1. Abakristaayo nibatunga buremeezi ki omu kubuurira?

ABEEGI ba Baibuli * omu kyasha kya 19 n’ekya 20 bakaba baine oburemeezi bw’amaani. Okushushana n’Abakristaayo b’omu kyasha ky’okubanza, nabo bakaba nibabuurira amakuru agu abantu baingi baabaire batarikumanya. Bakaba bari bakye, kandi abantu omu nsi bakaba nibabareeba nk’abatashomire. Sitaane Omuregi akaba naija kubagirira “n’ekiniga kingi.” (Kush. 12:12) Kandi omurimo gwabo gw’okubuurira gukaba nigwija kubaho omu ‘biro by’emperu eby’akabi kaingi.’—2 Tim. 3:1.

2. Yehova atuhwereire ata omu murimo gw’okubuurira?

² Kwonka, Yehova naayenda ngu omu bunaku obu abaheereza be babuurire amakuru marungi omu nsi yoona, kandi tihaine ekirikubaasa kumuremesa kuhikiiriza ekigyendererwa kye. Nk’oku Yehova yaacungwire Abaisraeli kuruga Babulooni, acungwire abaheereza be ab’obunaku obu kuruga omu ‘Rurembo Orukuru Babulooni,’ nigo madiini g’ebishuba. (Kush. 18:1-4) Atwegyeise eby’okutugasira, atuhaire obusingye, kandi atuhwereire kwegyesa abandi. (Shoma Isaaya 48:16-18.) Eki tikirikumanyisa ngu Yehova naaguma naareeba kare ebirikuza kubaho, reero ahindura embeera  omu nsi kutubaasisa kubuurira. N’amazima, ebintu ebimwe ebirikubaho omu nsi nibituhwera kubuurira. N’obu haraabe hakiriho okuhiiganisibwa n’obundi buremeezi oburikureetwaho ensi ya Sitaane, Yehova naatuhwera kubuurira.—Isa. 41:13; 1 Yoh. 5:19.

3. Okumanya okuhikire kukanyire kuta?

³ Yehova akahwera nabi Danieli kuranga ngu ‘okumanya’ okuhikire kukaba nikwija kukanya omu biro by’emperu. (Shoma Danieli 12:4.) Yehova akahwera Abeegi ba Baibuli kwetegyereza amazima g’omu Byahandiikirwe agaabaire gatwire gasherekirwe enyegyesa z’amadiini g’ebishuba. Hati naakoresa abaheereza be kumanyisa abantu omu nsi yoona amazima aga. Nitureeba okuhikiirira kw’obunabi bwa Danieli. Abantu nka 8,000,000 baikiriize amazima ga Baibuli kandi hati nibagabuurira omu nsi yoona. Ni nshonga ki ezibaasiise omurimo ogu ogw’okubuurira kujanjaara omu nsi yoona?

4. Baibuli ekavunuurwa kirikwingana ki omu kyasha kya 19?

⁴ Kimwe aha bihwereire omu kubuurira amakuru marungi, n’okujanjaara munonga kwa Baibuli. Kumara ebyasha bingi, abeebembezi b’ediini ezirikweyeta enkuristaayo bakaba nibaremesa abantu kutashoma Baibuli, kandi bakaitisa na bamwe abaavunwire Baibuli. Kwonka omu kyasha kya 19, ebibiina ebirikuvunuura Baibuli bikatandika kuvunuura ebitabo bya Baibuli byona, nari bimwe aharibyo omu ndimi nka 400. Ekyasha ekyo kiri haihi kuhendera, abantu baingi bakaba baine Baibuli, kwonka bataine okumanya okuhikire okw’Ebyahandiikirwe.

5. Abajurizi ba Yehova bahikiriize ki ahabw’okwejumba omu murimo gw’okuvunuura Baibuli?

⁵ Abeegi ba Baibuli bakaba nibamanya ngu baine kubuurira, kandi bakakora n’amaani kushoboorora eki Baibuli erikwegyesa. Abaheereza ba Yehova bakoreise kandi baagaba Baibuli z’envunuura nyingi. Kuruga 1950, batwire nibashohoza New World Translation of the Holy Scriptures, yoona nari bimwe aha bitabo byayo, omu ndimi ezirikurenga 120. New World Translation eya 2013 eyorobi kuvunuurwa omu ndimi ezindi. Okukoresa Baibuli erikwetegyerezibwa gye, kandi eyorobi kushoma nikituhwera kuhikiiriza omurimo gwaitu gw’okubuurira.

