1. Yehova naabaasa kucwamu kuba ki kuhikiiriza ekigyendererwa kye?

YEHOVA naabaasa kuba kyona ekirikwetengyesa kuhikiiriza ekigyendererwa kye. Nk’eky’okureeberaho, Yehova abaasize kuba Omwegyesa, Omuhuumuriza, kandi Omubuurizi w’amakuru marungi. Ebi ni bimwe aha bi abaasize kuba. (Isa. 48:17; 2 Kor. 7:6; Gal. 3:8) Kwonka nabwo, emirundi mingi naakoresa abantu kuhikiiriza ebigyendererwa bye. (Mat. 24:14; 28:19, 20; 2 Kor. 1:3, 4) Kandi Yehova naabaasa kutuha obwengye n’amaani kubaasa kuba kyona ekirikwetengyesa kuhikiiriza ekigyendererwa kye. Ebi byona nibihikaana n’amakuru g’eiziina Yehova, nk’oku n’abacondooza baingi barikuteekateeka.

2. (a) Ahabw’enki obumwe nitubaasa kubangaanisa yaaba Yehova naatukoresa? (b) Nituza kugamba ahari ki omu kicweka eki?

² Twena nitwenda kuba ab’omugasho ahari Yehova, kwonka abamwe nibabaasa kubangaanisa yaaba Yehova naabakoresa. Ahabw’enki? Ahakuba nibabaasa kureeba ngu nibaremesibwa emyaka yaabo, embeera zaabo, nari amaani gaabo. Kwonka, abamwe nibabaasa kuba bamazirwe n’eki barikukora hati, reero ekyo kibaremese kureeba ngu baine ekyetengo ky’okwongyeraho. Omu kicweka eki, nituza kureeba oku Yehova arikubaasa kutuha ekirikwetengyesa kuhikiiriza ekigyendererwa kye. Bwanyima, nituza kureeba Ebyahandiikirwe ebirikworeka oku Yehova yaahaire abaheereza be abashaija n’abakazi ekyetengo n’amaani g’okukora. Aha muheru, nituza kureeba oku turikubaasa kwikiriza Yehova kutukoresa.

3. Kurugiirira aha Abafilipi 2:13, Yehova naabaasa kutuha ata ekyetengo ky’okukora?

³ Shoma Abafilipi 2:13. * Yehova naabaasa kutuha okukunda nari ekyetengo ky’okukora. Eki naabaasa kukikora ata? Obundi nitubaasa kureeba ngu hariho ekiine kukorwa omu kibiina. Nari abareeberezi nibabaasa kushoma ebaruha erikutumanyisa ngu haine ahu twine kuhwera aheeru y’ekicweka ky’ekibiina kyaitu. Bwanyima, buri omwe ahariitwe naabaasa kwebuuza ati: ‘Nimbaasa kuhwera nta kuhikiiriza ekyetengo eki?’ Nari obundi noobaasa kwetwa kuza omu buheereza obugumire, kwonka nooyebuuza yaaba noija kubuhikiiriza gye. Nari bwanyima y’okushoma emishororongo emwe omu Baibuli, noobaasa kwebuuza oti: ‘Nimbaasa kugyendera nta aha buhabuzi bw’Ebyahandiikirwe ebi kuhwera abandi?’ Yehova tarikwija kutugyemesereza kukora ekintu kyona. Kwonka yaareeba tweteekateekire kugira eki twakora, naabaasa kutuha ekyetengo n’omuhimbo gw’okukora.

