1-2. Omuhandiiki omwe akahandiika ki, kandi nituza kushwijuma ki omu kicweka eki?

OBUNAKU obu abantu obukaikuru n’obukaikuru nibagira ngu nibaikiririza omuri Yesu, kwonka tibarikwikiriza ebi yaayegyeise. (2 Tim. 4:3, 4) Nangwa n’omuhandiiki omwe akagira ati: “Hati omuriitwe haabamu ‘Yesu’ ondiijo orikugamba nk’oku Yesu wenyini yaagambire . . . , mbwenu shi tukaamwangire nk’oku abantu baamwangire emyaka enkumi ibiri enyima? . . . Eky’okugarukamu kiri ngu: Eego, tukaamwangire.”

² Omu kyasha ky’okubanza baingi bakareeba Yesu naayegyesa kandi arikukora n’eby’okutangaaza, kwonka bakanga kumwikiririzamu. Ahabw’enki? Omu kicweka eky’enyima, tureebire enshonga ina ahabw’enki abantu baateirwe entsibo ahabw’ebi Yesu yaagambire n’ebi yaakozire. Ka tureebe ezindi enshonga. Nituza n’okureeba ahabw’enki abantu nibanga abakuratsi ba Yesu n’oku turikubaasa kwetantara kuteerwa entsibo.

3. Yesu akakora ki ebyareeteire bamwe kuteerwa entsibo?

³ Obu Yesu yaabaire ari omu nsi, akacwamu kushashaanuka n’abantu b’emiringo yoona. Akaba naarya n’abagaiga n’abantu b’amaani, kwonka obwire bwe obwingi akaba naabumara n’abooro n’abarikunyangarazibwa. Kandi, akaba naasaasibwa abaabaire nibatwarwa ‘nk’abasiisi.’ Abamwe abaabaire nibeetwara nk’abahikiriire bakateerwa entsibo ahabw’ebi Yesu yaakozire. Bakabuuza abeegi be bati: “Ahabw’enki nimurya kandi nimunywa n’abahooza n’abasiisi?” Yesu akabagarukamu ati: “Abahuriire [tibarikwetenga omushaho], kureka abarwaire. Tindaizire  kweta abahikiriire kureka abasiisi ngu beeteise.”​—Luk. 5:29-32.

4. Kurugiirira ahari nabi Isaaya, Abayudaaya baine kuba baabaire nibamanya ki ekyakuhikire ahari Mesia?

⁴ Ebyahandiikirwe nibigamba ki? Ira Mesia atakaizire, nabi Isaaya akamugambaho nk’ogwo ou ensi yaabaire neija kwanga. Obunabi bukaba nibugira buti: ‘Akagaywa yaayangwa abantu kandi nk’oku abantu barikutiinisa amaisho, nikwo yaagayirwe atyo, naitwe tutamwetemu kaabuntu.’ (Isa. 53:3) Mesia akaba aine ‘kwangwa abantu,’ n’ahabw’ekyo Abayudaaya omu kyasha ky’okubanza baine kuba baabaire nibamanya ngu Yesu naija kwangwa.

5. Abantu baingi nibareeba bata abakuratsi ba Yesu?

⁵ Nitureeba oburemeezi nk’obu obunaku obu? Eego. Abeebembezi b’ediini baingi omu maramizo gaabo nibaakiiramu abantu abarikumanywa, abagaiga, kandi abarikutwarwa nk’abanyabwengye omu nsi. Eki nibakikora n’obu abantu abo barikuba baine emicwe n’emitwarize yaabo erikuba etarikuhikaana n’emitindo ya Ruhanga. Abeebembezi b’ediini nibo bamwe nibagaya omujinya gw’abaheereza ba Yehova, n’emitwarize yaabo mirungi ahabw’okugira ngu terikuhikaana n’emitindo y’ensi. Nk’oku Paulo yaagambire, Ruhanga akatoorana abo ‘abarikugaywa.’ (1 Kor. 1:26-29) Kwonka we Yehova, naareeba ngu abaheereza be boona abeesigwa n’ab’omuhendo.

