1-2. Zadoki akaba ari oha? (1 Obusingye 12:​22, 26-28)

 TEERA akashushani, abashaija abarikurenga 340,000 bateeraniire hamwe kwemeka Daudi kuba omugabe wa Israeli yoona. Kumara ebiro bishatu, abashaija abo baguma aha rushozi haihi na Heburooni barikusheka, barikugaaniira, kandi barikweshongora eby’okuhimbisa Yehova. (1 Bus. 12:39) Nikibaasa kuba kyabaire kigumire kureeba Omutsigazi orikweta Zadoki omu mutwe muhango ogwo. Kwonka, Yehova akamanya ngu ariho, kandi naitwe naayenda ngu tukimanye. (Shoma 1 Obusingye 12:​22, 26-28.) Zadoki akaba ari oha?

² Zadoki akaba ari omunyamurwa owaabaire naaheereza hamwe n’Omunyamurwa Omukuru Abiasaari. Kandi Zadoki akaba ari omuhanuuzi owaabaire ahairwe okwetegyereza kwingi, kandi arikubaasa kumanya eki Ruhanga arikwenda. (2 Sam. 15:27) Abantu bakaba nibeebuuza ahari Zadoki obuhabuzi bw’obwengye. Kandi akaba ari omushaija emanzi. Ogu nigwo mutwarize ogu turikwenda kugambaho omu kicweka eki.

3. (a) Ahabw’enki abaheereza ba Yehova baine kugira obumanzi? (b) Nituza kushwijuma ki omu kicweka eki?

³ Omu biro ebi eby’emperu, Sitaane naateeraho munonga kutaahirira abaheereza ba Ruhanga. (1 Pet. 5:8) N’ahabw’ekyo, twine kugira obumanzi tutegyereize obu Yehova araacwekyereze Sitaane n’entebeekanisa ye mbi. (Zab. 31:24) Ka tushwijume emiringo eshatu oku turikubaasa kuba emanzi nka Zadoki.

SHAGIKA OBUKAMA BWA RUHANGA

4. Ahabw’enki abaheereza ba Yehova baine kugira obumanzi kubaasa kushagika Obukama bwa Ruhanga? (Reeba n’ekishushani.)

⁴ Itwe abaheereza ba Yehova, nitushagika Obukama bwe n’omutima gwaitu gwona, kwonka obumwe nikyetengyesa  kugira obumanzi. (Mat. 6:33) Nk’eky’okureeberaho, omu nsi egi embi, twine kugira obumanzi kugyendera aha mitindo ya Yehova, n’okubuurira amakuru marungi g’Obukama. (1 Tes. 2:2) Kandi twine kuba emanzi kubaasa kutagwera orubaju omu by’obutegyeki ebirikwongyera kubaganisamu nsi egi. (Yoh. 18:36) Abaheereza ba Yehova baingi batungire oburemeezi omu by’entaatsya, baahutaazibwa, kandi baateebwa omu bihome ahabw’okwanga kwejumba omu by’obutegyeki nari kuza omu mahe.

5. Ahabw’enki Zadoki yaabaire aine kugira obumanzi kubaasa kushagika Daudi?

⁵ Zadoki taragiire Heburooni kwemeka Daudi nk’Omugabe kyonka, kureka akazayo aine eky’okurwanisa kye, kandi ayetebeekaniise kurwana. (1 Bus. 12:38) Akaba ayeteekateekire kugyenda na Daudi omu rutaro kurwanisa abazigu ba Israeli. N’obu Zadoki yaabaire ataine bukugu omu by’entaro, akaba aine obumanzi.

6. Daudi akateeraho ata Zadoki eky’okureeberaho kirungi eky’okuba emanzi? (Zaaburi 138:3)

⁶ Kwonka shi omunyamurwa nka Zadoki akeegyera hi kuba emanzi? Akaba atwire n’abashaija baingi ab’amaani kandi amamanzi. Hatariho kubangaanisa akabeegyeraho. Nk’eky’okureeberaho, ahabw’okugira ngu Daudi akooreka obumanzi ‘yaayebembera Abaisraeli nibahurura, kandi nibatabaaruka’ kikahiga Abaisraeli boona kumushagika n’omutima gumwe. (1 Bus. 11:​1, 2) Butoosha Daudi akaba naayesiga Yehova kumuhwera kurwanisa abazigu be. (Zab. 28:7; shoma Zaaburi 138:3.) Zadoki akeegyera n’aha bashaija abandi nka Yehoyaada na mutabani we omurwani Benaaya, n’abakuru b’engabo makumi abiri na babiri abaabaire bari aha rubaju rwa Daudi. (1 Bus. 11:​22-25; 12:​26-28) Abashaija aba bakacwamu kushagika obugabe bwa Daudi.

