Embeera egyo eyaabaire neetiinisa niyo yaandeteire kutandika kusherura Omuhangi. Kwonka ntakabagambiire ekyakuratsireho aha kiro ekyo, ka mbanze naabatebeza ebi naarabiremu omu bunyeeto ebyandeteire kuta omutima aha kusherura Ruhanga.

Nkazaarwa 1937 omuri Guesnain, etauni y’ebirombe bingi omuri France. Tata owaabaire naakora omu kirombe nkamwegyeraho omugasho gw’okukora n’amaani. Kandi nkaba ninkunda oburingaaniza nka tata, obwabaire nibumuhiga kurwanirira abakozi bagyenzi be abaabaire nibakorera omu mbeera mbi. Omu kuteeraho kukora ekyo, tata akeegaita aha bigombe ebyabaire nibirwanirira obugabe bw’abarikukora omu birombe. Kandi akaba naayehurira kubi ahabw’oburyarya bw’abeebembezi b’ediini. Baingi bakaba bari abagaiga, kwonka nabwo bakaba nibashaba eby’okurya n’esente abooro abarikukora omu birombe. Tata akatamwa entwaza y’abeebembezi b’ediini abo, yaayanga kunyegyesa eby’ediini. Nangwa, tukaba tutarikugaaniira ebirikukwata ahari Ruhanga.

 Omu kukura kwangye nkatandika kwanga obutari buringaaniza, ebwabaire nibutwariramu okushoroora abatari batuuzi ba France. Nkaba ninkira kuzaana omupiira n’abaana baabo kandi ndikukunda kuba nabo. Oyihireho ekyo, maawe akaba naaruga Poland, atari Mufaransa. Nkaba nyine ekihika ky’okureeba nihabaho obusingye hatariho n’okushoroora.

Nkatwarwa omu mahe omuri 1957. Obwo nibwo naahendera ngire omu nshozi z’Algeria nyekiro nk’oku naaba naabagambire. Reero nkagira nti: “Ruhanga! Ai Ruhanga! Ekyandeeteire kukangarana ti baserukare abazigu, kureka ekaba eri endogoya y’omu kishaka! Ka naatungire oburuhuuko! Kwonka, ekyo ekyabaireho n’orutaro, bikandeetera kuteekateeka munonga aha kigyendererwa ky’okubaho. Okubaho kwaitu kwine kigyendererwa ki? Mbwenu shi Ruhanga naatufaho? Nihaija kubaho obusingye obw’obutwire?

Bwanyima, ku naabaire ndi omu kahuumuro ntaayaayiire abazaire bangye, nkabugana Omujurizi wa Yehova. Akampa Baibuli eya La Sainte Bible, eyaavunwirwe Abakaturiki omu France, nkatandika kugishoma ku naahikire Algeria. Haine ekicweka ekyankwatsireho ekiri omu Okushuuruurwa 21:3, 4. Nikigira kiti: ‘Eihema rya Ruhanga riri omu bantu. Naija kuragaza amarira goona aha maisho gaabo, tiharikwija kubaho kufa bundi, n’obu kwakuba okucura nari okurira nari obusaasi.’ * Ebigambo ebi bikantangaaza. ‘Hoona ebi nibiija kuhikiirira?’ Nikwo naabaire niinyebuuza. Obwire obwo, tihaine eki naabaire niimanya ahari Ruhanga na Baibuli.

Ku naarugire omu mahe omuri 1959, nkabugana Omujurizi wa Yehova orikwetwa François, owaayegyeise bingi kuruga omu Baibuli. Nk’eky’okureeberaho, akanyoreka omu Baibuli ngu Ruhanga aine eiziina rye, Yehova. (Zab. 83:18) Kandi François akashoboorora ngu Yehova naija kuhezaho obutari buringaaniza omu nsi, agihindure paradiso, kandi ahikiirize ebiri omu Okushuuruurwa 21:3, 4.

Enyegyesa ezo zikankorera amakuru, kandi zaampika aha mutima. Kwonka nabwo nkagirira abasosorodooti ekiniga kingi kandi naayenda kubasheeshuura ahabw’okwegyesa ebintu ebitari omu Baibuli! Ningira nkaba nkiine emiteekateekyere nk’eya tata, kandi ntari mugumisiriza. Nkaba niinyenda kugira eki naakora ahonaaho!

François n’ab’eishe-emwe abandi bakampwera kutegyeka ekiniga kyangye. Bakanshoboororera ngu omurimo gwaitu nk’Abakristaayo tigw’okucwera abandi orubanja, kureka n’ogw’okubaha amatsiko kurabira omu makuru marungi g’Obukama. Ogwo nigwo murimo ogu Yesu yaabaire naakora, kandi nigwo yaahaire abakuratsi be kukora. (Mat. 24:14; Luk. 4:43) Kandi nkaba nyine kwega kugamba n’abantu omu muringo gw’embabazi kandi ogw’obwengye, n’obu baakuba baine nyikiriza ki. Baibuli neegira eti: ‘Omuhuuku wa Mukama tashemereire kuba entongani, kureka orikutwaza gye ahari boona.’​—2 Tim. 2:24.

