1. Niki eki Yehova yaagizire ngu nikiija kubaho omu bunaku bwaitu?

YEHOVA akagamba aha bunaku obu ati: ‘Abantu ikumi, abarikuruga omu mahanga aga buri rurimi, nibaija kukwata omukugiro gw’ekanzu y’Omuyudaaya bamugire bati: Ka tugyende naimwe; ahabw’okuba tuhuriire ku Ruhanga ari naimwe.’ (Zek. 8:23) ‘Omuyudaaya’ naajwekyera abu Ruhanga ashukireho omwoyo ogurikwera. Kandi nibeetwa ‘Israeli ya Ruhanga.’ (Gal. 6:16) “Abantu ikumi” nibajwekyera abaine amatsiko g’okutuura omu nsi ebiro byona. Nibamanya ngu Yehova atooraine abashukirweho omwoyo gurikwera, kandi nibareeba ngu n’omugisha gw’amaani kuramiza hamwe nabo.

2. “Abantu ikumi” ‘nibagyenda’ bata n’abashukirweho omwoyo gurikwera?

² N’obu kiraabe kitarikubaasika kumanya eiziina rya buri omwe oshukirweho omwoyo gurikwera omu bunaku obu, * abaine amatsiko g’okutuura omu nsi nibabaasa ‘kugyenda’ nabo. Mu muringo ki? Baibuli neegira ngu “abantu ikumi” nibaija ‘kukwata omukugiro gw’ekanzu y’Omuyudaaya bamugire bati: Ka tugyende naimwe; ahabw’okuba tuhuriire ku Ruhanga ari naimwe.’ Ekyahandiikirwe eki nikigamba Omuyudaaya omwe. Kwonka ekigambo “naimwe,” ekirimu emirundi ebiri, nikyoreka ngu nibarenga aha muntu omwe. Eki nikimanyisa ngu Omuyudaaya orikugambwaho ti muntu omwe kureka naajwekyera guruupu yoona ey’abashukirweho omwoyo gurikwera. Abatashukirweho omwoyo gurikwera nibaheereza hamwe nabo. Kandi tibarikutwara abashukirweho omwoyo gurikwera nk’abeebembezi baabo, ahakuba nibeetegyereza ngu Yesu niwe Mwebembezi waabo.​—Mat. 23:10.

3. Ni bibuuzo ki ebirikuza kugarukwamu omu kicweka eki?

³ Obu hakiriho Abakristaayo abashukirweho omwoyo gurikwera omu bunaku obu, abamwe nibabaasa kwebuuza: (1) Abashukirweho  omwoyo gurikwera baine kweteekateekaho bata? (2) Abarikurya kandi bakanywa aha bumanyiso bw’Ekiijutsyo baine kutwarizibwa bata? (3) Mbwenu shi omubaro gw’abarikurya kandi bakanywa aha bumanyiso gwine kutwerarikiriza? Ekicweka eki nikiza kugarukamu ebibuuzo ebyo.

4. Ni kurabura ki okuri omu 1 Abakorinso 11:27-29 oku abashukirweho omwoyo gurikwera baine kuteekateekaho munonga, kandi n’ahabw’enki?

⁴ Abashukirweho omwoyo gurikwera baine kuteekateeka munonga aha kurabura okuri omu 1 Abakorinso 11:27-29. (Kishome.) Oshukirweho omwoyo gurikwera naabaasa kurya n’okunywa ata aha bumanyiso “nk’oku kitashemereire”? Naakikora yaarya kandi akanywa aha bumanyiso kwonka atarikworobera emitindo ya Yehova ehikiriire. (Heb. 6:4-6; 10:26-29) Abashukirweho omwoyo gurikwera nibeetegyereza ngu baine kuguma bari abeesigwa baaba nibenda kuheebwa ‘ekihembo eky’okweta kwa Ruhanga omuri Kristo Yesu eky’okuza omu iguru.’​—Fil. 3:13-16.

