Eki Baibuli erikugarukamu

 Danieli akaba ari nabi w’omutaano Omuyudaaya owaabaireho omu kyasha kya mushanju n’ekya mukaaga Y.A. Ruhanga akamubaasisa kushoboorora amakuru g’ebirooto, yaamuha okworekwa okw’eby’ebiro by’omumaisho, kandi yaamubaasisa n’okuhandiika ekitabo kya Baibuli ekirikwetererwa eiziina rye.—Danieli 1:17; 2:19.

Danieli akaba ari aho?

 Danieli akakurira omuri Yuda, obugabe obwabaire nibutwariramu Yerusaalemu, na hekalu y’Ekiyudaaya. Omuri 617 Y.A., omugabe wa Babulooni, Nebukadeneeza, akakwata orurembo Yerusaalemu, kandi yaatwara “abakuru b’ensi” omu bukwatwa Babulooni. (2 Abagabe 24:15; Danieli 1:1) Danieli, obundi owaabaire ari omushogoyo obwire obwo, nawe bakamutwara.

 Danieli n’eminyeeto abandi (otwariiremu Seduraaka, Mesaaki Abedeneego) bakatwara omu kikaari kya Babulooni kutunga okutendekwa kw’omutaano kuheereza omu gavumenti. Danieli na bagyenzi be n’obu baraabe baabaire nibagyemeserezibwa kureka enyikiriza zaabo, bakaguma bari abeesigwa ahari Ruhanga waabo Yehova. (Danieli 1:3-8) Ku baaherize kutendekwa kumara emyaka eshatu, Omugabe Nebukadeneeza akabasiima ahabw’obwengye n’oburyo ebi baabaire baine, yaagira ngu “nibakira abafumu n’abarogi boona, abaabaire bari omu bugabe bwe bwona emirundi ikumi.” Akatoorana Danieli na banywani be kuheereza omu kikaari kye.—Danieli 1:18-20.

 Bwanyima y’emyaka, obundi obu Danieli yaabaire ari omu myaka ya 90, akeetwa kuhozesebwa omu kikaari. Omushaija orikwetwa Belishaza, owaabaire naategyeka omuri Babulooni obwire obwo, akashaba Danieli kumushoboororera amakuru g’omukono ogwahandiikire aha kisiika kitaraariire. Danieli arikuhwerwa Ruhanga, akagira ngu obutegyeki bwa Babulooni bukaba nibwija kwihwaho obwa Bumeedi na Buperesi. Obutegyeki bwa Babulooni bukahambwa ekiro ekyo kyenyini.—Danieli 5:1, 13-31.

 Obu Danieli yaabaire ariha ahansi y’obutegyeki bwa Bumeedi na Buperesi, akatooranwa kuba omutegyeki mukuru, kandi Omugabe Dario akaba ariyo naateekateeka kwongyera kumukuza. (Danieli 6:1-3) Abategyeki abandi bakagira eihari baakora orukwe rw’okwenda kumwita barikumureetera kunagwa omu kiina ky’entare. Kwonka Yehova akamujuna. (Danieli 6:4-23) Danieli ari haihi kufa, maraika akamweyoreka kabiri arikumuhamiza ngu akaba ari “omushaija orikukundwa munonga” nari ow’omuhendo munonga.—Danieli 10:11, 19.

 Noobaasa kureeba ebi byona ebirikukwata ahari Danieli omu bicweka bibiri eby’omuzaano Danieli—Akaguma Aine Okwikiriza.