1. Okwikiriza ni kukuru kuta? (Reeba ekishushani aha kutandika.)

ORAYEBUURIZEHO yaaba ‘ori omwe aha bantu abu Yehova araacungure omu kubonabona kwingi bakaza omu nsi ensya?’ Buzima, okucungurwa nikutwariramu enshonga nyingi. Kwonka entumwa Paulo naayoreka emwe eri nkuru munonga. Naagira ati: “Otarikwikiriza tarikubaasa kushemeza Ruhanga.” (Heb. 11:6) Eki nikibaasa kureebeka nk’ekyorobi, kwonka amazima gari ngu “abaine okwikiriza ti boona.” (2 Tes. 3:2) Ebyahandiikirwe ebi nibituhwera kwetegyereza oku kiri kikuru kugira okwikiriza kuhami.

2, 3. (a) Nitwegyera ki ahari Petero aha bikwatiraine n’obukuru bw’okwikiriza? (b) Ni bibuuzo ki ebi turaashwijume?

² Entumwa Petero akagamba aha bukuru bw’okwikiriza obu yaagira ati: “Okugyezibwa kw’okwikiriza kwanyu kubareetere okusiimwa n’ekitiinisa n’okuhimbisibwa aha kushuuruurwa kwa Yesu Kristo.” (Shoma 1 Petero 1:7.) Mbwenu shi obu okubonabona kwingi kuri haihi kutandika, okwikiriza kwaitu tikushemereire kutuhwera kuba bamwe ahari abo abaraahimbisibwe Omugabe waitu ow’ekitiinisa ku araashuuruurwe? Buzimazima, nitwenda kuba “omuri abo abarikwikiriza, bakajuna amagara gaabo.” (Heb. 10:39) Twine ekigyendererwa eki, nitubaasa kweshengyereza nk’omushaija owaagizire ati: “Onkize obutaikiriza bwangye!” (Mak. 9:24) Nari nitubaasa kuhigwa kugamba nk’oku entumwa za Yesu zaagambire ngu “twongyereho okwikiriza.”—Luk. 17:5.

³ Ekyetengo ky’okwenda kwongyerwa okwikiriza nikireetaho  ebibuuzo. Nitubaasa kwombeka tuta omutwarize ogu? Nitubaasa kworeka tuta ngu twine okwikiriza? Twine buhame ki oburikworeka ngu twashaba kwongyerwa okwikiriza nitwija kugarukwamu?

4. Ni by’okureeberaho ki ebirikubaasa kutuhiga kuhamya okwikiriza kwaitu?

⁴ Obu turikumanya ngu “ebyahandiikirwe ira byona bikahandiikwa kutwegyesa,” nitubaasa kwegyera aha barikugambwaho omu Baibuli abaabaire baine okwikiriza. (Rom. 15:4) Ku turikushoma ebirikukwata aha bantu nka Abrahamu, Saara, Isaaka, Yakobo, Musa, Rahabu, Gideoni, Baraka, n’abandi baingi, nitubaasa kuhigwa kushwijuma okwikiriza kwaitu. (Heb. 11:32-35) Ekindi, ku turikushoma ebirikukwata aha b’eishe-emwe na banyaanyazi-itwe ab’obunaku obu aboorekire ngu baine okwikiriza kw’omutaano, nitubaasa kuhigwa kuhamya okwikiriza kwaitu. *

5. Eliya akooreka ata ngu naikiririza kimwe omuri Yehova, kandi eky’okureeberaho kye nikituhiga kuteekateeka ahari ki?

⁵ Omwe orikugambwaho omu Baibuli ni nabi Eliya. Teekateeka aha byamuhikireho ebirikworeka ngu akaba naayesigira kimwe Yehova. Obu Eliya yaagambira Omugabe Ahabu ekigyendererwa kya Yehova, akagamba atarikutiina ati: “Nindahira MUKAMA . . . tiharibaho rume nari enjura omuri egi myaka okuhitsya obu ndibiragiira!” (1 Bag. 17:1) Eliya akaba naikiriza ngu Yehova naija kumuha ebi arikwenda hamwe n’abandi omu bwire bw’ekyanda. (1 Bag. 17:4, 5, 13, 14) Eizooba erindi akooreka ngu naayesiga Yehova ngu naija kuzoora omwana owaabaire afiire. (1 Bag. 17:21) Kandi akaba atarikubanganisa ngu Yehova naija kwohereza omuriro kwotsya ekitambo, aha Rushozi Karumeeli. (1 Bag. 18:24, 37) Obunaku bwa Yehova ku bwahikire obw’okuhezaho ekyanda, nangwa hatakabaireho n’akamanyiso akarikworeka ngu enjura neeza kugwa, Eliya akagambira Ahabu ati: “Imuka, orye, onywe; ahakuba hariho okuhoorera kw’enjura nyingi munonga.” (1 Bag. 18:41) Mbwenu shi ebi byona tibirikutuhwera kweshwijuma kureeba yaaba okwikiriza kwaitu kuhami?

