1. Niki ekirikubaasa kutureetera amaganya kandi nitubaasa kukwatwaho tuta?

ORAGIZIREHO amaganya? * Obundi oine amaganya ahabw’okugira ngu ebi abandi baagambire nari ebi baakozire bikugwisize kubi. Nari oine amaganya ahabw’ebi iwe waagambire nari waakozire. Nk’eky’okureeberaho, noobaasa kuba waakozire enshobe, kandi nooyerarikirira ngu Yehova tarikwija kukusaasira. Okwongyera ahari ekyo, noobaasa kuba nooteekateeka ngu ahabw’okurengwa amaganya, oshemereire kuba otaine kwikiriza, kandi ori omuntu mubi. Kwonka shi ekyo kihikire?

2. Ni baahi abarikugambwaho Baibuli kutuhamiza ngu okugira amaganya tikirikumanyisa ngu titwine kwikiriza?

² Yetegyereze bamwe abarikugambwaho omu Baibuli. Hanna, owaazaire nabi Samueli akaba aine okwikiriza kuhami. Kwonka, akagira amaganya maingi obu yaatwarizibwa kubi omwe aha b’omu ka ye. (1 Sam. 1:7) Entumwa Paulo akaba aine okwikiriza kuhami, kwonka akarengwa amaganya ‘yaayemereza omutima’ ahabw’ebibiina. (2 Kor. 11:28) Kandi Omugabe Daudi akaba aine okwikiriza kuhami kyareetera Yehova kumukunda munonga. (Byak. 13:22) N’obu kiraabe kiri kityo, Daudi akakora enshobe ezaamureeteire kugira amaganya maingi. (Zab. 38:4) Yehova akabahuumuriza kandi yaaha buri omwe aharibo obuhuumure. Ka tureebe eki turikubaasa kubeegyeraho.

3. Ebi abandi barikugamba nibibaasa kutureetera bita amaganya?

³ Abandi baatugambira kubi nari baatutwariza kubi, nitubaasa  kugira amaganya. Eki nikikira kubaho omunywani ow’aha mara nari omunyabuzaare yaaba niwe yaatugwisa kubi. Nitubaasa kwerarikirira ngu omukago gwaitu nawe niguza kufa. Obumwe, omuntu orikuba atukozire kubi naabaasa kugamba atabandize kuteekateeka, tube nk’abaacumitwa rurara! (Enf. 12:18) Nari omuntu naabaasa kukikora akigyendereire acwemu kukoresa ebigambo ebirikureetera abandi obusaasi. Munyaanyazi-itwe omunyeeto akahikwaho oburemeezi obu. Naagira ati: “Emyaka mikye enyima ou naabaire ninteekateeka ngu ni munywani wangye murungi akangaambuura kurabira aha mukura. Nkahurira kubi naagira amaganya. Nkaba ntarikubaasa kwetegyereza ahabw’enki yaabaire naandeetera obusaasi arikungambuura.” Munywani waawe ow’aha mara nari omunyabuzaare ku araabe yaakugwize kubi noobaasa kugira eki waayegyera ahari Hanna.

4. Ni buremeezi ki obugumire obu Hanna yaabaire aine kwemera?

⁴ Hanna akaba aine kwemera embeera egumire. Kumara emyaka mingi akaba atarikubaasa kuzaara abaana. (1 Sam. 1:2) Omu ntwaza y’Abaisraeli omukazi engumba, akaba naateekateekwaho kuba akyeenirwe. Eki kikamureetera kuhemuka. (Kut. 30:1, 2) Iba akaba aine omukazi ondiijo Penina, owaazaire abaana reero kikaba rwongyerera maganya ahari Hanna. Penina akaba ainiire Hanna eihari kandi ‘akaba naamuteerera enaku, ngu amugwise kubi.’ (1 Sam. 1:6) Omu kubanza, Hanna akagumirwa kwemera embeera egi. Akaguubwa kubi ‘yaarira munonga,’ kandi akaba atakirya by’okurya. Akagira “obusaasi bwingi omu mutima.” (1 Sam. 1:7, 10) Niki ekyahweraire Hanna kutunga obuhuumure?

5. Okushaba kukahwera kuta Hanna?

⁵ Hanna akagambira Yehova amaganya ge kurabira omu kushaba. Bwanyima y’okushaba, akashoboororera Eli Omunyamurwa Omukuru embeera ye. Eli akamugira ati: “Yegyendere n’obusingye; [Yehova] Ruhanga wa Israeli akuhe eki waamushaba.” Niki ekyarugiremu? Hanna akeegyendera, “yaarya, tiyaagaruka kureebwa aine enaku.” (1 Sam. 1:17, 18) Okushaba kukahwera Hanna kugaruka kugira obusingye.

