1. Ni nshonga ki nungi eziine kukuhiga kubatizibwa?

 NOOKUNDA Yehova Ruhanga okuhaire ebiconco byona ebirungi otwariiremu n’amagara? Okaayenzire kworeka ngu noomukunda? Omuringo murungi gw’okukikoramu n’okwehayo ahariwe, kandi okakyoreka orikubatizibwa omu maizi. Waakora ekyo, noohinduka omwe aha b’eka ya Yehova. N’ekirikurugamu, Sho ow’omu iguru kandi Munywani waawe naija kukwebembera, akureeberere ahabw’okugira ngu ori owe. (Zab. 73:24; Isa. 43:​1, 2) Okwehayo kandi okabatizibwa nikikubaasisa kutunga amatsiko g’okutuuraho ebiro byona.—1 Pet. 3:21.

 2. Nituza kushwijuma ki omu kicweka eki?

² Haine ekirikukureetera kweziringa kubatizibwa? Kyaba nikwo kiri, manya ngu tori wenka. Abantu baingi bakozire empinduka nyingi omu mitwarize n’omu miteekateekyere yaabo, kubaasa kuba abahikire kubatizibwa. Hati nibaheereza Yehova baine okushemererwa n’omujinya. Nitubaasa kwegyera ki aha baabatiziibwe omu kyasha ky’okubanza? Ka tushwijume ebyabaire nibibaasa kubaremesa, n’eki turikubaasa kubeegyeraho.

ABASAMARIA BAKABATIZIBWA

 3. Ni bintu ki ebyabaire nibibaasa kuremesa Abasamaria abamwe kubatizibwa?

³ Abasamaria omu bwire bwa Yesu bakaba bari omu diini eyaabaire eri omu kicweka kya Shekemu na Samaria, bukiizi bwa bumosho bwa Buyudaaya. Abasamaria batakabatiziibwe, bakaba baine kubanza kumanya gye ebiri omu Kigambo kya Ruhanga. Bakaba nibaikiririza omu bitabo bitaano eby’okubanza byonka, eky’Okutandika kuhika aha Eky’Ebiragiro, obundi  n’ekitabo kya Yoshua. Kwonka, bakaba bategyereize Mesia kwija ahabw’ekiraganiso kya Ruhanga ekiri omu Eky’Ebiragiro 18:​18, 19. (Yoh. 4:25) Kubaasa kubatizibwa, bakaba baine kwikiriza ngu Yesu niwe Mesia owaaraganisiibwe. ‘Abasamaria abaingi’ nikyo baakozire. (Yoh. 4:39) Abandi bakaba baine kusingura omuze gw’okushoroora ogwabaire gutsimbire emizi aha gati y’Abasamaria n’Abayudaaya.—Luk. 9:​52-54.

 4. Kurugiirira aha Ebyakozirwe 8:​5, 6, 14, Abasamaria abamwe bakatwaza bata Filipo ku yaababuuriire?

⁴ Niki ekyahweraire Abasamaria kubatizibwa? Filipo omubuurizi ku yaababuuriire ebirikukwata ahari “Kristo,” bamwe aha Abasamaria ‘bakaikiriza ekigambo kya Ruhanga.’ (Shoma Ebyakozirwe 8:​5, 6, 14.) N’obu Filipo yaabaire ari Omuyudaaya, bakamuhurikiza. Obundi nibabaasa kuba baijukire emishororongo erikworeka ngu Ruhanga tarikushoroora. (Bir. 10:​17-19) Bakataho omutima ‘baahurira ebi Filipo yaagambire’ ahari Kristo, kandi bakareeba obuhame obwabaire nibworeka butunu ngu Ruhanga naamushagika. Akaba naakora eby’okutangaaza bingi, ebyabaire nibitwariramu okukiza abarwaire n’okubinga baadaimoni.—Byak. 8:7.