7. (a) Ni by’okureeberaho ki eby’obunaku obu ebi aboorekire obumanzi ebi turikubaasa kwegyeraho? (b) Nooyegyera ki aha w’eishe-emwe Nsilu, orikworekwa omu vidiyo?

 ⁷ Nitugira amaani n’obumanzi twateekateeka aha bashagikire obutegyeki bwa Yehova. Omugabe waitu, Kristo Yesu, akangira okugyemeserezibwa kwejumba omu ntebeekanisa ya Sitaane ey’eby’obutegyeki. (Mat. 4:​8-11; Yoh. 6:​14, 15) Butoosha akaba naayesiga Yehova kumuhwera kutunga amaani. Kandi, twine eby’okureeberaho bingi eby’obunaku obu, eby’abatsigazi eminyeeto abangire kuza omu mahe nari kwejumba omu by’obutegyeki. Teeraho kusherura bimwe aha birikubakwataho aha jw.org. a

HWERA AB’EISHE-EMWE

8. Ni ryari obu abareeberezi baine kugira obumanzi kubaasa kuhwera ab’eishe-emwe bagyenzi baabo?

⁸ Abaheereza ba Yehova nibakunda kuhwerahwerana. (2 Kor. 8:4) Kwonka obumwe, nikyetengyesa obumanzi kukikora. Nk’eky’okureeberaho, haabaho orutaro, abareeberezi nibamanya ngu nikyetengyesa kugumya. n’okushagika ab’eishe-emwe na banyaanyazi-itwe omu by’omwoyo n’omu by’omubiri. Ahabwa rukundo ei bainiire entaama, abareeberezi nibata amagara gaabo omu kabi kubaha ebirikwetengyesa. (Yoh. 15:​12, 13) Baakora batyo nibaba nibatooreza eky’okureeberaho kya Zadoki eky’obumanzi.

9. Nk’oku kiri omu 2 Samueli 15:​27-29, Daudi akagambira Zadoki kukora ki? (Reeba n’ekishushani.)

⁹ Amagara ga Daudi gakaba gari omu kabi. Omutabani Abusalomu akaba amaririire kumwihaho obugabe. (2 Sam. 15:​12, 13) Daudi akaba aine kuhunga ahonaaho. Akagambira abaheereza ati: “Nimwimukye tuhungye, ku turaabe tutahungire, tihariho n’omwe omuriitwe oraakire Abusalomu.” (2 Sam. 15:14) Abaheereza be ku baabaire nibagyenda, Daudi akeetegyereza ngu haine owaabaire aine kuguma  enyima kumumanyisa ebi Abusalomu yaabaire naatebeekanisa kukora. N’ahabw’ekyo akagambira Zadoki n’abanyamurwa abandi kugaruka omu rurembo kuba entatsi ze. (Shoma 2 Samueli 15:​27-29.) Bakaba baine kwegyendesereza. Eki Daudi yaabagambiire kukora kikaba kiri eky’akabi. Teekateeka aha ki Abusalomu omushaija orikweyendeza, enshaarizi, kandi endyarya, yaabaire naija kukora Zadoki n’abanyamurwa abandi ku ogire ngu akamanya ngu bakaba bari entatsi za Daudi.

10. Zadoki na bagyenzi be bakarinda bata Daudi?

¹⁰ Daudi akakora entebeekanisa eyaabaire neetwariramu Zadoki na Hushai munywani wa Daudi ondiijo orikwesigwa. (2 Sam. 15:​32-37) Hushai akakuratira entebeekanisa egyo yaareetera Abusalomu kumwesiga, kandi yaamugambira oku araataahirire Daudi, ekyabaire nikiza kuha Daudi obwire bw’okwetebeekanisa atakataahiriirwe. Bwanyima, Hushai akagambira Zadoki na Abiasaari obwengye obu yaabaire ahaire Abusalomu. (2 Sam. 17:​8-16) Abashaija abo bombi bakahamya ngu Daudi yaamanyisibwa ekyabaire nikigyenda omumaisho. (2 Sam. 17:17) Ahabw’obuhwezi bwa Yehova, Zadoki n’abanyamurwa bagyenzi be bakakora kihango kurinda Daudi.—2 Sam. 17:​21, 22.

