1. Twine okushemererwa kwa muringo ki?

BUZIMA ka nikitwesiimisa kandi ka n’ekitiinisa kuba Abajurizi ba Yehova! Nitwetererwa eiziina rya Ruhanga, kandi nitukora ebirikuhikaana n’eiziina eryo turikwejumba omu murimo gw’okubuurira n’okuhindura abantu beegi. Nikitushemeza twahwera omuntu oine ekihika ky’okukorerera amagara agatahwaho kuba Omukristaayo. (Byak. 13:48) Twine emiteekateekyere nk’eya Yesu ‘owaashemereirwe omu mwoyo gurikwera’ obu abeegi be baamugambira ebirungi ebi baatungire omu kubuurira.—Luk. 10:1, 17, 21.

2. Nitubaasa kworeka tuta ngu obuheereza bwaitu ni bukuru?

² Omurimo gw’okubuurira ni mukuru munonga ahariitwe. Entumwa Paulo akahiga Timoseo ati: “Oyerinde iwe wenka kandi n’omu bi orikwegyesa.” Paulo akoongyeraho ati: “Omu kukora otyo, noija kwejuna kandi ojune n’abarikukuhurira.” (1 Tim. 4:16) N’ahabw’ekyo omurimo gw’okubuurira nigutwariramu okukiza amagara. Nitwerinda ahakuba nitutegyekwa Obukama bwa Ruhanga. Butoosha nitwenda kutwaza omu muringo ogurikuhimbisisa Yehova, kandi ogurikuhikaana n’amakuru amarungi ogu turikubuurira. (Fil. 1:27) Nitworeka ngu ‘nitufayo aha myegyeseze yaitu’ turikwetebeekanisiza gye obuheereza, kandi turikushaba Yehova kutuha emigisha tutakatandikire kubuurira.

3. Mbwenu shi buri omwe naabaasa kwikiriza obutumwa bw’Obukama? Ha eky’okureeberaho.

³ N’obu twakukora n’amaani, abantu abarikukira obwingi omu kicweka kyaitu nibabaasa kwanga obutumwa bw’Obukama. Teekateeka aha ky’okureeberaho ky’Ow’eishe-emwe Georg Lindal, owaabaire naabuurira wenka omu bicweka bya Iceland kuruga 1929 kuhika 1947. Akaha abantu ebitabo enkumi n’enkumi, kwonka tihaine owaikiriize amazima. Akahandiika  ati: “Abamwe nibahakanisa amazima, kwonka abarikukira obwingi tibarikufayo.” N’obu haizire abamiisani abatendekirwe kuruga aha Gileadi, hakahinguraho emyaka mwenda bamwe aha bantu ba Iceland kubaasa kwehayo ahari Yehova bakabatizibwa. *

4. Nitubaasa kwehurira tuta abantu baayanga amakuru marungi?

⁴ Nikitumaramu amaani abantu baayanga amakuru marungi. Nitubaasa kwehurira nka Paulo, owaagizire “enaku nyingi n’obusaasi obutarikutuuza” ahabw’okugira ngu Abayudaaya abarikukira obwingi bakanga kwikiriza Yesu nka Mesia owaaraganisiibwe. (Rom. 9:1-3) Kandi shi ku waakukora n’amaani kandi okashabira omwegi wa Baibuli, kwonka akaremwa kutunguuka, oine kurekyere aho kumwegyesa? Nari shi ku waakuba otakahwerahoga omuntu weena kuhika aha kubatizibwa? Mbwenu shi oine kweshinja, obundi orikuteekateeka ngu Yehova tarikusiima obuheereza bwawe? Omu kicweka eki, nituza kugarukamu ebibuuzo bibiri ebi: (1) Niki ekirikworeka ngu obuheereza bwaitu niburugamu ebirungi? (2) Ni miteekateekyere ki eringaniire ei twine kugira?

5. Ahabw’enki obumwe obuheereza bwaitu nibubaasa kutagyenda nk’oku turikwenda?

⁵ Baibuli neegamba aha omuntu orikukora ebi Ruhanga arikukunda erikugira eti: ‘Ebi arikukora byona nibaija bigyenda gye.’ (Zab. 1:3) Kwonka, ekyo tikirikumanyisa ngu buri kimwe eki turikukorera Yehova nikiija kuba nk’oku turikwenda. Hatwire hariho ‘enaku nsha’ ahabw’obutahikiirira bwaitu n’obw’abandi. (Yob. 14:1) Ekindi, obumwe abarikutuhiiganisa nibabaasa kuturemesa kugumizamu nitubuurira nka butoosha. (1 Kor. 16:9; 1 Tes. 2:18) Mbwenu shi Yehova naapima ata obusinguzi bwaitu? Teekateeka aha misingye emwe ya Baibuli erikuhwera omu kugarukamu ekibuuzo eki.

