1. Yesu akeeta Abajubi b’eby’enyanja bana kukora ki, kandi bakatwaza bata?

ENTUMWA Petero, Anderea, Yakobo, na Yohaana bakaba bari abajubi b’eby’enyanja. Teebereza oku baayehuriire obu Yesu yaabeeta ati: ‘Mwije munkuratire, naanye ninyija kubagira abajubi b’abantu.’ * Bakatwaza bata? Baibuli neegira eti: ‘Ahonaaho bakatsigaho obutimba bwabo, baamukuratira.’ (Mat. 4:18-22) Okucwamu kwabo kukaba nikwija kuhindura amagara gaabo ebiro byona. Omu mwanya gw’okujuba eby’enyanja ebya butoosha, bakaba nibaija ‘kujuba abantu.’ (Luk. 5:10) Na hati Yesu naayeta abantu b’emitima mirungi abarikukunda amazima kwija kukora omurimo ogu. (Mat. 28:19, 20) Mbwenu shi waikiriize okweta kwa Yesu kuba omujubi w’eby’enyanja?

2. Ahabw’enki enshonga y’okuba abajubi b’abantu twine kugitwara nka nkuru, kandi niki ekiraatuhwere kucwamu tutyo?

² Obundi oyegire Baibuli waatunguuka hati ori aha rurengo rw’okucwamu kuba omubuurizi w’amakuru marungi. Waaba nooyeziringa kwikiriza okweta kwa Yesu, otahwa amaani. Shana obundi nooyeziringa ahabw’okumanya obukuru bw’okucwamu oku. N’amazima, Baibuli neegira ngu Petero na bagyenzi be bakatsigaho obutimba bwabo “ahonaaho.” Kwonka, Petero na beene ishe tibaracwiremu batabandize kuteekateeka. Ameezi nka mukaaga enyima bakaba baamanyire Yesu baamwikiriize ngu niwe Mesia. (Yoh. 1:35-42) Nikyo kimwe, naiwe noobaasa kuba waayegire bingi ebirikukwata ahari Yehova na Yesu, kandi nooyenda kugumizamu nootunguuka omu  by’omwoyo. Kwonka toine kucwamu otyo otabandize kuteekateeka n’obwegyendesereza aha birikutwarirwamu. Niki ekyahweraire Petero, Anderea, n’abandi kucwamu kukuratira Yesu?

3. Ni mitwarize ki eraakuhwere kwongyera kugira ekyetengo ky’okuba omujubi w’abantu?

³ Abeegi ba Yesu ab’okubanza bakaba baine omuhimbo, barikumanya kukora gye omurimo gwabo, bari abeeziriki, kandi baine emicwe mirungi. Hatariho kubangaanisa, emitwarize egi ekabahwera kuba abajubi barungi b’abantu. Ekicweka eki nikiza kworeka oku orikubaasa kugira emitwarize egyo, reero okaba omwegi murungi wa Kristo.

4. Niki ekyareeteire Petero kugira omuhimbo gw’okuba omujubi w’abantu?

⁴ Petero akaba naajuba eby’enyanja kubaisaho eka ye, kwonka akaba atarikugutwara nk’omurimo kyonka. Buzima akaba naakunda okujuba. (Yoh. 21:3, 9-15) Akakunda n’omurimo gw’okujuba abantu. Kandi Petero arikuhwerwa Yehova akeega gye omurimo ogwo.​—Byak. 2:14, 41.

5. Kurugiirira ahari Luka 5:8-11, ahabw’enki Petero yaatiinire, kandi niki ekirikubaasa kutuhwera kusingura enyehurira nk’ezo?

⁵ Nitubuurira ahakuba nitukunda Yehova, ekyo nikyo kintu kikuru ekirikutureetera kugira omuhimbo gw’okukora omurimo ogwo. Rukundo ei twiniire Yehova neebaasa kutuhwera kusingura enyehurira zoona ez’okwereeba nk’abatarikubaasa. Obu Yesu yaayeta Petero kuba omujubi w’abantu, akamugira ati: “Otatiina.” (Shoma Luka 5:8-11.) Petero akaba atatiinire ekirikubaasa kubaho yaahinduka omwegi wa Yesu. Omu mwanya gw’ekyo, akatangaarira omuringo gw’eky’okutangaaza ogu Yesu yaakwatsiremu eby’enyanja ebi yaabaire yaaheza kuha abashaija, reero yaayereeba  nk’otarikubaasa. Naiwe noobaasa kwerarikirira waateekateeka aha kirikutwarirwa omu kuba omwegi wa Kristo. Kyaba nikwo kiri, yongyera kukunda Yehova, Yesu, n’abataahi, reero ekyo nikiija kukureetera kugira omuhimbo gw’okuba omujubi w’abantu.​—Mat. 22:37, 39; Yoh. 14:15.