6, 7. (a) Entaro zijanjaire kirikwingana ki? (b) Obusingye oburiho omu mahanga agamwe buhwereire buta omurimo gwaitu gw’okubuurira?

⁶ Noobaasa kwebuuza oti, ‘Hoona ensi etwire erimu obusingye?’ Nk’eky’okureeberaho omu kyasha kya 20, obukaikuru bw’abantu bakafa ahabw’entaro, okukira munonga omu ntaro ibiri ez’ensi yoona. Kwonka obu Orutaro rw’Ensi Yoona II rwabaire nirunyiinyiitira omuri 1942, Nathan Knorr, owaabaire naayebembera Abajurizi ba Yehova obunaku obwo, aha ruteerane oruhango akaha orubazo orwabaire rwine omutwe, “Obusingye—Nibubaasa Kugumaho?” Orubazo orwo rukaba nirworeka obuhame kuruga omu Okushuuruurwa eshuura 17 ngu orutaro orwo rukaba rutarikwija kurugamu Haramagedoni, kureka ngu hakaba nihaija kubaho obwire bw’obusingye bwanyima yaarwo.—Kush. 17:3, 11.

⁷ Kwonka orutaro rw’Ensi Yoona II ku rwahwaire tiharabeireho busingye obwabuzima. Kurugiirira aha kucondooza kumwe, habaireho okurwanagana kw’emiringo 331 kuruga 1946 kuhika 2013. Abantu obukaikuru n’obukaikuru bafeereire omu ntaro ezo. Kwonka omu myaka egyo yoona, amahanga maingi gatwire gaine obusingye, ekibaasiise Abajurizi ba Yehova kubuurira amakuru marungi. Eki kirugiremu ki? Omuri 1944,  ababuurizi b’Obukama bakaba batarikuhika 110,000 omu nsi yoona. Kwonka hati, hariho ababuurizi nka 8,000,000! (Shoma Isaaya 60:22.) Mbwenu shi titurikushemererwa ku turikubuurira amakuru marungi omu mbeera z’obusingye?

8, 9. Habaireho ntunguuka ki omu by’engyenda, kandi eki kituhwereire kita omu murimo gwaitu?

⁸ Okutunguuka omu by’engyenda kuhwereire munonga omu murimo gw’okubuurira. Omuri 1900 bwanyima y’emyaka nka 21 kuruga obu Watch Tower ey’okubanza eteerwa, omuri United States yoona emotoka 8,000 zonka nizo zaabaire zihandiikisiibwe, kandi hakaba hariho enguuto nkye nungi ez’okuvugiramu emotoka ezo. Omu nsi yoona hati harimu emotoka ezirikurenga akahumbi kamwe n’ekicweka ezihandiikisiibwe, kandi hariho enguuto nyamwingi nungi. Emotoka n’enguuto nyingi nibitubaasisa kutwarira amakuru marungi abantu abarikutuura omu byaro. Kwonka, n’obu turikuba tutaine eby’engyenda ebirungi kandi twine kugyenda engyendo ndaingwa, nituteeraho kuhindura abantu abeegi.—Mat. 28:19, 20.

⁹ Emiringo etari emwe n’emwe ey’ebiiruka nayo etuhwereire munonga omu murimo ogu. Emotoka, ebyombo, n’egaari z’omwika nibihwera omu kutwara ebitabo omu myanya y’ebyaro omu saabiiti nkye. Omu mahanga agamwe, enyonyi nizibaasisa abareeberezi abarikutaayaayira ebibiina, ab’aha bukiiko bw’amataagi, abamiisani, n’abandi kurahuka kuhika aha nteerane empango ez’ebiro bishatu nari kuhikiiriza obujunaanizibwa bw’eby’omwoyo obundi. Kandi ab’Akakiiko akareeberezi n’ab’eishe-emwe abandi abarikuruga aha ofiisi enkuru, nibagyendera omu nyonyi kuza omu mahanga maingi kugaruramu ab’eishe-emwe amaani n’okubaha obuhabuzi. Okutunguuka omu by’engyenda nikubaasisa abaheereza ba Yehova kugira obumwe.—Zab. 133:1-3.