Nkakora empinduka ezirikwetegyesa naabatizibwa naaba omwe aha Bajurizi ba Yehova omuri 1959 aha ruteerane oruhango orw’ekiro kimwe.  Okwo niyo naabugaine munyaanyazi-itwe muto orikwetwa Angèle, ou naarigiire. Nkatandika kutaayaaya omu kibiina eki yaabaire arimu kandi twataaha omu bushwere omu 1960. Buzima akaba ari omukazi murungi munonga, ow’omuhendo kandi akambeera nk’ekiconco kuruga ahari Yehova.​—Enf. 19:14.

Kumara emyaka mingi, ab’eishe-emwe abanyabwengye kandi abarikumanya bingi mbegyeireho amashomo makuru maingi. Eishomo rikuru n’eri: Kubaasa kuba omusinguzi omu buheereza bwona, twine kuba abacureezi kandi tukata omu nkora obuhabuzi oburi omu Enfumu 15:22, aharikugira hati: ‘Ahu abahi b’obwengye baingi bari, [enaama] nizihikiirizibwa.’

Omuri 1964, nkatandika kureeba ebigambo ebyo birikuhikiirira. Omu mwaka ogwo, nkatandika kukora omurimo gw’okutaayaayira ebibiina kugumya ab’eishe-emwe n’okubahwera kuhama omu by’omwoyo. Obwo nkaba nyine emyaka 27 kandi ntarikumanya bingi. N’ahabw’ekyo nkaba ninkora enshobe. Kwonka nkateeraho kubeegyeraho. Okukira byona, nyegire amashomo g’omuhendo kuruga aha bahi b’obwengye abarikwebaasa kandi abarikumanya bingi.

Ninyijuka ekyabaireho nkiri musya omu murimo gw’okutaayaayira ebibiina. Bwanyima y’okutaayaayira ekibiina omuri Paris, ow’eishe-emwe okuzire omu by’omwoyo akanshaba kugaaniiraho naanye kakye. Nkamugira ngu “tikiine nshonga.”

Akambuuza ati: “Louis, omushaho yaaza omu ka y’omuntu naaba agiire kureeba oha?”

Nkagarukamu ngu “n’orwaire.”

Yaagarukamu ati: “Ohikire. Kwonka nyetegyereize ngu noomara obwire bwingi n’abarikukora gye omu by’omwoyo, nk’abareeberezi. Ekibiina kyaitu kirimu ab’eishe-emwe na banyaanyazi-itwe abatamirwe, abasya, nari ab’enshoni. Nibaija kusiima munonga waateeraho kumara nabo obwire nari orikubataayaayira kurya nabo.”

Obuhabuzi bw’ow’eishe-emwe ogwo bukaba buhikire kandi bukangasira munonga. Rukundo ei yaabaire ainiire Yehova ekankwataho munonga. N’ahabw’ekyo nkaikiriza enshobe yangye, kandi ahonaaho naata obuhabuzi bwe omu nkora. Ninsiima Yehova ahabw’ab’eishe-emwe nkabo.

 Omu 1969 na 1973, nkatooranwa kureeberera abaabaire nibakora aha by’okurya aha ruteerane oruhango omuri Colombes, Paris. Omu ruteerane oruhango orwa 1973, abantu 60,000 bakaba baine kuriisibwa kumara ebiro bitaano! Nkaba ntarikumanya oku ndikubaasa kukora omurimo ogwo. Kwonka nkahwerwa Enfumu 15:22, okwebuuza ahari abo abarikumanya. Nkashaba obuhabuzi ab’eishe-emwe abaabaire baakozireho omurimo ogwo. Omuri abo hakaba harimu ababaagi, abahingi b’emboga, abateeki, n’abashuubuzi. Tukakwatanisa hamwe kukora omurimo ogwabaire oguri nk’orushozi ruhango.

Omu 1973, nyowe n’omukazi wangye bakatweta kuza kuheereza aha Beseeli eya France. Obujunaanizibwa bwangye obw’okubanza aha Beseeli nabwo bukaba bugumire. Nkaba nyine kwoherereza ab’eishe-emwe ebitabo omuri Cameroon ey’Africa, ahu omurimo gwaitu gwabaire gwemereziibwe kuruga 1970 kuhitsya 1993. Eki nakyo, kikaandenga. Ow’eishe-emwe owaabaire naareeberera omurimo gw’obuheereza omuri France, ningira ku yaareebire ngu ntiinire yaangumya arikugira ngu, “ab’eishe-emwe omuri Cameroon buzima nibenda eby’okurya by’omwoyo. Twine kubareeberera!” Kandi ekyo nikyo twakozire.

