1. Aha muheru gw’ekyasha ky’okubanza Y.A.K., entumwa Yohaana akaba ari mu mbeera ki?

AHA muheru gw’ekyasha ky’okubanza Y.A.K., entumwa Yohaana akaba ari omu mbeera egumire munonga. Akaba ari omugurusi, akomiirwe aha kirwa kya Patumo, kandi naabaasa kuba niwe ntumwa owaabaire akiriho ahuriire wenka. (Kush. 1:9) Akaba naamanya ngu abahakanisa nibahabisa ebibiina kandi nibareetamu okwebaganisamu. Nikibaasa kuba kyabaire nikireebeka ngu nihaija kuba hatariho Mukristaayo n’omwe ow’amazima.​—Yud. 4; Kush. 2:15, 20; 3:1, 17.

2. Kurugiirira aha Okushuuruurwa 7:9-14, ni kworekwa ki okw’obunabi okurikushemeza oku Yohaana yaatungire? (Reeba ekishushani ekiri aha mutwe.)

² Obu Yohaana yaabaire ari omu mbeera ezi, akatunga okworekwa kw’obunabi. Omu kworekwa okwo, baamaraika nibagambirwa kuba barekire kurekura emiyaga y’okucwekyereza ey’okubonabona kwingi kuhitsya abahuuku ba Ruhanga baaheza kuteebwaho akamanyiso. (Kush. 7:1-3) Abahuuku abo nibahika 144,000 abaraategyeke na Yesu omu iguru. (Luk. 12:32; Kush. 7:4) Bwanyima Yohaana naagamba aha bandi bantu baingi munonga, reero agira ati: “Naareeba”! Ekigambo eki nikibaasa kumanyisa ngu akatangaara ahabw’okureeba eki yaabaire ateeteekateekire. Yohaana akareeba ki? “Omutwe muhango gw’abantu ogu omuntu atarikubaasa kubara, abaarugire omu mahanga goona n’enganda zoona n’abantu boona n’endimi zoona, beemereire omu maisho g’ekitebe ky’obukama n’omu maisho g’Omwana gw’entaama.” (Shoma Okushuuruura 7:9-14.) Teekateeka oku Yohaana aine kuba yaashemereirwe kureeba abantu nyamwingi barikwejumba omu kuramya okw’amazima omu biro by’omumaisho!

3. (a) Ahabw’enki okworekwa kwa Yohaana nikuhamya okwikiriza kwaitu? (b) Nituza kwega ki omu kicweka eki?

³ Hatariho kubangaanisa, okworekwa oku kukahamya okwikiriza  kwa Yohaana. Okworekwa oku ka kushemereire kuhamya munonga okwikiriza kwaitu obu kurikukwata aha biro by’emperu ebi turimu! Tubaasize kureeba obukaikuru bw’abantu abaine amatsiko g’okuhonokaho aha kubonabona kwingi barikwija kuramya Yehova, reero bakatuura omu nsi ebiro byona. Omu kicweka eki, nituza kwega oku Yehova yaatumanyiise ebirikukwata aha mutwe gw’abantu aba, omu myaka erengire kinaana enyima. Bwanyima nituza kureeba ebintu bibiri ebirikukwata aha bantu aba: (1) omubaro gwabo muhango (2) n’obukomooko bwabo butarikushushana. Enshonga ezi zishemereire kuhamya okwikiriza kwa boona abarikwenda kuba bamwe aharibo.

4. Ni mazima ki kuruga omu Byahandiikirwe agu abarikweyeta Abakristaayo batarikwetegyereza, kandi abeegi ba Baibuli bakaba nibataana bata nabo?

⁴ Abarikweyeta Abakristaayo tibarikwegyesa amazima g’omu Byahandiikirwe ngu abantu abeesigwa nibaija kutuura omu nsi ebiro byona. (2 Kor. 4:3, 4) Obunaku obu, amadiini maingi agarikweyeta Amakristaayo nigeegyesa ngu abantu abarungi boona nibaza omu iguru baaheza kufa. Kwonka ekibiina kikye ky’Abeegi ba Baibuli abaabaire nibashohoza Watch Tower omu myaka ya 1800, bakaba nibataana n’amadiini ago. Bakaba nibamanya ngu Ruhanga naija kugaruraho paradiso omu nsi, kandi ngu obukaikuru bw’abantu abeesigwa nibaija kutuura aha omu nsi beitu ritari iguru. Kwonka, kikabatwarira obwire kumanya gye abeesigwa abo abaraatuure omu nsi.​—Mat. 6:10.