5. Abakristaayo abashukirweho omwoyo gurikwera baine kweteekateekaho bata?

⁵ Omwoyo gurikwera niguhwera abaheereza  ba Yehova kuba abacureezi, beitu kutari kwetunguura. (Efe. 4:1-3; Kol. 3:10, 12) N’ahabw’ekyo abashukirweho omwoyo gurikwera tibarikuteekateeka ngu nibakira abandi. Nibamanya ngu Yehova tarikubaha omwoyo gurikwera kukira abaheereza be abandi. Tibarikuteekateeka ngu nibeetegyereza munonga amazima g’omu Baibuli kukira abandi. Kandi tibarikugambira abandi ngu nabo bashukirweho omwoyo gurikwera kandi ngu baine kutandika kurya n’okunywa aha bumanyiso bw’Ekiijutsyo. Kureka, omu bucureezi nibeetegyereza ngu Yehova niwe arikutoorana abarikuza omu iguru.

6. Kurugiirira aha 1 Abakorinso 4:7, 8, Abakristaayo abashukirweho omwoyo gurikwera bashemereire kutwaza bata?

⁶ N’obu abashukirweho omwoyo gurikwera baraabe nibamanya ngu n’ekitiinisa ky’amaani kwetwa kuza omu iguru, kwonka tibarikuteekateeka ngu abandi baine kubatwariza omu muringo gw’omutaano. (Fil. 2:2, 3) Kandi nibamanya ngu obu Yehova yaabashukaho omwoyo gurikwera, tihaine ondiijo ou yaamanyiise. N’ahabw’ekyo oshukirweho omwoyo gurikwera tikirikumutangaaza abamwe baaba batarahukire kwikiriza ngu atoorainwe kuza omu iguru. Naamanya ngu Baibuli neeturabura kutarahuka kwikiriza omuntu orikugira ngu Ruhanga amuhaire obujunaanizibwa bw’omutaano. (Kush. 2:2) Omukristaayo oshukirweho omwoyo gurikwera ahabw’okutenda kwetaho omutima, tashemereire kugyenda naayeyanjurira abatarikumumanya ngu ashukirweho omwoyo gurikwera. Kandi tashemereire n’okwehimbisa aha bandi.​—Shoma 1 Abakorinso 4:7, 8.

7. Abakristaayo abashukirweho omwoyo gurikwera baine kwetantara kukora ki, kandi n’ahabw’enki?

⁷ Abakristaayo abashukirweho omwoyo gurikwera tibarikuteekateeka ngu baine kubaho hamwe na bagyenzi baabo abashukirweho omwoyo, reero bakataho ekibiina ekyabo bonka. Tibarikusherura abashukirweho omwoyo gurikwera bagyenzi baabo, kugaaniira aha kushukwaho omwoyo kwabo nari kutaho guruupu eyaabo bonka ey’okwega Baibuli. (Gal. 1:15-17) Abashukirweho omwoyo gurikwera baakora ebintu ebi nibabaganisamu ekibiina. Nibaba nibahakanisa omwoyo gurikwera, ogurikuhwera abaheereza ba Ruhanga kugira obusingye n’obumwe.​—Rom. 16:17, 18.

8. Ahabw’enki twine kwegyendesereza oku turikutwariza abarikurya kandi bakanywa aha bumanyiso bw’Ekiijutsyo? (Reeba obugambo obw’ahansi.)

⁸ Tushemereire kutwariza tuta abashukirweho omwoyo gurikwera? Nikiba kitahikire kwegomba  omuntu munonga, n’obu yaakuba ari mwene Ishe Kristo oshukirweho omwoyo gurikwera. (Mat. 23:8-12) Baibuli ku erikugamba aha bareeberezi, neetuhiga ‘kutooreza okwikiriza kwabo,’ kwonka terikugira ngu twine kuhindura omuntu weena omutegyeki waitu. (Heb. 13:7) N’amazima Baibuli neegira ngu bamwe ‘bashemereire kuheebwa ekitiinisa kingi.’ Kwonka ti ahabw’okugira ngu bashukirweho omwoyo gurikwera, kureka n’ahabw’okureeberera gye ekibiina, n’okukora gye “omurimo gw’okubuurira n’okwegyesa.” (1 Tim. 5:17) Abashukirweho omwoyo gurikwera twabahimbisiriza kandi tukabataho omutima ekirenga, nibahurira barikuhemuka. * Kandi ekibi munonga, nitubaasa kubareetera kugira omwetunguuro. (Rom. 12:3) Omuriitwe tihaine orikwenda kukora ekintu kyona ekirikureetera beene Ishe Kristo kukora enshobe y’amaani nk’egyo!​—Luk. 17:2.

