Okwirira Haihi Ruhanga Kitwire Kiri Kirungi Ahariinye
Ku naahikize emyaka mwenda, naarekyera aho kukura. Egyo n’emyaka 34 enyima obu naabaire ndi omu Côte d’Ivoire, na hati naayemerera nyine fuuti ishatu oburaingwa. Embeera yangye egi ku yaamanyirwe, abazaire bangye bakampiga kukora n’amaani kugira ngu ntakaateekateeka munonga aha ndeebeka yangye. Nkata omudaara gw’ebijuma omu maisho g’enju yaitu, kandi naaguma nimbiboneza kugira ngu bigume nibireebeka gye. Ekyo kikaba kireeta abaguzi baingi.
Amazima gari ngu, okukora munonga tikuraahindwire buri kimwe. Nkaguma ndi mugufu, nkaba ninteganisibwa n’ebintu ebimwe, nk’oburaingwa bw’amadaara agarikubiikwamu ebintu. Okaba nooshusha ngu buri kintu kitebeekanisiibwe ahabw’abaraingwa bonka. Nkaba nyesaasira, kwonka ekyo kikahinduka ku naahikize emyaka 14.
Eizooba rimwe, abakazi babiri Abajurizi ba Yehova, bakagura ebijuma, bwanyima baatandika kunyegyesa Baibuli. Ahonaaho nketegyereza ngu okumanya Yehova n’ekigyendererwa kye kikaba kiri kikuru kukira embeera yangye. Ekyo kikampwera munonga. Zaaburi 73:28 kikahinduka ekyahandiikirwe kyangye eki ndikukunda munonga. Ebigambo by’ekyahandiikirwe ekyo ebirikubanza nibigira biti: “Ekirungi ahariinye n’okwirira haihi Ruhanga.”
Ku haahingwireho obwire bukye eka yaitu yaafuruka yaaza omuri Burkina Faso, embeera zangye zikahindukira kimwe. Omuri Côte d’Ivoire, abantu bakaba bamanyiriire kundeeba nyemereire aha mudaara gw’ebijuma. Kwonka hati omu mwanya musya, nkaba ntarikumanywa, baingi bakaba nibandeeba nk’ow’omutaano. Abantu bakaba nibaampanga amaisho. Obumwe eki kikaba kindeetera kweshereka omu nju kumara saabiiti nyingi. Bwanyima nkaijuka oku okwirira haihi Yehova kitwire kiri kirungi ahariinye. Nkahandiikira ofiisi y’eitaagi ey’Abajurizi ba Yehova kandi naatayaayirwa omukazi orikwetwa Nani, Omumisani owaiziire aha kapiki.
Enguuto zaitu ezirimu omusheenyi niziba niziterera, kandi niziba zirimu ebyondo omu bwire bw’enjura. Nani akaba agwa n’akapiki ke emirundi mingi arikwija kunyegyesa, kwonka ekyo tikiramuremeise. Akeehayo kuntwara omu nteerane. Nkamanya ngu eki nikimanyisa kuruga omu nju kandi nkemera abantu kunshamaarira. Ekindi, okumpeka aha kapiki kikaba nikyongyerera aha buremeezi, ahakuba kakaba kagumire kuvuga. Kwonka, nkaikiriza ahabw’okwijuka ebigambo by’ekicweka kya kabiri omu Kyahandiikirwe kyangye eki ndikukunda ebirikugira ngu Yehova “Ruhanga mmuhindwire obweshereko bwangye.”
Nyowe na Nani obumwe tukaba tugwa omu byondo, kwonka okuza omu nteerane kikaba kiri kirungi munonga. Abantu abaine rukundo kandi abarikushemererwa abu naashangire aha Kyombeko ky’Obukama bakaba nibataanira kimwe aha b’aheeru abarikunshenkerera! Bwanyima y’ameezi mwenda, nkabatizibwa.
Ekicweka kya kashatu ky’Ekyahandiikirwe eki ndikukunda nibigira ngu “mbone kumanyisa abantu ebi wakozire byona.” Nkaba nimmanya ngu okubuurira nikwo kuraakireyo kungumira. Na hati ninyijuka eizooba ry’okubanza obu naaza kubuurira enju aha nju. Abato n’abakuru kaba bankurata obwo barikutooreza oku ndikugyenda. Ekyo kikaba kinshaasha, kwonka nkaba nguma ninyeijutsya ngu nibeetenga ensi nsya nkaanye, ekyo kyampwera kugumisiriza.
Kubaasa kworobya emirimo yangye nkagura egaari y’enziga ishatu. Ou naabaire nimbuurira nawe akaba antsindika aha kashozi, reero aguruka ashutama aha kagaari twahika aha kashuumo. Okubuurira okwabaire kugumira omu kubanza, kukarugamu okushemererwa kw’amaani, kyandeetera kuheereza nka payoniya ow’obutwire omu 1998.
Nkegyesa abantu baingi Baibuli kandi bana aharibo bakabatizibwa. Okwongyera ahari ekyo, omwe ahari barumuna bangye akaikiriza amazima! Okuhurira oku abandi baabaire nibatunguuka kikaba kingaruramu amaani omu bwire bwenyine obu ndikugeetenga. Eizooba rimwe obu naabaire ndwaire omushwija, nkatunga ebaruha kuruga Côte d’Ivoire. Nkaba ntandikire kwegyesa Baibuli omwegi wa yunivasite omuri Burkina Faso, reero naamuha ow’eishe-emwe kwega nawe. Bwanyima omwegi ogwo akafuruka yaaza Côte d’Ivoire. Ka kyanshemeize munonga kumanya ngu akatunguuka yaaba omubuurizi otakabatiziibwe!
Ninyebaisaho nta? Ekitongore ekirikuhwera abatarikwebaasa kikeehayo kunyegyesa okubaziira. Omwe aha bakazi omwegyesa akareeba emikorere yangye yaagira ati: “Tushemereire kukwegyesa kukora saabuuni.” Kandi bakakikora. Ninkora saabuuni y’okwozya n’ey’okunaaba. Abantu nibakunda saabuuni yangye kandi nibagikundisa n’abandi. Niinye ndikugitwara omu bantu kugiguza obwo ndikukoresa akagaari kangye k’enziga ishatu.
Eky’obusaasi, omu 2004, endwara yangye ekandeetera obusaasi bwingi naareeba ngu n’eky’obwengye kurekyera aho kuheereza nka Payoniya. Kwonka nabwo, ninkyejumbira kimwe omu kubuurira.
Abantu nibagira ngu okumwenya kwangye nabo nikubareetera kumwenya. Nyine enshonga nyingi ezirikundetera okushemererwa ahabw’okuba okwirira haihi Ruhanga kitwire kiri kirungi ahariinye.
