Omushaija omugaiga na Laazaaro ni kimwe aha bitebyo ebi Yesu yaatebize. (Luka 16:19-31) Omu kitebyo eki, abashaija aba nibajwekyera guruupu ibiri z’abantu: (1) abeebembezi b’ediini y’Ekiyudaaya ab’omwetunguuro omu bwire bwa Yesu (2) abantu ab’ahansi kwonka abacureezi abaahurikiize obutumwa bwa Yesu.

Omu kicweka eki

•  Yesu akagamba ki aha mushaija omugaiga na Laazaaro?

•  Ekitebyo eki shi buzima kikabaho?

•  Nikishagika enyegyesa y’omuriro ogutarikuraara shi?

•  Ekitebyo eki kiine makuru ki?

 Omuri Luka eshuura 16, Yesu akagamba aha bashaija babiri abu embeera zaabo zaahindukire ahonaaho.

 Omu bugufu eki nikyo kitebyo eki Yesu yaatebize: Omushaija omugaiga akaba ari omu kujarama. Omushabiirizi orikwetwa Laazaaro akaba naashutama ah’eirembo ry’omugaiga, aine amatsiko g’okutunga oburagarika bw’eby’okurya kuruga aha meeza ye. Bwanyima y’obwire, Laazaaro akafa reero baamaraika baamutwara ahu Abrahamu ari. Omugaiga nawe akafa baamuziika. Omu kitebyo eki, abashaija bombi nibagambwaho nk’abaine eki barikumanya bwanyima y’okufa. Omushaija omugaiga akaba naabonabonesibwa omu muriro, reero yaashaba Abrahamu kwohereza Laazaaro kuhoza orurimi rwe n’eitondo ry’amaizi kuruga aha rukumu rwe. Abrahamu akanga kugarukamu okushaba kw’omugaiga, kandi yaagira ngu bombi embeera zaabo zikahinduka ahonaaho, kandi ngu aha gati yaabo hariho oruhanga orutarikubaasa kwambukwa.

 Ngaaha. Enfumu egi Yesu akagigamba kwegyesa eishomo. N’abacondooza nibaikiriza ngu eki buzima kikaba kiri ekitebyo butebyo. Nk’eky’okureeberaho omutwe omukye omu nvunuura ya Baibuli eya Luther eya 1912 nigugira ngu egi n’enfumu. Kandi na Jerusalem Bible, ey’Abanyakaturiki obugambo obw’aha nsi nibugira ngu “egi n’enfumu omu muringo gw’ekitebyo etarikugamba aha bantu abaabuzima abaabaireho omu byafaayo.”

 Mbwenu shi Yesu akaba ariyo naayegyesa ngu hariho amagara bwanyima y’okufa? Akaba naamanyisa shi ngu abantu abamwe nibabonabona omu muriro baafa, kandi ngu Abrahamu na Laazaaro bakaba bari omu iguru? Obuhame bwingi nibworeka ngu aga tigo makuru.

 Nk’eky’okureeberaho:

•   Omushaija omugaiga ku araabe yaabaire ari omu muriro naatsya, omuriro shi gukaba gutarikwija kwomesa otwizi tw’aha rukumu rwa Laazaaro?

•   N’obu twakuba tutoomire, eitondo rimwe ry’amaizi rikaba niribaasa kuhwera omushaija omugaiga ori omu muriro?

•   Abrahamu akaba naabaasa ata kuba ari omu iguru, kandi obwo Yesu yaagambire butunu ngu kuhitsya obu yaagamba ekitebyo eki, tihaine owaabaire yaagire omu iguru?—Yohaana 3:13.

 Ngaaha. N’obu eki kiraabe kitari ekitebyo kyenyini ekyabaireho, abamwe nibagira ngu nikijwekyera enyegyesa ngu abantu barungi nibaza omu iguru, kandi ngu ababi nibaza okuzimu omu muriro. a

 Mbwenu shi buzima eki n’eky’oburyo? Ngaaha.

 Enyegyesa y’omuriro ogutarikuraara terikuhikaana n’eki Baibuli erikugamba aha mbeera y’abafu. Nk’eky’okureeberaho, terikugira ngu abantu abarungi boona baafa nibaza omu iguru, kandi nabwo terikugira ngu abantu ababi nibaza omu muriro. Kureka, Baibuli neeyoreka butunu eti: “Abahuriire bamanya ku barifa, kwonka abafiire tibagira ki bamanya.”—Omubuurizi 9:5.

 Ekitebyo eki nikyoreka ngu abantu b’emiringo ebiri bakaba bari haihi kutunga empinduka z’amaani omu mbeera zaabo.

 Omushaija omugaiga akaba naajwekyera abeebembezi b’ediini Abayudaaya, “abaabaire bari abakunzi b’empiiha.” (Luka 16:14) Bakaba nibahurira ebi Yesu yaabaire naagamba, kwonka bakaba nibahakanisa obutumwa bwe. Abeebembezi b’ediini aba bakaba nibagaya abantu aba butoosha.—Yohaana 7:49.

 Laazaaro naajwekyera abantu ba butoosha ab’ahansi abaikiriize obutumwa bwa Yesu, kandi abaabaire nibagaywa abeebembezi b’ediini Abayudaaya.

 Okuhinduka kw’embeera z’aba guruupu ezi zombi kukabaho ahonaaho.

•   Abeebembezi b’ediini Abayudaaya bakaba nibamanya ngu nibasiimwa Ruhanga. Kwonka bakafa omu muringo gw’akamanyiso, obu Ruhanga yaabanga n’okuramya kwabo ahabw’okutaikiriza obutumwa bwa Yesu. Kandi bakaba nibabonabonesibwa obutumwa bwa Yesu n’obu abakuratsi be baabaire nibabuurira.—Matayo 23:29, 30; Ebyakozirwe 5:29-33.

•   Abantu ba butoosha abu abeebembezi b’ediini baahugireho kare, hati bakaba bariyo nibagirirwa embabazi. Baingi bakaikiriza obutumwa kuruga omu Byahandiikirwe obu Yesu yaayegyeise, kandi baabugasirwamu. Bo bakatunga omugisha gw’okusiimwa Ruhanga ebiro byona.—Yohaana 17:3.