 5. Nooyegyera ki aha Basamaria?

⁵ Abasamaria abo bakaba nibabaasa kwikiriza okushoroora nari okutamanya kubaremesa kutunguuka. Kwonka tibaraikiriize ekyo kubaho. Abasamaria tibareziringire kubatizibwa ku baahamize ngu ebi Filipo yaabeegyeise gakaba gari amazima. Baibuli neeshoboorora eti: “Ku baikiriize, Filipo owaababuuriire ebigambo birungi eby’obukama bwa Ruhanga n’eiziina rya Yesu Kristo, baabatizibwa, abashaija n’abakazi.” (Byak. 8:12) Naiwe shi noohamiza kimwe ngu Ekigambo kya Ruhanga n’amazima kandi ngu Abajurizi ba Yehova nibasingura okushoroora, bateeraho kugirirana rukundo erikworeka ngu n’Abakristaayo abaabuzima? (Yoh. 13:35) Kyaba nikwo kiri, cwamu ahonaaho, orikuhamiza kimwe ngu Yehova naija kukuha emigisha.

 6. Noobaasa kwegyera ki aha ky’okureeberaho kya Ruben?

⁶ Ruben, kuruga Germany, akakurira omu ka y’Abajurizi ba Yehova. Kwonka obu yaabaire akiri omunyeeto, akatandika kubangaanisa yaaba Yehova ariho. Akasingura ata okubangaanisa kwe? Ku yaayetegyereize ngu haine ebi yaabaire atarikumanya, akacwamu kugira eki yaakora. Akagira ati: “Omu kweshomesa, nkaba nyine kusingura okubangaanisa kwangye. Nkeega emirundi mingi aha nshonga ey’okugira ngu ebintu bikabaho birikuruga omu bindi.” Ruben akashoma akatabo Is There a Creator Who Cares About You? Akatabo ako kakamukwataho munonga. Akateekateeka ati: ‘Buzima Yehova ariho!’ Kandi ku yaataayaayire aha ofiisi enkuru, akoongyera kusiima munonga obumwe oburikutangaaza obu twine n’ab’eishe-emwe omu nsi yoona. Ku yaagarukire Germany, akabatizibwa aha emyaka 17. Waaba oine okubangaanisa aha bi oyegire, noobaasa kukusingura orikucondooza omu bitabo byaitu. Okumanya okuhikire nikwija kukuhwera kusingura okubangaanisa. (Efe. 4:​13, 14) Waahurira ripoota ezirikukwata ahari rukundo n’obumwe obw’abaheereza ba Yehova baine omu bicweka ebindi, kandi okabureeba n’omu kibiina kyawe, rukundo ei oiniire ab’eishe-emwe omu nsi yoona neeyongyera.

SAULO OWA TARUSO AKABATIZIBWA

 7. Ni miteekateekyere ki ei Saulo yaabaire aine kuhindura?

⁷ Teekateeka ahari Saulo owa Taruso. Akaba ayegyesiibwe gye omu diini y’Ekiyudaaya, kandi arikumanywa munonga. (Gal. 1:​13, 14;  Fil. 3:5) Obu Abayudaaya baabaire nibareeba Abakristaayo nk’abeehagwire aha mazima, Saulo akabahiiganisa n’ekiniga kingi. Akaba naateekateeka ngu naakora ebirikuhikaana n’ebi Ruhanga arikukunda, kwonka akaba agwire. (Byak. 8:3; 9:​1, 2; 26:​9-11) Saulo kubaasa kwikiriza Yesu kandi akabatizibwa nk’Omukristaayo, akaba aine kuba ayeteekateekire kuhiiganisibwa.

 8. (a) Niki ekyahweraire Saulo kubatizibwa? (b) Kurugiirira aha Ebyakozirwe 22:​12-16, Anania akahwera ata Saulo? (Reeba n’ekishushani.)