6. Yehova naamanya ata ngu nituteeraho kukora n’amaani omurimo gwe?

⁶ Yehova naamanya okuteeraho n’okugumisiriza kwaitu. Yehova naatureeba nk’abasinguzi, twakora omurimo gwaitu twine obweziriki na rukundo, yaaba abantu baikiriza nari bakanga. Paulo akahandiika ati: ‘Ruhanga t’otahikiriire kwebwa emirimo yaanyu n’okukunda oku mwayorekire aha iziina rye, obu mwaheereza abarikwera, abu mukirikuheereza na hati.’ (Heb. 6:10) Yehova naijuka kuteeraho kwaitu na rukundo, n’obu haakuba hatarikurugamu ebirungi. Kandi, nitubaasa n’okwijuka eki Paulo yaagambiire Abakorinso obu yaagira ati: ‘Okukora kwanyu ti kwa busha omuri Mukama,’ n’obu ebintu byakuba bitagyenzire nk’oku tubaire nituteekateeka.—1 Kor. 15:58.

7. Nitubaasa kwegyera ki aha ku entumwa Paulo yaagambire aha buheereza be?

⁷ Entumwa Paulo akaba ari omumiisani w’omutaano, arikutandikaho ebibiina bisya omu ndembo nyingi. Kwonka, ku kyamwetengyeise  kworeka ngu ahikire kuba omuheereza wa Kristo, taragambire munonga aha mubaro gw’abantu obu yaabaire ahweraire kuhinduka Abakristaayo. Kureka, abandi ku baateireho kwehimbisa akagira ati: ‘Nimbakira omu kukora munonga.’ (2 Kor. 11:23) Nka Paulo, ijuka ngu okuteeraho kwawe n’okugumisiriza nibyo Yehova arikutwara nka bikuru.

8. Twine kwijuka ki aha bikwatiraine n’obuheereza bwaitu?

⁸ Obuheereza bwaitu nibushemeza Yehova. Yesu akoohereza abeegi be 70 kubuurira aha Bukama, kandi bwanyima ‘bakagaruka bashemereirwe.’ Niki ekyabareetaire okushemererwa? Bakagira bati: “Na baadaimoni nibatworobera omu iziina ryawe.” Kwonka, Yesu akateereza emiteekateekyere yaabo obu yaabagira ati: “Mushemererwe ahabw’amaziina gaanyu kuhandiikwa omu iguru.” (Luk. 10:17-20) Yesu akaba naamanya ngu butoosha tibarikwija kuguma nibatunga ebirungi nk’ebyo omu buheereza. Nangwa, titurikumanya omuhendo gw’abantu abahurikize obutumwa bw’abeegi bakahinduka abaikiriza. Abeegi bakaba baine kutunga okushemererwa ti ahabw’okuba abasinguzi omu buheereza, kureka ahabw’okumanya ngu Yehova naasiima okuteeraho kwabo.

9. Kurugiirira aha Abagalatia 6:7-9, nihaija kubaho ki twagumisiriza omu buheereza bwaitu?

⁹ Twagumisiriza omu buheereza bwaitu, nitwija kutunga amagara agatahwaho. Twabiba embibo z’amazima g’Obukama twine obweziriki kandi tukazireeberera, nituba ‘nitubibira omu omwoyo’ turikwikiriza obuhwezi bw’omwoyo gwa gurikwera. Twaba tutahanikire nari ‘tutahwaire amatsiko’ Yehova naatuhamiza ngu nitwija kushaarura amagara agatahwaho, n’obu twakuba tutahweraire omwegi kwehayo ahari Ruhanga.—Shoma Abagalatia 6:7-9.

10. Okukunda amazima kw’abantu nikurugiirira ahari ki?

¹⁰ Okukunda amazima nikurugiirira aha mbeera y’omutima gw’omuntu. Yesu akagamba aha mbeera egi omu ky’okureeberaho kye eky’omubibi owaabibire embibo omu bika by’eitaka ebitarikushushana, kandi embibo zikakurira gye omu kika kimwe kyonka. (Luk. 8:5-8) Yesu akagira ngu eitaka eritarikushushana nirijwekyera emitima y’abantu abarikwikiriza ‘ekigambo kya Ruhanga’ omu miringo etarikushushana. (Luk. 8:11-15) Nk’omubibi, titurikubaasa kutegyeka ebirikuruga omu murimo gwaitu, ahabw’okuba nikirugiirira aha mbeera y’omutima gw’omutu. Obujunaanizibwa bwaitu n’okuguma nitubiba embibo y’Obukama. Nk’oku entumwa Paulo yaagambire, ‘buri omwe naija kuheebwa ebihembo nk’omurimo gwe oku guri,’ beitu kutari aha birikuruga omu murimo gwe.—1 Kor. 3:8.