6. Nitubaasa kugira tuta emiteekateekyere nk’eya Yesu eri omuri Matayo 11:25, 26?

⁶ Nitubaasa kwetantara tuta kuteerwa entsibo? (Shoma Matayo 11:25, 26.) Otagira emiteekateekyere nk’ei abantu b’ensi baine aha baheereza ba Ruhanga. Kimanye ngu Yehova naakoresa abantu abacureezi bonka kukora ebi arikukunda. (Zab. 138:6) Kandi teekateeka aha bintu ebi Ruhanga abaasize kuhikiiriza arikukoresa abantu abarikureebwa nk’abataine bwengye n’obushongokye omu nsi.

7. Ahabw’enki Yesu yaayetsire Abafarisaayo endyarya, kandi bo bakatwaza bata?

⁷ Obu Yesu yaabaire ari omu nsi, omu muringo gw’obumanzi akasheeshuura ebikorwa by’ediini eby’oburyarya. Nk’eky’okureeberaho, akasheeshuura oburyarya bw’Abafarisaayo, abaabaire nibata omutima aha ku baine kunaaba engaro zaabo kukira oku baabaire baine kureeberera abazaire baabo. (Mat. 15:1-11) Abeegi ba Yesu bashemereire kuba baatangariire ebigambo bya Yesu. Nangwa bakamubuuza bati: “Noomanya ku Abafarisaayo baaguubwa kubi ahabw’okuhurira ebyo ebi waagamba?” Yesu akabagarukamu ati: ‘Buri muti gwona ogu Tata ow’omu iguru atarabyaire, nigwija kukuurwa. Mubarekye! N’abeebembezi empumi, haza nabo bahumire. Mumanye ngu empumi yaayebeembera endiijo, zombi nizigwa omu kiina.’ (Mat. 15:12-14) Yesu taraikiriize emitwarize egwire ey’abeebembezi b’ediini kumuremesa kugamba amazima.

8. Yesu akooreka ata ngu ti buri nyikiriza zoona ez’ediini Ruhanga naazisiima?

⁸ Yesu akasheeshuura n’enyegyesa z’ediini ezigwire. Taragizire ngu Ruhanga naasiima enyikiriza zoona ez’ediini. Kureka, akagira ngu baingi bari omu muhanda muhango ogurikuhitsya omu kucwekyerera, kandi ngu bakye nibo baabaire nibaija kuza omu kahanda akakye akarikuhitsya omu magara. (Mat. 7:13, 14) Akakyoreka butunu ngu bamwe bakaabaire nibeeshushaniriza nk’abarikuheereza Ruhanga, kwonka buzima batarikumuheereza. Akarabura ati: ‘Mwerinde baanabi b’ebishuba abarikubaizira nibeeshushanisa nk’entaama, haza omunda bari emishega esheegire. Nimwija kubamanyira aha byana byabo.’​—Mat. 7:15-20.

9. Ni nyegyesa ki ezimwe ezigwire ezi Yesu yaasheeshwire?

⁹ Ebyahandiikirwe nibigamba ki? Obunabi  bwa Baibuli bukooreka kare ngu Mesia akaba naija kugirira enju ya Yehova omujinya gw’amaani. (Zab. 69:9; Yoh. 2:14-17) Omujinya ogu gukahiga Yesu kusheeshuura enyikiriza n’ebikorwa by’ediini ebigwire. Nk’eky’okureeberaho, Abafarisaayo bakaba nibagira ngu omuntu naagumizamu ahuriire bwanyima y’okufa, kwonka we Yesu akeegyesa ngu abafu nibaba bagwejegyeire. (Yoh. 11:11) Abasadukaayo bakaba batarikwikiriza ngu nihaija kubaho okuzooka, kwonka Yesu akazoora Laazaaro. (Yoh. 11:43, 44; Byak. 23:8) Abafarisaayo bakaba nibagira ngu buri kimwe nikireetwaho Ruhanga nari ngu kikatebeekanisibwa kare, beitu Yesu akeegyesa ngu abantu nibabaasa kwecweramu kuheereza Ruhanga nari kutamuheereza.​—Mat. 11:28.