6. Ni nshonga ki ezindi ezirikutureetera kugira omuhimbo gw’okubuurira?

⁶ Yetegyereze enshonga ezindi ezirikutureetera kugira omuhimbo gw’okubuurira. Nitwenda kworobera ekiragiro kya Yesu: “Mugyende . . . muhindure abantu abeegi.” (Mat. 28:19, 20) Kandi nitubuurira ahabw’okugira ngu abantu “baburaburiirwe, bashobeirwe,” kandi nibendera kimwe kwega amazima agarikukwata aha Bukama bwa Ruhanga. (Mat. 9:36) Yehova naayenda ngu abantu b’emiringo yoona batungye okumanya okuhikire okurikukwata aha mazima reero bajunwe.​—1 Tim. 2:4.

7. Abarooma 10:13-15 nihooreka hata ngu omurimo gw’okubuurira ni mukuru?

⁷ Nitwija kugira omuhimbo gw’okwejumba omu murimo ogu ogurikukiza amagara twateekateeka aha ku okubuurira kurikuhwera abantu. Okutashushana n’omujubi w’eby’enyanja orikubikwata kubiguza nari orikubirya, nitujuba abantu kujuna amagara gaabo.​—Shoma Abarooma 10:13-15; 1 Tim. 4:16.

8-9. Omujubi w’eby’enyanja aine kuba naamanya ki, kandi ahabw’enki?

⁸ Obu Yesu yaabaire ari omu nsi, omujubi w’eby’enyanja Omwisraeli akaba aine kumanya ekika ky’eby’enyanja eki arikwenda kutega. (Lev. 11:9-12) Kandi akaba aine kuba naamanya omwanya ogu eby’enyanja birimu. Eby’enyanja nibikira kuba biri omu maizi agarikubibaasisa kuba gye, kandi ahari eby’okurya bingi. Mbwenu shi omujubi aine kufayo aha bwire obu aine kuzayo kujuba? Aha bikwatiraine n’obwire burungi bw’okukwata eby’enyanja, yetegyereze eki Omujurizi wa Yehova aha kirwa kya Pacific yaagambire obu yaayeta omumiisani kugyenda nawe kujuba. Omumiisani akagira ati: “Ninza kukubugana nyenkyakare shaaha ishatu z’akasheeshe.” Ow’eishe-emwe akamugarukamu ati: “Eki orikugamba torikukyetegyereza gye. Nituzayo obu burikuba buri obwire burungi bw’okukwata eby’enyanja, beitu butari omu bwire burungi bwaitu.”

⁹ Nikyo kimwe, abajubi b’abantu omu kyasha ky’okubanza bakaba nibaza omu myanya ahu abantu bari, kandi bakaba nibazayo obu barikuteekateeka kubashangayo. Nk’eky’okureeberaho, abakuratsi ba Yesu bakaba nibabuurira omuri hekalu n’omuri sinagogi, enju aha nju, n’omu butare. (Byak. 5:42; 17:17; 18:4) Naitwe tushemereire kuba nitwetegyereza gye entwaza y’abantu abarikutuura omu kicweka eki turikubuuriramu. Twine kuhinduramu tukabuurira ahu abantu bari, n’obu barikubaasa kushangwayo.​—1 Kor. 9:19-23.

10. Ni bikoreso ki ebi ekibiina kya Yehova kirikutuha?

¹⁰ Omujubi w’eby’enyanja ashemereire kuba aine ekikoreso ekihikire, kandi ashemereire kuba naamanya kukikoresa. Naitwe tushemeire kuba twine ebikoreso ebihikire kukora omurimo gwaitu. Kandi twine kuba nitumanya kubikoresa. Yesu akaha abeegi be obuhabuzi oburikwetegyerezibwa gye aha bikwatiraine n’oku baine kujuba abantu. Akabagambira ebi baine kugyendana, ahu baine kubuurira, n’ebi baine kugamba. (Mat. 10:5-7; Luk. 10:1-11) Obunaku obu, ekibiina kya Yehova nikituha Eby’okukoresa omu Kwegyesa ebihamiibwe ngu buzima nibikora gye. * Kandi nitwegyesibwa oku twine kubikoresa. Okutendekwa oku nikutuhwera kugira obuhame n’obwengye oburikwetengyesa  kubikoresa gye omu murimo gwaitu.​—2 Tim. 2:15.

