ gyima ɛkpondɛlɛ. Yɛɛ tattoo ɛkyikyilɛ bolɛ yɛ se eza ɔyɛ nyane. Neɛnleanu nee menli dɔɔnwo mɔɔ yɛ tattoo ɛkyikyilɛ gyima la maa ɔda ali kɛ menli dɔɔnwo mɔɔ ɛyɛ tattoo la kunlu anu a anrɛɛ bɛanyɛ.