Ngyenzire engyendo nyingi ndikuza omu mahanga agahereraine na Cameroon kubugana abareeberezi b’eihanga eryo. Abashaija amamanzi kandi abanyabwengye abo bakampwera kukora entebeekanisa y’okuguma ninyohereza eby’okurya by’omwoyo omuri Cameroon. Yehova akaha omugisha okuteeraho kwaitu. Nangwa, kumara emyaka 20, abaheereza be omu ihanga eryo tihaine eki bataratungire yaaba Omunaara gw’Omurinzi nari Obuheereza Bwaitu bw’Obukama.

Kuruga obu twatandika kweriima, nketegyereza ngu Angèle’s n’omuntu w’eby’omwoyo. Kandi emitwarize ye egi nkongyera kugireeba gye  twataahire omu bushwere. Kandi aha izooba ry’okugaitwa ryenyini, akangira ngu tushabe Yehova tumugambire aha kigyendererwa kyaitu eky’okuheereza hamwe Yehova omu bwijwire. Yehova akagarukamu okushaba okwo.

Angèle kandi ampweraire kwesigira kimwe Yehova. Nk’eky’okureeberaho: Omu 1973 ku twagiire aha Beseeli, nkaba ntarikwenda kuzayo ahakuba nkaba ninkunda omurimo gw’okutaayaayira ebibiina. Kwonka Angèle akanyijutsya ngu tukaba twehaireyo kuheereza Yehova. Mbwenu shi titwine kukora buri murimo ogu ekibiina kirikutushaba kukora? (Heb. 13:17) Ekyo nkaba ntarikubaasa kukihakanisa! N’ahabw’ekyo tucwamu kuza aha Beseeli. Obwire bwona obu mmazire n’omukazi wangye obwegyendesereza bwe, okuba otebeekaine, n’okwebembeza eby’omwoyo, kihamize obushwere bwaitu, kandi kyampwera n’okucwamu gye.

Hati turi omu myaka ya bukuru, Angèle nkunzi yangye naakigumizamu kunshagika. Nk’eky’okureeberaho, kubaasa kuza omu mashomero g’obukama, ag’Orungyereza, nyowe na Angèle tukatandika kwongyera amaani omu kwega orurimi orwo. Ekyo kikaba nikitwariramu okuza omu kibiina erikukoresa Orungyereza, n’obu turaabe twabaire turi omu myaka ya 70. Nyine obujunaanizibwa bwingi ahabw’okuba omwe aha b’akakiiko k’eitaagi rya France, n’ahabw’ekyo okwega orurimi orundi kikaba kitoorobi. Kwonka nyowe na Angèle tukahwerahwerana. Hati turi omu myaka ya 80, kwonka nitugumizamu kutebeekanisiza enteerane omu Rungyereza n’Orufaransa. Kandi nituteeraho kwejumba omu nteerane n’omu kubuurira n’ekibiina kyaitu. Yehova atuhaire emigisha ahabw’okuteeraho kwega Orungyereza.

Tukatunga omugisha gw’omutaano omu 2017. Nyowe na Angèle tukatunga omugisha twaza omu Ishomero ry’Okutendeka ab’Akakiiko k’Eitaagi n’Abakazi Baabo, aha Watchtower Educational Center omuri Patterson, New York.

Buzima Yehova n’Omwegyesa Orikukirayo. (Isa. 30:20) N’ahabw’ekyo tikirikutangaaza kureeba ngu abantu be abato n’abakuru nibatunga obwegyese oburikukirayo! (Bir. 4:5-8) Buzima, nyetegyereize ngu abato abarikworobera Yehova n’ab’eishe-emwe na banyaanyazi-itwe abakuzire abarikumanya bingi nibatunguuka omu by’omwoyo kandi baba abasinguzi baakura. Enfumu 9:9 nihagira hati: ‘Ohabure omunyabwengye, naija kweyongyera kugira obwengye. Oyegyese ohikiriire, naija kweyongyera kwega.’

Obumwe, ninteekateeka aha mbeera erikutiinisa eyaabaireho nyekiro ndi omu nshozi z’Algeria emyaka nka 60 enyima. Nkaba ntarikumanya ebirungi ebi ndikwija kutunga. Nyegiire bingi aha bandi! Buzima nyowe na Angèle, Yehova atuhweraire kutunga okushemererwa n’okumarwa. N’ahabw’ekyo tumariirire kutarekyera aho kwegyera ahari Tataitwe omu iguru n’aha b’eishe-emwe na banyaanyazi-itwe abanyabwengye kandi abarikumukunda.