Ab’eishe-emwe aha Beseeli bakaba batwire nibakora n’amaani kwombeka radiyo ya WBBR aha kirwa Staten, omu rurembo New York. Bwanyima y’okuboneza omwanya, bakombekaho enju mpango y’abakozi, n’ekyombeko ekindi ky’okubiikamu eby’okukoresa. Ku baaherize, bakatandika kugaita ebyoma by’okushohoza amaraka “aha radiyo.” Kwonka bakaba baine kusingura oburemeezi obundi bwingi.

Ab’eishe-emwe bakeetegyereza ngu tikyorobi kwemereza eriyoro ya radiyo. Eriyoro y’oburaingwa bwa fuuti 300 ekaba eine kuhanikwa aha mirongoti ebiri ya fuuti 200. Omu kubanza ab’eishe-emwe bakaremwa, kwonka bwanyima bakasingura ahabw’okwesiga Yehova. Calvin Prosser, owaahwereire aha mirimo egyo akagira ngu, “ku ogire ngu omu kubanza bikagyenda gye, tukaba nitwija kwehimbisa tugire tuti: ‘Reeba eki tubaasize kukora!’” Ab’eishe-emwe bakahimbisa Yehova ahabw’okusingura. Kwonka bakaba bakiine oburemeezi.

Okwombeka radiyo kikaba kiri kisya, kandi kikaba kitoorobi kutunga ebyoma by’okukoresa. N’ahabw’ekyo ab’eishe-emwe bakatunga ekyoma ekirikubaasisa signal ya radiyo kuhika omu myanya ya hare ekiine amaani agarikwigana watt 500. Omu mwanya gw’okugura omuzindaaro, bakakoresa ogw’esimu. Ekiro kimwe Okwakabiri, ab’eishe-emwe bakacwamu kugyeseza radiyo egi kureeba yaaba neekora. Bakaba nibenda puroguraamu y’okuta aha radiyo, n’ahabw’ekyo bakacwamu kweshongora ebyeshongoro by’Obukama. Ernest Lowe akagamba ekyabaireho obu ab’eishe-emwe  baabaire nibeeshongora. Omuramuzi Rutherford, b akabahurira aha radiyo barikweshongora ari Brooklyn mahiro nka 15, reero yaabateerera esimu

Ow’eishe-emwe Rutherford akagira ati: “Murekyere aho kuteera orwari. Amaraka gaanyu gari nk’ag’enjangu!” Ab’eishe-emwe bakabwerabwera, ahonaaho baihaho radiyo, kwonka bakaba baine obuhame ngu nibabaasa kutandika kugikoresa.

Okwakabiri 24, 1924, obu radiyo yaakoresibwa omurundi gw’okubanza, Ow’eishe-emwe Rutherford akagihayo “kushagika emirimo y’obukama bwa Mesia.” Akagira ngu ekigyendererwa kya radiyo egyo “n’okuhwera abantu kwetegyereza Baibuli, n’obukuru bw’obwire obuturimu.”

Obu radiyo yaabanza kukoresibwa buri kimwe kikagyenda gye. Emyaka 33 eyaakuratsireho, WBBR ekakoresibwa kurangirira puroguraamu z’ekibiina.

Omu Kwamushanju 1924, Abeegi ba Baibuli bakagira oruteerane oruhango omuri Columbus, Ohio. Ab’eishe-emwe kuruga omu nsi yoona, bakahurira embazo omu Oruharabu, Orungyereza, Orufaransa, Orugyamani, Orugriika, Oruhangare, Oruitalia, Orurimi rwa Lithuania, Orurimi rwa Poland, Orurasha, endimi za Scandinavia, n’Oruyukuraini. Embazo ezimwe zikateebwa aha radiyo, kandi baakatebeekanisa ngu orupapura rw’amakuru Ohio State Journal rugume nirushohoza ebyabaho aha ruteerane oruhango buri izooba.

Orwakana, Okwamushanju 24, abaizire aha ruteerane oruhango abarikurenga 5,000 bakeejumba omu kubuurira. Bakagaba ebitabo nka 30,000, kandi bakatandika kwegyesa Baibuli abantu baingi munonga. Omunaara gw’Omurinzi gukagira ngu eizooba eryo “niryo ryakizireyo kuba rirungi aha ruteerane oruhango.”