9. Nitubaasa kworeka tuta ngu nituha ekitiinisa Abashukirweho omwoyo gurikwera?

⁹ Nitubaasa kworeka tuta ngu nituha ekitiinisa abu Yehova ashukireho omwoyo gurikwera? Titwine kubabuuza oku baashukirweho omwoyo gurikwera. Egi n’enshonga y’omuntu ei tutaine bushoboorozi bw’okumanya. (1 Tes. 4:11; 2 Tes. 3:11) Kandi titwine kuteekateeka ngu ou ari nawe omu bushwere, abazaire be, nari ondiijo weena omu ka ye nawe ngu ashukirweho omwoyo gurikwera. Omuntu tarikuhungura omu ka ye amatsiko g’okuza omu iguru. Naatunga ekiconco kuruga ahari Ruhanga. (1 Tes. 2:12) Kandi tushemereire kwetantara kubuuza ebibuuzo ebirikubaasa kugwisa kubi abandi. N’eky’okureeberaho, titurikubuuza omukazi w’ow’eishe-emwe oshukirweho omwoyo gurikwera oku arikwehurira aha nshonga y’okutuura omu nsi ebiro byona ataine mukundwa we. Kasita twine obuhame ngu omu nsi ensya, Yehova naija kuhaazya “ekintu kyona ekihuriire ebi kirikwetenga.”​—Zab. 145:16.

10. Nitwerinda tuta twayetantara kuha “abantu ekitiinisa” ekirengire?

¹⁰ Kandi nitwerinda twayetantara kutwariza abashukirweho omwoyo gurikwera nk’abarikukira abandi. Mu muringo ki? Baibuli neegira ngu bamwe aha bashukirweho omwoyo gurikwera nibabaasa kutaguma bari abeesigwa. (Mat. 25:10-12; 2 Pet. 2:20, 21) Twayetantara kuha “abantu ekitiinisa” ekirengire, titurikwija kutabakuratira, nangwa n’obu baakuba bashukirweho omwoyo gurikwera, barikumanywa munonga, nari baheereize Yehova obwire buraingwa. (Yud. 16) Kandi baaremwa kuguma bari abeesigwa nari baaruga omu kibiina, titurikwija kurekyera aho kwikiririza omuri Yehova nari kureka kumuheereza.

11. Niki ekiriyo nikibaho hati aha kikwatiraine n’omubaro gw’abarikurya kandi bakanywa aha bumanyiso bw’Ekiijutsyo?

¹¹ Kumara emyaka mingi, omubaro gw’abarikurya kandi bakanywa aha bumanyiso bw’Ekiijutsyo gukaba nigutuuba. Kwonka hati, omubaro ogu nigweyongyera kukanya buri mwaka. Mbwenu shi eki kishemereire kutwerarikiriza? Ngaaha. Ka tureebe zimwe aha nshonga ezi twine kuguma nitwijuka.

12. Ahabw’enki tutaine kutiina ahabw’okweyongyera kw’abarikurya kandi bakanywa aha bumanyiso bw’Ekiijutsyo?

¹² Yehova “naamanya abe.” (2 Tim. 2:19) Obutashushana na Yehova, ab’eishe-emwe abarikubara abarikurya kandi bakanywa aha bumanyiso bw’Ekiijutsyo, nibaba batarikumanya buzima oshukirweho omwoyo gurikwera. N’ahabw’ekyo omubaro ogwo nigutwariramu  abarikuteekateeka ngu bashukirweho omwoyo gurikwera kwonka buzima batagushukirweho. Nk’eky’okureeberaho, bamwe abaabaire nibarya kandi bakanywa aha bumanyiso bw’Ekiijutsyo bwanyima bakarekyera aho. Abamwe nibabaasa kuba baine oburemeezi omu mutwe nari enyehurira mbi ezirikubareetera kuteekateeka ngu nibaija kuza omu iguru kutegyeka na Kristo. Buzima, titurikumanya gye omubaro gwenyini ogw’abashukirweho omwoyo gurikwera abakiri omu nsi.

13. Baibuli neegamba ki aha mubaro gw’abashukirweho omwoyo gurikwera abaraabe bari omu nsi okubonabona kwingi kwaza kutandika?