10. Ahabw’enki baingi nibateerwa entsibo ahabw’enyegyesa zaitu?

¹⁰ Nitureeba oburemeezi nk’obu obunaku obu? Eego. Baingi nibateerwa entsibo ahabw’okugira ngu enyegyesa zaitu ezirikwegamira ahari Baibuli nizisheeshuura ebishuba by’ediini. Abeebembezi b’ediini nibeegyesa ngu Ruhanga naafubira ababi arikubootsya omu muriro ogutarikuraara. Nibakoresa enyegyesa egwire egyo kuguma baine obushoboorozi aha bantu. Itwe abarikuramya Yehova Ruhanga owa rukundo, nitusheeshuura enyegyesa egwire egyo. Kandi abeebembezi b’ediini nibeegyesa ngu omuntu yaafa haine ekirikuguma kihuriire. Nitusheeshuura enyikiriza egwire egyo, ahakuba ku ogire ngu ehikire, okuzooka kukaabaire kutaine makuru. Kandi okutashushana n’ediini nyingi ezirikwegyesa ngu buri kimwe ekirikukwata aha muntu kikatebeekanisibwa kare, nitwegyesa ngu omuntu aine obugabe bw’okwecweramu, kandi naabaasa kucwamu kuheereza Ruhanga. Abeebembezi b’ediini nibatwaza bata twasheeshuura ebishuba byabo? Nibakira kuguubwa kubi!

11. Okuhikaana n’ebigambo bya Yesu ebiri omuri Yohaana 8:45-47, Ruhanga naayenda ngu abantu be bakore ki?

¹¹ Nitubaasa kwetantara tuta kuteerwa entsibo? Twaba nitukunda amazima, nituba twine kwikiriza ebi Ruhanga arikugamba. (Shoma Yohaana 8:45-47.) Okutashushana na Sitaane  Omuregi, itwe nituhamira omu mazima. Titurikubaasa kukora ekirikuhakanisa enyikiriza zaitu. (Yoh. 8:44) Ruhanga naayenda ngu abaheereza be ‘bangye ekibi’ reero ‘bahamire aha kirungi,’ nk’oku Yesu yaakozire.​—Rom. 12:9; Heb. 1:9.

12. Ahabw’enki Abayudaaya baingi baateirwe entsibo ahabw’omuringo ogu Yesu yaafiiremu?

¹² Ni kintu ki ekindi ekyateize Abayudaaya entsibo omu bunaku bwa Yesu? Paulo akagira ngu itwe nitubuurira ahari Kristo owaahanikirwe aha muti, kandi ogwo aha Bayudaaya n’enkongi nari ekirikuteeza entsibo. (1 Kor. 1:23) Ahabw’enki Abayudaaya baingi baateganisiibwe omuringo ogu Yesu yaafiiremu? Ahabw’okugira ngu Yesu akafeera aha muti bakamureeba nk’omushuma kandi omusiisi, beitu atari Mesia.​—Bir. 21:22, 23.

13. Abaateirwe entsibo ahabw’oku Yesu yaafiire bakabura kwetegyereza ki?

¹³ Abayudaaya abaateirwe entsibo ahabw’oku Yesu yaafiire, bakabura kumanya ngu akaba ataine rubanja, ngu bakamubeiherera, kandi ngu akatwarizibwa omu muringo gutari gw’oburingaaniza. Abaabaire nibamucwera orubanja bakaba batarikufayo aha buringaaniza. Ab’eicwero ry’emanja erikuru ery’Abayudaaya bakarahukiiriza kucwera Yesu orubanja, kandi tibarakurataire enkora ya butoosha ey’okushara emishango. (Luk. 22:54; Yoh. 18:24) Kureka abaramuzi abo bakahurikiza ebishuba ebyagambirwe ahari Yesu n’obujurizi butahikire “baasherura obwamushinja bw’ebishuba kubeiherera Yesu ngu bamwite.” Ekyo ku kyayangire kukora, omuramuzi omukuru akateeraho kutega Yesu ngu agambe ekigwire reero bamuteho orubanja. Eki kikaba kitarikuhikaana n’ebiragiro ebihikire. (Mat. 26:59; Mak. 14:55-64) Bwanyima ya Yesu kuzooka, abaramuzi babi abo bakashashura “empiiha nyingi” abaserukare Abarooma abaabaire nibarinda ekituuro kye, kujanjaaza ebitebyo bigwire kushoboorora ahabw’enki ekituuro kyabaire kirimu busha.​—Mat. 28:11-15.

