1, 2. Ahabw’enki twine kugaaniira aha miringo y’okuhuumurizamu abarikuganya? (Reeba ekishushani aha kutandika.)

“BWANYIMA y’omwaka nka gumwe mutabani waitu aherize kufa, tukahurira obusaasi bwingi munonga,” bikagambwa Susi. Bwanyima y’ow’eishe-emwe omwe kufeerwa omukazi we kitaraariire, akagira ngu akatunga “obusaasi obutarikubaasa kushoboororwa.” Eky’obusaasi abantu baingi nibatunga obusaasi nk’obu. Omu kibiina Ekikristaayo, baingi aha b’eishe-emwe na banyaanyazi-itwe bakaba batarikuteekateeka ngu abakundwa baabo nibaija kufa Haramagedoni etakahikire. Obundi okafeerwa omukundwa, nari obumwe noomanya omuntu orikuganya. Kyaba nikwo kiri, noobaasa kwebuuza oti: ‘Omuntu orikuganya naabaasa kuhuumurizibwa ata?’

² Abantu abamwe nibagira ngu okuhinguraho kw’obwire nikukiza enkojo zoona. Kwonka shi eki nikibaho omu mbeera zoona? Omufaakazi omwe akagira ati: “Nshangire ngu kihikire kugira ngu oku omuntu arikukoresa obwire bwe nikyo kirikumuhwera kukira.” Enkojo eza butoosha kubaasa kukira oine kukuguma noozireeberera kandi hakahinguraho n’obwire. Omu muringo nigwo gumwe, omuntu aine  kufuubwaho hakahinguraho n’obwire kubaasa kukira obusaasi bw’enyehurira. Niki buzima ekirikubaasa kuhwera abarikuganya kutuubya aha busaasi bwabo omu nyehurira?

3, 4. Ahabw’enki nituhamya ngu Yehova naayetegyereza okuganya kwaitu?

³ Tataitwe Yehova ow’embabazi niwe arikukirayo kutuha okuhuumurizibwa oku turikwenda. (Shoma 2 Abakorinso 1:3, 4.) Niwe arikukirayo kugira esaasi, kandi naaraganisa abantu be ati: “Nyowe, niinye orikubahuumuriza.”​—Isaaya 51:12; Zaaburi 119:50, 52, 76.

⁴ Tataitwe owa rukundo nawe akafeerwa abantu abu arikukunda, nka Abrahamu, Isaaka, Yakobo, Musa, n’Omugabe Daudi. (Okubara 12:6-8; Matayo 22:31, 32; Ebyakozirwe 13:22) Baibuli neegira ngu Yehova buzima ainiire ekihika eizooba obu araazoore abashaija abo abeesigwa. (Yobu 14:14, 15) Omu bwire obwo, nibaija kushemererwa kandi bagire amagara agahikiriire. Kandi Yehova akafeerwa Omwana we omujigaijo. Baibuli neegira ngu Yesu niwe ou Ruhanga yaabaire naakunda munonga. (Enfumu 8:22, 30) Titurikubaasa n’okuteebereza obusaasi obu Yehova yaagizire arikureeba Omwana we naafa aine obusaasi bwingi.​—Yohaana 5:20; 10:17.

5, 6. Yehova naatuhuumuriza ata?

⁵ Nitubaasa kuhamiza kimwe ngu Yehova naija kutuhwera. N’ahabw’ekyo butoosha titwine kutiina kumushaba tukamugambira obusaasi bwaitu n’enaku. Ka nikihuumuriza kumanya ngu Yehova naayetegyereza enyehurira zaitu, kandi ngu naatuhuumuriza nk’oku turikwenda! Kwonka shi naakikora ata?

⁶ Omuringo gumwe ogu Yehova arikutuhuumurizamu n’okukoresa omwoyo gwe ogurikwera. (Ebyakozirwe 9:31) Yesu akaraganisa ngu Tataitwe ow’omu iguru naija kuha omwoyo gwe gurikwera abo boona abarikugumushaba. (Luka 11:13) Susi, owaaba yaagambirweho naagira ati: “Hariho emirundi mingi ei twabaire tutsimba amaju tukeeshengyereza Yehova kutuhuumuriza. Buri kushaba, obusingye bwa Ruhanga buzima bukaba burinda emitima yaitu n’ebiteekateeko.”​—Shoma Abafilipi 4:6, 7.