11. Nitubaasa kuba tuta emanzi nka Zadoki twaba nituhwera ab’eishe-emwe bagyenzi baitu?

¹¹ Nitubaasa kworeka tuta obumanzi nka Zadoki, twashabwa kuhwera ab’eishe-emwe bagyenzi baitu omu bwire bw’akabi? (1) Kuratira obuhabuzi. Omu mbeera nk’ezo, ni kikuru kuguma twine obumwe. Gyendera aha buhabuzi oburikuruga aha ofiisi y’eitaagi. (Heb. 13:17) Butoosha abareeberezi baine kushwijuma obuhabuzi bw’ekibiina kumanya oku baine kwetebeekanisiza ekigwererezi, n’eki baine kukora kyabaho. (1 Kor. 14:​33, 40) (2) Ba emanzi kwonka oyegyendesereze. (Enf. 22:3) Koresa okwetegyereza. Otata amagara gaawe omu kabi kyaba kitarikwetengyesa. (3) Yesigye Yehova. Ijuka ngu Yehova naayenda  ngu iwe n’ab’eishe-emwe abandi mugire oburinzi. Naabaasa kukurinda waaba noohwera ab’eishe-emwe bagyenzi baawe.

12-13. Nooyegyera ki aha byahikire ahari Viktor na Vitalii? (Reeba n’ekishushani.)

¹² Teekateeka ahari Viktor na Vitalii, ab’eishe-emwe babiri abaabaire nibatwarira ab’eishe-emwe bagyenzi baabo eby’okurya na amaizi omuri Ukraine. Viktor naagira ati: “Tukasherura eby’okurya buri hamwe, kwonka kaingi tukaba tuhurira amasasi haihi naitwe. Ow’eishe-emwe omwe akahayo eby’okurya ebi yaabaire aine omu ibiikiro rye. Eby’okurya ebyo bikahwera ab’eishe-emwe baingi kumara obwire. Ku twabaire nitupakira eby’okurya omu motoka, bakatambika bomu mita nka 20 (fuuti 66) kuruga ahu twabaire turi. Eizooba ryoona, nkeeshengyereza Yehova kumpa obumanzi obwabaire nibwetengyesa kubaasa kuhwera ab’eishe-emwe.”

¹³ “Vitalii naagira ati: “Kikaba nikyetengyesa obumanzi. Orugyendo orw’okubanza rukamara eshaaha ikumi na ibiri. Nkashaba Yehova omu rugyendo orwo rwona.” Vitalii akaba ari emanzi, kwonka akaba naayegyendesereza. Naayongyeraho ati: “Nkaguma ninshaba Yehova kumpa obwengye n’okumpwera kuba orikwetwara. Nkavugira aha nguuto ezi ab’obushoboorozi baabaire baikiriize zonka. Okwikiriza kwangye kukahama ku naareebire butunu ab’eishe-emwe na banyaanyazi-itwe barikukwatanisa. Bakaihaho ebyabaire biri omu muhanda, baarundaana ebintu by’okwirukangirira, kandi baabipakira omu motoka, baatuha eby’okurya, n’ah’okuhuumurira.”

GUMA OHAMIIRE AHARI YEHOVA

14. Nitubaasa kukwatwaho tuta omuntu ou turikukunda yaacwamu kuruga ahari Yehova?

¹⁴ Kimwe aha birikukira kutumaramu amaani, n’okureeba omwe aha b’eka yaitu nari munywani waitu ow’aha mara arikuruga ahari Yehova. (Zab. 78:40; Enf. 24:10) Omukago gwaitu n’omuntu ogwo gwaba guhami, nikibaasa kutugumira kwemera embeera. Ku oraabe oraahikirweho embeera nk’egyo ey’obusaasi, eky’okureeberaho kya Zadoki nikibaasa kukugumya.