11. Ahabw’enki Noa omubuurizi “w’okuhikiirira” yaabaire omusinguzi? (Reeba ekishushani ekiri aha kipampagare.)

¹¹ Kumara emyaka mingi Abajurizi ba Yehova batwire nibabuurira abantu abatarikwefeerayo. Nk’eky’okureeberaho, Noa akaba ari omubuurizi “w’okuhikiirira,” obundi kumara emyaka mingi. (2 Pet. 2:5) Hatariho kubangaanisa, akaba aine amatsiko ngu abantu nibaija kukunda ebi arikubuurira, kwonka ekyo Yehova tarakigambireho. Kureka, obu Ruhanga yaaragiira Noa kwombeka emeeri, akamugira ati: ‘Noija kutaaha omu meeri na batabani baawe n’omukazi waawe na bakaamwana baawe.’ (Kut. 6:18) Kandi waateekateeka aha buhango bw’emeeri ei Ruhanga yaaragiire Noa kwombeka, Noa naabaasa kuba yaayetegyereize ngu bakye nibo barikwija kwikiriza obutumwa bwe. (Kut. 6:15) Kandi nitumanya ngu, tihaine n’omwe aha bantu abo enshaarizi owaikiriize obutumwa bwa Noa. (Kut. 7:7)  Mbwenu shi Yehova akareeba Noa nk’otarabuurire ekirikumara? Ngaaha buzima! Omu maisho ga Ruhanga, Noa akahikiiriza gye obujunaanizibwa bwe ahakuba akakora eki yaagambirwe.—Kut. 6:22.

12. Nabi Yeremia akashemererwa ata omu buheereza n’obu abantu baraabe baabaire nibamuhakanisa kandi batarikwefeerayo?

¹² Nabi Yeremia nawe akabuurira abantu abahakani kandi abatarikwefeerayo kumara emyaka mingi. Akagira amaganya mingi ‘ahabw’ebijumo n’ebigaaniizo’ by’abahakani abo yaayenda n’okutsigaho obuheereza bwe. (Yer. 20:8, 9) Kwonka Yeremia tarahanikire akabirugaho! Niki ekyamuhweraire kusingura enyehurira zigwire, reero akashemererwa omu buheereza bwe? Akata omutima aha bintu bibiri bikuru ebi. Eky’okubanza, obutumwa bwa Ruhanga obu Yeremia yaabaire naagambira abantu bukaba nibutwariramu “amatsiko” n’ebiro birungi by’omumaisho. (Yer. 29:11) Ekya kabiri, Yehova akaba atooraine Yeremia kujuririra eiziina rye. (Yer. 15:16) Naitwe nitubuurira obutumwa oburikuha abantu amatsiko, kandi nitwetererwa eiziina rya Yehova ahabw’okugira ngu turi Abajurizi be. Twata omutima aha nshonga ibiri ezo enkuru, nitubaasa kushemererwa n’obu abantu baakwanga kutuhurikiza.

13. Nitwegyera ki omu ky’okureeberaho kya Yesu ekiri omuri Mako 4:26-29?

¹³ Okutunguuka omu by’omwoyo nikubaho mporampora. Yesu eki akakyoreka gye omu ky’okureeberaho kye eky’omubibi owaabibire embibo bwanyima akabyama. (Shoma Mak. 4:26-29.) Ebyarugire omu kuteeraho kwe bikabaho mporampora kandi akaba atabyineho bushoboorozi. Naitwe nitubaasa kutareeba ebirikuruga omu murimo gw’okubuurira kumara obwire ahabw’okuba okutunguuka kw’omwegi nikubaho mporampora. Nk’oku omuhingi atarikubaasa kugyema ekimera kukurira aha rurengo oru arikwenda, titurikubaasa kugyema abeegi ba Baibuli kutunguuka juba nk’oku turikwenda. N’ahabw’ekyo otahanika nari okahwamu amaani omwegi yaaturaho kutunguuka nk’oku obaire nooteekateeka. Nk’okuhinga, twine kugumisiriza omu kuhindura abantu abeegi.—Yak. 5:7, 8.

