Ripoota y’Ababuurizi b’Obukama

Akamanya Ekigyendererwa ky’Okubaho

YESU akagira ngu naamanya entaama ze. (Yohaana 10:14) Omuntu yaaba aine omutima murungi arikukunda obusingye n’okuhikiirira, Ruhanga naamweyiriza haihi aba omwe aha bakuratsi ba Yesu. Omuntu nk’ogwo naamanya ekigyendererwa ky’okugira amagara, nk’omukazi omwe omuri Belgium. Ebi nibyo birikumukwataho:

“Obu Abajurizi ba Yehova baateera kodi aha rwigi rwangye, nkaba mpwairemu amaani ndikwenda kweita. Nkakunda eki bangambiire aha ku oburemeezi bw’ensi egi buraahweho kwonka tindashemereirwe ku baangambiire ngu Ruhanga niwe araakikore. Nkaba mmazire emyaka munaana ntarikuza mukanisa, ahakuba nkaba niinyanga oburyarya obwabaire buriyo. Kwonka nketegyereza ngu ebi Abajurizi ba Yehova baabaire nibagamba gakaba gari amazima, kandi ngu kigumire kubaho otaine Ruhanga.

“Eky’obusaasi, bwanyima y’okuntaayaayira emirundi mikye, tindagarukire kuhurizana n’Abajurizi ba Yehova. Nkagira enaku. Nkaba niindeetsa paketi ibiri za tsigara buri izooba, kandi nkatandika n’okukoresa emibazi y’ekitabura bwongo. Ahabw’okwenda kugamba na tatenkuru owaafiire, nkeejumba omu by’obufumu. Nkaba nintiina kuba nyenka omu kiro ahabw’okutaahirirwa baadaimoni! Eki kikabaho kumara ameezi. Buri kiro nkaba ntiina kuba nyenka.

“Izooba rimwe, nkacwamu kugyendagyenda, kwonka ndikuraba omu muhanda ogundi ogu naabaire ntarikukira kurabamu obutoosha, omu kugyenda kwangye nkahika aha mwanya muhango ogu baabaire nibombeka. Kikaantangaaza kureeba hariho abantu baingi. Ku naabahikire haihi, nkamanya ngu n’Abajurizi ba Yehova abaabaire nibombeka Ekyombeko ky’Obukama. Nkaijuka obu baabaire nibantaayaayira owangye, reero naateekateeka ngu buzima kikaabaire kiri kirungi kuri noogira ngu abantu boona bari nk’abantu aba.

“Buzima nkaba niinyenda ngu Abajurizi ba Yehova bagarukye baije owangye, n’ahabw’ekyo nkagamba na bamwe aha baabaire nibombeka. Nkashaba Ruhanga, kandi bwanyima y’ebiro ikumi omushaija owaagaaniire naanye omurundi gw’okubanza akaija aha rwigi rwangye. Akagira ngu nitubaasa kugumizamu nitwega Baibuli, n’okushemererwa kwingi nkaikiriza. Ahonaaho akanyeta kuza omu ruteerane aha Kyombeko ky’Obukama. Nkaikiriza. Eki naareebire nkaba ntakakireebahoga! Nkaba mmazire obwire ninsherura abantu abarikukundana kandi abashemereirwe. Kandi hati nkabatunga!

“N’ahabw’ekyo nkatandika kuza omu nteerane zoona. Bwanyima ya saabiiti nka ishatu, nkacwa omuze mubi ogw’okureetsa. Nkanaga ebitabo byangye byona eby’obufumu n’ebyeshongoro bya Sitaane, kandi nkaba nimpurira ndikuruga omu mikono ya baadaimoni. Nkakora empinduka kuhikaana n’emitindo ya Yehova eya Baibuli, kandi bwanyima y’ameezi ashatu nkatandika kubuurira amakuru marungi. Reero bwanyima y’ameezi mukaaga nkabatizibwa. Bwanyima y’ebiro bibiri mperize kubatizibwa nkaba payoniya omuhwezi.

“Ninsiima Yehova ahabw’ebirungi byona ebi ankoreire. Hati niimanya ekigyendererwa ky’okugira amagara. Eego, eiziina rya Yehova n’omunaara gugumire ogu ntungiiremu obuhungiro n’oburinzi. (Enfumu 18:10) Ninyehurira nk’omuhandiiki wa zaaburi obu yaahandiika Zaaburi 84:10 ati: ‘Ekiro kimwe omu bikaari byawe nikikira okumara ebiro rukumi ahandi. Nkaayenzire kuba omukumiirizi omu nju ya Ruhanga wangye, okukira okutuura omu mahema g’obubi.’”

Omukazi omucureezi ogu akamanya ekigyendererwa ky’okugira amagara. Kandi buri omwe orikusherura Yehova n’omutima murungi naabaasa kumanya ekigyendererwa ky’okugira amagara.