Ngaaha, ensi ei turikutuuraho terikwija kucwekyerezibwa, kwokibwa omuriro, nari kwihwaho hakateebwaho endiijo. Baibuli neeyegyesa ngu Ruhanga akahanga ensi kutuurwamu ebiro byona.

•   ‘Abahikiriire nibaija kuhungura ensi, bagituuremu ebiro byona’—Zaaburi 37:29.

•   “[Ruhanga akata] ensi aha misingi yaayo, ngu etaritengyetsibwa ebiro byona.”—Zaaburi 104:5.

•   ‘Ensi yo neegumaho obutwire bwona.’—Omubuurizi 1:4.

•   ‘Akahanga ensi, akagibumburika, kandi akagihamya. Taragihangiire [busha], kureka akagihanga kutuurwamu.’—Isaaya 45:18.

 Ruhanga tarikwija kwikiriza abantu kucwekyereza ensi, barikugikoresa kubi, kurabira omu ntaro, nari ekindi. Kureka, naija ‘kuhwerekyereza abarikuhwerekyereza ensi.’ (Okushuuruurwa 11:18) Eki naija kukikora ata?

 Ruhanga naija kwihaho gavumenti z’abantu, eziremirwe kurinda ensi, ateho Obukama bw’omu iguru obuhikiriire. (Danieli 2:44; Matayo 6:9, 10) Obukama obwo nibwija kuba nibutegyekwa Omwana wa Ruhanga, Yesu Kristo. (Isaaya 9:6, 7) Obu Yesu yaabaire ari omu nsi, akabaasa kucureeza amaani g’obuhangwa. (Mako 4:35-41) Yesu ku araabe naakora nk’Omugabe w’Obukama bwa Ruhanga, naija kuba aine obushoboorozi aha maani g’obuhangwa. Naija kuhindurira kimwe embeera omu nsi, zibe nk’ezaabaire ziri omu musiri Edeni.—Matayo 19:28; Luka 23:43.

 Ngaaha buzima. Enyikiriza egi neekira kuruga omu kwetegyereza kubi 2 Petero 3:7, aharikugira hati: “Eiguru n’ensi ebiriho hati, ahabw’ekigambo ekyo, bibiikiirwe omuriro.” Teekateeka aha nshonga ibiri nkuru ezirikutuhwera kwetegyereza ebigambo ebyo:

1.   Baibuli neekoresa ebigambo “eiguru,” “ensi,” hamwe ‘n’omuriro’ kumanyisa amakuru agarengire ahari gamwe. Nk’eky’okureeberaho, Okutandika 11:1 nihagira hati: “Ensi yoona ekaba eine orurimi rumwe.” Aha, ekigambo “ensi” nikimanyisa abantu boona.

2.   Ebyetooroire 2 Petero 3:7 nibyoreka amakuru g’ebigambo eiguru, ensi, n’omuriro ebirikugambwaho omu kyahandiikirwe ekyo. Omushororongo 5 na 6 neegyeragyeranisa n’ebyabaireho omu bwire bw’Omwegyemure gwa Noa. Omu bwire obwo, ensi ekacwekyerezibwa, kwonka ensi erikutuurwaho teracwekyereziibwe. Kureka, Omwegyemure gukacwekyereza “ensi” nari abantu enshaarizi. (Okutandika 6:11) Kandi gukacwekyereza ‘n’eiguru’ ery’omuringo ogundi, abo abaabaire nibategyeka ensi obwire obwo. N’ahabw’ekyo, abantu babi nibo baacwekyereziibwe, beitu etari ensi yaitu erikutuurwaho. Noa n’ab’eka ye bakahonokaho aha kucwekyerera kw’ensi egyo, kandi bakagaruka baatuura aha nsi erikutuurwaho bwanyima y’Omwegyemure.—Okutandika 8:15-18.

 Kushushana n’amaizi g’Omwegyemure ogwo, okucwekyerera nari “omuriro” ogurikugambwaho omu 2 Petero 3:7, niguza an kwihaho ensi y’abantu ababi, beitu etari ensi erikutuurwaho. Ruhanga naaraganisa ‘eiguru erisya n’ensi ensya ebiraatuurwemu okuhikiirira.’ (2 Petero 3:13) “Ensi ensya,” nari embeera z’abantu ensya, neija kuba nibategyekwa “eiguru erisya,” nari obutegyeki busya, nibwo Obukama bwa Ruhanga. Ahansi y’Obukama obwo, ensi neija kuba paradiso y’obusingye.—Okushuuruurwa 21:1-4.