Noobaasa kugarukamu ebibuuzo ebirikwegamira aha bibaire biri omu Omunaara gw’Omurinzi ogwa 2019?

Ekiraganiso kya Ruhanga ngu ‘tihariho ky’okurwanisa eki baheesire kukurwanisa ekiraasingure,’ nikimanyisa ki? (Isa. 54:17)

Nitubaasa kuhamya ngu Ruhanga naija kuturinda “eihunga” ry’abategyeki abataine saasi. (Isa. 25:4, 5) Abazigu baitu tibarikwija kutuhitsyaho akabi k’obutwire.​—w19.01, kacw. 6-7.

Oku Ruhanga yaakoragaine n’Abanyakanaani n’Abaisraeli abagomi kukoreka kuta oburingaaniza bwe?

Ruhanga akaba naacwera orubanja abarikwejumba omu by’obushambani nari abarikutwariza kubi abakazi n’abaana. Kwonka akaba naaha omugisha abarikumworobera kandi bakatwariza abandi omu muringo gw’oburingaaniza.​—w19.02, kacw. 22-23.

Twine kukora ki omuntu otari w’eishe-emwe yaashaba turiho?

Nitubaasa kuguma tuhunami omu bucureezi kwonka titurikugarukamu ngu “amiina” nari kukwatana omu ngaro n’abandi baaba nibashaba. Nitubaasa kushabira aha mutima ahabwaitu.​—w19.03, rup. 31.

Okutoroboza abaana n’ekibi ky’amaani kwingana ki?

N’ekicumuro aha waatorobozibwa, aha kibiina, aha b’obushoboorozi, n’ahari Ruhanga. Ekiragiro ky’eihanga kyaba nikyetengyesa okumanyisa ab’obushoboorozi haabaho owaatorobozibwa, abareeberezi nibakyorobera.​—w19.05, kacw. 9-10.

Noobaasa kuhindura ota emiteekateekyere yaawe nari kugitereeza?

Amadaara makuru: Shaba Yehova. Teekateeka oine ekigyendererwa ky’okweshwijuma. Toorana abanywani n’obwegyendesereza.​—w19.06, rup. 11.

Nitubaasa kukora ki hati kwetebeekanisiza okuhiiganisibwa?

Twine kuhamya omukago gwaitu na Yehova. Gira obuhame ngu naatukunda kandi tarikubaasa kututsigaho. Shoma Baibuli buri izooba, kandi oshabe obutoosha. Gira obuhame ngu emigisha y’Obukama neeza kuhikiirira. Kwata omu mutwe ebyahandiikirwe n’ebyeshongoro ebi orikukunda.​—w19.07, kacw. 2-4.

Nitubaasa kukora ki kuhwera abanyabuzaare baitu kucungurwa?

Ni kikuru kugira esaasi, kukundisa abandi amazima turikutwaza gye, tukaba abagumisiriza kandi abeegyendesereza.​—w19.08, kacw. 15-17.

Nitugira tuta obuhuumure, nk’oku Yesu yaaraganiise omuri Matayo 11:28?

Twine abareeberezi, abanywani barungi, n’omurimo ogurikukirayo oburungi.​—w19.09, rup. 23.

Ruhanga naabaasa kutuha ata ekyetengo n’amaani g’okukora? (Fil. 2:13)

Twashoma Ekigambo kya Ruhanga kandi tukakiteekateekaho, Ruhanga naatuha omuhimbo, ekyetengo n’amaani g’okukora. Omwoyo gwe nigutuhwera kwongyera aha kubaasa kwaitu.​—w19.10, rup. 21.

Ni madaara ki agu twine kukuratira tutakacwiremu?

Amadaara ataano nigo aga: Condooza gye. Shaba Yehova obwengye. Shwijuma ebigyendererwa byawe. Manya ekigyendererwa kyawe. Manya obugarukiro bwawe.​—w19.11, kacw. 27-29.

Mbwenu shi enyegyesa y’omwoyo ogutarikufa ekatandika obu Sitaane yaagamba na Haawa?

Obundi ngaaha. Sitaane akagambira Haawa ngu tarikwija kufa, kwonka taramugambiire ngu naija kushusha nk’owaafa. Enyegyesa z’ebishuba zoona ziine kuba zitaragumireho obu haabaho omwegyemure. Enyegyesa y’omwoyo ogutarikufa eine kuba yaatandikireho obu Ruhanga yaataataanisa abantu abaabaire nibombeka omunaara gwa Babeeli.​—w19.12, rup. 15.