7, 8. Ahabw’enki turikubaasa kuhamya ngu Yesu naija kutuhuumuriza?

⁷ Obu Yesu yaabaire ari omu nsi, akooreka emitwarize nk’eya Ishe omu bigambo n’omu bikorwa. (Yohaana 5:19) Yehova akoohereza Yesu omu nsi kuhuumuriza “abacwekire emitima” na “boona abarikuganya.” (Isaaya 61:1, 2; Luka 4:17-21) Abantu bakaba nibamanya ngu Yesu naayetegyereza okubonabona kwabo, kandi ngu buzima naayenda kubahwera.​—Abaheburaayo 2:17.

⁸ Obu Yesu yaabaire ari muto, naabaasa kuba yaafeereirwe banywani be n’abanyabuzaare.  Nk’eky’okureeberaho, Yosefu owaayoroire Yesu naabaasa kuba yaafiire obu Yesu yaabaire akiri omutsigazi. * (Reeba obugambo obw’ahansi.) Teekateeka oku kirikubaasa kuba kyabaire kigumiire Yesu owaabaire naafayo aha bandi omu butsigazi bwe kwemera amaganya age, n’obusaasi bwa nyina, obwa beene ishe, na banyaanya.

9. Yesu akooreka ata ngu aine esaasi obu Laazaaro yaafa?

⁹ Obu Yesu yaabaire naaheereza omu nsi, akooreka ngu buzima naayetegyereza abantu kandi ngu abainiire esaasi. Nk’eky’okureeberaho, obu yaafeerwa munywani we ow’aha mara Laazaaro, akagira obusaasi bw’amaani nk’obu Mariamu na Mariza baabaire baine. Akabagirira esaasi nyingi yaahika n’aha kurira, n’obu araabe yaabaire naamanya ngu naaza kuzoora Laazaaro.​—Yohaana 11:33-36.

10. Nitubaasa kuhamya tuta ngu Yesu naayetegyereza oku turikwehurira obunaku obu?

¹⁰ Ebigambo bya Yesu ebya ira ebirikuhuumuriza nibituhwera bita obunaku obu? Baibuli neegamba butunu ngu Yesu tarikuhinduka. Neegira eti: “Yesu Kristo tahinduka; oku abaire ari nyomwabazyo, n’eri izooba nikwo ari, kandi nikwo ariguma ebiro byona.” (Abaheburaayo 13:8) Naayetwa Omuhikaanisa “w’Amagara” Omukuru ahakuba naatubaasisa kwija kutuuraho ebiro byona. Kandi Yesu naamanya gye amaganya “naabaasa kuhwera abarikwohibwa.” (Ebyakozirwe 3:15; Abaheburaayo 2:10, 18) N’ahabw’ekyo nitubaasa kuhamya ngu Yesu na hati naakwatwaho abandi baaba baine obusaasi. Naayetegyereza obusaasi bwabo, kandi naabaasa kubahuumuriza ‘ahu barikwetengyera hoona’ nari omu bwire obuhikire.​—Shoma Abaheburaayo 4:15, 16.

11. Ni byahandiikirwe ki iwe ebirikukuhuumuriza?

¹¹ Ebirikukwata aha kuganya kwa Yesu obu Laazaaro yaafa, ni bimwe aha byahandiikirwe ebirikuhuumuriza ebiri omu Kigambo kya Ruhanga. Eki tikirikututangaaza, ahakuba “Ebyahandiikirwe ira byona bikahandiikwa kutwegyesa, ngu tubone kugira amatsiko ahabw’okugumisiriza, n’ahabw’okuhuumuzibwa Ebyahandiikirwe ebyo.” (Abarooma 15:4) Naiwe waaba nooganya noobaasa kuhuumurizibwa ebyahandiikirwe nk’ebi:

• Yehova “aba haihi ab’emitima ehendekire, ajuna ab’omutima ogweteisiize kimwe.”​—Zaaburi 34:18, 19.

• “Ku nteekateeka bingi, naayemereza omutima, okuhuumuriza kwawe [Yehova] kugwisa gye amagara gangye.”​—Zaaburi 94:19.