14. Ebyahandiikirwe bikagamba ki kare aha kufa kwa Mesia?

¹⁴ Ebyahandiikirwe nibigamba ki? N’obu  Abayudaaya baingi omu bunaku bwa Yesu baraabe baabaire batarikuteekateeka ngu Mesia aine kufa, yetegyereze obunabi obwabaire buri omu Byahandiikirwe: “Akashuka amagara ge okuhitsya aha kufa, yaabarirwa hamwe n’enkozi z’ebibi, yaayekorera ebibi by’abaingi, kandi yaatonganira abasiisi.” (Isa. 53:12) N’ahabw’ekyo Abayudaaya bakaba batashemereire kuteerwa entsibo ahabw’okugira ngu Yesu akaitwa nk’omusiisi.

15. Ni bishuba ki ebirikugambwa aha Bajurizi ba Yehova ebireeteire bamwe kuteerwa entsibo?

¹⁵ Nitureeba oburemeezi nk’obu obunaku obu? Eego buzima! Yesu akateebwaho emanja zitahikire kandi yaatwarizibwa kubi, n’Abajurizi ba Yehova nibatwarizibwa kubi. Yetegyereze eby’okureeberaho ebimwe. Omu myaka ya 1930 na 1940 omuri United States, obugabe bwaitu obw’okuramya Ruhanga bukaba nibukira kuhakanisibwa omu macwero g’emanja. Abaramuzi abamwe bakaba nibooreka ngu nibatuharana bataine nshoni na kakye. Omu rurembo Quebec orwa Canada, ekanisa na gavumenti y’eihanga bikaba nibikoragana kuhakanisa omurimo gwaitu. Ababuurizi baingi bakateebwa omu kihome ahabw’okugambira abataahi aha Bukama bwa Ruhanga. Omu bunaku bw’Abanazi omuri Germany, ab’eishe-emwe baingi eminyeeto bakaitwa omu butware bw’abakaafiire. Kandi omu myaka egi, ab’eishe-emwe baingi omuri Russia nibateebwaho emanja kandi baateebwa omu bihome ahabw’okugamba ahari Baibuli barikugira ngu “omurimo gwaitu n’ogw’abantu endeme.” Nangwa na Baibuli yaitu eya New World Translation of the Holy Scriptures omu rurimi rwa Russia ekazibirwa, kandi baagira ngu “n’ekitabo ky’endeme” ahabw’okugira ngu neekoresa eiziina Yehova.

16. Nk’oku kirikworekwa omuri 1 Yohaana 4:1, ahabw’enki tutaine kuhabisibwa ebi barikugamba aha Bajurizi ba Yehova?

¹⁶ Nitubaasa kwetantara tuta kuteerwa entsibo? Manya ebihikire. Yesu arikuha Orubazo rw’aha Rushozi, akarabura abamuhurikiize ngu bamwe bakaba nibaija ‘kubabeiherera ekigambo kyona ekibi.’ (Mat. 5:11) Sitaane niwe bukomooko bw’ebishuba ebi. Naareetera abahakanisa kugamba ebishuba ahari abo abarikukunda amazima. (Kush. 12:9, 10) Twine kwanga ebishuba ebirikugambwa abarikutuhakanisa. Titushemereire kwikiriza ebishuba nk’ebyo kututiinisa nari kutuubya okwikiriza kwaitu.​—Shoma 1 Yohaana 4:1.