15. Ahabw’enki Zadoki yaabaire aine kugira obumanzi kubaasa kuguma ahamiire ahari Yehova? (1 Abagabe 1:​5-8)

¹⁵ Zadoki akaguma ahamiire ahari Yehova, munywani we Abiasaari ku yaacwiremu kutaguma ari omwesigwa. Eki kikabaho obutegyeki bwa Daudi burikuhendera. Obu Daudi yaabaire ari aha ncwamba za rufu, omutabani Adoniya akateeraho kwegaruriza obugabe, obu Yehova yaabaire araganiise Sulemaani. (1 Bus. 22:​9, 10) Abiasaari akacwamu kushagika Adoniya. (Shoma 1 Abagabe 1:​5-8.) Omu kukora atyo, Abiasaari akooreka ngu tari mwesigwa ahari Daudi na Yehova. Teera akashushani oku Zadoki aine kuba yaayehuriire! Abiasaari na Zadoki bakakora hamwe nk’abanyamurwa kumara emyaka makumi ana. (2 Sam. 8:17) Bakaba nibareeberera hamwe “eshanduukye ya Ruhanga.” (2 Sam. 15:29) Omu kubanza, bombi bakaba nibashagika Omugabe Daudi, kandi barikukora n’ebindi bingi.—2 Sam. 19:​11-14.

16. Niki ekirikubaasa kuba kyahweraire Zadoki kuguma ahamiire ahari Yehova?

¹⁶ Zadoki akaguma ahamiire ahari Yehova n’obu Abiasaari yaacwiremu kutaguma ari omwesigwa. Daudi akaba atarikubangaanisa obwesigwa bwa Zadoki. Enaama ya Adoniya ku yaamanyirwe, Daudi akatoorana Zadoki, Nasani, na Benaaya kwemeka Sulemaani nk’omugabe. (1 Bag. 1:​32-34) Okuba hamwe n’abaheereza ba Yehova abeesigwa nka Nasani n’abandi abaabaire nibashagika Daudi,  kiine kuba kyagumize Zadoki. (1 Bag. 1:​38, 39) Sulemaani ku yaabaire omugabe, ‘akata Zadoki omunyamurwa omu mwanya gwa Abiasaari.’—1 Bag. 2:35.

17. Noobaasa kutooreza ota Zadoki, munywani waawe yaacwamu kuruga ahari Yehova?

¹⁷ Noobaasa kutooreza ota Zadoki? Omuntu ou orikukunda yaacwamu kuruga ahari Yehova, yoreka ngu omaririire kuhamira ahari Yehova. (Yos. 24:15) Yehova naija kukuha amaani n’obumanzi oburikwetengyesa. Yoreka ngu noomwesiga orikushaba, kandi okaguma haihi n’abaheereza be abeesigwa. Yehova naakusiima ahabw’okumuhamiraho, kandi naija kukushumbuusha.—2 Sam. 22:26.

18. Nooyegyera ki ahari Marco na Sidse?

¹⁸ Teekateeka ahari Marco n’omukazi we Sidse, abu bahara baabo babiri baarugire omu mazima. Marco naagira ati: “Kuruga obu abaana baawe barikuzaarwa nooba noobakunda munonga. Nookora kyona eki orikubaasa kubarinda kutahikwaho akabi. N’ahabw’ekyo, ku barikucwamu kuruga ahari Yehova, noogira obusaasi bw’omu mutima.” Naayongyeraho ati: “Kwonka Yehova atwire ari aha rubaju rwaitu. Ahamize ngu naaba ntaine amaani, omukazi wangye naaba ahami, kandi yaaba ataine maani, nimba mpami.” Sidse naagira ati: “Tukaba tutarikwija kugumisiriza ku ogire ngu Yehova taratuhaire amaani agarikwetengyesa. Nkaba niinyecwera orubanja aha bw’ebyabaireho, n’ahabw’ekyo nkagambira Yehova oku naabaire ninyehurira. Bwanyima y’obwire bukye, munyaanyazi-itwe ou naabaire ntwireho ntarikureeba akampikaho yaankwata aha mabega, yaandeeba aha maisho, yaangira ati, ‘Sidse, ijuka ngu ti mushango gwawe!’ Ahabw’okuhwerwa Yehova, mbaasize kuguma nyine okushemererwa omu kumuheereza.”

19. Omaririire kukora ki?

¹⁹ Yehova naayenda ngu abaheereza be boona babe emanzi nka Zadoki. (2 Tim. 1:7) Kwonka tarikwenda ngu twesigye amaani gaitu. Kureka, naayenda ngu tumwesigye. N’ahabw’ekyo waahikwaho embeera erikwetengyesa okugira obumanzi, shaba Yehova kukuhwera kubugira. Gira obwesigye ngu naija kukubaasisa kugira obumanzi nka Zadoki.—1 Pet. 5:10.