Ekindi ekirikushemeza kikabaho Orwakataano, Okwamushanju 25, obu ow’eishe-emwe Rutherford yaashoma ekihandiiko ky’okusingisa orubanja abeebembezi b’ediini. Ekihandiiko ekyo kikaba kihandiikirwe nk’eky’ab’ebiragiro, kirikusingisa orubanja ab’eby’obutegyeki, abeebembezi b’ediini, n’abashuubuzi “ahabw’okuremesa abantu kumanya ebirikukwata aha Bukama bwa Ruhanga obu araakorese kureetera abantu emigisha.” Kandi, ekihandiiko ekyo kikooreka ngu abashaija  abo bakaba “nibashagika Ekigombe ky’Amahanga Agakwataniise barikugira ngu nikijwekyera Obukama bwa Ruhanga omu nsi.” Abeegi ba Baibuli bakaba baine kugira obumanzi kubaasa kugambira abantu obutumwa obwo.

Omunaara gw’Omurinzi gukagamba omu bugufu aha byabaireho aha ruteerane orwo guti: “Eihe rikye rya Mukama eryeteeraniire omuri Columbus aha ruteerane oruhango rihamiibwe omu kwikiriza. . . , kandi riine amaani maingi g’okurwanisa emyambi y’omuzigu.” Leo Claus, owaabaire ariho aha ruteerane orwo akagira ati: “Tukaruga aha ruteerane twine omuhimbo gw’okujanjaaza ekihandiiko ekyo omu kicweka kyaitu.”

Omu Kwaikumi, Abeegi ba Baibuli bakatandika kujanjaaza kopi za turakiti Ecclesiastics Indicted, eyaabaire erimu ebi Ow’eishe-emwe Rutherford yaagambire. Omu tauni nkye eya Cleveland, Oklahoma, Ow’eishe-emwe Frank Johnson ku yaaherize kugaba turakiti ezo, akaba aine kutegyereza kumara edakiika 20 ababuurizi bagyenzi be kumwakiira. Kwonka, akaba atarikubaasa kutegyerereza ahu buri omwe yaabaire naabaasa kumureeba, ahabw’okuba abashaija omu tauni egyo abaabaire baine ekiniga ahabw’okubuurira kwe bakaba nibamusherura. Ow’eishe-emwe Johnson akacwamu kweshereka omu kanisa eyaabaire eri haihi. Ahabw’okugira ngu tihaine owaabaire arimu, akatsiga turakiti ya Ecclesiastics Indicted omu Baibuli y’omubuurizi, n’aha buri ntebe y’omu kanisa. Ku yaaherize, akashohora ahonaaho. Kwonka akaba akiine obwire, n’ahabw’ekyo akaza omu kanisa ezindi ibiri yaakora nikyo kimwe.

Frank akairuka yaagaruka ahu ababuurizi bagyenzi be baabaire nibaza kumwakiira. Akeeshereka enyima y’eicundiro ry’amajuta, arikureeba abashaija abaabaire nibamusherura. Kwonka bakavuga baarabaho, batamureebire. Ahonaaho ku baaherize kurabaho, ababuurizi bagyenzi be abaabaire nibabuurira haihi bakaija kumwakiira, reero baagyenda.

Ow’eishe-emwe omwe naagira ati: “Ku twabaire nituruga omu tauni egyo, tukaraba aha kanisa ishatu ezo. Omu maisho ga buri kanisa hakaba hemereireho abantu nka 50. Abamwe bakaba nibashoma turakiti, abandi barikugyoreka omubuurizi waabo. Amazima gari ngu tukakirira hakye. Kwonka tukasiima Yehova Ruhanga ahabw’okutuha oburinzi, n’obwengye bw’okutakwatwa abazigu b’Obukama.”

Omu mahanga agandi, abeegi ba Baibuli bakagumizamu nibabuurira n’obumanzi. Bukiizi-bwa-bumosho bwa France, Józef Krett akabuurira abashuhuuki kuruga Poland abaabaire nibakora omu kirombe. Akaba naaza kuha orubazo orwabaire nirugira ngu “Okuzooka kw’Abafu Kuri Haihi.” Abantu omu tauni ku baahairwe kaada z’okubeeta, omwebembezi w’ediini omwe akarabura ab’ekanisa ye kutazayo. Okurabura kwe kukafa busha. Abantu abarikurenga 5,000 bakahurikiiza orubazo rwe otwariiremu n’omwebembezi w’ediini. Ow’eishe-emwe Krett akeeta omwebembezi w’ediini kwija kujurira ebi arikwikiriza, yaayanga. Ow’eishe-emwe Krett akagaba ebitabo byona ebi yaabaire aine, kandi akeetegyereza ngu abantu abu yaabuuriire bakaba baine eiriho ry’Ekigambo kya Ruhanga.—Amo. 8:11.