6. Niki eki twine kushaba Yehova kubaasa kwombeka okwikiriza kwaitu?

⁶ Titurikubaasa kugira okwikiriza ahabw’amaani gaitu gonka. Omwoyo gurikwera nigwo gurikutuhwera kugira okwikiriza. (Gal. 5:22) N’ahabw’ekyo, nituba turi abanyabwengye kukuratira obuhabuzi bwa Yesu oburikukwata aha kushaba kuheebwa omwoyo gurikwera, ahakuba Yesu naatuhamiza, ngu Tataitwe naija ‘kuha omwoyo gurikwera abo abamushaba.’—Luk. 11:13.

7. Ha eky’okureeberaho kworeka oku turikubaasa kuhamya okwikiriza kwaitu.

⁷ Twaheza kugira okwikiriza, tushemereire kugumizamu nitukwombeka. Okwikiriza kwaitu nikubaasa kugyeragyeranisibwa n’omuriro gw’enku. Omuriro gwaba gwaheza kuhembwa, niguba nigwaka munonga gurikunaga enkobe. Kwonka, twaba tutagumire nitwongyera enku omu muriro ogwo, nigwija kurugaho niguraara n’amakara nigakyenya nigarugamu eiju ririkufuka. Beitu waaguma nooyongyera enku omu muriro, nigubaasa kukuguma nigwaka. N’ahabw’ekyo, n’okwikiriza kwaitu nikubaasa kukuguma kuhami twaguma nitweshomesa Ekigambo kya Ruhanga. Twagumizamu nitwega ebiri omu Baibuli, mporampora niturugaho nitugikunda, nitukunda n’Owaagihandiikiise, kandi  ekyo nikiija kutuhwera kwombeka okwikiriza kwaitu.

8. Niki ekirikwija kutuhwera kwombeka okwikiriza kwaitu kandi tukaguma tukwine?

⁸ Niki ekindi eki orikubaasa kukora kwombeka okwikiriza n’okukuhamya? Otakaamarwa n’ebyo byonka ebi waayegire kuhika aha kubatizibwa. (Heb. 6:1, 2) Teeraho kwetegyereza obunabi bw’omu Baibuli obwahikiriziibwe, ahakuba nibwija kukureetera kugira okwikiriza kuhami. Noobaasa n’okukoresa Ekigambo kya Ruhanga kwepima kureeba okwikiriza kwawe ku kuraabe nikuhikaana n’okw’abo abarikugambwaho nk’abaine okwikiriza kuhami.—Shoma Yakobo 1:25; 2:24, 26.

9, 10. Ebintu ebi nibituhwera bita kwombeka okwikiriza? (a) Emikago mirungi? (b) enteerane z’ekibiina? (c) okubuurira?

⁹ Entumwa Paulo akagambira Abakristaayo bagyenzi be ngu okwikiriza kwabo kukaba nikubaasa kubareetera ‘kugumyana.’ (Rom. 1:12) Twaba turi hamwe n’abaikiriza bagyenzi baitu, nitubaasa kwombekana omu kwikiriza, na munonga twaba turi n’abarahikirweho “okugyezibwa omu kwikiriza.” (Yak. 1:3) Emikago mibi neita okwikiriza, kwonka emikago mirungi neekwombeka. (1 Kor. 15:33) Niyo nshonga ahabw’enki nituheebwa obuhabuzi kutareka “kuteeranira hamwe,” kureka tugumizemu ‘nitugumyana.’ (Shoma Abaheburaayo 10:24, 25.) Enshonga endiijo eri ngu ebirikuba biri omu nteerane, birimu obuhabuzi oburikwombeka okwikiriza kwaitu. Eki nikihikaana n’ebigambo bya Paulo ebi: “Okwikiriza kuruga omu bi tuhurira.” (Rom. 10:17) Nookunda kuba ori omu nteerane butoosha?