6. Ni mashomo ki agarikukwata aha kushaba agu turikubaasa kwegyera ahari Hanna n’omu Abafilipi 4:6, 7?

⁶ Nitubaasa kugaruka kugira obusingye twayezirikira okushaba. Hanna akamara obwire arikugamba na Ishe w’omu iguru. (1 Sam. 1:12)  Naitwe nitubaasa kumara obwire buraingwa turikugambira Yehova ebirikutwerarikiriza, ebi turikutiina nangwa n’obweremwa bwaitu. Tikirikwetengyesa ngu okushaba kwaitu kube kuri nk’ekyevugo nari kubanza kutebeekanisa oku ebigambo biraakuratane gye. Nitubaasa kushanga turikugamba ebigambo by’obusaasi bwingi obundi turikuhunamamu kakye tukarira. N’obu ekyo kyakubaho, Yehova tarikwija kuruha kutuhurikiza. Okwongyera aha kugambira Yehova oburemeezi bwaitu, twine kwijuka obuhabuzi oburi omu Abafilipi 4:6, 7. (Kishome.) Paulo akagamba butunu ngu okushaba kwaitu nikutwariramu okusiima Yehova. Hariho enshonga nyingi ezishemereire kutureetera kumusiima. Nk’eky’okureeberaho, nitubaasa kumwebaza ahabw’ekiconco ky’amagara, ebi yaahangire, rukundo ye etarikuhwaho, n’amatsiko g’omuhendo agu atuhaire. Niki ekindi eki turikubaasa kwegyera ahari Hanna?

7. Hanna na iba bakaguma nibakora ki batarikwosha?

⁷ Oyihireho oburemeezi obu Hanna yaabaire aine, akaguma naaza Shiilo na iba kuramya Yehova. (1 Sam. 1:1-5) Hanna akaba ari aha hekalu obu Omunyamurwa Omukuru Eli yaamugumya, akamugira ngu aine amatsiko ngu Yehova naija kugarukamu okushaba kwe.​—1 Sam. 1:9, 17.

8. Enteerane nizibaasa kutuhwera zita? Shoboorora.

⁸ Nitubaasa kugaruka tugire obusingye twagumizamu nituza omu nteerane. Butoosha enteerane zaitu zaaba nizitandika, ow’eishe-emwe naashaba Yehova kutuha omwoyo gurikwera. Obusingye n’ekicweka ky’ekyana ky’omwoyo gurikwera. (Gal. 5:22) Twaza omu nteerane n’obu twakuba twine amaganya, nituba nituha Yehova n’ab’eishe-emwe omugisha gw’okutuhwera kugaruka kugira obusingye bw’omu biteekateeko n’omu mutima. Okushaba n’enteerane n’emiringo mikuru ei Yehova arikukoresa kutuha obuhuumure. (Heb. 10:24, 25) Yetegyereze eishomo erindi eri turikwegyera ahari Hanna.

9. Ni mbeera ki eza Hanna ezahindukire, kandi niki ekitarahindukire?

⁹ Ebyabaire nibireetera Hanna amaganya tibirarugireho ahonaaho. Hanna ku yaagarukire omu ka arikuruga aha hekalu, akagaruka yaatuura na Penina nka butoosha. Kandi Baibuli terikworeka ngu Penina akahindura aha mitwarize ye. N’ahabw’ekyo Hanna akagumizamu naagumisiriza ebigambo bya muka iba ebirikucumita. Kwonka Hanna akagaruka yaagira obusingye bw’omu mutima kandi yaaguma nabwo. Ijuka ngu Hanna bwanyima y’okwegyekyera Yehova oburemeezi bwe, taragarukire kureebwa arengirwe amaganya. Akaikiriza Yehova kumuhuumuriza n’okumuha obuhuumure. Bwanyima y’obwire, Yehova akaha Hanna omugisha yaazaara abaana abe!​—1 Sam. 1:19, 20; 2:21.

10. Niki eki turikwegyera ahari Hanna?

¹⁰ Nitubaasa kugaruka kugira obusingye n’obu twakuba tukiine oburemeezi. N’obu twakwezirikira okushaba kandi tukaguma nituza omu nteerane obutoosha, oburemeezi obumwe tiburikurugaho. Kwonka ebi Hanna yaarabiremu, nibitwegyesa ngu tihariho ekirikubaasa kuzibira Yehova kutuha obuhuumure omu mutima. Yehova tarikubaasa kutwebwa, kandi juba nari bwanyima naija kutushumbuusha ahabw’obwesigwa bwaitu.​—Heb. 11:6.