5. Abeegi ba Baibuli bakaba nibeetegyereza bata ebirikukwata aha bantu 144,000?

⁵ Kwonka kandi, Abeegi ba Baibuli bakeetegyereza kuruga omu Byahandiikirwe ngu hariho bamwe ‘abaraacungurwe kuruga omu nsi’ kuza kutegyeka na Yesu omu iguru. (Kush. 14:3) Aba n’Abakristaayo abeehaireyo 144,000, kandi abarikuheereza Ruhanga omu bwesigwa baaba bakiri omu nsi. Kandi shi omutwe omuhango gw’abantu?

6. Abeegi ba Baibuli bakaba nibaikiriza ki aha bikwatiraine n’omutwe muhango gw’abantu?

⁶ Yohaana omu kworekwa, akareeba abantu nyamwingi “beemereire omu maisho g’ekitebe ky’obukama n’omu maisho g’Omwana gw’entaama.” (Kush. 7:9) Ebigambo ebyo bikareetera Abeegi ba Baibuli kuteekateeka ngu omutwe muhango gw’abantu nibaija kutuura omu iguru nka bariya 144,000. Mbwenu shi 144,000 hamwe n’omutwe muhango gw’abantu ku baraabe baabaire nibaija kutuura omu iguru, bakaagizire ntaaniso ki? Abeegi ba Baibuli bakaba nibateekateeka ngu omutwe muhango gw’abantu n’Abakristaayo abatarikworobera Ruhanga omu bwijwire baaba bakiri omu nsi. N’obu baraabe baabaire bari abeesigwa, abamwe nibabaasa kuba baagumire omu makanisa agarikweyeta Amakristaayo. Abeegi ba Baibuli bakateekateeka ngu abari nkabo bakaba baine omujinya, kwonka gutari gw’amaani kubaasa kutegyeka na Yesu. Kandi ngu ahabw’okugira ngu omutwe muhango gw’abantu bakaba batainiire Ruhanga rukundo y’amaani, bakaba nibaikirizibwa kuza omu iguru omu maisho g’ekitebe ky’Obukama kwonka batarikushutama aha bitebe.

7. Abeegi ba Baibuli bakaba nibaikiriza ngu ni baahi abaraatuure omu nsi omu Myaka Rukumi, kandi bakaba nibaikiriza ki aha bikwatiraine n’abeesigwa aba ira?

⁷ Mbwenu shi ni baahi abaabaire nibaija kutuura omu nsi? Abeegi ba Baibuli bakaba nibaikiriza ngu bwanyima y’abantu 144,000 n’omutwe muhango gw’abantu kuza omu iguru, obukaikuru bw’abantu abandi nibaija kuheebwa amagara omu nsi batungye emigisha y’Obutegyeki bwa Kristo obw’Emyaka Rukumi. Abeegi ba Baibuli bakaba batarikuteekateeka ngu abantu nyamwingi aba nibaija kuheereza Yehova Obutegyeki bwa Kristo obw’Emyaka Rukumi butakatandikire kutegyeka. Kureka, bakaba nibamanya ngu aba guruupu egi nibaija  kwegyesibwa emihanda ya Yehova omu Myaka Rukumi. Bwanyima, abaakworobaire emitindo ya Yehova baakahairwe omugisha gw’okutunga amagara agatahwaho omu nsi, reero abagomi bacwekyerezibwa. Abeegi ba Baibuli bakaba nibateekateeka ngu obundi bamwe aha baraabe “abategyeki omu nsi” omu Myaka Rukumi, otwariiremu abeesigwa abaabaireho kandi bakafa Kristo atakazairwe, bwanyima nibaija kutwarwa omu iguru.​—Zab. 45:16.