4. Yehova naabaasa kutuha ata amaani g’okukora?

⁴ Naitwe Yehova naabaasa kutuha amaani g’okukora. (Isa. 40:29) Naabaasa kutuha omwoyo gwe gurikwera kwongyera aha kubaasa kwaitu. (Kur. 35:30-35) Yehova naabaasa kukoresa ekibiina kye kutwegyesa oku turikubaasa kukora emirimo emwe. Waaba otarikumanya gye oku orikubaasa kuhikiiriza obuheereza obumwe, shaba obuhwezi. Kandi otatiina kushaba Tataitwe ow’omu iguru efura kukuha “amaani agarikukirira kimwe” aha ga butoosha. (2 Kor. 4:7; Luk. 11:13) Baibuli erimu eby’okureeberaho bingi ebirikworeka oku Yehova yaabaasiise abashaija n’abakazi abamwe arikubaha ekyetengo n’amaani g’okukora. Twaba nitushwijuma bimwe aha by’okureeberaho ebi, teeraho kuteekateeka aha miringo ei Yehova arikubaasa kukukoresa omu muringo nigwo gumwe.

5. Nitwegyera ki aha ku Yehova yaakoreise Musa n’obu yaamukoresa kucungura abaheereza be?

⁵ Yehova akareetera Musa kuba omucunguzi w’Abaisraeli. Kwonka shi Yehova akamukoresa ryari? Mbwenu shi Musa akaba aine ebirikumubaasisa kukora omurimo gwa Yehova bwanyima y’okwegyesibwa “obwengye bwona obw’Abanyamisri”? (Byak. 7:22-25) Ngaaha. Yehova akakoresa Musa bwanyima y’okumuhindura omucureezi, kandi orikutwaza gye. (Byak. 7:30, 34-36) Yehova akaha Musa obumanzi bw’okwemerera omu maisho g’omutegyeki rugambwa omuri Misri. (Kur. 9:13-19) Nitwegyera ki aha ku Yehova yaakoreise Musa n’obu yaamukoresa? Yehova naakoresa abo abarikuteeraho kugira emitwarize nk’eye n’abarikumwesiga kubaha amaani.​—Fil. 4:13.

6. Nitwegyera ki aha ku Yehova yaakoreise Baruzilai kuhwera Omugabe Daudi?

⁶ Bwanyima y’ebyasha, Yehova akakoresa Baruzilai kuhwera Omugabe Daudi. Daudi n’abantu be bakaba baine ‘enjara, baruhire, kandi baine eiriho’ obu baabaire nibahunga mutabani wa Daudi Abusalomu. Omugurusi Baruzilai na bagyenzi be, bakooga amagara gaabo kuha Daudi n’abu yaabaire aine ebirikwetengyesa. Tarateekateekire ngu obu ari omugurusi, takiine mugasho ahari Yehova. Omu mwanya gw’ekyo, akaba efura yaakoresa ebi aine kuhwera abaheereza ba Ruhanga abaine eki bakyenire. (2 Sam. 17:27-29) Eki nitukyegyeraho ki? Oyihireho emyaka ei twine, Yehova naabaasa kutukoresa kuhwera abandi omu bi bakyenire, yaaba omu kicweka kyaitu nari omu ihanga erindi. (Enf. 3:27, 28; 19:17) N’obu twakuba tutarikubaasa kubahwera butunu, nitubaasa kuhayo ahabw’omurimo gwaitu omu  nsi yoona kugira ngu esente zikoresibwe kuhwera ab’eishe-emwe abaine oburemeezi kyaba nikyetengyesa.​—2 Kor. 8:14, 15; 9:11.

7. Yehova akakoresa ata Simeoni, kandi okumanya ekyo nikibaasa kutugumya kita?

⁷ Yehova akaraganisa omugurusi omwesigwa Simeoni omuri Yerusaalemu ngu tarikwija kufa atakareebire Mesia. Okuraganisa oku kushemereire kuba kwagumize Simeoni munonga, ahabw’okugira ngu akaba ategyereize Mesia kumara emyaka mingi. Okugumisiriza kwe kw’obwesigwa kukarugamu ebirungi bingi. Eizooba rimwe, ‘akatwarwa amaani g’omwoyo gurikwera omuri hekalu.’ Simeoni ku yaabaire ariyo, akareeba omwereere Yesu, kandi Yehova akakoresa Simeoni kugamba obunabi oburikukwata aha mwana ogu owaabaire naija kuba Kristo. (Luk. 2:25-35) N’obu Simeoni arikubaasa kuba atarahangaire munonga kureeba Yesu arikuheereza omu nsi, akasiima omugisha ogu yaatungire, kandi aine n’endiijo migisha mingi ei ari haihi kutunga! Omu nsi ensya, omushaija ogwo omwesigwa naija kureeba oku obutegyeki bwa Yesu buraahwere amaka goona omu nsi kutunga emigisha. (Kut. 22:18) Naitwe twine kusiima buri mugisha gwona ogu Yehova arikutuha omu buheereza bwe.