⁸ Niki ekyahweraire Saulo kubatizibwa? Yesu ku yaamweyorekire omu kitiinisa kingi, Saulo akahuma amaisho. (Byak. 9:​3-9) Kumara ebiro bishatu, akeesiibyakwo kandi naabaasa kuba yaateekateekire munonga aha kyamubaireho. Saulo akahamya ngu Yesu ni Mesia, kandi ngu abakuratsi be nibo bari omu kuramya okw’amazima. Saulo ka aine kuba yaabaire naayeshinja ahabw’okwejumba omu kwita Stefano! (Byak. 22:20) Bwanyima y’ebiro bishatu, omwegi orikwetwa Anania akaza ahu Saulo yaabaire ari, yaamuhumuura, kandi yaamuhiga kuteeziringa kubatizibwa. (Shoma Ebyakozirwe 22:​12-16.) Saulo omu bucureezi akaikiriza obuhwezi, kandi yaakora empinduka.—Byak. 9:​17, 18.

 9. Nooyegyera ki ahari Saulo?

⁹ Twine amashomo agu turikwegyera ahari Saulo. Akaba naabaasa kwikiriza amaryo nari okutiina abantu kumuremesa kubatizibwa. Kwonka taraikiriize ekyo kubaho. Saulo akaba omucureezi yaahindura emitwarize ye ku yaamanyire amazima agarikukwata ahari Kristo. (Byak. 26:​14, 19) Saulo akaba ayeteekateekire kuba Omukristaayo n’obu araabe yaabaire naamanya ngu naija kuhiiganisibwa. (Byak. 9:​15, 16; 20:​22, 23) Bwanyima y’okubatizibwa, akagumizamu naayesiga Yehova kumuhwera kugumisiriza embeera zigumire. (2 Kor. 4:​7-10) Waabatizibwa okaba omwe aha Bajurizi ba Yehova okwikiriza kwawe nikubaasa kugyezibwa nari ohiiganisibwe, kwonka nooza kuba oine obuhwezi. Noobaasa kugira obwesigye  ngu Ruhanga na Kristo nibaija kugumizamu nibakushagika.—Fil. 4:13.

10. Noobaasa kwegyera ki aha ky’okureeberaho kya Anna?

¹⁰ Anna akakurira omu burugwa-izooba bwa Europe. Nyina ku yaaherize kubatizibwa, Anna akashaba ishe orusa yaatandika kwega Baibuli aha myaka 9. Kwonka ekyo kikamureetera kugira obutaikirizana n’abanyabuzaare be abu baabaire nibatuura nabo. Abanyabuzaare bakaba nibakireeba nk’okubashwaza omwe aharibo kuruga omu diini ya baishenkurubo. Anna ku yaabaire aine emyaka 12, akashaba ishe orusa rw’okubatizibwa. Ishe akaba naayenda kumanya yaaba kwabaire kuri okucwamu kw’omuhara, nari haaba haine owaabaire naamugyemesereza. Anna akamugarukamu ati: “Ninkunda Yehova.” Ishe akamwikiriza kubatizibwa. Bwanyima, Anna akajumwa, kandi yaatwarizibwa kubi omu miringo etari emwe. Omwe aha banyabuzaare be akamugira ati: “Kikaabaire gye kwejumba omu bikorwa by’obushambani n’okureetsa omu mwanya gw’okuba Omujurizi wa Yehova.” Anna akeemera ata embeera egyo? Akagira ati: “Yehova akampwera kuhama, kandi maawe na tata bakanshagika munonga.” Anna naaguma naahandiika obwire butari bumwe obu areebire omukono gwa Yehova. Kandi butoosha naaguma naabishoma kugira ngu ateebwa oku Yehova amuhweraire. Waaba nootiina kuhakanisibwa, ijuka ngu naiwe Yehova naija kukuhwera.—Heb. 13:6.

KORUNEELIO AKABATIZIBWA

11. Niki ekyabaire nikibaasa kureetera Koruneelio kweziringa kubatizibwa?

¹¹ Baibuli neegamba n’ahari Koruneelio. Akaba ari mukuru w’abaserukare 100 omu ihe ry’Abarooma. (Byak. 10:1) N’ahabw’ekyo akaba aine ekitiinisa omu kicweka kyabo n’omu mahe. Akaba “ahwera abooro n’ebintu bye bingi.” (Byak. 10:2) Yehova akoohereza entumwa Petero kumubuurira amakuru marungi. Mbwenu shi Koruneelio akeeziringa kubatizibwa ahabw’ekitiinisa eki yaabaire aine?