8. Ni guruupu ki ishatu ez’abantu abaabaire nibateekateekwaho ngu nibaija kugasirwa omu ntebeekanisa ya Ruhanga?

⁸ N’ahabw’ekyo, Abeegi ba Baibuli bakaba nibaikiriza ngu hariho guruupu ishatu z’abantu: (1) abantu 144,000, ab’okutegyeka na Yesu omu iguru; (2) omutwe muhango gw’abantu abataine mujinya gw’amaani, abaabaire nibaija kwemerera omu maisho g’ekitebe kya Yesu omu iguru; (3) n’obukaikuru bw’abantu abaabaire nibaija kwegyesibwa emihanda ya Yehova omu Butegyeki bwa Kristo obw’Emyaka Rukumi. * Kwonka bwanyima y’obwire, Yehova akabahwera kwongyera kwetegyereza gye enshonga egi.​—Enf. 4:18.

9. (a) Ni mu muringo ki ogu omutwe muhango gw’abantu omu nsi barikwemerera “omu maisho g’Omwana gw’entaama”? (b) Ahabw’enki oku turikwetegyereza Okushuuruurwa 7:9 hati kurikukora amakuru?

⁹ Omuri 1935 Abajurizi ba Yehova bakeetegyereza gye omutwe muhango gw’abantu abarikugambwaho omu kworekwa kwa Yohaana. Bakeetegyereza gye ngu omutwe muhango gw’abantu tikirikubeetengyesa kuba “beemereire omu maisho g’ekitebe ky’Omwana gw’entaama” butunu. Kureka, eki nibakikora omu muringo gw’akamanyiso. Omutwe omuhango gw’abantu n’obu baraabe nibaija kutuura omu nsi, nibeemerera “omu maisho g’ekitebe” barikweta ahansi y’obushoboorozi bwa Yehova, kandi bakaikiriza ngu niwe ahikire kutegyeka byona. (Isa. 66:1) Nibabaasa kwemerera “omu maisho g’Omwana gw’entaama” barikwikiririza omu kitambo kya Yesu. Nikyo kimwe, omuri Matayo 25:31, 32, “amahanga goona” otwariiremu n’ababi nibagambwaho ‘nk’abateeraniirwe omu maisho’ ga Yesu ari aha kitebe kye eky’ekitiinisa. Buzima, amahanga aga goona tigari mu iguru, kureka gari omu nsi. N’ahabw’ekyo enyetegyereza egi ensya neekora amakuru. Neeshoboorora gye ahabw’enki omutwe muhango gw’abantu batarikugambwaho nk’abarikutwarwa omu iguru. Guruupu emwe yonka ey’abantu 144,000 nibo barikuraganisibwa amagara agatahwaho omu iguru ‘barikutegyeka ensi’ hamwe na Yesu.​—Kush. 5:10.

10. Ahabw’enki omutwe muhango gw’abantu baine kwegyesibwa emihanda ya Yehova, Obutegyeki bw’Emyaka Rukumi butakatandikire?

¹⁰ Kuruga 1935, Abajurizi ba Yehova batwire nibeetegyereza ngu omutwe muhango gw’abantu oguri omu kworekwa kwa Yohaana ni guruupu y’Abakristaayo abeesigwa abaine amatsiko g’okutuura omu nsi ebiro byona. Omutwe muhango gw’abantu kubaasa kuhonokaho aha kubonabona kwingi, baine kwega emihanda ya Yehova, Obutegyeki bw’Emyaka Rukumi butakatandikire. Baine kugira okwikiriza kuhami kubaasa ‘kukira ebyo byona ebiraabeho’ Obutegyeki bw’Emyaka Rukumi butakatandikire.​—Luk. 21:34-36.

11. Niki ekirikubaasa kuba kyareeteire Abeegi ba Baibuli kuteekateeka ngu abamwe nibaija kutwarwa omu iguru bwanyima y’Emyaka Rukumi?

¹¹ Kandi shi emiteekateekyere erikugira ngu abarungi abamwe omu nsi nibaija kutwarwa omu iguru bwanyima y’Emyaka Rukumi? Enyetegyereza egyo ekashoboororowa omu Kwakabiri 15, 1913, omu Watch Tower. Omuntu akaba naabaasa kwebuuza ati: ‘Ahabw’enki abaheereza ba Ruhanga aba ira abeesigwa nibaija kuhungura ensi kwonka Abakristaayo abataine kwikiriza kw’amaani bakaheebwa amagara agatahwaho omu  iguru?’ Amazima gari ngu, Abeegi ba Baibuli bakaba nibaikiriza ekyo ahabw’okutebeereza kw’emiringo ebiri oku: (1) ngu omutwe muhango gw’abantu nibaija kutuura omu iguru (2) kandi ngu omutwe muhango gw’abantu bakaabaire barimu Abakristaayo abataine mujinya gw’amaani.