8. Yehova naabaasa kutukoresa ata nk’oku yaakoreise Barunaba?

⁸ Omu kyasha ky’okubanza Y.A.K., omushaija orikwetwa Yosefu akeehayo kukorera Yehova. (Byak. 4:36, 37) Obundi ahabw’okugira ngu Yosefu akaba naamanya kuhuumuriza abandi, entumwa bakamweta Barunaba, ekirikumanyisa “Omwana w’Okwezirikisa” nari w’okuhuumuriza. Nk’eky’okureeberaho, bwanyima ya Saulo kuba Omukristaayo, ab’eishe-emwe baingi bakaba nibatiina kumwirira haihi ahabw’okumanya ngu akaba naahiiganisa ebibiina. Kwonka Barunaba owaabaire aine omutima gw’embabazi akahwera Saulo, kandi Saulo nawe ashemereire kuba yaasiimire embabazi ze. (Byak. 9:21, 26-28) Bwanyima, abareeberezi omuri Yerusaalemu bakareeba ngu nikyetengyesa kugumya ab’eishe-emwe abaabaire bari hare omuri Antiokia eya Siria. Mbwenu shi bakoohereza oha? Ni Barunaba! Buzima bakatoorana gye. Ebyahandiikirwe nibyoreka ngu Barunaba akeehangiriza “boona kuguma ahari Mukama n’omutima oguhamire.” (Byak. 11:22-24) Naitwe obunaku obu, Yehova naabaasa kutuhwera kuba abahuumuriza Abakristaayo bagyenzi baitu. Nk’eky’okureeberaho, naabaasa kutukoresa kuhuumuriza abafeereirwe abakundwa baabo. Nari naabaasa kutuha ekihika ky’okuza kureeba orwaire nari oine amaganya nari kubateerera esimu tukabagambira ebigambo by’embabazi. Noija kwikiriza Yehova kukukoresa nk’oku yaakoreise Barunaba?​—1 Tes. 5:14.

9. Nitwegyera ki aha muringo ogu Yehova yaahwerairemu ow’eishe-emwe Vasily kuba omureeberezi murungi?

⁹ Yehova akahwera ow’eishe-emwe orikwetwa Vasily kuba omureeberezi murungi. Obu Vasily yaatooranwa kuba omureeberezi aha myaka 26, akatiina ngu akaba atahikire kubaasa kuhwera ekibiina omu by’omwoyo, na munonga abaine oburemeezi. Kwonka, ab’eishe-emwe abaabaire bamazire obwire bari abareeberezi bakamutendeka gye kandi yaaza n’omu Ishomero ry’Obuheereza bw’Obukama. Vasily akakora n’amaani kuba omureeberezi murungi. Nk’eky’okureeberaho, akahandiika ebigyendererwa bikye ebi yaabaire aine kukoraho. Ku yaagumire naahikiiriza kimwe aharibyo, mporampora yaasingura okutiina kwe. Hati naagira ati: “Ekyantiiniise buriya hati nikindeetera okushemererwa kwingi. Yehova ku arikumpwera kutunga ekyahandiikirwe ekihikire eky’okugumya ow’eishe-emwe nari munyaanyazi, nikindeetera okumarwa kw’amaani.” B’eishe-emwe, nka Vasily mwayehayo kukoresibwa Yehova, naija kubabaasisa kuhikiiriza obujunaanizibwa bw’amaani omu kibiina.