12. Niki ekyahweraire Koruneelio kubatizibwa?

¹² Niki ekyahweraire Koruneelio kubatizibwa? Baibuli neeyoreka ngu we n’ab’omu ka ye boona bakaba ‘nibatiina Ruhanga.’ Kandi akaba naashaba Ruhanga obutoosha. (Byak. 10:2) Petero ku yaabuuriire Koruneelio amakuru marungi, we n’eka ye bakaikiriza Kristo kandi baabatizibwa ahonaaho. (Byak. 10:​47, 48) Koruneelio akaba ayeteekateekire kukora empinduka zoona ezirikwetengyesa kuramya Yehova ari hamwe n’eka ye.—Yos. 24:15; Byak. 10:​24, 33.

13. Nooyegyera ki ahari Koruneelio?

¹³ Koruneelio akaba naabaasa kwikiriza obujunaanizibwa obu yaabaire aine kumuremesa kuba Omukristaayo. Kwonka nka Saulo, ekyo tarakiikiriize kubaho. Mbwenu shi nikikwetengyesa kukora empinduka z’amaani kubaasa kwikiriza amazima? Kyaba nikwo kiri, Yehova naija kuba Omuhwezi waawe. Naija kukuha emigisha ahabw’okumariirira kumuheereza omu muringo ogurikuhikaana n’emisingye ya Baibuli.

14. Noobaasa kwegyera ki aha ky’okureeberaho kya Tsuyoshi?

¹⁴ Tsuyoshi kuruga Japan, akaba aine kuhindura omurimo gwe kubaasa kuba ohikire kubatizibwa. Akaba ari owa kabiri ahari mukuru w’eishomero rya Ikenobo ery’okutereeza ebimuri. Mukuru w’eishomero ku yaabaire aremwa kuza aha kuziika, Tsuyoshi butoosha akaba amujwekyera omu migyenzo y’Abaabuda. Kwonka, Tsuyoshi ku yaayegire amazima agarikukwata aha kufa, akaba atarikubaasa kubatizibwa ahabw’emigyenzo egyo. Akacwamu kuteejumba omu migyenzo  y’Abaabuda. (2 Kor. 6:​15, 16) Tsuyoshi akagamba na mukuru w’eishomero aha nshonga egyo. N’ekyarugiremu, Tsuyoshi akabaasa kuguma aha murimo gwe kandi kikaba kitarikumwetengyesa kwejumba omu migyenzo egyo. Akabatizibwa bwanyima y’omwaka gumwe aherize kutandika kwega Baibuli. a Kyaba nikikwetengyesa kuhindura omurimo gwawe kubaasa kushemeza Yehova, gira obwesigye ngu naija kukuha ebirikwetengyesa iwe n’ab’eka yaawe.—Zab. 127:2; Mat. 6:33.

ABAKORINSO BAKABATIZIBWA

15. Ni bintu ki ebyabaire nibibaasa kuremesa Abakorinso kubatizibwa?

¹⁵ Korinso eya ira ekaba neemanywa ahabw’okukunda eby’obutungi n’obushambani. Baingi bakaba nibatuura omu mbeera ezitarikusiimwa Ruhanga. Ahabw’embeera nk’ezo, weena owaabaire aikiriza amakuru marungi akaba agumirwa kutandika kuheereza Yehova. Kwonka nabwo, entumwa Paulo ku yaizire omu rurembo orwo akabuurira amakuru marungi agarikukwata ahari Kristo, “aba Korinso baingi, ku baahuriire, baikiriza, baabatizibwa.” (Byak. 18:​7-11) Bwanyima Mukama waitu Yesu Kristo akagamba na Paulo omu kworekwa yaamugira ati: “Ahakuba nyine abantu baingi omu rurembo oru.” N’ahabw’ekyo Paulo akagumizamu naabuurira omu kicweka ekyo kumara omwaka gumwe n’ekicweka.