• “Mukama waitu Yesu Kristo na Ruhanga Tataitwe owaatukunzire akatuha okuhuumura okutahwaho n’amatsiko marungi ahabw’embabazi ze, ahuumuze emitima yaanyu, agigumye gye.”​—2 Abatesalonika 2:16, 17. *—​Reeba obugambo obw’ahansi.

12. Nitubaasa kuhuumuriza tuta abandi?

¹² Abarikuganya nibabaasa kutunga okuhuumurizibwa kuruga omu kibiina Ekikristaayo. (Shoma 1 Abatesalonika 5:11.) Noobaasa kugumya ota abaine “omutima ogucuramiriirwe” kandi okabahuumuriza? (Enfumu 17:22) Ijuka ngu hariho “obunaku bw’okuhunama n’obunaku bw’okugamba.” (Omubuurizi 3:7) Omufaakazi orikwetwa Dalene naashoboorora ngu abarikuganya baine kugamba eki barikuteekateeka n’oku barikwehurira. N’ahabw’ekyo, ekintu kikuru eki orikubaasa kukora, n’okuhurikiza omuntu otarikumushara kirimi. Junia ou mwene ishe yaayeitsire, naagira ati: “N’obu oraabe otarikubaasa kwetegyereza amaganya gaabo goona, ekikuru n’okugira ngu nooba nooyenda kwetegyereza oku barikwehurira.”

13. Niki eki tushemereire kwijuka aha kuganya?

¹³ Twine kwijuka ngu abantu boona tibarikugira enyehurira zirikushushana, nari kworeka amaganya omu muringo gurikushushana. Obumwe tikirikubaasika omuntu kushoboorora gye obusaasi obu aine. Ekigambo kya Ruhanga nikigira kiti: “Obusaasi bumanywa omutima ogu burimu, kandi omu kushemererwa kwagwo tihariho mugyenyi okwatanisa nagwo.” (Enfumu 14:10) N’obu omuntu yaakugamba oku arikwehurira, nikiba kitoorobi abandi kwetegyereza eki arikumanyisa.

14. Nitubaasa kukoresa bigambo ki kuhuumuriza abarikuganya?

¹⁴ Nikibaasa kuguma kumanya eki tushemereire kugambira omuntu orikuganya. Kwonka Baibuli neegira ngu “orurimi rw’omunyabwengye rutamba.” (Enfumu 12:18) Baingi bashangire ebigambo ebirikuhuumuriza omu katabo When Someone You Love Dies. * (Reeba obugambo obw’ahansi.) Kwonka obwire obwingi, ekintu ekirikuhwera eki orikubaasa kukora ‘n’okurira hamwe n’abarikurira.’ (Abarooma 12:15) Gaby, owaafeereirwe iba naagira ngu omuringo gumwe ogu arikworekamu enyehurira ze n’okurira. Naayongyeraho ati: “Niyo nshonga ahabw’enki nintunga obuhuumure banywani bangye baarira naanye. Omu bwire obwo, tindikuhurira ngu ndi nyenka omu kuganya.”

15. Nitubaasa kuhuumuriza tuta abandi kyaba nikitugumira kukikora butunu? (Reeba akabokisi “ Ebigambo Birungi eby’Okuhuumuriza.”)

¹⁵ Waaba nooshanga kigumire kugamba ebirikuhuumuriza omuntu, nikibaasa kukworobera kumuhandiikira kaada, kumutsindikira obutumwa aha Intaneeti nari aha simu, nari kumuhamundiikira ebaruha. Noobaasa kujuriza ekyahandiikirwe ekirikuhuumuriza, gamba omutwarize gw’omutaano ogu orikwijuka aha muntu owaafiire, nari ogambe ekintu kirikushemeza eki yaakozire eki orikwijuka. Junia naagira ati:  “Okutunga obutumwa bugufu oburikuhuumuriza nari Omukristaayo okunyeta kubaho nawe nikimpwera kukira ebi ndikubaasa kugamba. Ebigambo ebyo nibindeetera kwehurira ngu abantu nibankunda kandi nibanfaho.”