10. Abigaili akakora ki, kandi noomwegyeraho eishomo ki?

¹⁰ Daudi n’abo abaabaire nibamushagika bakaba nibahunga Omugabe Saulo, kandi bakaba baine kuhwerwa. Abashaija abu Daudi yaabaire ari nabo bakashaba omushaija omugaiga Omwisraeli orikwetwa Nabali kubaha aha by’okurya bye. Kikaboorobera kumushaba eby’okurya ahakuba bakaba nibarinda amasyo ge omu ihamba. Kwonka Nabali ahabw’okweyendeza, akanga kubaha akantu koona. Daudi akagira ekiniga kingi kandi akaba naayenda kwita Nabali na buri mushaija weena ori omu ka ye. (1 Sam. 25:3-13, 22) Kwonka muka Nabali omukazi murungi orikwetwa Abigaili akaba aine okwetegyereza. Akooreka obumanzi bwingi yaajuumara aha bigyere bya Daudi kandi yaamweshengyereza kutahoora enzigu akagiibwaho orubanja rw’okusheesha eshagama. Omu muringo gw’obwengye akahabura Daudi ngu enshonga azirekye omu mikono ya Yehova. Ebigambo bya Abigaili eby’embabazi n’ebikorwa bye eby’obwengye bikahika aha mutima gwa Daudi. Akeetegyereza ngu Yehova niwe yaamutuma. (1 Sam. 25:23-28, 32-34) Abigaili akaba agizire emitwarize ei Yehova arikusiima. Omu muringo nigwo gumwe, Abakristaayo abaine okwetegyereza n’obwengye, Yehova naabaasa kubakoresa kwombeka ab’omu maka gaabo, n’abandi omu kibiina.​—Enf. 24:3; Tit. 2:3-5.

11. Bahara ba Shalumu bakakora ki, kandi ni baahi abarikubatooreza obunaku obu?

¹¹ Bwanyima y’ebyasha bingi, bahara ba Shalumu bakaba bari bamwe abu Yehova yaakoreise kwejumba omu kuhunduuza ebisiika bya Yerusaalemu. (Neh. 2:20; 3:12) N’obu Shalumu araabe yaabaire ari omutegyeki, abahara bakaba beeteekateekire kukora omurimo gugumire kandi gurikubaasa kubarugiramu akabi. (Neh. 4:15-18) Bakaba nibataaniira kimwe aha bashaija ba Tekoa, abaayangire kwecureeza bakata ‘mutima aha murimo.’ (Neh. 3:5) Teekateeka aha kushemererwa oku bahara ba Shalumu baine kuba baagizire omurimo gw’okuhunduuza ku gwahwaire omu biro 52 byonka! (Neh. 6:15) Omu bunaku bwaitu, banyaanyazi-itwe nibashemererwa kwejumba omu buheereza bw’omutaano nk’okwombeka n’okureeberera ebyombeko ebihairweyo ahari Yehova. Emyoga yaabo, omujinya gwabo, n’okuhamira ahari Yehova, ni bikuru munonga omu kuba abasinguzi omu murimo ogu.

12. Yehova naabaasa kutukoresa ata nk’oku yaakoreise Tabisa?

¹² Yehova akahiga Tabisa kukora “emirimo mingi mirungi n’eby’embabazi,” okukira munonga kuhwera efaakazi. (Byak. 9:36) Ahabw’okuba efura kandi omunyambabazi ow’omutaano, abantu baingi bakaganya ku yaafiire. Kwonka bakashemererwa munonga entumwa Petero ku yaamuzoire. (Byak. 9:39-41) Niki eki turikwegyera ahari Tabisa? Yaaba turi bato nari bakuru, abashaija nari abakazi, twena nitubaasa kugira ebi twakora kuhwera ab’eishe-emwe na banyaanyazi-itwe.​—Heb. 13:16.

