Obunywani nibubaasa kureetera omuntu okushemererwa n’okumarwa. Obunywani burungi niburugamu okwombekana n’okugumyana.—Enfumu 27:17.

 Kwonka, Baibuli neeyoreka ngu ni kikuru kutoorana abanywani n’obwegyendesereza. Neerabura aha bibi ebirikuruga omu kugira abanywani babi. (Enfumu 13:20; 1 Abakorinso 15:33) Abanywani ab’omuringo nk’ogu nibabaasa kureetera omuntu kucwamu kubi nari kushiisha emitwarize ye mirungi.

Omu kicweka eki

•  Niki ekirikureetera omuntu kuba omunywani murungi?

•  Ni baahi abaabaire bari abanywani barungi omu Baibuli?

•  Omuntu naabaasa kuba munywani wa Ruhanga?

•  Ebyahandiikirwe ebirikukwata aha bunywani

 Baibuli neeyegyesa ngu obunywani burungi bushemereire kuba niburugiirira aha kirikukira aha kukunda ebintu birikushushana. Nk’eky’okureeberaho, Zaaburi 119:63 nihagira ati: ‘Ndi [munywani] wa boona abarikukutiina, a kandi n’abarikukwata ebi orikwegyesa.’ Yetegyereze ngu omuhandiiki wa Baibuli naagira ngu naanywana abarikutiina kugwisa kubi Ruhanga, kandi abaine ekyetengo ky’okugyendera aha mitindo ye.

 Kandi Baibuli neeyoreka n’emitwarize mirungi ei abanywani bashemereire kugira. Nk’eky’okureeberaho:

•   ‘Munywani w’omuntu amukunda ebiro byona, kandi [naaba ari] ow’eishe-emwe ozaariirwe okuhwera abantu omu bihikiirizi.’—Enfumu 17:17.

•   “Emikago mingi esheenya eka, kwonka habaho munywani w’omuntu okira owa nyina owaazairwe nawe.”—Enfumu 18:24.

 Ebyahandiikirwe ebi nibyoreka ngu omunywani murungi naahamira ahari mugyenzi we, naamukunda, naamugirira embabazi, kandi n’efura. Omunywani owaabuzima naaba ariho kushagika mugyenzi we omu mbeera nungi n’embi. Naaba aine n’obumanzi bw’okugambira mugyenzi we yaaba ari omu muhanda mubi, nari yaaba ari haihi kucwamu kubi.—Enfumu 27:6, 9

 Baibuli neegamba aha bantu abaabaire nibakundana kwonka batarikwingana omu myaka, batarikushushanisa obukomooko, enganda, n’obushoboorozi. Yetegyereze obunywani bw’emiringo eshatu.

•   Ruusi na Naomi. Ruusi akaba ari mukaamwana wa Naomi, kandi Naomi ashemereire kuba yaabaire naakiza Ruusi emyaka mingi. Ekindi, obukomooko bwa Ruusi bukaba nibutaanira kimwe n’obwa Naomi. Oyihireho entaaniso egi, bakaba baine obunywani burungi munonga.—Ruusi 1:16.

•   Daudi na Yonasaani. N’obu Yonasaani araabe yaabaire naakiza Daudi emyaka nka 30, Baibuli neegira ngu ‘omutima gwa Yonasaani gukanywana n’ogwa Daudi.’—1 Samueli 18:1.

•   Yesu n’entumwa ze. Yesu akaba aine obushoboorozi aha ntumwa ze, ari omwegyesa waabo, kandi mukama waabo. (Yohaana 13:13) Kwonka tarabareebire nk’abu atahikire kunywana. Kureka, Yesu akaba aine omukago murungi na boona abaabaire nibakuratira enyegyesa ze. Akagira ati: “Mbeetsire banywani bangye, ahakuba byona ebi naagambiirwe Tata, mbibamanyiise.”—Yohaana 15:14, 15.

 Eego, nikibaasika abantu kuba banywani ba Ruhanga. Baibuli neegira eti: ‘Ab’omutima ogugororokire naabeesiga,’ nari naabanywana. (Enfumu 3:32) Ekirikumanyisa ngu Ruhanga naanywana abarikuteeraho kuba barungi, ab’amazima, abarikweha ekitiinisa, kandi abarikuteeraho kugyendera aha mitindo ey’ekihikire n’ekigwire. Nk’eky’okureeberaho, omushaija omwesigwa Abrahamu naayetwa munywani wa Ruhanga omu Byahandiikirwe.—2 Obusingye 20:7; Isaaya 41:8; Yakobo 2:23.