14. Ni by’okureeberaho ki ebirikworeka ngu nikibaasa kutwara obwire abantu kutuhurikiza omu kubuurira?

¹⁴ Omu myanya emwe, nikibaasa kutwara emyaka mingi kutunga ebirungi omu buheereza. Teekateeka aha ky’okureeberaho kya banyaanyazi-itwe Gladys na Ruby Allen abarikuzaarwa kumwe. Omuri 1959 bakaza kuheereza omuri Quebec orurembo rumwe omuri Canada nka baapayoniya ab’obutwire. * Abantu bakaba nibanga kuhurikiza obutumwa bw’Obukama ahabw’okugyemeserezibwa kw’abantu omu kicweka ekyo n’okw’ediini y’Abanyakaturiki. Gladys naagira ati: “Kumara emyaka ebiri tukabuurira enju aha nju, eshaaha munaana buri izooba kwonka tihaine n’omwe owaabaire naayenda kutuhurikiza! Abantu ku baabaire bamanya ngu naitwe twiguza aha nyigi zaabo, bakaba banga kwiguraho. Kwonka titurahanikire.” Bwanyima y’obwire, abantu bakatandika kugira emiteekateekyere mirungi kandi baikiriza amakuru marungi. Hati orurembo orwo rurimu ebibiina bishatu.—Isa. 60:22.

15. Ebiri omu 1 Abakorinso 3:6, 7 nibitwegyesa ki aha murimo gw’okuhindura abantu abeegi?

¹⁵ Okuhindura abantu abeegi nikyetengyesa okukwatanisa. Nikigambwa ngu nikitwariramu ekibiina kyona kuhwera omuntu kuhika aha kubatizibwa. (Shoma 1 Abakorinso 3:6, 7.) Nk’eky’okureeberaho, omubuurizi  omwe naabaasa kutsigira orikwenda kumanya ebirikukiraho turakiti nari magaziini. Naabaasa kushaba ow’eishe-emwe ondiijo kugarukayo ahabw’okugira ngu ashangire ngu obwire obu baaragaine tiburikumubaasikira. Ow’eishe-emwe naabaasa kutandika kwegyesa omuntu ogwo Baibuli. Naabaasa kuguma naagarukayo n’ab’eishe-emwe na banyaanyazi-itwe abandi, reero buri omwe ahigye omwegi omu muringo gw’omutaano. Buri w’eishe-emwe nari munyaanyazi-itwe orikuzayo naahwera kwitirira embibo y’amazima eri omu mwegi ogwo. Omu muringo ogwo, nk’oku Yesu yaagambire, omubibi n’omugyesi nibashemererwa omu kushaaruura kw’eby’omwoyo.—Yoh. 4:35-38.

16. Ahabw’enki orikubaasa kwesiimira omu buheereza n’obu waakuba oine amagara mabi nari amaani makye?

¹⁶ Kwonka shi ku waakuba otarikubaasa kwejumbira kimwe omu murimo gw’okubuurira n’okwegyesa abandi amakuru marungi ahabw’amagara mabi nari amaani makye? Nabwo noobaasa kwesiimira omu ki orikubaasa kukora. Teekateeka aha ky’okureeberaho ky’Omugabe Daudi, obu we n’abashaija be baacungura ebintu byabo n’ab’amaka gaabo omu mikono y’Abaameleki. Abashaija be nk’enkumi ibiri bakaba baruhire munonga batarikubaasa kuza kurwana, n’ahabw’ekyo bakatsigara enyima kurinda ebintu. Bwanyima y’okusingura okurwana, Daudi akaragiira ngu eminyago bagibaganisemu buri omwe atungyeho. (1 Sam. 30:21-25) Nikyo kimwe n’omurimo gwaitu gw’okubuurira ogurikukorwa omu nsi yoona. Buri omwe orikukora nk’oku arikubaasa naashemererwa kureeba omuntu musya yaakucungurwa kandi akahwerwa kuza omu muhanda ogurikuhitsya omu magara.

17. Niki eki twine kusiima ahari Yehova?

¹⁷ Nitusiima Yehova ahabw’omuringo gwa rukundo ogu arikureebamu obuheereza bwaitu. Naamanya ngu titwine bushoboorozi aha birikuruga omu kuteeraho kwaitu. N’obu kiraabe kiri kityo, naareeba okuteeraho kwaitu n’ebigyendererwa byaitu birungi reero atuha emigisha. Naatwegyesa oku turikubaasa kwesiimira omu bi turikuba tukozire omu murimo mukuru ogu ogw’okushaaruura. (Yoh. 14:12) Nitubaasa kuhamya ngu Ruhanga naatusiima twaba tutahanikire tukabirugaho!