17. Ebyabaireho Yesu atakaitsirwe nibibaasa kuba byateerize bita bamwe entsibo?

¹⁷ Yesu ari haihi kwitwa, omwe aha ntumwa ze 12 akamuryamu orukwe. Ondiijo akamwehakana emirundi eshatu, kandi entumwa ze boona bakahunga baamutsigaho omu mwabazyo obu baamukwata. (Mat. 26:14-16, 47, 56, 75) Yesu ekyo tikiramutangaarize. Nangwa akaba yaagambire ngu ekyo nikiija kubaho. (Yoh. 6:64; 13:21, 26, 38; 16:32) Bamwe abaareebire eki nikibaho nibabaasa kuba baateirwe entsibo barikuteekateeka bati: ‘Entumwa za Yesu ku baraabe baatwaza bati, tindikwenda kuba omwe aharibo!’

18. Ni bunabi ki obwahikiriire Yesu ari haihi kwitwa?

¹⁸ Ebyahandiikirwe nibigamba ki? Ebyasha bingi enyima, Yehova akooreka omu Kigambo kye ngu nibaija kureebya Mesia ahabw’ebicweka 30 eby’efeeza. (Zek. 11:12, 13) Kandi owaabaire naija kumureebya akaba naija kuba ari omwe ahari banywani we. (Zab. 41:9) Kandi nabi Zekaria akahandiika ati: “Teera omuriisa, entaama zitaataane.” (Zek. 13:7) Ab’emitima y’amazima omu mwanya gw’okuteerwa entsibo ahabw’ebyo ebyabaireho, bakaba baine kuhama ahabw’okureeba obunabi obu nibuhikiirira omuri Yesu.

19. Ab’emitima y’amazima nibamanya ki?

 ¹⁹ Nitureeba oburemeezi nk’obu obunaku obu? Eego. Ebiro ebi, Abajurizi ba Yehova bakye abarikumanywa barugire omu mazima, baaba abagomi, kandi baateeraho kuhabisa n’abandi. Nibagamba ebitahikire, amazima g’ekitega, n’ebishuba ebya butunu aha Bajurizi ba Yehova kurabira omu makuru na Intaneeti. Kwonka ab’emitima y’amazima tibarikuteerwa ntsibo. Okutaana n’ekyo, nibamanya ngu Baibuli ekagamba kare ngu ebintu nk’ebyo bikaba nibiija kubaho.​—Mat. 24:24; 2 Pet. 2:18-22.

20. Nitubaasa kwetantara tuta kuteezibwa entsibo abarikuruga omu mazima? (2 Timoseo 4:4, 5)

²⁰ Nitubaasa kwetantara tuta kuteerwa entsibo? Tushemereire kuguma twine okwikiriza kuhami turikweyegyesa butoosha, turikugumizamu nitushaba, kandi turikuguma twine bingi by’okukora omu murimo ogu Yehova yaatuhaire kukora. (Shoma 2 Timoseo 4:4, 5.) Twaba twine okwikiriza kuhami, titurikwija kuterebushuka twahurira amakuru gatahikire. (Isa. 28:16) Rukundo ei twiniire Yehova, Ekigambo kye, n’ab’eishe-emwe bagyenzi baitu neija kutuhwera kwetantara kuteezibwa entsibo abarikuruga omu mazima.

21. N’obu abantu baingi obunaku obu baraabe nibanga obutumwa bwaitu, nitubaasa kugira buhame ki?

²¹ Omu kyasha ky’okubanza, baingi bakateerwa entsibo kandi baayanga Yesu. Kwonka abandi baingi bakamwikiriza. Aba nibatwariramu omuntu nk’omwe aha b’Eishengyero ry’Ekiyudaaya otwariiremu “abanyamurwa baingi.” (Byak. 6:7; Mat. 27:57-60; Mak. 15:43) N’omu bunaku obu, baingi bangire kuteerwa entsibo. Ahabw’enki? Ahakuba nibamanya amazima agari omu Byahandiikirwe kandi nibagakunda. Ekigambo kya Ruhanga nikigira kiti: ‘Abarikunda ebiragiro byawe baine obusingye bwingi, tihariho kirikubaasa kubateeza entsibo.’​—Zab. 119:165.