¹⁰ Ku turikwejumba omu kubuurira, nituba tutarikwombeka okwikiriza kw’abandi kyonka, beitu n’okwaitu nikweyongyera kuhama. Nitwega kwesigira kimwe Yehova n’okugamba twine obumanzi omu mbeera yoona, nk’Abakristaayo aba ira.—Byak. 4:17-20; 13:46.

11. Ahabw’enki Kalebu na Yoshua baabaire baine okwikiriza kuhami, kandi nitubaasa kuba tuta nkabo?

¹¹ Twamanya oku Yehova arikutuhwera n’oku arikugarukamu okushaba kwaitu, okwikiriza kwaitu nikweyongyera. Eki nikwo kyabaire kiri ahari Kalebu na Yoshua. Bakooreka ngu nibaikiririza omuri Yehova obu baaza kutata Ensi Eyaaraganisiibwe. Kwonka, buri murundi ogu baabaire bareeba oku obuhabuzi bwa Yehova bubahwereire, okwikiriza kwabo kukaba kweyongyera. Niyo nshonga ahabw’enki Yoshua yaagambiire Abaisraeli ngu tihariho “kintu na kimwe ekirabuzire aha birungi byona ebi MUKAMA Ruhanga waanyu yaabaraganiise.” Bwanyima akongyeraho ati: “N’ahabw’ekyo hati mutiine MUKAMA, mumuheereze omu mazima mutarikuryarya . . . Nyowe n’eka yangye nitwija kuguma nituheereza” Yehova. (Yos. 23:14; 24:14, 15) Naitwe twaroza aha burungi bwa Yehova, nitubaasa kutunga obuhame nk’obwo.—Zab. 34:8.

12. Yakobo naayoreka ngu niki ekirikwetengyesa aha bikwatiraine n’okwikiriza?

¹² Nitworeka tuta ngu twine okwikiriza kuhami? Omwegi wa Yesu orikwetwa Yakobo naagarukamu ekibuuzo ekyo arikugira ngu niinyija kukworeka “okwikiriza kwangye okurikureeberwa omu bi ndikukora.” (Yak. 2:18) Ebikorwa byaitu nibyoreka ngu twine okwikiriza okwabuzima. Ka tureebe bimwe aha by’okureeberaho.

13. Ahabw’enki okubuurira nigwo muringo murungi gw’okworekamu okwikiriza?

¹³ Okwejumba omu murimo gw’okubuurira nigwo muringo murungi ogw’okworeka okwikiriza kwaitu. Ahabw’enki kiri kityo? Omurimo ogu nigutureetera kwikiriza ngu emperu y’obusingye obu neija kwija nk’oku  Ruhanga arikuraganisa, kandi ngu terikwija kukyerererwa! (Hab. 2:3) Omuringo gumwe ogu turikupimamu okwikiriza kwaitu n’okureeba oku turikuba tweteekateekire kwejumbira kimwe omu kubuurira. Nitukora kyona ekirikubaasika, obundi turikusherura emiringo ei turaayongyere aha buheereza bwaitu? (2 Kor. 13:5) Buzima, okukoresa akanwa kugamba aha kujunwa, n’omuringo mukuru ogw’okworeka ngu twine okwikiriza omu mutima.—Shoma Abarooma 10:10.

14, 15. (a) Nitubaasa kworeka tuta ngu twine okwikiriza? (b) Ha eky’okureeberaho kya bamwe abaayorekire ngu baine okwikiriza kuhami.

¹⁴ Nitubaasa kworeka okwikiriza kwaitu twaba twine emirabanamu. Twaba turwaire, tuhwairemu amaani, twine amaganya, obworo, nari obundi buremeezi, nituba twine obuhame ngu Yehova n’Omwana we nibaija kutuhwera omu bunaku obuhikire. (Heb. 4:16) Nitworeka obuhame nk’obwo turikushaba Yehova obuhwezi obundi obutari bw’eby’omwoyo. Yesu akagira ngu nitubaasa kushaba n’ebintu eby’omubiri otwariiremu “eby’okurya byaitu ebya buri izooba.” (Luk. 11:3) Ebyahandiikirwe nibituhamiza ngu Yehova naabaasa kubituha. Omu kyanda ky’amaani omuri Israeli, Yehova akaha Eliya eby’okurya n’amaizi. Ebikoona bikaguma “nibimureetera emigaati n’enyama buri kasheeshe n’omu mwabazyo; kandi yaaguma naanywa amaizi ahari ako kagyera,” nk’oku Yehova yaabaire aragiire. (1 Bag. 17:3-6) Nitwikiriza ngu Yehova naabaasa kugira eki yaakora kuhamya ngu twaguma nitutunga ebi turikwenda.

