Eego, Baibuli neeha obuhame ngu Ruhanga ariho. Neetuhiga kwombeka okwikiriza omuri Ruhanga, kutari kwikiririza eryo enyegyesa z’ediini, beitu turikukoresa okubaasa kwaitu kw’okuteekateeka ‘n’okwetegyereza.’ (Abarooma 12:1; 1 Yohaana 5:​20) Teekateeka aha nyetegyereza erikuhikaana n’ebiri omu Baibuli:

•   Okubaho kw’ensi etebeekanisiibwe gye n’ebiine amagara n’obuhame ngu hariho Omuhangi. Baibuli neegira eti: ‘Ahakuba enju yoona neeyombekwa omuntu nanka, kwonka omwombeki w’ebintu byona ni Ruhanga.’ (Abaheburaayo 3:4) N’obu enshoboorora egi eraabe eyorobi, kwonka neegumira baingi abeegi. a

•   Itwe abantu, twine ekyetengo ky’okumanya ekigyendererwa ky’okugira amagara, ekyetengo ekirikugumaho na twaheza kwigutsa ebyetengo byaitu eby’omubiri. Eki nikyo Baibuli erikweta ‘ekyetengo kyaitu eky’omwoyo,’ ekirikutwariramu ekihika ky’okumanya Ruhanga n’okumuramya. (Matayo 5:3; Okushuuruurwa 4:​11) Ekyetengo eki eky’omwoyo nikituha obuhame ngu Ruhanga ariho, kandi nikyoreka ngu n’Omuhangi oine rukundo orikwenda ngu twigutse ekyetengo ekyo.​—Matayo 4:4.

•   Obunabi bwa Baibuli obwahandiikirwe ira munonga bukahikiirira omu bwijwire nk’oku bwagambirwe. Okuhikiirira kw’obunabi obwo nikworeka ngu kikabaho ahabw’amaani agarikukira ag’abantu.​—2 Petero 1:​21.

•   Abaahandiikire Baibuli bakaba nibamanya ebya saayansi kukira abanyasaayansi ab’obunaku obwo. Nk’eky’okureeberaho, ira abantu bakaba nibaikiriza ngu ensi ehanikirwe aha nyamaishwa, nk’enjojo, engiri nari enimi y’enaaho. Okutaana n’ekyo, Baibuli neegira ngu Ruhanga akahanga ‘ensi yaagihanika ahari busha.’ (Yobu 26:7) Nikyo kimwe, Baibuli neeshoboorora oku ensi ekozirwe erikugira ngu eri nk’enkurungu, nari “eyebumburikire.” (Isaaya 40:22) Abantu baingi nibateekateeka ngu enshoboorora egi ey’ekika ky’ahaiguru neeyoreka ngu abaahandiikire Baibuli, Ruhanga niwe yaabahaire obutumwa.

•   Baibuli neegarukamu ebibuuzo bingi ebigumire, kandi omuntu yaaba atatungire eby’okugarukamu ebirikwesigwa naabaasa kuteekateeka ngu Ruhanga tariho. Nk’eky’okureeberaho: Ruhanga ku araabe aine rukundo n’amaani maingi, ahabw’enki hariho okubonabona n’ebikorwa bibi omu nsi? Ahabw’enki ediini niyo erikukira kureetera abantu kutwaza kubi omu mwanya gw’okutwaza gye?​—Tito 1:​16.