Omuri Africa, Claude Brown akareeta amakuru marungi omuri Gold Coast, hati erikumanywa nka Ghana. Embazo ezi yaahaire, n’ebitabo ebi yaagabire, bikahwera omu kujanjaaza amazima ahonaaho omu eihanga eryo. John Blankson, owaabaire naayega obushaho, akahurikiza rumwe aha mbazo z’Ow’eishe-emwe Brown. Ahonaaho akeetegyereza ngu aboine amazima. John akagira  ati: “Amazima gakandeetera kushemererwa, kandi nkagagambira baingi abu naabaire ninshoma nabo obushaho.”

Eizooba rimwe, John akaza omu kanisa y’Abaporotesitanti kubuuza omwebembezi w’ediini aha nyegyesa y’Obushatu, ei yaabaire ayetegyereize ngu terikushangwa omu byahandiikirwe. Omwebembezi w’ediini akamubinga aine ekiniga, arikugira ati: “Tori Mukristaayo; ori owa Sitaane. Ruga aha!”

John ku yaahikire omuka, akahandiikira omwebembezi w’ediini ebaruha, arikumweta kushoboorora obushatu omu rweteeraine rw’abantu. Omwebembezi w’ediini ogwo akeeta John omu ofiisi ya mukuru w’eishomero. Ku yaahikireyo, mukuru w’eishomero akamubuuza yaaba buzima ahandiikiire omwebembezi w’ediini ebaruha.

John akagarukamu ati: “Eego Sebo.”

Mukuru w’eishomero akagambira John kuhandiikira omwebembezi w’ediini ebaruha arikumushaba okusaasirwa. N’ahabw’ekyo John akahandiika ati:

“Sebo, omushomesa wangye yaangambira kukuhandiikira ebaruha ndikushaba okusaasirwa. Nyeteekateekire kugihandiika, kwonka oine kubanza waikiriza ngu nooyegyesa ebishuba.”

Omushomesa akatangaara yaamubuuza ati: “Blankson, ebyo nibyo orikwenda kumuhandiikira?”

“Eego Sebo. Ebyo nibyo ndikubaasa kuhandiika.”

“Nooza kubingwa omu ishomero. Noobaasa kugamba ota ebintu nk’ebyo aha mwebembezi w’ediini ya gavumenti, reero okateekateeka ngu gavumenti neija kuguma neekushagika?”

“Mushomesa, . . . ku orikutwegyesa tukagira enshonga ezi tutayetegyereza gye, titurikukubuuza?”

“Eego, nimubuuza.”

“Sebo, naanye ekyo nikyo nkozire. Omushaija abaire naatwegyesa Baibuli, naamubuuza ekibuuzo. Ku araabe areemirwe kugarukamu ekibuuzo, ahabw’enki nyine kumushaba okusaasirwa?”

Blankson tarabingirwe aha ishomero, kandi ebaruha y’okushaba okusaasirwa taragihandiikire.

Omunaara gw’Omurinzi gukagamba ahari byona ebyabaireho omu mwaka ogwo guti: “Nka Daudi nitubaasa kugira tuti: ‘Okanzirika amaani g’okurwana.’ (Zaaburi 18:39) Omwaka gubaire gurimu bingi ebirikugumya, ahakuba tureebire omukono gwa Mukama . . . abaheereza be abeesigwa . . . batwire nibabuurira amakuru marungi bashemereirwe.”

Omwaka gurikuhendera, ab’eishe-emwe bakataho entebeekanisa y’okwongyera kukoresa radiyo kubuurira. Bakatandika kwombeka radiyo endiijo haihi na Chicago. Radiyo egyo ensya ekeetwa KIGAMBO. Ahabw’okugira ngu bakakoresa ekyoma ekirikubaasisa signal ya radiyo kuhika omu myanya ya hare eky’amaani agarikwigana watt 5,000, radiyo egi ekaba neebaasisa abantu abari hare munonga kuhurira obutumwa bw’Obukama, kuhika bukiizi-bwa-bumosho bwa Canada.

Omwaka 1925 gukaba guri haihi, kandi Abeegi ba Baibuli bakaba nibaija kwongyera kwetegyereza ebiri omu Okushuuruurwa eshuura 12. Bamwe bakaba nibaija kuteerwa entsibo. Kwonka abaingi, bakaba nibaija kwikiriza enyetegyereza egi erikukwata aha byabaireho omu iguru, n’oku abantu ba Ruhanga omu nsi baakwatsirweho.