¹⁵ Nitumanya ngu twagyendera aha buhabuzi bwa Baibuli, nitwija kutunga eky’okurya. Rebecca, munyaanyazi-itwe oshweirwe omu Asia, eki kimuhwereire hamwe n’ab’omu ka ye. Bakakuratira obuhabuzi oburi omuri Matayo 6:33 hamwe na Enfumu 10:4 barikwebembeza eby’Obukama obwo barikukora n’obweziriki. Rebecca naagira ngu iba ku yaamanyire oku okugyemeserezibwa okuri aha murimo kurikubaasa kuba okw’akabi omu by’omwoyo, akacwamu kugureka. Kwonka bakaba baine abaana bana b’okureeberera. Rebecca naatugambira ekyabaireho:  “Tukatandika kukora eby’okurya n’okubiguza. Kumara emyaka akarimo aka katwire nikatubaisaho, tureebire ngu Yehova tarikubaasa kututsigaho. Titukaburaga eky’okurya.” Naiwe noikiriza ngu Baibuli erimu obuhabuzi oburikukirayo oburungi obunaku obu?

16. Niki ekirikwija kurugamu twayesiga Ruhanga?

¹⁶ Titwine kubanganisa ngu twakuratira obuhabuzi bwa Ruhanga, nihaija kurugamu ebirungi. Paulo arikujuriza ebigambo bya Habakuuki, akahandiika ati: “Ohikiriire aryagira amagara ahabw’okwikiriza.” (Gal. 3:11; Hab. 2:4) N’ahabw’ekyo, ni kikuru ngu twikiririze omuri Ogwo orikubaasa kutuhwera buzima. Paulo naatwijutsya ngu Ruhanga niwe “Ogwo orikubaasa kukora ebirikukirira kimwe ebi tushaba nari ebi tuteekateeka, ahabw’amaani agakorera omuriitwe.” (Efe. 3:20) Abajurizi ba Yehova nibakora kyona ekirikubaasika kukora ebi Ruhanga arikukunda, kwonka barikumanya obweremwa bwabo, nibeesigira kimwe ngu Yehova naija kubaha emigisha. Mbwenu shi titwine okushemererwa ahabw’okumanya ngu Ruhanga ari naitwe?

17. (a) Okushaba kw’entumwa kwongyerwa okwikiriza kukagarukwamu kuta? (b) Ahabw’enki twine kugira amatsiko ngu twashaba kwongyerwa okwikiriza nitwija kugarukwamu?

¹⁷ Ahabw’ebi twaheza kushwijuma, nitubaasa kwehurira nk’oku entumwa baayehuriire obu baagira Mukama waabo bati: “Twongyereho okwikiriza!” (Luk. 17:5) Okushaba kwabo kukagarukwamu aha Pentekoote omu gwa 33, obu baashukwaho omwoyo gurikwera bakahwerwa kwetegyereza gye ekigyendererwa kya Ruhanga. Eki kikahamya okwikiriza kwabo. N’ekyarugiremu, bakeejumbira kimwe omu murimo gw’okubuurira. (Kol. 1:23) Mbwenu shi twashaba kwongyerwaho okwikiriza Ruhanga naatugarukamu? Baibuli neetuhamiza ngu naatugarukamu twashaba “nk’oku akunda.”—1 Yoh. 5:14.

18. Yehova naahwera ata abarikugira eki baakora kuhamya okwikiriza kwabo?

¹⁸ Buzima, Yehova naasiima abo abarikumwesigira kimwe. Yehova naija kutugarukamu twamushaba kutwongyera okwikiriza, kandi okwikiriza kwaitu nikwija kweyongyerera kimwe tube “abashemereire Obukama bwa Ruhanga.”—2 Tes. 1:3, 5.