16. Omuringo murungi gw’okuhuumurizamu abandi ni guuha?

¹⁶ Okushaba kwaitu nikuhwera ab’eishe-emwe na banyaanyazi-itwe abarikuganya. Nitubaasa kubashabira nari kushaba nabo. N’obu kiraabe nikikugumira ahabw’okugira ngu noobaasa kurira, okushaba kwawe okurikuruga aha mutima nikubaasa kugumya omuntu. Dalene naagira ati: “Obumwe banyaanyazi-itwe ku barikwija kungumya, nimbabuuza yaaba nibabaasa kushaba naanye. Nibatandika kushaba bagumiirwe, kwonka ku barikuheza kugambaho ebigambo bikye, eiraka ryabo nirimanyiira bashaba kuruga aha mutima. Okwikiriza kwabo, rukundo yaabo, n’okufayo kwabo bihamize munonga okwikiriza kwangye.”

17-19. Ahabw’enki twine kugumizamu nituhuumuriza abandi?

¹⁷ Tikirikubaasika kumanya obwire bwenyine obu buri muntu arikubaasa kumara naaganya. Waaheza kufeerwa omukundwa, omu kubanza abanywani baingi n’abanyabuzaare nibaba bariho kukuhuumuriza. Kwonka baagaruka aha mirimo yaabo ya butoosha, abarikuganya nibaba nibenda kuhuumurizibwa. N’ahabw’ekyo ba oyeteekateekire kuhwera. “Munywani w’omuntu amukunda ebiro byona kandi ow’eishe-emwe azaarirwa okuhwera abantu omu bihikiirizi.” (Enfumu 17:17) Twine kugumizamu nituhuumuriza abarikuganya baaba  nibakyetenga obuhwezi bwaitu.​—Shoma 1 Abatesalonika 3:7.

¹⁸ Ijuka ngu obwire bwona omuntu naabaasa kugaruka agire amaganya kitaraariire. Eki nikibaasa kubaho omu bwire bw’okwijuka emikoro emwe, okuhurira ebyeshongoro ebimwe, okureeba ebishushani, omu kukora emirimo emwe, waakaga akahooho, waahurira amaraka, nari obwire bumwe omu mwaka. Efaakazi nari omushaija ofeereirwe omukazi we omurundi gw’okubanza kukora ekintu wenka, nk’okuza omu ruteerane oruhango nari aha Kiijutsyo, nikibaasa kumushaasha munonga. Ow’eishe-mwe omwe naagira ati: “Nkaba nimmanya ngu omukoro gw’okubanza kwijuka obushwere bwaitu ndi nyenka nigwija kuba ogw’obusaasi munonga, kandi kwo buzima gukaba gutoorobi. Kwonka ab’eishe-emwe na banyaanyazi-itwe bakatebeekanisa akagyenyi akarimu banywani bangye ab’aha mara kugira ngu ntaba nyenka.”

¹⁹ Ijuka ngu abarikuganya nibaba nibenda kuhuumurizibwa obwire bwona hatari aha mikoro y’omutaano yonka. Junia naashoboorora ati: “Obumwe abantu baija bakaba naiwe hatariho mukoro gw’omutaano ogw’okwijuka nikibaasa kuhwera munonga. Emikoro erikubaho eshaaha yoona hatariho kintu ky’omutaano neebaasa kuba ey’omuhendo kandi neehuumuriza.” N’amazima titurikubaasa kwihaho okuganya kwona nari eihamba, kwonka nitubaasa kuhuumuriza abarikuganya turikugira ebi twabakorera. (1 Yohaana 3:18) Gaby naagira ati: “Ninsiima Yehova ahabw’abareeberezi abaarabire naanye omuri buri rugyendo rwona orugumire. Bandeeteire kwehurira nk’ofumbatsirwe emikono ya Yehova.”

20. Ahabw’enki ebi Yehova arikuraganisa birikuhuumuriza munonga?

²⁰ Nikihuumuriza kumanya ngu Yehova Ruhanga ow’okuhuumuriza kwona, naija kwihaho okuganya kwona omu bwire bw’okuzooka. (Yohaana 5:28, 29) Ruhanga naaraganisa ngu naija kwihiraho “kimwe rufu, aragaze amarira aha maisho goona.” (Isaaya 25:8) Reero omu mwanya gw’okurira “hamwe n’abarikurira,” buri omwe omu nsi naija kushemererwa “hamwe n’abarikushemererwa.”​—Abarooma 12:15.