11. Ni nshonga ki ezaareeteire Paulo okwerarikirira?

¹¹ Hariho ebintu bingi ebyareeteire Paulo okwerarikirira. Nk’eky’okureeberaho, ahabw’okukunda ab’eishe-emwe na banyaanyazi-itwe, oburemeezi bwabo bukamureetera kwemereza omutima. (2 Kor. 2:4; 11:28) Paulo omu buheereza bwe nk’entumwa, akaba  aine kwemera abahakanisa abaamuteire kandi bakamuta omu kihome. Kandi akaba aine kwemera embeera zigumire ezirikubaasa kumureetera kwerarikirira, nk’okutagira ebintu birikumara. (Fil. 4:12) Kandi aine kuba yaabaire naayerarikirira orugyendo rw’emeeri, ahakuba akaba yaatungireho butandu y’emeeri emirundi eshatu. (2 Kor. 11:23-27) Niki ekyabaire nikihwera Paulo omu bwire bw’okwerarikirira?

12. Niki ekyahwereire Paulo kutuubya aha kwerarikirira kwe?

¹² Paulo akaba naayerarikirira ahabw’embeera z’ab’eishe-emwe ezigumire, kwonka tarataireho kushoboorora oburemeezi bwabo bwona ahabwe. Paulo akamanya obugarukiro bwe. Akashaba abandi kumuhwera omu kureeberera ekibiina. Nk’eky’okureeberaho, obujunaanizibwa obumwe akaburekurira abashaija abeesigwa nka Timoseo na Tito. Hatariho kubangaanisa ahabw’emirimo ei abashaija abo baakozire, kikatuubya aha kwerarikirira kwa Paulo.​—Fil. 2:19, 20; Tit. 1:1, 4, 5.

13. Abareeberezi nibabaasa kutooreza bata Paulo?

¹³ Shaba abandi kukuhwera. Nka Paulo, abareeberezi abanyambabazi obunaku obu nibeerarikirira omu kibiina haaba harimu abarikugyezibwa. Kwonka omureeberezi tarikubaasa kuhwera buri omwe omu kibiina. Okumanya ngu aine obugarukiro nikimuhiga kubagana obujunaanizibwa n’ab’eishe-emwe abarikuhikiiriza ebirikwetengyesa, n’okutendeka ab’eishe-emwe abato kumuhwera kureeberera obusyo bwa Ruhanga.​—2 Tim. 2:2.

14. Niki eki Paulo yaabaire atarikutiina, kandi nitubaasa kumwegyeraho ki?

¹⁴ Manya ngu naiwe oine kuhuumurizibwa. Paulo akaba ari omucureezi, n’ahabw’ekyo akaikiriza banywani be kumugumya. Akaba atarikutiina ngu abantu nibaija kumureeba nk’omweremwa baamanya ngu nawe abandi bamuhuumuriize. Obu Paulo yaahandiikira Filemooni, akagira ati: ‘Okukunda kwawe kukanshemeza munonga kandi naaruhuuka.’ (Film. 7) Paulo akagamba n’aha bakozi bagyenzi be baingi abaamuhuumuriize obu yaabaire aine amaganya. (Kol. 4:7-11) Twaba abacureezi tukaikiriza ngu twine kuhuumurizibwa, ab’eishe-emwe na banyaanyazi-itwe nibaija kushemererwa kutuhwera.

15. Paulo akatunga ata obuhuumure obu yaabaire ayerarikiriire?

¹⁵ Yesigye Ekigambo kya Ruhanga. Paulo akaba naamanya ngu Ebyahandiikirwe nibibaasa kumuhuumuriza. (Rom. 15:4) Bikaba nibimuha obwengye kwemera okugyezibwa okwa buri  muringo. (2 Tim. 3:15, 16) Obu Paulo yaabaire ari omu kihome omuri Rooma omurundi gwa kabiri, akaba naamanya ngu ari haihi kwitwa. Omu mbeera egyo erikwerarikiriza, Paulo akakora ki? Akashaba Timoseo kwija kumureeba juba kandi amureetere ‘ebitabo by’empu’ nari emizingo. (2 Tim. 4:6, 7, 9, 13) Ahabw’enki? N’ahabw’okugira ngu obundi emizingo egyo ekaba eriho Ebyahandiikirwe eby’Oruheburaayo ebi Paulo yaabaire naabaasa kukoresa omu kweyegyesa. Twakuratira eky’okureeberaho kya Paulo turikweyegyesa Ekigambo kya Ruhanga butoosha, Yehova naija kukoresa Ebyahandiikirwe kuturuhuura n’obu twakuba nitugyezibwa tuta.