11. Ahabw’enki abajubi b’abantu baine kuba bari emanzi?

¹¹ Abajubi b’eby’enyanja baine kugira obumanzi. Obumwe nibaraba omu mbeera zitari nungi aha nyanja. Obundi nibajuba nyekiro obu harikubaasa kurahuka kubaho eihunga. Abajubi b’abantu nabo baine kugira obumanzi. Twatandika kubuurira tukagambira abantu ngu turi Abajurizi ba Yehova, nitubaasa kuhiiganisibwa ab’omu maka gaitu, kujumwa abarikutumanya, kandi n’obutumwa bwaitu nibubaasa kwangwa. Kwonka eki tikirikututangaaza. Yesu akarabura ngu naija kwohereza abakuratsi be omu bantu bagumire.​—Mat. 10:16.

12. Kuhikaana na Yoshua 1:7-9, niki ekirikubaasa kutuhwera kugira obumanzi?

¹² Noobaasa kwongyera ota kugira obumanzi? Eky’okubanza, gira obuhame ngu Yesu naagumizamu naayebembera omurimo arikwema omu iguru. (Yoh. 16:33; Kush. 14:14-16) Ekya kabiri, yongyera kwikiririza omu kuraganisa kwa Yehova ngu naija kukureeberera. (Mat. 6:32-34) Oku oraayongyere kuhamya okwikiriza kwawe, nikwo oraayongyere kugira obumanzi. Petero na bagyenzi be bakooreka ngu baine okwikiriza kw’amaani obu baatsigaho omurimo gwabo bakakuratira Yesu. Naiwe noobaasa kuba waayorekire obumanzi bw’amaani orikugambira banywani baawe n’ab’omu ka yaawe, ngu Abajurizi ba Yehova batandikire kukwegyesa Baibuli, kandi ngu nooza omu nteerane zaabo! Hatariho  kubangaanisa okozire empindahinduka z’amaani omu micwe yaawe n’entwaza yaawe kubaasa kugyendera aha mitindo ya Yehova. Eki okikozire ahabw’okugira okwikiriza n’obumanzi. Waagumizamu nooyongyera aha bumanzi bwawe, noogira obuhame ngu Yehova ‘Ruhanga waawe naija kuguma naiwe, ei oraaze yoona.’​—Shoma Yoshua 1:7-9.

13. Okuteekateeka n’okushaba nibiija kukuhwera bita kugira obumanzi?

¹³ Ni muringo ki ogundi ogu orikubaasa kugiramu obumanzi? Shaba Yehova akuhe obumanzi n’okutatiina. (Byak. 4:29, 31) Yehova naija kugarukamu okushaba kwawe kandi tarikwija kukutsigaho. Butoosha naaba ayeteekateekire kukushagika. Kandi, noobaasa n’okuteekateeka aha ku Yehova yaajunire abandi ira. Teekateeka n’aha ku akuhweraire kusingura embeera zaawe ezigumire, akakuha n’amaani g’okukora empindahinduka. Hatariho kubangaanisa Ogwo owaayebembeire abantu be kubarabya omu Nyanja Erikutukura naabaasa kukuhwera kuba omwegi wa Kristo. (Kur. 14:13) Guma oine okwikiriza nk’okw’omuhandiiki wa Zaaburi owaagizire ngu Yehova ‘ari aha rubaju rwangye, tindikwija kutiina, omuntu naabaasa kungira ata?’​—Zab. 118:6.

14. Ebyahikire ahari Masae na Tomoyo noobyegyeraho ki?

¹⁴ Omuringo ogundi ogw’okugira obumanzi n’okumanya oku Yehova ahwereire abantu abaine enshoni omu buhangwa bakaba emanzi. Teekateeka aha ky’okureeberaho kya munyaanyazi-itwe orikwetwa Masae. Akaba aine enshoni kandi akaba naateekateeka ngu tarikubaasa kugamba aha kwikiriza kwe yaaba ari omu rweteeraine. Okugamba n’abantu abu atarikumanya kikaba kimugumiire munonga nk’okutemba ekisiika kiraingwa ekitarikubaasika. N’ahabw’ekyo akateeraho omu muringo gw’omutaano kwongyera kuhamya rukundo ei ainiire Ruhanga n’abataahi. Akateekateeka aha bukuru bw’obwire obu turimu reero yaashaba obuhwezi kwongyera aha kyetengo kye ky’okubuurira. Akasingura okutiina kwe kandi akaba payoniya ow’obutwire. Yehova naabaasa kuhwera ababuurizi abasya “kuba emanzi.” Yetegyereze eky’okureeberaho kya munyaanyazi-itwe orikwetwa Tomoyo. Ku yaatandikire kubuurira enju aha nju, nyineeka ou yaabandize kuhikaho kubuurira akamutabukira ati: “Tindikwenda kumanya ekintu kyona ekikwatiraine n’Abajurizi ba Yehova!” reero yaakinga orwigi aine ekiniga. Tomoyo aine obumanzi akagambira ou yaabaire naabuurira nawe ati: “Ekyo waakihurira? Tihaine kigambo kyona eki naagamba, kwonka yaamanya ngu ndi Omujurizi wa Yehova. Ekyo kyanshemeza munonga!” Tomoyo hati ni payoniya ow’obutwire.