10. Ahabw’enki kirikubaasa kugambwa ngu Orungyereza n’orurimi rw’ensi yoona?

¹⁰ Omu kyasha ky’okubanza Orugriika orurikwetwa Koine rukaba nirugambwa abantu baingi omu butware bwa Rooma. Mbwenu shi hariho orurimi orurikugambwa abantu baingi obunaku obu? Baingi nibabaasa kugira ngu n’Orungyereza. Ekitabo English as a Global Language nikigira kiti: “Abantu nka kimwe kya kashatu omu nsi yoona nibabaasa  kugamba Orungyereza nari nibarugamba gye.” Orurimi orurikukirayo kwegyesibwa omu mahanga agandi n’Orungyereza, abantu nibakira kurukoresa omu by’obushuubuzi, eby’obutegyeki, n’omu bya sayansi.

11. Orungyereza ruhwereire ruta omu kutunguura okuramya okw’amazima?

¹¹ Okujanjaara munonga kw’Orungyereza kuhwereire omu kutunguura okuramya okw’amazima. Kumara emyaka, Omunaara gw’Omurinzi n’ebitabo ebindi ebirikushoboorora ahari Baibuli bikaba nibishohozibwa omu Rungyereza rwonka. Nirwo rurimi orurikukoresibwa aha ofiisi enkuru ey’Abajurizi ba Yehova. Kandi nirukoresibwa omu kwegyesa abeegi omu mashomero g’obuheereza agarikuba Patterson, omuri New York, U.S.A.

12. Abajurizi ba Yehova bavunwire ebitabo omu ndimi zirikwingana ki, kandi niki ekirikubabaasisa kukora ekyo?

¹² Ahabw’okugira ngu twine obujunaanizibwa bw’okubuurira amakuru marungi g’Obukama omu bantu b’amahanga goona, tubaasize kuvunuura ebitabo byaitu omu ndimi nka 700. Okutunguuka omu bya kompyuta kubaasiise Abajurizi ba Yehova kukora puroguraamu ya kompyuta erikwetwa MEPS erikutubaasisa kuteera ebitabo omu ndimi nyingi. Okuteeraho oku kutuhwereire kujanjaaza amakuru g’Obukama kyatuhwera n’okugira obumwe omu nsi yoona. Kwonka ekirikukira kutugaita hamwe, n’okugamba orurimi orushemeire orw’amazima g’Ebyahandiikirwe.—Shoma Zefania 3:9.

13, 14. Abakristaayo obwire obu bagasiirwe bata omu biragiro n’amacwero g’emanja?

¹³ Nk’oku tureebire omu kicweka ekihweire, Abakristaayo aba ira bakagasirwa omu biragiro bya Rooma, ebyabaire nibikora omu butware bwa Rooma bwona. Abakristaayo ab’obunaku obu nabo nibagasirwa omu biragiro ebitairweho. Nk’eky’okureeberaho, omuri United States ahu ofiisi enkuru eri, engyenderwaho y’eihanga eryo neeha abantu obugabe bw’okuramya, obw’okugamba, n’obw’okugira enteerane empango. Eki kihaire ab’eishe-emwe omuri United States obugabe bw’okuteeranira hamwe, okuhikaanisa ebiteekateeko aha Baibuli butunu, n’okubuurira abandi aha bi barikwega. Kwonka, obumwe nikiba nikyetengyesa kubanza kuza omu macwero g’emanja kubaasa kukora ebintu ebyo. (Fil. 1:7) Abajurizi ba Yehova ku barikuteebwaho orubanja omuri United  States, reero bakajurira omu kooti enkuru, butoosha nibagambirwa ngu baine obugabe bw’okubuurira aha Bukama.