13. Munyaanyazi-itwe omwe oine enshoni orikwetwa Ruth, Yehova akamukoresa ata, kandi akagamba ki aha muheru?

¹³ Munyaanyazi-itwe orikwetwa Ruth akaba naayenda kuba omumiisani. Obu yaabaire akiri omwishiki muto, akaba naarahukiiriza yaaba naabuurira enju aha nju, arikuha abantu turakiti. “Nkaba ninkunda omurimo ogu,” nikwo arikugira. Kwonka, akaba naagumirwa munonga kugambira abantu aha Bukama bwa Ruhanga. Ruth n’obu araabe yaabaire aine enshoni, akaba payoniya ow’obutwire obu yaabaire aine emyaka 18. Omuri 1946, akaza omu Ishomero rya Gileadi reero bwanyima yaaheereza omuri Hawaii na Japan. Yehova akamukoresa omu muringo gw’omutaano kujanjaaza amakuru marungi omu bicweka ebyo. Bwanyima y’emyaka nka 80  Ruth arikwejumba omu kujanjaaza amakuru marungi, akagira ati aha muheru: “Yehova atwire naangaruramu amaani. Ampweraire kusingura enshoni zangye. Nimpamiza kimwe ntaine kubangaanisa kwona ngu Yehova naabaasa kukoresa omuntu weena orikumwesiga.”

14. Kurugiirira aha Abakolosai 1:29, twine kukora ki twaba nitwenda ngu Yehova atukorese?

¹⁴ Omu byafaayo byona, Yehova atwire naakoresa abaheereza be omu miringo etari emwe n’emwe. Naija kukureetera kuba ki? Okukira munonga nikirugiirira ahariiwe waaba oyeteekateekire kwehayo kukora n’amaani. (Shoma Abakolosai 1:29.) Waaba oyehaireyo kukora buri kimwe, Yehova naabaasa kukureetera kuba omubuurizi omweziriki, omwegyesa murungi, omuhuumuriza murungi, omukozi oine omwoga, omunywani murungi, nari kuba kyona eki arikwenda kubaasa kuhikiiriza ekigyendererwa kye.

15. Nk’oku kirikworekwa omu 1 Timoseo 4:12, 15, ab’eishe-emwe abatsigazi baine kweshengyereza Yehova kubahwera kukora ki?

¹⁵ Kandi shi imwe ab’eishe-emwe abakiriyo nimunyeeta? Abatsigazi abaine amaani nibeetengwa munonga kubaasa kwongyerwa obujunaanizibwa bakaba abaheereza. Omu bibiina bingi abareeberezi nibaba nibakira abaheereza. Mbwenu shi bamwe omuriimwe ab’eishe-emwe nimubaasa kugira ekyetengo ky’okwenda kwongyerwa obujunaanizibwa obundi omu kibiina? Ab’eishe-emwe abamwe nibakira kugira bati: “Nyowe mmazirwe kuheereza nk’omubuurizi owa butoosha kyonka.” Ku oraabe nikwo orikwehurira otyo, yeshengyereze Yehova kukuhwera kugira ekyetengo ky’okutunguuka kuba omuheereza, kandi akuhe n’amaani g’okukora kyona eki orikubaasa kukunda kumuheereza. (Mub. 12:1) Nitwenda obuhwezi bwawe!​—Shoma 1 Timoseo 4:12, 15.

16. Niki eki twine kushaba Yehova, kandi n’ahabw’enki?

¹⁶ Yehova naabaasa kukureetera kuba kyona eki arikwenda kubaasa kuhikiiriza ekigyendererwa kye. N’ahabw’ekyo mushabe kukuha ekyetengo ky’okwenda kukora, kandi bwanyima mushabe kukuha amaani agu orikwenda. Yaaba ori muto nari mukuru, koresa obwire bwawe, amaani gaawe, n’ebintu byawe kuhaisa Yehova ekitiinisa hati. (Mub. 9:10) Otaikiriza okutiina nari okwehurira nk’otarikubaasa kukuremesa omugisha gw’okukora kyona eki orikubaasa omu kuheereza Yehova. Twena ka twine omugisha gw’amaani kugira eki twakora mu kuha Tataitwe owa rukundo ekitiinisa ekimushemereire!