12-13. Abashukirweho amajuta hamwe n’omutwe muhango gw’abantu nibamanya ki aha bikwatiraine n’omugabo gwabo?

¹² Kwonka nk’oku twaheza kureeba, kuruga 1935, Abajurizi ba Yehova bakabaasa kwetegyereza gye ngu omutwe muhango gw’abantu abarikugambwaho omu kworekwa kwa Yohaana n’abo abaraahonokeho ahari Haramagedoni. Nibaija kuruga “omu kubonabona kwingi” omu nsi aha, kandi nibaija kuguma “nibagamba n’eiraka rihango bati: Okujuna n’okwa Ruhanga waitu, oshutami aha kitebe ky’obukama, kandi n’okw’Omwana gw’entaama.” (Kush. 7:10, 14) Kandi, Ebyahandiikirwe nibyegyesa ngu abo abarikuzooka bakaza omu iguru nibatunga “ekirikukira oburungi” aha ky’abaheereza ba Ruhanga abeesigwa aba ira. (Heb. 11:40) Kuruga obwo, ab’eishe-emwe bakatandika kweta abantu baine omuhimbo kwija kuheereza Yehova baine amatsiko g’okutuura omu nsi ebiro byona.

¹³ Omutwe muhango gw’abantu nibeesiimira omu matsiko gaabo. Nibeetegyereza ngu Yehova niwe arikucwamu ahu abantu be abeesigwa baraamuheerereze, yaaba omu iguru nari omu nsi. Abashukirweho amajuta hamwe n’omutwe muhango gw’abantu nibamanya ngu nibaija kutunga omugabo gwabo ahabw’embabazi za Yehova ezitabashemereire, ezi yaayorekire kurabira omu kitambo kya Yesu Kristo.​—Rom. 3:24.

14. Bwanyima ya 1935, ahabw’enki baingi baabaire nibeebuuza oku obunabi oburikukwata aha mutwe muhango gw’abantu buraahikiirizibwe?

¹⁴ Abajurizi ba Yehova bwanyima y’okuhinduramu omu nyetegyereza yaabo muri 1935, baingi bakaba nibeebuuza oku haraabeho omutwe muhango gw’abantu. Nk’eky’okureeberaho, Ronald Parkin akaba aine emyaka 12 obu omutwe muhango gw’abantu gwayetegyerezibwa gye. Naagira ati: “Omu bwire obwo, omu nsi yoona hakaba harimu ababuurizi 56,000, kandi baingi ahari aba nari abarikukira obwingi bakaba bashukirweho omwoyo gurikwera. N’ahabw’ekyo omutwe muhango gw’abantu bakaba batarikureebeka nk’abari baingi.”

15. Okurundaana omutwe muhango gw’abantu kugumiizemu kuta nikweyongyera?

¹⁵ Kwonka omu myaka eyaakuratsireho, abamiisani bakooherezibwa omu mahanga maingi, kandi omubaro gw’Abajurizi ba Yehova gukeeyongyera. Reero omuri 1968, bakatandikaho ehururu y’okwegyesa abantu Baibuli barikukoresa ekitabo The Truth That Leads to Eternal Life. Ekitabo eki ahabw’okushoboorora amazima  ga Baibuli omu muringo gworobi, kikareetera abantu baingi kukunda Yehova kukira ira. Omu myaka ena, abantu basya abarikurenga emitwaro makumi ataano bakabatizibwa. Kandi Abanyakaturiki ku baatandikire kuhwa amaani omu Latin America n’amahanga agandi, n’emihingo ekaihwa aha murimo gwaitu omuri Europe n’omu bicweka bimwe omuri Africa, obukaikuru n’obukaikuru bw’abantu abandi nabo bakabatizibwa. (Isa. 60:22) Omu myaka ya juba, ekibiina kya Yehova kishohoize ebindi bikoreso bingi kuhwera abantu kumanya eki Baibuli erikwegyesa. Tihariho kubangaanisa ngu omutwe muhango gw’abantu abarikurenga obukaikuru munaana babaasize kurundaanwa.