16. Niki ekyahweraire bamwe omuri Korinso kusingura ebyabaire nibibaasa kubaremesa kubatizibwa? (2 Abakorinso 10:​4, 5)

¹⁶ Niki ekyahweraire Abakorinso kubatizibwa? (Shoma 2 Abakorinso 10:​4, 5.) Ekigambo kya Ruhanga n’Omwoyo gwe ogurikwera bikabahwera kukora empinduka z’amaani omu magara gaabo. (Heb. 4:12) Abakorinso abaikiriize amakuru marungi agarikukwata ahari Kristo bakabaasa kureka emize n’ebikorwa bibi nk’obusinzi, obushuma, n’obutingwa.—1 Kor. 6:​9-11. b

17. Noobaasa ki kwegyera ki aha Abakorinso?

¹⁷ Yetegyereze ngu n’obu Abakorinso baabaire baine emize egumire kucwa ei baabaire baine kusingura, tibarateekateekire ngu kikaba nikiza kubagumira kuba Abakristaayo. Bakateeraho nk’oku barikubaasa kuza omu kahanda akafunzire akarikuhitsya omu magara agatahwaho. (Mat. 7:​13, 14) Nooteeraho kusingura omuze mubi nari ebikorwa bitahikire kugira ngu obaase kubatizibwa?  Otahanika! Shaba Yehova kukuha omwoyo gwe ogurikwera kukuhwera kwangira ekyetengo ky’okukora ekibi.

18. Noobaasa kwegyera ki aha ky’okureeberaho kya Monika?

¹⁸ Monika, orikutuura Georgia, akateeraho munonga kureka emigambire mibi, n’eby’okweshemeza ebitashemeire kugira ngu abaase kubatizibwa. Akagira ati: “Obu naabaire ndi omunyeeto, amaani gangye gakaba nigaruga omu kushaba. Yehova akaba naamanya ngu niinyenda kukora ekihikire, kandi butoosha akaba ampwera, anyebembera.” Monika akabatizibwa aine myaka 16. Haine emize ei oine kusingura kubaasa kuheereza Yehova omu muringo ogu arikusiima? Gumizamu noomushaba amaani g’okukora empinduka. Yehova naija kukuha omwoyo gwe ogurikwera omu bwijwire.—Yoh. 3:34.

OKWIKIRIZA KWAWE NIKUBAASA KUHIGURA ENSHOZI

19. Niki ekirikubaasa kukuhwera kusingura oburemeezi oburi nk’enshozi? (Reeba n’ekishushani.)

¹⁹ Gira obwesigye ngu Yehova naakukunda, kandi naayenda ngu obe omwe aha b’eka ye. Eki nikibaasika n’obu waakuba oine ebirikukuremesa kuhika aha kubatizibwa. Yesu akagambira guruupu y’abeegi be omu kyasha ky’okubanza ati: “Ku muraabe mwine okwikiriza nk’akajuma ka sinaapi, ku murigambira orushozi oru ngu, Ruga aha, oze hariya, ruryarugaho, kandi tihariho kintu kyona ekiribarema.” (Mat. 17:20) Abaahuriire ebigambo ebyo bakaba bamazire emyaka mikye na Yesu, n’ahabw’ekyo okwikiriza kwabo kukaba kukiriyo nikukura. Yesu akabahamiza ngu baagira okwikiriza kwingi, Yehova naija kubahwera kusingura oburemeezi oburi nk’enshozi. Kandi naiwe Yehova naija kukuhwera omu muringo nigwo gumwe!

20. Eby’okureeberaho eby’Abakristaayo b’ekyasha ky’okubanza n’ab’obunaku obu abaagambwaho omu kicweka eki byakuhiga kukora ki?

²⁰ Waamanya ebirikukuremesa kubatizibwa, oteeziringa kugira eki waakora kubisingura. Eby’okureeberaho eby’Abakristaayo b’ekyasha ky’okubanza n’ab’obunaku obu ka bikuhuumurize kandi bikugumye! Eky’okureeberaho kyabo ka kikuhige kwehayo ahari Yehova kandi obatizibwe! Nikwo kucwamu okurikukirayo oburungi oku orikubaasa kukora!