15. Okwehana niki, kandi ahabw’enki omutwarize ogu ni mukuru aha Bakristaayo?

¹⁵ Abajubi barungi b’eby’enyanja nibaba baine kwehana. Omutwarize gw’okwehana nigushoboororwaho “nk’okubaasa kw’okwehiga kukora ebintu ebiine kukorwa.” Abarikujuba eby’enyanja by’okuguza baine kwehana kubaasa kwimuka kare, kukora mpaka omurimo guhwaire, kandi baine n’okugumisiriza omu mbeera mbi y’obwire. Naitwe twine kwehana twaba nitwenda kugumisiriza tukahendera omurimo gwaitu.​—Mat. 10:22.

16. Nitubaasa kugira tuta omutwarize gw’okwehana?

¹⁶ Titurikuhuungura omutwarize gw’okwehana. Omu mwanya gw’ekyo, n’ekya butoosha kuhurira nitwenda kukora eki turikukunda. Nikyetengyesa okwerinda kubaasa kwehana nari kwesaasa. N’ahabw’ekyo, twine kutunga obuhwezi kubaasa kwetendeka kukora ebintu ebirikuba bitugumiire kubikora. Yehova naatuha obuhwezi obwo arikukoresa omwoyo gwe gurikwera.​—Gal. 5:22, 23.

17. Nk’oku kiri omu 1 Abakorinso 9:25-27, entumwa Paulo akaba aine kukora ki kwongyera kwehana?

 ¹⁷ Entumwa Paulo akaba aine omutwarize gw’okwehana. Kwonka akaikiriza ngu akaba aine ‘kuteera’ omubiri gwe kubaasa kukora ekihikire. (Shoma 1 Abakorinso 9:25-27.) Akahiga abandi kwehana n’okukora gye ebintu byona kandi “bitebeekanisiibwe.” (1 Kor. 14:40) Twine kwehana nari kwesaasa kubaasa kuguma twine entebeekanisa nungi y’eby’omwoyo erikutwariramu okuguma nitwejumba omu murimo gw’okujuba abantu butoosha.​—Byak. 2:46.

18. Yehova naija kwihirira ahari ki kutureeba nk’abasinguzi?

¹⁸ Omujubi w’eby’enyanja naamanya ngu n’omusinguzi kurugiirira aha bwingi bw’eby’enyanja ebi arikutega. Okutaana n’ekyo, obusinguzi bwaitu titurikubumanyira aha muhendo gw’abantu abu turikureeta omu kibiina kya Ruhanga. (Luk. 8:11-15) Itwe ekikuru twagumisiriza omu murimo gw’okubuurira n’okwegyesa abandi amakuru marungi, Yehova naija kutureeba nk’abasinguzi. Ahabw’enki? Ahakuba nituba nitworeka ngu nitumworobera hamwe n’Omwana we.​—Mak. 13:10; Byak. 5:28, 29.

19-20. Ni nshonga ki ey’omutaano eshemereire kutuhiga kubuurira hati?

¹⁹ Omu mahanga agamwe, okujuba eby’enyanja nikwikirizibwa omu meezi agamwe. Omu mahanga nk’ago, omujubi naayongyeramu amaani omu murimo gwe gw’okujuba ameezi ago gaaba gari haihi kuhendera. Naitwe abajubi b’abantu, twine kwongyeramu amaani omu murimo gw’okubuurira hati, ahakuba emperu y’obusingye obu eri haihi munonga! Obwire obutsigaireyo obw’okwejumba omu murimo ogu ogw’okukiza amagara butuubiire kimwe. Otakaayeziringa kandi otakaateekateeka ngu oine kutegyereza embeera nungi eziraakubaasise kwejumba omu murimo mukuru ogu.​—Mub. 11:4.

²⁰ Gira eki waakora hati kwongyera aha muhimbo gwawe, yongyera kumanya gye Baibuli, yongyera kugira obumanzi, kandi yega kwehana. Yegaite aha bajubi b’abantu abarikurenga obukaikuru munaana, kandi noija kutunga okushemererwa kwa Yehova. (Neh. 8:10) Mariirira kwejumbira kimwe omu murimo ogu, okuhitsya obu guraahendere. Ekicweka ekirikukurataho nikiza kworeka emiringo eshatu oku turikubaasa kwongyera kumariirira kugumizamu omu murimo gw’okubuurira aha Bukama nk’abajubi b’abantu.