16. Daudi akeereetera maganya ki?

¹⁶ Daudi akakora ekintu kibi ekyamureeteire kugira omutima ogurikweshinja. Akashambana na Batisheba, yaakora orukwe rw’okwita iba, kandi yaateeraho kushwekyerera ebibi bye. (2 Sam. 12:9) Omu kubanza, Daudi akeehuzya okweshinja kwe. Ekyarugiremu, akarwara omu by’omwoyo, omu mubiri n’omu biteekateeko. (Zab. 32:3, 4) Niki ekyahwereire Daudi kusingura amaganya agu yaayereeteire, kandi niki ekirikubaasa kutuhwera twakora ekibi ky’amaani?

17. Ebiri omu Zaaburi 51:1-4 nibyoreka bita ngu Daudi akeeteisiza kimwe kuruga aha mutima?

¹⁷ Shaba Yehova okusaasirwa. Daudi akarugaho yaayecureeza yaashaba Yehova. Akeeteisiza kimwe, yaayatura ebibi bye. (Shoma Zaaburi 51:1-4.) Kandi ka kyamureeteire kutunga oburuhuuko! (Zab. 32:1, 2, 4, 5) Waakora ekibi ky’amaani, otateeraho kukishwekyerera. Kureka, yatura ekibi kyawe orikukigambira Yehova kurabira omu kushaba. Noija kutandika kutunga oburuhuuko kuruga aha maganya agarikureetwa omutima ogurikweshinja. Kwonka waaba nooyenda kugaruraho omukago gwawe na Yehova, oine kukora ekirikukira aha kushaba.

18. Daudi akatwaza ata ku yaahanirwe?

¹⁸ Ikiriza okuhanwa. Yehova ku yaayohereize nabi Nasani kugambira Daudi ekibi eki akozire, Daudi tarateireho kwehozaho nari kuteekateeka ngu ekibi kye ti ky’amaani. Ahonaaho akaikiriza ngu taracumwire ahari iba wa Batisheba wenka, beitu okukira munonga akacumura ahari Yehova. Daudi akaikiriza Yehova yaamuhana, kandi Yehova nawe akamusaasira. (2 Sam. 12:10-14) Waaba okozire ekibi ky’amaani, oine kugambira abu Yehova atooraine  kutureeberera omu by’omwoyo. (Yak. 5:14, 15) Kandi twine kuteeraho kurwanisa omutego gw’okwenda kwehozaho. Twikiriza kandi tukakuratira okuhanwa okutuhairwe ahonaaho, nitwija kurahuka kutunga obusingye n’okushemererwa.

19. Oine kumariirira kukora ki?

¹⁹ Mariirira kutagaruka kukora enshobe niyo emwe. Omugabe Daudi akaba naamanya ngu kubaasa kwetantara kukora enshobe niyo emwe, aine kwesiga Yehova kumuhwera. (Zab. 51:7, 10, 12) Yehova ku yaasaasiire Daudi, akamariirira kusingura emiteekateekyere mibi. Ekyarugiremu, akagaruka yaagira obusingye.

20. Nitubaasa kworeka tuta ngu nitusiima okusaasira kwa Yehova?

²⁰ Nitworeka ngu nitugasirwa omu kusaasira kwa Yehova twamushaba, tukaikiriza kutuhana, kandi tukateeraho kwetantara kugaruka kukora enshobe. Twakuratira amadaara ago, nitugaruka nitugira obusingye bw’omu mutima. Ow’eishe-emwe James owaakozire ekibi ky’amaani, akashanga eki kihikire. Naagira ati: “Ku naayatwire ekibi kyangye nkakigambira abareeberezi, okaba nooshusha oti baanyihaho omugugu guremeire aha mabega gangye. Nkatandika kugaruka kugira obusingye bw’omu biteekateeko.” Ka nikigaruramu amaani kumanya ngu Yehova ‘naaba ari haihi ab’emitima ehendekire,’ kandi ‘naajuna ab’omutima ogweteisiize kimwe’!​—Zab. 34:18.

21. Nitubaasa kukora ki Yehova kubaasa kutuha obuhuumure?

²¹ Obu ebiro by’emperu biri haihi kuhendera, ebirikutureetera amaganya nibaija kweyongyera. Waagira ekyakureetera kwerarikirira, oteeziringa kushaba Yehova kukuhwera. Ba omweziriki omu kweyegyesa Baibuli. Yegyera ahari Hanna, Paulo, na Daudi. Shaba Sho ow’omu iguru kukuhwera kumanya ebirikukwerarikiriza. (Zab. 139:23) Gambira Yehova oburemeezi bwawe akuhwere, okukira munonga obwo obu otarikubaasa kuzibira nari kumaraho. Waakora otyo, noija kuba nk’omuhandiiki wa Zaaburi owaayeshongoreire Yehova ati: “Ku nteekateeka bingi, naayemereza omutima, okuhuumuriza kwawe kugwisa gye amagara gangye.”​—Zab. 94:19.