16. Omutwe muhango gw’abantu nibarundaanwa kuruga nkahi?

¹⁶ Obu Yohaana yaahandiika okworekwa kwe, akagira ngu omutwe muhango gw’abantu nibaija kuruga “omu mahanga goona n’enganda zoona n’abantu boona n’endimi zoona.” Enyima nabi Zekaria akaba yaagambire aha ekintu ekirikushusha kityo. Akahandiika ati: ‘Omuri ebyo biro abantu ikumi, abarikuruga omu mahanga aga buri rurimi, nibaija kukwata omukugiro gw’ekanzu y’Omuyudaaya bamugire bati: Ka tugyende naimwe; ahabw’okuba tuhuriire ku Ruhanga ari naimwe.’​—Zek. 8:23.

17. Niki ekiriyo nikikorwa kuhwera abantu b’amahanga goona n’endimi zoona?

 ¹⁷ Abajurizi ba Yehova nibeetegyereza ngu abantu b’endimi zoona kubaasa kurundaanwa, amakuru marungi gaine kubuurirwa omu ndimi nyingi. Tutwire nituvunuura ebitabo ebirikushoboorora Baibuli kumara emyaka erengire 130, kwonka hati nitukora omurimo gw’okuvunuura omu ndimi nyingi ogurikukirayo omu byafaayo. Buzima, obunaku obu omu omuringo gw’eky’okutangaaza, Yehova ariyo naarundaana omutwe muhango gw’abantu kuruga omu mahanga goona. Nitushemererwa kureeba ngu hariho eby’okurya bingi by’omwoyo omu ndimi nyingi munonga, ekirikutureetera kugira obumwe omu kuramya. Kandi Abajurizi ba Yehova nibamanywa gye ahabw’okubuurira baine obweziriki n’ahabw’okukundana kwabo. Ekyo buzima ka nikihamya okwikiriza kwaitu!​—Mat. 24:14; Yoh. 13:35.

18. (a) Okuhikaana na Isaaya 46:10, 11, ahabw’enki tutarikutangaara ngu Yehova ahikiriize obunabi oburikukwata aha mutwe muhango gw’abantu? (b) Ahabw’enki abaine amatsiko g’okutuura omu nsi batarikuhurira baine eki barikufeerwa?

¹⁸ Twine enshonga nyingi ezishemereire kutureetera kwenda kumanya ebirikukwata aha bunabi bw’omutwe muhango gw’abantu! Tikirikututangaaza kureeba ngu Yehova ahikiriize obunabi obwo omu muringo gurikutangaaza nk’ogu. (Shoma Isaaya 46:10, 11.) Omutwe muhango gw’abantu nibasiima Yehova ahabw’amatsiko aga agu abahaire. Tibarikuhurira ngu haine eki barikufeerwa ahabw’okugira ngu tibashukirweho omwoyo gurikwera kuza kuheereza na Yesu omu iguru. Omu Byahandiikirwe byona, nitushoma aha bashaija n’abakazi abeesigwa abaabaire nibeebemberwa omwoyo gurikwera, kwonka abatari bamwe aha bantu 144,000. Yohaana omubatizi n’omwe aharibo. (Mat. 11:11) Daudi nawe n’omwe aharibo. (Byak. 2:34) Aba n’abandi baingi nibaija kuzoorwa batungye amagara agatahwaho omu paradiso omu nsi. Aba boona hamwe n’omutwe muhango gw’abantu, nibaija kutunga omugisha gw’okworeka ngu bahamiire ahari Yehova, kandi ngu nibamushagika nk’ohikire kutegyeka byona.

19. Okuhikiirira kw’okworekwa kwa Yohaana okurikukwata aha mutwe muhango gw’abantu nikworeka kuta obukuru bw’obwire obu turimu?

¹⁹ Omu byafaayo Ruhanga takarundaanaga hamwe abantu nyamwingi bati kuruga omu mahanga goona. Yaaba amatsiko gaitu n’ag’okutuura omu iguru nari omu nsi, twine kuteeraho kuhwera baingi nk’oku kirikubaasika kuba bamwe aha mutwe muhango ‘gw’ab’entaama ezindi.’ (Yoh. 10:16) Juba, Yehova naija kureeta okubonabona kwingi okwagambirweho, kucwekyereza gavumenti n’ediini ezitwire nizireetera abantu kubonabona. Ka n’omugisha gw’omutaano omutwe muhango gw’abantu kuheereza Yehova omu nsi ebiro byona!​—Kush. 7:14.