¹⁴ Kooti omu mahanga agandi zoorekire ngu hariho obugabe bw’okuramya n’okubuurira butunu. Omu mahanga agamwe, tusingirwe emanja, kwonka twajurira omu kooti ez’ensi yoona. Nk’eky’okureeberaho, omuri Gyuni 2014, Kooti ya Buraaya y’Obugabe bw’Abantu ekacwamu ngu tukasinga emishango 57 erikukwata aha mahanga goona ag’omuri Buraaya. N’obu turaabe ‘nitwangwa amahanga goona,’ kooti z’amahanga amaingi zibaasize kuhamya ngu twine obugabe bw’okuramya.—Mat. 24:9.

15. Habaireho ntunguuka ki omu kuteera ebitabo, kandi eki kituhwereire kita?

¹⁵ Entunguuka omu kuteera ebitabo ebaasiise omurimo gw’okubuurira amakuru marungi kujanjaara omu nsi yoona. Okumara ebyasha bingi, ekyoma ky’okuteera ebitabo ekyajumbirwe Johannes Gutenberg nk’omuri 1450 kikareetaho empindahinduka nkye. Kwonka ebyasha bibiri ebihingwire, habaireho empindahinduka z’amaani omu miringo erikukoresibwa kuteera ebitabo. Hatairweho ebyoma bihango by’okuteera ebitabo, ebirikurahutsya, kandi ebirikukoresa obwengye bw’ahaiguru. Okushohoza empapura n’okuzikwatanisa tibirikutwara sente nyingi munonga. Omuringo gw’okuteera ebitabo oguriho hati, niguhwera omu kurahuka kushohoza ebitabo ebirimu ebishushani. Empindahinduka ezi zoona zikwatsire zita aha murimo gwaitu? Teekateeka ahari eki: Watch Tower eyaabandize kushohozibwa omuri Gyuraayi 1879 bakateera kopi 6,000, ezitarimu bishushani, kandi omu Rungyereza rwonka. Obunaku obu, bwanyima y’emyaka 136, kopi ezirikurenga omu 50,000,000 eza buri Munaara gw’Omurinzi nizo zirikushohozibwa kandi zikagabwa. Magaziini ezi niziba zirimu ebishushani by’erangi zitari zimwe na zimwe kandi omu ndimi ezirikurenga 200.

16. Ni miringo ki ey’entunguuka etuhwereire omu kubuurira omu nsi yoona? (Reeba ekishushani aha kutandika.)

¹⁶ Yetegyereze emiringo y’okubuurira amakuru marungi ei abaheereza ba Ruhanga bakoreise omu myaka nka 200 ehingwire. Twaba twagambire aha gaari y’omwika, emotoka, n’enyonyi, kwonka hariho n’egaari, taipu ruraita, ebyoma ebirikuteera ebitabo by’abantu abahumire, tereguraafu, esimu, zaakamera, ebirikukwata vidiyo, radiyo, tiivi, ebishushani ebirikugyenda, kompyuta, na Intaneeti. Ebintu ebyo bituhwereire omu miringo etari emwe kuhikiiriza omurimo gwaitu gw’okuhindura abantu abeegi. Kubaasa kuhikiiriza obunabi obu ngu abaheereza ba Yehova baraanywa ‘amate g’amahanga,’ tubaasize kukoresa ebintu by’amahanga nk’entunguuka eriho obunaku obu, kubaasa kuteera Baibuli n’ebitabo omu ndimi nyingi.—Shoma Isaaya 60:16.

17. (a) Twine buhame ki? (b) Ahabw’enki Yehova naatwikiriza kuba “abakozi” bagyenzi be?

¹⁷ Hatariho kubanganisa, twine obuhame ngu Ruhanga naatuha omugisha. Kwonka, Yehova tarikwihirira aha buhwezi bwaitu kuhikiiriza ekigyendererwa kye. N’obu kiraabe kiri kityo, Tataitwe ow’omu iguru naatwikiriza kuba “abakozi abarikukora hamwe” nawe, reero naitwe tubaasa kumukunda n’abataahi. (1 Kor. 3:9; Mak. 12:28-31) Ka tuteereho kukoresa buri mugisha gwona kubuurira amakuru g’Obukama, omurimo ogurikukirayo obukuru omu nsi. Omu miringo yoona, ka tukyorekye ngu nitusiima Yehova ahabw’okutuhabura n’okuha omugisha omurimo gwaitu gw’okubuurira n’okwegyesa abantu omu nsi yoona!