¹³ Yesu ku araije kutwara abashukirweho amajuta omu iguru, nibaija kuba bari omu bicweka bingi by’ensi. (Mat. 24:31) Baibuli neegira ngu omu biro by’emperu, nihaija kuba hariho omubaro mukye gw’abashukirweho omwoyo gurikwera omu nsi. (Kush. 12:17) Kwonka terikworeka omubaro gwenyini ogw’abaraabe bariho okubonabona kwingi kwaza kutandika.

14. Nk’oku kirikworekwa omu Abarooma 9:11, 16, niki eki twine kwetegyereza aha kikwatiraine n’okutooranwa kw’abashukirweho omwoyo gurikwera?

¹⁴ Yehova niwe arikucwamu obu araatoorane abashukirweho omwoyo gurikwera. (Rom. 8:28-30) Yehova akatandika kushuka omwoyo gurikwera aha bantu, bwanyima ya Yesu kuzooka. Nikireebeka omu kyasha ky’okubanza, Abakristaayo boona bakaba bashukirweho omwoyo gurikwera. Omu myaka eyaakuratsireho, baingi aha baabaire nibeeyeta Abakristaayo, buzima bakaba batari bakuratsi ba Kristo. N’obu kiraabe kiri kityo, Yehova akagumizamu naashuka omwoyo gurikwera aha Bakristaayo bakye abaabaire bari ab’amazima. Abo bakaba bari nk’oburo obu Yesu yaagizire ngu nibwija kukurira omu nkyenzi. (Mat. 13:24-30) Omu biro by’emperu ebi, Yehova agumiizemu  naatoorana abantu kuba bamwe aha 144,000. * N’ahabw’ekyo Ruhanga yaacwamu kugumizamu naatoorana abashukirweho omwoyo gurikwera ekiro ky’emperu kitakahikire, buzima titwine kubangaanisa obwengye bwe. (Shoma Abarooma 9:11, 16.) * Twine kwegyendesereza kutatwaza nk’abakozi abu Yesu yaagambireho omuri kimwe aha ky’okureeberaho kye. Bakeetomboitera mukama waabo ahabw’oku yaatwariize abakozi abaatandikire kukora omu shaaha y’aha muheru.​—Mat. 20:8-15.

15. Mbwenu shi boona abashukirweho omwoyo gurikwera nibo ‘omwambari omwesigwa kandi ow’obwengye,’ orikugambwaho omuri Matayo 24:45-47? Shoboorora.

¹⁵ Ti boona abaine amatsiko g’okuza omu iguru ngu nibo ‘omwambari omwesigwa kandi ow’obwengye.’ (Shoma Matayo 24:45-47.) Nk’oku kyabaire kiri omu kyasha ky’okubanza, n’omu bunaku obu Yehova na Yesu nibakoresa ab’eishe-emwe bakye kuriisa baingi, nari kubeegyesa. Abakristaayo bakye omu kyasha ky’okubanza nibo bonka abaakoresiibwe kuhandiika Ebyahandiikirwe eby’Orugriika. Omu bunaku obu, Abakristaayo bakye abashukirweho omwoyo gurikwera nibo baine obujunaanizibwa bw’okuha abaheereza ba Ruhanga eby’okurya by’omwoyo “omu bunaku obuhikire.”

16. Waayega ki omu kicweka eki?

¹⁶ Twayega ki omu kicweka eki? Yehova acwiremu kuha abaheereza be nyamwingi amatsiko g’okutuura omu nsi ebiro byona, kandi bakye nibo baraaze omu iguru kutegyeka na Yesu. Yehova naashumbuusha abaheereza be boona, abarikutwariramu ‘Omuyudaaya’ hamwe ‘n’abantu ikumi.’ Kandi naayenda ngu boona boorobere ebiragiro nibyo bimwe, kandi bagume bari abeesigwa. Boona baine kuguma bari abacureezi. Boona baine kumuheereza bakwataniise, kandi baine obumwe. Kandi boona baine kukora n’amaani kureetaho obusingye omu kibiina. Obu emperu eri haihi kuhika, twena ka tumariirire kuheereza Yehova kandi tukuratire Kristo turi “obusyo bumwe.”​—Yoh. 10:16.